1, 2. Καλά δυσκολίες κα μπορίνενας τι τσσιναβέν ι Μαρκός ντα ι Τιμοθεός τι υπηρετίνεν ι γιαβερέν πο μπουτ;

 ΠΦΡΑΛΑΛΕΝ σο ισινέν τερνέ, μανγκένα τι κερέν πο μπουτ πράγματα κι υπηρεσία κι Ιεχωβάσκι ντα τι βοηθίνεν πο μπουτ ι πφραλέν τουμαρέ κχανγκιριάτε; Σίγουρα μανγκένα τι κερέν-λες ανταβά. Ισινάμ μπουτ χαρούμενοι σο ντικχάσα μπουτέ τερνέ πφραλέν τι αβέν έτοιμοι τι υπηρετίνεν ι γιαβερέν! (Ψαλμ. 110:3) Αλλά μπορεί μα τι αβέλ εύκολος τουμένγκε τι κερέν πο μπουτ πράγματα ι Ιεχωβάσκε. Μήπως πακιάνα ότι ισί μπουτ δύσκολος τουμένγκε τι κερέν πο μπουτ πράγματα ι Ιεχωβάσκε επειδή να τζανένα σαρ κα αλλάνελ ανταβά τουμαρί ζωή ή κατέ κα μανγκέλ τουμένταρ ο Ιεχωβά τι τζαν; Ή μήπως σακιντισάλεν τι κερέν πο μπουτ πράγματα κι υπηρεσία κι Ιεχωβάσκι επειδή πακιάνας ότι να κα κερένας-λες λατσσές; Άμα αβιλό-πες τουμένγκε κάτι ασακό, μπορίνενα τι σκεφτίνεν ότι γιαβερά-ντα τζενέ νιωθίνενα αντικάς.

² Εμ ο Μάρκος ντα ο Τιμόθεος νιωθίνενας αντικάς. Αλλά παρόλο σο να τζανένας σαρ μπορεί τι αλλάνελας λένγκι ζωή ή παρόλο σο μπορεί τι νιωθίνενας ότι να καταφερίνενας-λεν, ανταβά να τσσιναντάς-λεν τι υπηρετίνεν ι γιαβερέν. Κάνα ο απόστολος Παύλος ντα ο Βαρνάβας καλιντέ ι Μαρκός τι αβέλ λέντζαρ κο πρώτος ιεραποστολικός ταξίδι, ο Μάρκος μπέκιμ μπεσέλας πι νταγιάσαρ σε εκ μπουτ σουκάρ κχερ. (Πράξ. 12:12, 13, 25) Αλλά ο Μάρκος μουκχλάς πο κχερ για τι κερέλ πο μπουτ πράγματα ι Ιεχωβάσκε. Πρώτα γκιλό κι Αντιόχεια. Σοράν, γκιλό ι Παυλόσαρ ντα ι Βαρναβάσαρ γιαβερέ τθεμέντε σο ισινέ ντουρ. (Πράξ. 13:1-5) Ο Τιμόθεος-ντα μπέκιμ τζουβντιόλας πι νταντέσαρ ντα πι νταγιάσαρ κάνα ο Παύλος βακερντάς λέσκε τι αβέλ λέσαρ κο έργος. Ο Τιμόθεος ισινέ εκ τερνό μουρς, οτθάρ κα μπορίνελας τι νιωθίνελ ότι να κα καταφερίνελας-λεν αζόμ λατσσές για τι τζαλ ι Παυλόσαρ. (Ντικχέν 1 Κορινθίους 16:10, 11 ντα 1 Τιμόθεο 4:12) Όμως δεχτιντάς ι πρόσκληση ι Παυλόσκι ντα τζουβντιλό μπουτ σουκάρ ευλογίες.​—Πράξ. 16:3-5.

3. (α) Σαρ τζανάσα ότι ο Παύλος εκτιμίνελας ι Μαρκός ντα ι Τιμοθεός; (2 Τιμόθεο 4:6, 9, 11) (Ντικχέν ο φωτογραφίες-ντα) (β) Καλά ερωτήσεις κα ντικχάς ανταλέ μαθημάστε;

 ³ Ο Μάρκος ντα ο Τιμόθεος σικλιλέ σαρ τι φροντίνεν μπερεκέτι σημαντικέ πραγματένγκε αντρέ κι κχανγκιρί καζόμ ισινέ ατζέ τερνέ. Ο Παύλος εκτιμιντάς αζόμ μπουτ ανταλέ τερνέ μουρσέν σο πο σοράν γραφιντάς ότι μανγκέλας-λεν πασέ πέστε κάνα αγαντάς ότι ατζεχάνικ κα μερέλας. (Διαβάνεν 2 Τιμόθεο 4:6, 9, 11) Καλά σουκάρ ιδιότητες μπεϊντιντάς ο Παύλος κο Μάρκος ντα κο Τιμόθεος; Σαρ μπορίνενα ο τερνέ πφραλά τι μοιάζεν λέντε; Ντα σαρ μπορίνενα ο τερνέ μουρσά τι βοηθίντιβεν κατά λατσσέ συμβουλές ι Παυλόσκε;

ΚΕΡΕΝ Ο ΠΟ ΛΑΤΣΣΟ ΓΙΑ ΤΙ ΥΠΗΡΕΤΙΝΕΝ Ι ΙΕΧΩΒΑΣ ΝΤΑ Ι ΓΙΑΒΕΡΕΝ ΣΑΡ Ο ΜΑΡΚΟΣ

4, 5. Σαρ σικαντάς ο Μάρκος ότι μανγκέλας τι υπηρετίνελ ι γιαβερέν;

⁴ Σαρ μπορίνασα τι υπηρετίνας ι γιαβερέν; Κεράσα-λες ανταβά κάνα μαράσα-αμέν για τι βοηθίνας-λεν ντα συνεχίνασα τι βοηθίνας-λεν ατζέ-ντα κάνα νανέ αμένγκε εύκολος ανταβά. Ο Μάρκος ισινέ εκ μπουτ λατσσό παράδειγμας οπράλ ανταλέστε. Κάνα ο Παύλος να δεχτιντάς τι λελ-λες παλά-πέστε κο δεύτερος ιεραποστολικός ταξίδι, ο Μάρκος μάλλον στεναχωρισάλο μπουτ ντα πφανγκιλό λέσκο γκι. (Πράξ. 15:37, 38) Αλλά ανταβά να κερντάς ι Μαρκός τι τσσιναβέλ τι υπηρετίνελ πι πφραλέν ντα πι πφενίν.

⁵ Ο Μάρκος γκιλό πι ξαδελφόσαρ, ι Βαρναβάσαρ τι υπηρετίνελ κάπου γιαβερτθέ. Περίπου 11 μπρεσά πο σοράν, κάνα ο Παύλος ισινέ κι φυλακή κι Ρώμη, ο Μάρκος ισινέ λέσαρ για τι βοηθίνελ-λες. (Φιλήμ. 23, 24) Ο Παύλος εκτιμιντάς αζόμ μπουτ ι βοήθεια ι Μαρκόσκι σο βακερντάς ότι ο Μάρκος “λοκχιαρντάς μπουτ λέσκο γκι”.​—Κολ. 4:10, 11.

6. Σαρ βοηθίντιλο ο Μάρκος κατά παρέα σο κερέλας πιστέ Χριστιανόντζαρ; (Ντικχέν ι υποσημείωση-ντα)

⁶ Ο Μάρκος βοηθίντιλο κατά χρόνος σο νακχλάας πφραλέντζαρ σο ισινέ πιστοί. Αφού μπεσλό χάνικ ι Παυλόσαρ κι Ρώμη, ο Μάρκος γκιλό με τον απόστολο Πέτρο κι Βαβυλώνα. Αβιλέ αζόμ λατσσέ αμαλά, σο ο Πέτρος βακερντάς ότι ο Μάρκος ισινέ σαρ τι αβέλας λέσκο τσσαβό. (1 Πέτρ. 5:13) Καζόμ κερένας μπουτί γιεκ, ο Πέτρος μάλλον βακερντάας πι τερνέ αμαλέσκε μπουτ σημαντικά πράγματα ι Ιησούσκε ζωγιάκε ντα λέσκε εργόσκε σο ανταλά ο Μάρκος τσσουντάς-λεν πο σοράν κο Ευαγγέλιος σο γραφιντάς. a

7. Σαρ βοηθίντιλο εκ τερνό πφραλ κατά παράδειγμας ι Μαρκόσκο; (Ντικχέν ι φωτογραφία-ντα)

 ⁷ Ο Μάρκος συνεχιντάς τι κερέλ μπουτ πράγματα κι υπηρεσία κι Ιεχωβάσκι ντα ατσσιλό πασέ κο πιστά πφραλά. Σαρ μπορίνενα τι μοιάζεν κο Μάρκος; Άμα χασαρντέν εκ προνόμιος σο τθερένας ανγκλέ, κερέν υπομονή τουμαρέ νεαυτόσαρ ντα συνεχίνεν τι ρόντεν γιαβερά τρόπους τι υπηρετίνεν ι Ιεχωβάς ντα ι πφραλέν. Σκεφτίνεν ο παράδειγμας ι πφραλέσκο Σενγκ-Γιου σο ακανά ισί πρεσβύτερος. Κάνα ισινέ τερνό, συγκρίνελας πο νεαυτός γιαβερέ τερνέ πφραλέντζαρ. Μερικοί λένταρ τθερένας προνόμια σο τθερέλας-λεν βοβ-ντα ανγκλέ. Ο Σενγκ-Γιου νιωθίνελας πληγωμέ ντα στεναχωριμέ ντα τελικά πουταρντάς πο γκι κο πρεσβύτεροι. Εκ πρεσβύτερος βακερντάς λέσκε τι κερέλ ο πο λατσσό σο μπορίνελα για τι υπηρετίνελ ι γιαβερέν, ατζέ-ντα άμα ο γιαβερά να ντικχένας-λες ανταβά. Ο Σενγκ-Γιου κερντάς ανταγιά συμβουλή ντα αρχισάλο τι βοηθίνελ ι πφουρέ πφραλέν ντα γιαβερέν σο χρειαζίντιβενας βοήθεια για τι τζαν κο συναθροίσεις. Καζόμ σκεφτίνελα οντουβά βακίτι βακερέλα: «Σικλιλόμ ατζέ πο λατσσές σο μανγκέλα τι βακερέλ τι υπηρετίνας ι γιαβερέν. Νιωσάλομ ι χαρά σο αβέλα κάνα ντάσα κο γιαβερά ι βοήθεια σο χρειαζίντιβενα».

ΣΙΚΑΒΕΝ ΟΤΙ ΠΦΑΜΠΟΝΑ ΜΠΑΓΙΑ Ι ΓΙΑΒΕΡΕΝΓΚΕ ΣΑΡ Ο ΤΙΜΟΘΕΟΣ

8. Σόσκε ο Παύλος τραμπιντάς ι Τιμοθεός για τι αβέλ λέσαρ κο ταξίδια; (Φιλιππησίους 2:19-22)

⁸ Ο Παύλος χρειαζίντιβελας πασέ πέστε μπίνταρανε πφραλέν για τι τζαλ πάλι κο πόλεις σο ο τζενέ γκιλέας λέσαρ κόντρα. Πρώτα ο Παύλος τραμπιντάς τι αβέλ λέσαρ εκ πφραλ σο βακέρντιβελας Σίλας, σο υπηρετίνελας ι Ιεχωβάς για μπουτ μπρεσά. (Πράξ. 15:22, 40) Πο σοράν ο Παύλος τραμπιντάς ι Τιμοθεός για τι αβέλ λέσαρ. Σόσκε τραμπιντάς-λες; Εκ λόγος ισινέ ότι ο Τιμόθεος τθερέλας λατσσό ναβ. (Πράξ. 16:1, 2) Επίσης πφαμπόλας μπαγιά ι τζενένγκε.​—Διαβάνεν Φιλιππησίους 2:19-22.

9. Σαρ σικαντάς ο Τιμόθεος ότι πφαμπόλας μπαγιά πι πφραλένγκε ντα πι πφενίνγκε;

⁹ Από αζομάν σο αρχισάλο τι υπηρετίνελ γιεκ ι Παυλόσαρ, ο Τιμόθεος σικαντάς ότι πφαμπόλας πο μπουτ ι γιαβερένγκε παρά πι νεαυτόσκε. Οτθάρ ο Παύλος μουκχλάς-λες κι Βέροια ντα ισινέ σίγουρος ότι κα ενθαρρύνελας ι νεβέ πφραλέν οτθέ. (Πράξ. 17:13, 14) Αζομάν ο Τιμόθεος σίγουρα σικλιλό μπουτ πράγματα κατά Σίλας σο βοβ-ντα ατσσιλό κι Βέροια. Πο σοράν, όμως, ο Παύλος μπουτσσαντάς ι Τιμοθεός τι τζαλ κορκορό κι Θεσσαλονίκη για τι ντελ ζορ ι πφραλέν οτθέ. (1 Θεσ. 3:2, υποσ.) Σοράν ανταλέσταρ, κο μπρεσά σο αβιλέ, ο Τιμόθεος σικλιλό “τι ροβέλ οντουλέντζαρ σο ροβένας” ντα τι αγαβέλ ι ντουκχ οντουλένγκι σο τσσίντενας μπουτ. (Ρωμ. 12:15· 2 Τιμ. 1:4) Σαρ μπορίνενα ο τερνέ μουρσά τι μοιάζεν κο Τιμόθεος;

10. Σαρ σικλιλό εκ πφραλ τι πφαμπόλ ι γιαβερένγκε πο μπουτ;

¹⁰ Εκ πφραλ σο βακέρντιβελα Γιου-Τζέι σικλιλό τι πφαμπόλ πο μπουτ ι γιαβερένγκε. Κάνα ισινέ τερνό, ο Γιου-Τζέι δυσκολίντιβελας τι πουτρέλ συζήτηση ι πο μπαρέ πφραλέντζαρ ντα πφενίντζαρ.  Οτθάρ, κάνα αβέλας κι Αίθουσα απλά χαιρετίνελας-λεν ντα νασέλας. Εκ πρεσβύτερος βακερντάς λέσκε τι βακερέλ οντουλέ πφραλένγκε σο εκτιμίνελας λέντε ντα αντικάς τι αρχίνελ λέντζαρ συζήτηση. Ο πρεσβύτερος επίσης βακερντάς λέσκε τι σκεφτίνελ σο μπορεί τι ενδιαφερίνελας ι γιαβερέ τζενές. Ο Γιου-Τζέι κερντάς ανταγιά συμβουλή. Αντιβές ισί πρεσβύτερος ντα βακερέλα: «Ακανά ισί μάνγκε πο εύκολος τι πουτράβ συζήτηση τζενέντζαρ σο τθερένα διαφορετική ηλικία μάνταρ. Χαιρίναβα μπουτ σο αγαβάβα πο λατσσές σο νακχένα ο γιαβερά τζενέ. Ανταβά βοηθίνελα-μαν τι τζανάβ σο χρειαζίντιβενα μπαγιά μο πφραλά ντα μο πφενιά ντα τι βοηθίναβ-λεν».

11. Σαρ μπορίνενα ο τερνέ πφραλά τι πφαμπόν ι γιαβερένγκε κι κχανγκιρί; (Ντικχέν ι φωτογραφία-ντα)

¹¹ Τουμέν-ντα πφραλάλεν σο ισινέν τερνέ, μπορίνενα τι σικλιόν σαρ τι πφαμπόν ι γιαβερένγκε. Κάνα ισινέν κο συναθροίσεις, κερέν λάφι σαρέ ι τζενέντζαρ, ατζέ-ντα οντουλέντζαρ σο ισί πο μπαρέ ή πο χουρντέ τουμένταρ. Πουτσέν-λεν σαρ ισί ντα σοράν ασουνέν-λεν. Αντικάς κα τζανέν σαρ μπορίνενα τι βοηθίνεν-λεν. Για παράδειγμας μπορεί τι σικλιόν ότι εκ πφουρό ζευγάρι να τζανέλα σαρ τι χρησιμοποιήνελ ι εφαρμογή JW Library^®. Ή μπορεί τι σικλιόν ότι ανταβά ζευγάρι να τθερέλα κάσαρ τι νικιόλ κο έργος. Κα μπορίνενας τι βοηθίνεν ασακέ πφραλέν τι χρησιμοποιήνεν πουμαρό τάμπλετ ή τι νικιόν λέντζαρ κο έργος; Κάνα κερένα τουμέν ο πρώτος βήμας για τι βοηθίνεν ι γιαβερέν, κα μουκχέν λατσσό παράδειγμας σαριλένγκε.

Ο ΣΥΜΒΟΥΛΕΣ Ι ΠΑΥΛΟΣΚΕ ΜΠΟΡΙΝΕΝΑ ΤΙ ΒΟΗΘΙΝΕΝ-ΤΟΥΜΕΝ

12. Σαρ μπορίνελα εκ τερνό πφραλ τι βοηθίντιβελ κατά συμβουλή σο ντινάς ο Παύλος κο Τιμόθεος;

¹² Ο Παύλος ντινάς κο Τιμόθεος λατσσέ συμβουλές για τι βοηθίνελ-λες τι τθερέλ εκ πο ευτυχισμέ ζωή ντα τι κερέλ ατζέ πο μπουτ πράγματα κι υπηρεσία κι Ντεβλέσκι. (1 Τιμ. 1:18· 2 Τιμ. 4:5) Τουμέν-ντα πφραλάλεν σο ισινέν τερνέ μπορίνενα τι βοηθίντιβεν κατά λατσσέ συμβουλές ι Παυλόσκε. Σαρ; Διαβάνεν ο ντούι γράμματα σο γραφιντάς ο Παύλος κο Τιμόθεος σαρ τι γραφίντιλε τουμένγκε ντα ντικχέν σο κα μπορίνενας τι εφαρμόνεν τουμαρέ ζωγιάτε. Ντικχέν μερικά παραδείγματα.

13. Σο κα βοηθίνελ-αμέν τι αβάς πο αφοσιωμέ κο Ιεχωβά;

¹³ «Τι γυμνάνες το νεαυτός ντα τι τθερές ο στόχος τι σικαβές αφοσίωση κο Ντεβέλ». (1 Τιμ. 4:7β) Σο μανγκέλα τι βακερέλ «αφοσίωση κο Ντεβέλ»; Τι ατσσάς αζόμ πασέ κο Ντεβέλ σαρ τι αβάας κολλημέ λέσαρ ντα τι κεράς οντουβά σο μανγκέλα. Όμως, να μπιάντιβασα με την ιδιότητα ανταγιά. Χρειαζίντιβελα τι μαράς-αμέν για τι τθεράς-λα. Σαρ; Η πουρανί μπαλαμανί λέξη σο μεταφράντιβελα «τι γυμνάνες το νεαυτός», μπουτ φαρ χρησιμοποιήντιβελας για τι σικαβέλ εκχέ τζενές σο κερέλα συνέχεια γυμναστική για  τι ετοιμάνελ-πες για εκ αγώνας. Ανταλά αθλητές χρειαζίντιβελας τι τθερέν πουμαρί γκοντί σάντε κο στόχος τι νικίνεν ντα τι νασέν ντουρ κατά πράγματα σο κα μπορίνενας τι ταρτίνεν λένγκι προσοχή ανταλέσταρ. Αμαρό στόχος αντιβές ισί τι τζας πο πασέ κο Ιεχωβά. Αμέν-ντα χρειαζίντιβελα τι νασάς ντουρ σαρέ κατά πράγματα σο μπορεί τι ταρτίνεν αμαρί προσοχή ανταλέσταρ. Οκιά μπάνταρ, πρέπει τι σικλιαράς αμαρό νεαυτός τι κερέλ πράγματα αντρέ κο ντιβές σο κα βοηθίνεν-αμέν τι πετυχίνας ανταβά στόχος.

14. Καβά ισί αμαρό στόχος κάνα διαβάνασα ι Γραφή; Βακερέν εκ παράδειγμας.

¹⁴ Ισί μπουτ σημαντικός τι τθεράς ι συνήθεια τι διαβάνας ι Αγία Γραφή κάθε ντιβές. Ντα ισί επίσης σημαντικός τι ντας-αμέν γκοντί ότι κάνα διαβάνασα ι Γραφή, ο στόχος αμαρό πρέπει τι αβέλ τι τζας πο πασέ κο Ιεχωβά. Για παράδειγμας, σο σικλιάσα ι Ιεχωβάσκε κατά ιστορία ι Ιησούσαρ ντα ι χουλανέ τερνέ αρχοντάσαρ; (Μάρκ. 10:17-22) Ο τερνό μουρς πακιάλας ότι ο Ιησούς ισινέ ο Μεσσίας. Όμως, να τθερέλας αζόμ μπουτ πίστη για τι ακολουθίνελ-λες. Ο Ιησούς μανγκέλας οντουλέ τερνέ μουρσές παρόλο σο να τθερέλας ζουρανί πίστη. Ο Ιησούς κερντάς λάφι λατσσιμάσαρ κο τερνό άρχοντας. Σίγουρα ο Ιησούς μανγκέλας ο τερνό τι τθερέλ εκ πφερντί ζωή κι υπηρεσία κι Ιεχωβάσκι. Οντουβά σο νιωθίνελας ο Ιησούς ανταλέ τερνέ μουρσέσκε ισινέ ακριβώς οντουβά σο νιωθίνελας ο Ιεχωβά-ντα λέσκε. (Ιωάν. 14:9) Καζόμ σκεφτίνενα ανταγιά ιστορία ντα τουμαρί ζωή, πουτσέν τουμαρό νεαυτός: “Σο χρειαζίντιβελα τι κεράβ για τι τζαβ πο πασέ κο Ιεχωβά ντα τι υπηρετίναβ ι γιαβερέν ατζέ πο μπουτ;”

15. Σόσκε χρειαζίντιβελα εκ τερνό πφραλ τι αβέλ λατσσό παράδειγμας ι γιαβερένγκε; Βακερέν εκ παράδειγμας. (1 Τιμόθεο 4:12, 13)

¹⁵ «Τι αβές ι πιστέ τζενένγκε λατσσό παράδειγμας». (Διαβάνεν 1 Τιμόθεο 4:12, 13) Ο Παύλος βακερντάς κο Τιμόθεος τι σικλιόλ σαρ τι διαβάνελ λατσσές ντα σαρ τι αβέλ λατσσό δάσκαλος. Όμως ο Παύλος μανγκλάς επίσης λέσταρ τι μπαριαρέλ πι αγάπη ντα πι πίστη ντα τι συνεχίνελ τι τθερέλ πάκι ζωή. Σόσκε; Επειδή οντουλά σο κερέλα εκ τζενό ισί πο σημαντικά οντουλένταρ σο βακερέλα. Βακερέν ότι τθερένα τι κερέν εκ ομιλία σο βακερέλα σαρ τι πφαμπάς πο μπουτ ι εργόσκε. Κα αβέλ τουμένγκε πο εύκολος τι κερέν ανταγιά ομιλία άμα τουμέν κερένα ο πο λατσσό σο μπορίνενα κο έργος. Ντα οντουλά σο ασουνένα-τουμέν κα μανγκέν τι κερέν πο μπουτ κο έργος άμα τουμέν ισινέν εκ λατσσό παράδειγμας ανταλέστε.​—1 Τιμ. 3:13.

16. (α) Καλέ παντς τροπόντζαρ μπορίνενα τι αβέν λατσσό παράδειγμας ο τερνέ Χριστιανοί; (β) Σαρ μπορίνελα εκ τερνό πφραλ τι αβέλ λατσσό παράδειγμας «κο λάφια»;

¹⁶ Κο εδάφιος 1 Τιμόθεο 4:12, ο Παύλος βακερέλα παντς τρόπους σο εκ τερνό πφραλ μπορίνελα τι αβέλ λατσσό παράδειγμας. Κα αβέλας μπουτ λατσσό άμα κα ντένας τουμαρέ σαατίσταρ για τι ρόντεν προσεκτικά ο κάθε εκ ανταλένταρ. Φιρειπείν, βακερέν ότι μανγκένα τι αβέν πο λατσσό παράδειγμας «κο λάφια». Σκεφτίνεν σο κα μπορίνενας τι βακερέν για τι ντεν ζορ κο γιαβερά. Άμα μπεσένα ατζέ τουμαρέ νταντέσαρ ντα τουμαρέ νταγιάσαρ, κα μπορίνενας τι βακερέν λένγκε πο μπουτ φαρ ευχαριστώ για το πράγματα σο κερένα τουμένγκε; Σοράν κατά συνάθροιση, κα μπορίνενας τι βακερέν εκχέ πφραλέσκε ή εκχέ πφενιάκε σο μπεϊντιντέν κατά ομιλία σο κερντάς; Επίσης μπορίνενα τι προσπαθίνεν τι ντεν απαντήσεις τουμαρέ λαφίντζαρ κο συναθροίσεις. Κάνα μαρένα-τουμέν τι αβέν λατσσό παράδειγμας κο τρόπος σο κερένα λάφι, κα ντικχίντιβελ σαριλέντε ότι αβένα εκ πο λατσσό υπηρέτης ι Ιεχωβάσκο.​—1 Τιμ. 4:15.

17. Σο κα βοηθίνελ εκχέ τερνέ πφραλές τι πετυχίνελ πο στόχους; (2 Τιμόθεο 2:22)

¹⁷ «Τι νασές οντουλέ πραγματένταρ σο μανγκένα ο τερνέ, αλλά τι κερές ο πο λατσσό για τι αβές δίκαιος». (Διαβάνεν 2 Τιμόθεο 2:22) Ο Παύλος βακερντάς κο Τιμόθεος τι ατσσόλ ντουρ σαρέ κατά πράγματα σο κα μπορίνενας τι τσσιναβέν-λες τι κερέλ πο μπουτ πράγματα ι Ιεχωβάσκε. Επίσης βακερντάς λέσκε ότι έπρεπε τι νασέλ ντουρ σαρέ κατά πράγματα σο κα μπορίνενας τι κερέν ζιάνι κι φιλία σο τθερέλας ι Ιεχωβάσαρ.  Τουμέν-ντα μπορεί τι αγαβέν ότι κάποια πράγματα παρόλο σο νανέ λάθος τι κερέν-λεν, μπορεί τι λένα τουμένταρ μπουτ χρόνος ντα αντικάς μα τι τθερέν χρόνος για τι κερέν πο μπουτ πράγματα ι Ιεχωβάσκε. Για παράδειγμας, σκεφτίνεν καζόμ χρόνος ντένα κο αθλήματα, κο Ίντερνετ ντα κο παιχνίδια. Κα μπορίνενας τι χρησιμοποιήνεν κάποια σαάτια ανταλένταρ για τι κερέν πο μπουτ πράγματα ι Ιεχωβάσκε ντα ι γιαβερένγκε; Μπέκιμ τι μπορίνενα τι βοηθίνεν κο μπουτιά σο αβένα-πες κι Αίθουσα τουμαρί. Ή τι τσσουβέν-τουμέν κο πρόγραμμας σο τθερέλα τουμαρί κχανγκιρί για το σταντ. Άμα κερένα ασακέ πράγματα, κα αρακχέν νεβέ αμαλέν σο κα βοηθίνεν-τουμέν τι κερέν πο μπουτ πράγματα ι Ιεχωβάσκε ντα τι πετυχίνεν τουμαρέ στόχους.

ΚΑ ΤΘΕΡΕΝ ΜΠΑΡΕ ΕΥΛΟΓΙΕΣ ΚΑΝΑ ΥΠΗΡΕΤΙΝΕΝΑ Ι ΓΙΑΒΕΡΕΝ

18. Σόσκε μπορίνασα τι βακεράς ότι ο Μάρκος ντα ο Τιμόθεος τζουβντιλέ εκ πφερντί ζωή;

¹⁸ Ο Μάρκος ντα ο Τιμόθεος κερντέ θυσίες για τι υπηρετίνεν ι γιαβερέν πο μπουτ. Αντικάς τζουβντιλέ μπουτ σουκάρ πράγματα ντα τθερένας εκ πφερντί ζωή. (Πράξ. 20:35) Για τι υπηρετίνελ πι πφραλέν, ο Μάρκος κερντάς μπαρέ ταξίδια μπουτέ τθεμέντε κο ντουνιάς. Επίσης γραφιντάς εκ κατά Ευαγγέλια σο κερένα λάφι για τη ζωή ντα για το έργος ι Ιησούσκο. Ο Τιμόθεος βοηθιντάς ι Παυλός τι κερέλ νεβέ κχανγκιριά ντα τι ντελ μπαρί ζορ κο πφραλά ντα κο πφενιά. Ο Ιεχωβά ντικχλάς σαρέ ο θυσίες σο κερντέ ο Μάρκος ντα ο Τιμόθεος για τι κερέν πο μπουτ λέσκε, ντα ανταβά κερντάς λέσκο γκι.

19. Σόσκε ο τερνέ πφραλά πρέπει τι ντεν προσοχή κο συμβουλές σο ντινάς ο Παύλος κο Τιμόθεος, ντα καβά κα αβέλ ο αποτέλεσμας;

¹⁹ Αντράλ κατά γράμματα σο γραφιντάς ο Παύλος κο Τιμόθεος, μπορίνασα τι αγαβάς ότι ο Παύλος μανγκέλας μπαγιά ι Τιμοθεός. Όμως ο Ιεχωβά ισινέ οντουβά σο τσσιντιντάς ι Παυλός τι γραφίνελ ανταλά γράμματα. Άρα οντουλά σο διαβάνασα αντρέ κο γράμματα ανταλά σικαβένα σαρ νιωθίνελα ο Ιεχωβά τουμένγκε τερνάλεν αντιβές. Μανγκέλα-τουμέν. Μανγκέλα τι τθερέν εκ μπουτ σουκάρ ζωή κι υπηρεσία λέσκι. Οτθάρ κερέν ο πο λατσσό σο μπορίνενα για τι εφαρμόνεν ο συμβουλές ι Παυλόσκε ντα τι μπαριαρέν τουμαρί επιθυμία τι υπηρετίνεν ι γιαβερέν πο μπουτ. Άμα κα κερέν-λες ανταβά, κα απολαμβάνεν εκ πφερντί ζωή ακανά ντα κα “ασταρέν ζουρανές ι ζωή σο κα ντελ ο Ντεβέλ” κο μέλλον.​—1 Τιμ. 6:18, 19.