1. Σο σικλιλέν Οντουλέσκε σο κερντάς-αμέν;

ΑΜΑ μπαριλέν σαρ Μάρτυρες ι Ιεχωβάσκε, μάλλον σικλιλέν ι Ιεχωβάσκε χουρντιαρέλα. Σικλιλέν ότι βοβ κερντάς-λεν σαρέ, ότι τθερέλα μπουτ σουκάρ ιδιότητες ντα ότι μανγκέλα τι κερέλ ι πφουβ παράδεισος.​—Γέν. 1:1· Πράξ. 17:​24-27.

2. Σαρ ντικχένα μερικοί οντουλέν σο πακιάνα ότι ο Ντεβέλ κερντάς-λεν σαρέ;

² Μπουτ τζενέ όμως να πακιάνα ότι υπαρχίντιβελα Ντεβέλ ή ότι βοβ κερντάς-λεν σαρέ. Οκιά μπάνταρ, πακιάνα ότι η ζωή αβιλί κορκορί ντα σοράν χάνικ χάνικ από χουρντέ πράγματα σο τθερένα ζωή αβιλέ πιο μπαρέ πράγματα σο τθερένα ζωή. Μερικοί οντουλένταρ σο πακιάνα-λες ανταβά ισί μπουτ μορφωμέ. Μπορεί τι βακερένα ότι η επιστήμη σικαντάς ότι οντουλά σο βακερέλα η Γραφή νανέ μπαγιά ντα ότι ο τζενέ σο πακιάνα ότι ο Ντεβέλ κερντάς-λεν σαρέ νανέ μορφωμέ, ισί μπίζουρανε ντα να τσσινέλα λένγκι γκοντί.

3. Σόσκε ισί σημαντικός τι μπαριαράς αμαρί πίστη;

³ Μήπως οντουλά σο βακερένα μερικά μορφωμέ τζενέ κα κερέν-αμέν τι τσσιναβάς τι πακιάς ότι ο Ιεχωβά κερντάς σαρέ ο πράγματα; Για τι σικλιάς-λες ανταβά, ισί λατσσό τι σκεφτίνας σόσκε πακιάσα ότι ο Ιεχωβά κερντάς-λεν σαρέ. Πακιάσα-λες επειδή βακερντάς-λες αμένγκε εκ γιαβέρ τζενό ή επειδή ντινάμ αμαρέ σαατίσταρ για τι ρόντας κορκορέ ανταλέσκε; (1 Κορ. 3:​12-15) Καζόμ-ντα μπρεσά τι αβάς Μάρτυρες ι Ιεχωβάσκε, σαρέ πρέπει συνέχεια τι κεράς πιο ζουρανί αμαρί πίστη. Άμα κεράσα-λες ανταβά, να κα χουχάντιβας κάνα βακερένα ο τζενέ ότι ο Λάφι ι Ντεβλέσκο νανέ μπαγιά. (Κολ. 2:8· Εβρ. 11:6) Για τι βοηθίντιβας, ανταλέ μαθημάστε κα ντικχάς (1) σόσκε μπουτ τζενέ να πακιάνα ότι ο Ντεβέλ κερντάς-λεν σαρέ, (2) σαρ τι μπαριαρέν τουμαρί πίστη κο Ιεχωβά, Οντουλέστε σο κερντάς-τουμέν, ντα (3) σαρ τι ατσσικιαρέν ανταγιά πίστη ζουρανί.

4. Σο ισί πίστη σαρ βακερέλα η Γραφή κο Εβραίους 11:1;

⁴ Μερικοί αμντίνενα ότι πίστη μανγκέλα τι βακερέλ τι πακιάς κάτι χωρίς τι ρόντες για τι ντικχές άμα ισί μπαγιά. Αλλά σαρ βακερέλα η Γραφή, ανταβά νανέ αληθινή πίστη. (Διαβάνεν Εβραίους 11:1) Η Γραφή ντέλα-αμέν τι αγαβάς ότι για τι πακιάς οντουλέντε σο να ντικχίντιβενα, σαρ ισί ο Ιεχωβά, ο Ιησούς ντα η Βασιλεία, πρέπει τι ρόντας πράγματα σο σικαβένα ξεκάθαρα ότι σαρέ ανταλά ισί μπαγιά. (Εβρ. 11:3) Εκ Μάρτυρας σο ισί επιστήμονας βακερέλα: «Ο Μάρτυρες ι Ιεχωβάσκε τθερένα λόγος τι πακιάν οντουλά σο πακιάνα. Να πφάντενα πουμαρέ γιακχά κο πράγματα σο σικαβέλα η επιστήμη».

5. Σόσκε πακιάνα μπουτ τζενέ ότι ο Ντεβέλ να κερντάς ι ζωή;

⁵ Κα μπορίναας τι πουτσάς: “Αφού μπουτ πράγματα σικαβένα ότι ο Ντεβέλ κερντάς-λεν σαρέ, σόσκε μπουτ τζενέ πακιάνα ότι ο Ντεβέλ να κερντάς ι ζωή;” Μερικά τζενέ να μπεσλέ τι ρόντεν κορκορέ πράγματα σο σικαβένα ότι ισί μπαγιά ανταβά. Ο Ρόμπερτ, σο ακανά ισί Μάρτυρας ι Ιεχωβάσκο, βακερέλα: «Αφού κο σχολείος να βακερένας ποτές ότι ο Ντεβέλ κερντάς-λεν σαρέ, πακιάβας ότι ισινέ μπαγιά ανταβά. Ισινόμας πιο μπουτ από 20 μπρεσένγκο κάνα κερντόμ λάφι ι Ιεχωβάσκε Μαρτυρέντζαρ ντα σικαντέ μάνγκε αντράλ κατά Γραφή ότι ο Ντεβέλ κερντάς-λεν σαρέ». *​—Ντικχέν ο πλαίσιος « Κάτι Σημαντικός ι Νταντένγκε ντα ι Νταΐνγκε».

6. Σόσκε μερικά τζενέ να πακιάνα ότι ο Ντεβέλ κερντάς σαρέ ο πράγματα;

⁶ Μερικά τζενέ βακερένα ότι ο Ντεβέλ να κερντάς σαρέ ο πράγματα σόσκε πακιάνα σάντε οντουλά σο ντικχένα. Αλλά η αλήθεια ισί ότι πακιάνα πραγματέντε σο να  ντικχίντιβενα, σαρ ισί η μπαρμπάλ, σόσκε αρακχλέ πράγματα σο σικαβένα ξεκάθαρα ότι ισί μπαγιά. Η πίστη σο βακέρντιβελα κι Γραφή τθερέλα τι κερέλ επίσης “πραγματέντζαρ σο ναστί ντικχέλα εκ τζενό”. (Εβρ. 11:1) Πρέπει τι ντας αμαρέ σαατίσταρ ντα αμαρέ ζοριάταρ για τι σικαβάς αμαρέ νεαυτόσκε ότι εκ πράγμας ισί μπαγιά, ντα μπουτ τζενέ να μανγκένα τι κερέν-λες ανταβά. Εκ τζενό σο να ρόντελα κορκορό για τι σικαβέλ πι νεαυτόσκε άμα ο Ντεβέλ κερντάς-λεν σαρέ μπορεί τι βακερέλ ότι να υπαρχίντιβελα Ντεβέλ.

7. Σαρέ ο μορφωμέ τζενέ να πακιάνα ότι ο Ντεβέλ κερντάς ο σύμπαν; Εξηγίνεν.

⁷ Μερικοί επιστήμονες σο ροντιντέ, αγαντέ ότι ο Ντεβέλ κερντάς ο σύμπαν. * Μερικοί, σαρ ο Ρόμπερτ, μπορεί τι πακιάνας ότι να  κερντάς ο Ντεβέλ σαρέ ο πράγματα σόσκε κο πανεπιστήμιος να σικλιαρένας ότι ο Ντεβέλ κερντάς-λεν σαρέ. Αλλά μπουτ επιστήμονες σικλιλέ ι Ιεχωβάσκε ντα μανγκλέ-λες. Σαρ κερντέ ανταλά επιστήμονες, αντικάς αμέν-ντα πρέπει τι μπαριαράς αμαρί πίστη κο Ντεβέλ, καζόμ-ντα μορφωμέ τι αβάς. Καέκ γιαβέρ ναστί κερέλα-λες ανταβά αμένγκε.

8, 9. (α) Καγιά ερώτηση κα ντικχάς ακανά; (β) Σαρ κα βοηθίντιβεν άμα κα σικλιόν σαρ ισί κερντό ο ντουνιάς;

⁸ Σαρ μπορίνενα τι μπαριαρέν τουμαρί πίστη Οντουλέστε σο κερντάς-λεν σαρέ; Για τι ντικχάς σταρ τρόπους.

⁹ Σικλιόν σαρ ισί κερντό ο ντουνιάς. Μπορίνενα τι μπαριαρέν τουμαρί πίστη Οντουλέστε σο κερντάς σαρέ ο πράγματα κάνα ντικχένα ο ζώα, ο φυτά ντα ο τσεργανιά. (Ψαλμ. 19:1· Ησ. 40:​26) Καζόμ πιο μπουτ σικλιόνα ασακέ πραγματένγκε, αζόμ πιο σίγουροι κα αβέν ότι ο Ιεχωβά κερντάς-λεν σαρέ. Αμαρέ έντυπα μπουτ φαρ τθερένα θέματα σο βακερένα σαρ ισί κερντό ο ντουνιάς. Τι διαβάνεν ανταλά θέματα ατζέ-ντα άμα δυσκολίντιβενα τι αγαβέν-λεν λατσσές. Σικλιόν καζόμ πιο μπουτ πράγματα αβέλα-πες. Ντα μα μπιστρέν τι ντικχέν αμαρέ ιστοτοπόστε, κο jw.org, ο σουκάρ βίντεα σο σικαβένα σαρ ισί κερντό ο ντουνιάς σο ντικχλάμ ο τελευταία μπρεσά κο περιφερειακές συνελεύσεις.

10. Βακερέν εκ παράδειγμας σο σικαβέλα ότι υπαρχίντιβελα κάποιος σο κερντάς-λεν σαρέ. (Ρωμαίους 1:20)

¹⁰ Κάνα ντικχένα σαρ ισί κερντέ ο πράγματα, προσπαθίνεν τι σικλιόν πιο λατσσές Οντουλές σο κερντάς-λεν. (Διαβάνεν Ρωμαίους 1:​20) Για παράδειγμας, ο κχαμ ντέλα κι πφουβ ο τατιπέ ντα ο φως σο χρειαζίντιβελα για τι υπαρχίντιβελ η ζωή. Αλλά μερικές ακτίνες ι κχαμέσκε ισί επικίνδυνες. Αμέν ο τζενέ πρέπει τι αρακχαβάς-αμέν λένταρ. Ντα ισινάμ αρακχαντέ! Σαρ; Ο όζον ισί σαρ ασπίδα οπράλ κατά πφουβ σο να μουκχέλα τι νακχέν ανταλά επικίνδυνες ακτίνες. Κάνα ο επικίνδυνες ακτίνες ι κχαμέσκε αβένα πιο ζουρανέ, ο όζον αβέλα πιο μπουτ. Να αγαβάσα ανταλέσταρ ότι κάποιος πρέπει τι κερντάς-λες ανταβά ντα ότι οντουβά σο κερντάς-λες πρέπει τι ισί μπουτ γκοντιαβέρ ντα μανγκέλα-αμέν μπουτ;

11. Κατέ μπορίνενα τι αρακχέν μπουτ πράγματα σο κα μπαριαρέν τουμαρί πίστη Οντουλέστε σο κερντάς-λεν σαρέ; (Ντικχέν ο πλαίσιος « Πληροφορίες σο κα Μπαριαρέν Τουμαρί Πίστη Οντουλέστε σο Κερντάς Σαρέ ο Πράγματα»)

¹¹ Μπορίνενα τι αρακχέν μπουτ πράγματα σο κα μπαριαρέν τουμαρί πίστη Οντουλέστε σο κερντάς-λεν σαρέ άμα κα ρόντεν κο Ευρετήριο Εκδόσεων Σκοπιάς ντα κο ιστότοπος jw.org. Κα μπορίνενας τι αρχίνεν κατά θέματα ντα κατά βίντεα σο ισί κι σειρά «Προϊόν Σχεδιασμού;» Ανταλά θέματα ντα βίντεα ισί χουρντέ ντα βακερένα μπουτ πράγματα σο τθερένα τι κερέν με το ζώα ντα με το φυτά. Επίσης, τθερένα παραδείγματα σο σικαβένα σαρ προσπαθιντέ ο επιστήμονες τι λατσσαρέν μπουτ πράγματα οντουλένταρ σο ντικχλέ κι πφουβ.

12. Καλά ισί μερικά πράγματα σο πρέπει τι ντικχάς κάνα σικλιαράσα-αμέν κατά Αγία Γραφή;

¹² Τι σικλιαρέν-τουμέν κατά Αγία Γραφή. Ο επιστήμονας σο βακερντάμ λέσκε κι παράγραφος σταρ να πακιάλας ότι ο Ντεβέλ κερντάς-λεν σαρέ. Πιο σοράν όμως πακιαντάς. Βοβ βακερέλα: «Μι πίστη να βασίντιβελας σάντε οντουλέντε σο σικλιάβας κι επιστήμη. Βασίντιβελας οντουλέντε-ντα σο σικλιάβας κατά Γραφή». Μπορεί τι τζανένα μπουτ λατσσές ι Γραφή. Αλλά για τι μπαριαρέν τουμαρί πίστη Οντουλέστε σο κερντάς-λεν σαρέ, δεν πρέπει τι τσσιναβέν τι σικλιαρέν-τουμέν κατά Λάφι ι Ντεβλέσκο. (Ιησ. Ναυή 1:8· Ψαλμ. 119:​97) Ντικχέν προσεκτικά σο βακερέλα η Αγία Γραφή διάφορε πραγματένγκε σο αβιλέ-πες κο πουρανέ μπρεσά. Σκεφτίνεν ο μπουτ πράγματα σο βακερντάς  η Γραφή ότι κα νικιόν μπαγιά ντα σαρ ταιριάνενα μπουτ βιβλία ι Γραφιάκε ο εκ ι γιαβερέσαρ. Ανταβά κα κερέλ-τουμέν τι πακιάν ατζέ πιο μπουτ ότι κερντάς-αμέν ο Ντεβέλ σο ισί γκοντιαβέρ ντα μανγκέλα-αμέν μπουτ ντα ότι λέσκε πνευμάσαρ γραφίντιλι η Αγία Γραφή. *​—2 Τιμ. 3:​14· 2 Πέτρ. 1:21.

13. Καβά ισί εκ παράδειγμας σο σικαβέλα ότι ο Λάφι ι Ντεβλέσκο ισί πφερντό σοφία;

¹³ Κάνα σικλιαρένα-τουμέν κατά Λάφι ι Ντεβλέσκο, τι ντικχέν καζόμ βοηθίνενα-τουμέν ο συμβουλές σο τθερέλα. Για παράδειγμας, η Γραφή μπουτ μπρεσά πριν βακερντάς ότι η αγάπη ι λοβένγκε κερέλα ζιάνι ντα ότι ανέλα μπουτ ντουκχ. (1 Τιμ. 6:9, 10· Παρ. 28:​20· Ματθ. 6:​24) Ισί μπαγιά ανταβά αμαρέ ντιβεσέντε; Ο βιβλίος Επιδημία Ναρκισσισμού (The Narcissism Epidemic) βακερέλα: «Ο πιο μπουτ φαρ, ο τζενέ σο πακιάνα ότι ο λοβέ ισί ο πιο σημαντικός πράγμας κι ζωή ισί μπουτ στεναχωριμέ. Ατζέ-ντα οντουλά σο μανγκένα απλά τι νικαβέν πιο μπουτ λοβέ ισί μπουτ στεναχωριμέ ντα τθερένα μπουτ προβλήματα υγείας». Καζόμ λατσσί ισί η συμβουλή ι Γραφιάκι σο βακερέλα μα τι τθεράς αγάπη ι λοβένγκε! Μπορίνενα τι σκεφτίνεν γιαβερά-ντα αρχές ι Γραφιάκε σο βοηθιντέ-τουμέν; Κάνα σκεφτίνασα σαρέ ο συμβουλές ι Γραφιάκε, κα αγαβάς ότι αμαρό Ντεβέλ σο κερντάς-λεν σαρέ ντα μανγκέλα-αμέν μπουτ τζανέλα καβά ισί ο πιο λατσσό αμένγκε. (Ιακ. 1:5) Αντικάς, κα απολαμβάνας πιο μπουτ αμαρί ζωή.​—Ησ. 48:​17, 18.

14. Σο σικλιόνα ι Ιεχωβάσκε κάνα σικλιαρένα-τουμέν κατά Γραφή;

¹⁴ Κάνα σικλιαρένα-τουμέν κατά Γραφή τι τθερέν τουμαρέ γκοντιάτε τι σικλιόν πιο λατσσές ι Ιεχωβάς. (Ιωάν. 17:3) Καζόμ κερένα-λες ανταβά, κα σικλιόν σο Ντεβέλ ισί ο Ιεχωβά ντα σο ιδιότητες τθερέλα. Μπορίνενα τι σικλιόν μερικές κατά ιδιότητες λέσκε κάνα ντικχένα σαρ ισί κερντό ο ντουνιάς. Κάνα σικλιάσα ο ιδιότητες ι Ιεχωβάσκε, αβάσα σίγουροι ότι ο Ιεχωβά υπαρχίντιβελα. (Έξοδ. 34:6, 7· Ψαλμ. 145:8, 9) Καζόμ πιο λατσσές σικλιόνα ι Ιεχωβάς, τουμαρί πίστη λέστε κα μπαριόλ, τουμαρί αγάπη λέσκε κα αβέλ πιο ζουρανί ντα τουμαρί φιλία λέσαρ κα αβέλ πιο λατσσί.

15. Σαρ κα βοηθίντιβεν άμα κερένα λάφι ι Ντεβλέσκε;

¹⁵ Τι κερέν λάφι κο γιαβερά ι Ντεβλέσκε. Καζόμ κερένα-λες ανταβά, κα μπαριόλ τουμαρί πίστη. Σο αβέλα-πες όμως άμα εκ τζενό σο κερένα λέσαρ λάφι νανέ σίγουρος ότι υπαρχίντιβελα Ντεβέλ ντα να τζανένα σο τι βακερέν λέσκε; Ρόντεν κο έντυπα για τι αρακχέν σο βακερέλα η Γραφή ντα σοράν βακερέν ι τζενέσκε οντουβά σο αρακχλέν. (1 Πέτρ. 3:​15) Επίσης, μπορίνενα τι μανγκέν εκχέ γιαβερέ πφραλέσταρ τι βοηθίνελ-τουμέν τι ντικχέν σο τι βακερέν. Είτε ο τζενό κα ασουνέλ οντουβά σο κα βακερέν λέσκε κατά Γραφή είτε όχι, τουμέν κα βοηθίντιβεν σο ροντιντέν. Τουμαρί πίστη κα αβέλ πιο ζουρανί. Αντικάς, να κα πακιάν τζενέν σο ντικχίντιβενα γκοντιαβέρ ή μορφωμέ ντα βακερένα ότι να κερντάς-λεν σαρέ ο Ντεβέλ.

16. Σο μπορεί τι αβέλ-πες άμα να ατσσικιαρντάμ ζουρανί αμαρί πίστη;

¹⁶ Καζόμ-ντα μπρεσά τι υπηρετίνασα ι Ιεχωβάς, δεν πρέπει τι τσσιναβάς τι μπαριαράς αμαρί πίστη λέστε ντα τι ατσσικιαράς-λα ζουρανί. Σόσκε; Επειδή άμα να κα προσοχίνας, αμαρί πίστη να κα αβέλ αζόμ ζουρανί. Σαρ ντικχλάμ, η πίστη βασίντιβελα πραγματέντε σο να ντικχίντιβενα. Ισί εύκολος τι μπιστράς ο πράγματα σο ναστί ντικχάσα. Οτθάρ, ο Παύλος βακερντάς ότι η πίστη σο νανέ ζουρανί ισί «αμαρτία σο μπερδίνελα-αμέν εύκολα». (Εβρ. 12:1) Σαρ μπορίνασα τι αβάς σίγουροι ότι αμαρί πίστη ισί ζουρανί;​—2 Θεσ. 1:3.

17. Καγιά βοήθεια χρειαζίντιβασα για τι ατσσικιαράς ζουρανί αμαρί πίστη;

¹⁷ Πρώτον, τι μολίνεν ι Ιεχωβάς τι ντελ-τουμέν  πο άγιος πνεύμας ντα μα τσσιναβέν τι κερέν-λες ανταβά. Σόσκε; Επειδή η πίστη ισί αντρέ κο καρπός κι πνευμάσκο. (Γαλ. 5:​22, 23) Ναστί μπορίνασα τι μπαριαράς αμαρί πίστη Οντουλέστε σο κερντάς-αμέν ντα τι ατσσικιαράς-λα ζουρανί χωρίς τι τθεράς ι βοήθεια ι άγιε πνευμάσκι. Άμα μανγκάσα κατά Ιεχωβά λέσκο άγιος πνεύμας, κα ντελ-λες αμέντε. (Λουκ. 11:​13) Μπορίνασα ατζέ-ντα τι βακεράς αμαρέ προσευχιάτε: «Ντε-αμέν πιο μπουτ πίστη».​—Λουκ. 17:5.

18. Καβά προνόμιος μπορίνασα τι τθεράς σαρ βακερένα ο εδάφια Ψαλμός 1:2, 3;

¹⁸ Επίσης, τι διαβάνεν κάθε ντιβές ο Λάφι ι Ντεβλέσκο. (Διαβάνεν Ψαλμός 1:2, 3) Κάνα γραφίντιλο ανταβά ψαλμός, χάνικ Ισραηλίτες τθερένας αντίγραφος κατά Νόμος ι Ντεβλέσκο. Όμως, ο βασιλιάς ντα ο ιερείς μπορίνενας τι τθερέν αντίγραφα ντα, κάθε εφτά μπρεσά, “ο μουρσά, ο τζουβλιά, ο χουρντέ” ντα ο ξένοι σο μπεσένας κο Ισραήλ γκιντίντιβενας σαρέ γιεκ για τι ασουνέν ο Νόμος ι Ντεβλέσκο. (Δευτ. 31:​10-12) Κο μπρεσά κι Ιησούσκε, χάνικ τζενέ τθερένας αντίγραφα ι Γραφιάκε. Ο πιο μπουτ αντίγραφα ισινέ κο συναγωγές. Οκιά μπάνταρ, αντιβές ο πιο μπουτ τζενέ μπορίνενα τι διαβάνεν μερικά βιβλία ι Γραφιάκε ή ατζέ-ντα σαρί ι Γραφή. Ανταβά ισί μπαρό προνόμιος. Σαρ μπορίνασα τι σικαβάς ότι εκτιμίνασα-λες;

19. Σο πρέπει τι κεράς για τι ατσσικιαράς αμαρί πίστη ζουρανί;

¹⁹ Σικαβάσα ότι εκτιμίνασα ο Λάφι ι Ντεβλέσκο κάνα διαβάνασα-λες κάθε ντιβές. Δεν πρέπει τι διαβάνας ντα τι σικλιαράς-αμέν κατά Γραφή σάντε κάνα τθεράσα χρόνος. Άμα τσσουβάσα πρόγραμμας για τι διαβάνας κάθε ντιβές ι Γραφή, κα ατσσικιαράς αμαρί πίστη ζουρανί.

20. Σο πρέπει τι αβάς αποφασισμέ τι κεράς;

²⁰ Αμέν τθεράσα ζουρανί πίστη σο βασίντιβελα κο Λάφι κι Ντεβλέσκο. Ασακί πίστη να τθερένα ο “γκοντιαβέρ ντα ο μορφωμέ τζενέ” ανταλέ ντουνιάσκε. (Ματθ. 11:​25, 26) Η Γραφή ντέλα-αμέν τι αγαβάς σόσκε αβένα χειρότερα ο πράγματα κι πφουβ ντα σο κα κερέλ ο Ιεχωβά ανταλέσκε. Οτθάρ, τι αβάς αποφασισμέ τι μπαριαράς αμαρί πίστη ντα τι βοηθίνας καζόμ πιο μπουτ τζενέν αβέλα-πες τι πακιάν Οντουλέστε σο κερντάς σαρέ ο πράγματα. (1 Τιμ. 2:3, 4) Ντα τι συνεχίνας τι μπεκλεντίνας τι αβέλ ο βακίτι σο κα δοξάνεν ι Ιεχωβάς σαρέ ο τζενέ σο τζουβντιόνα κι πφουβ ντα κα βακερέν ο λάφια ι εδαφιόσκε Αποκάλυψη 4:​11: «Άξιος ισινάν Ιεχωβά, αμαρό Ντεβέλ, τι λες ι δόξα . . . σόσκε τούι κερντάν-λεν σαρέ».