1, 2. (α) Καγιά προσπάθεια χρειαζίντιβελα τι κεράς για τι αβάς λατσσέ αμαλά με κάποιον; (β) Σο κα ντικχάς ανταλέ μαθημάστε;

 ΑΝ ΤΙ γκοντιάτε εκχέ λατσσέ αμαλές σο τθερέσα. Σαρ αβιλάν λατσσό αμάλ λέσαρ; Σίγουρα νακχλάν χρόνος λέσαρ, σικλιλάν σο νακχλό πι ζωγιάτε, σο μπεϊντίνελα ντα σο να μπεϊντίνελα. Ντικχλάν ότι τθερέλα μπουτ σουκάρ ιδιότητες σο κα μανγκέας τι τθερές-λεν τούι-ντα. Αντικάς, μανγκλάν ανταλέ τζενές.

² Για τι αβάς λατσσέ αμαλά εκχέ τζενέσαρ χρειαζίντιβελα χρόνος ντα προσπάθεια. Ο ίδιος χρειαζίντιβελα για τι αβάς λατσσέ αμαλά ι Ιεχωβά Ντεβλέσαρ-ντα. Ανταλέ μαθημάστε κα ντικχάς σαρ μπορίνασα τι πλησιάνας ατζέ πο μπουτ αμαρέ Ντεβλές ντα καλά λατσσίματα κα ανέλ αμένγκε ανταβά. Πρώτα, κα ντικχάς σόσκε ισί λατσσό τι πλησιάνας αμαρέ πο λατσσέ Αμαλές, ι Ιεχωβάς.

3. Σόσκε πρέπει τι σκεφτίνας ο λατσσίματα σο αβένα κάνα πλησιάνασα ι Ιεχωβάς; Βακερέν εκ παράδειγμας.

³ Σίγουρα συμφωνίνενα ότι ισί λατσσό τι πλησιάνας ι Ιεχωβάς. Αλλά κάνα σκεφτίνασα ο λατσσίματα σο αβένα κάνα ισινάμ αμαλά ι Ιεχωβάσαρ, ανταβά κα τσσίντελ-αμέν τι συνεχίνας τι πλησιάνας-λες. (Ψαλμ. 63:6-8) Για παράδειγμας, σαρέ τζανάσα ότι κερέλα αμένγκε λατσσιπέ τι χας υγιεινά, τι κεράς γυμναστική, τι ξεκουράντιβας λατσσές ντα τι πιάς μπερεκέτι πανί. Όμως, μπουτ τζενέ να σκεφτίνενα-λεν μπουτ ανταλά, ντα οτθάρ να προσοχίνενα πουμαρί υγεία. Ισί μπαγιά ότι καζόμ πο μπουτ σκεφτίνασα ο λατσσίματα σο ανένα ανταλά κι υγεία αμαρί, αζόμ πο μπουτ κα μανγκάς τι κεράς-λεν. Άκ’ αντικάς, μπορεί τι τζανάσα  ότι ισί λατσσό αμένγκε τι πλησιάνας ι Ιεχωβάς. Αλλά κάνα σκεφτίνασα ο λατσσίματα σο αβένα κάνα ισινάμ αμαλά λέσαρ, ανταβά κα τσσίντελ-αμέν τι συνεχίνας τι πλησιάνας αμαρέ Αμαλές.​—Ψαλμ. 119:27-30.

4. Σαρ νιωθίνελας ο τζενό σο γραφιντάς ο Ψαλμός 73:28;

⁴ Διαβάνεν Ψαλμός 73:28. Ο τζενό σο γραφιντάς ο Ψαλμός 73 ισινέ Λευίτης ντα υπηρετίνελας κο ναός κι Ιεχωβάσκο σαρ μουσικός. Μάλλον υπηρετιντάας ι Ιεχωβάς πιστά για κάποιος βακίτι. Όμως, ατζέκ ατζέκ νιωθίνελας ότι έπρεπε τι ανέλ εμ πιρέ γκοντιάτε εμ κι γιαβερένγκι γκοντί ότι “ισί λατσσό τι πλησιάνας ι Ντεβλές”. Καλά ισί μερικά λατσσίματα σο αβένα ανταλέσταρ;

ΚΑΝΑ “ΠΛΗΣΙΑΝΑΣΑ Ι ΝΤΕΒΛΕΣ” ΙΣΙΝΑΜ ΕΥΤΥΧΙΣΜΕ

5. (α) Σόσκε ισινάμ ευτυχισμέ κάνα πλησιάνασα πο μπουτ ι Ιεχωβάς; (β) Σαρ η σοφία σο ντέλα ο Ιεχωβά βοηθίνελα-τουμέν ντα αρακχαβέλα-τουμέν; (Παροιμίες 2:6-16)

⁵ Καζόμ πο μπουτ πλησιάνασα ι Ιεχωβάς, αζόμ πο ευτυχισμέ κα αβάς. (Ψαλμ. 65:4) Ανταβά αβέλα-πες για μπουτ λόγους. Εκ λόγος ισί ότι κάνα κεράσα οντουλά σο βακερέλα αμένγκε βοβ αντρέ κι Γραφή ντα ντάσα-λες καν, τθεράσα σοφία. Ανταγιά σοφία αρακχαβέλα-αμέν πραγματένταρ σο κερένα αμένγκε ζιάνι ντα κατά μπαρέ λάθη. (Διαβάνεν Παροιμίες 2:6-16) Άκ’ σόσκε βακερέλα η Γραφή: «Ευτυχισμέ ισί ο τζενό σο αρακχέλα σοφία ντα ο τζενό σο αγαβέλα».​—Παρ. 3:13.

6. Σο κερντάς ι τζενές σο γραφιντάς ανταβά ψαλμός τι χασαρέλ πι χαρά;

⁶ Ισί μπαγιά ότι ατζέ-ντα ο αμαλά ι Ιεχωβάσκε μπάζιμα ισί στεναχωριμέ. Ο τζενό σο γραφιντάς ο Ψαλμός 73 χασαρντάς πι χαρά κάνα αρχισάλο τι σκεφτίνελ αρνητικά. Σκεφτίνελας ότι ο πφιρνέ τζενέ τζουβντιόνας λατσσές παρόλο σο να χάλας-λεν ανάγκη ο Ντεβέλ ντα ο κανόνες λέσκε, ντα ανταβά χολιασκιαρέλας μπουτ ανταλέ τζενές. Αρχισάλο ατζέ-ντα τι ζηλίνελ-λεν. Πακιάλας ότι ο τζενέ σο ισινέ βίαιοι ντα μπαρικανέ μπορίνενας τι τθερέν σο-ντα μανγκένας ντα τι αβέν υγιείς. Σκεφτίνελας ατζέ-ντα ότι να τθερένας ιτς προβλήματα. (Ψαλμ. 73:3-7, 12) Ανταγιά αδικία σο ντικχέλας κερντάς-λες ατζέ-ντα τι σκεφτίνελ άμα αξίνελας τι ντελ λατρεία ι Ιεχωβάς. Βακερντάς πφανγκέ γκίσαρ: «Σίγουρα, σινανέ ατσσικιαρντόμ πάκι μο γκι ντα τθοντόμ μο βαστά κατά μελ ι γκεραλιμάσκι».​—Ψαλμ. 73:13.

7. Σο μπορίνασα τι κεράς κάνα ισινάμ στεναχωριμέ; (Ντικχέν ι φωτογραφία-ντα)

⁷ Ανταβά τζενό να μουκχλάς ι στεναχώρια τι λελ λέσταρ σαρί λέσκι ζορ, αλλά κερντάς κάτι για τι αλλάνελ ο τρόπος σο σκεφτίνελας. “Τσσουντάς-πες κο εντυπωσιακός τθαν κι Ντεβλέσκο” ντα οτθέ ο Ιεχωβά διορθωντάς λέσκο τρόπος σκέψης. (Ψαλμ. 73:17-19) Κάνα ισινάμ στεναχωριμέ, ο Ιεχωβά, αμαρό μπουτ λατσσό Αμάλ, τζανέλα-λες. Άμα προσευχίντιβασα λέστε για τι οδηγίνελ-αμέν ντα δεχτίνασα ι βοήθεια σο ντέλα-αμέν αντράλ πι Λαφίσταρ ντα κατά κχανγκιρί, κα λας μπαρί ζορ για τι νταϊντίνας ι στεναχώρια. Ατζέ-ντα κάνα νιωθίνασα αζόμ μπαρί ανησυχία σο να τζανάσα σο τι κεράς, ο Ιεχωβά κα βοηθίνελ-αμέν τι ηρεμίνας.​—Ψαλμ. 94:19. a

ΚΑΝΑ “ΠΛΗΣΙΑΝΑΣΑ Ι ΝΤΕΒΛΕΣ” ΤΘΕΡΑΣΑ ΠΦΕΡΝΤΙ ΖΩΗ ΝΤΑ ΕΛΠΙΔΑ

8. Καλά ισί ντούι γιαβερά λόγοι σο ισί λατσσό αμένγκε τι πλησιάνας ι Ντεβλές;

⁸ Ισί λατσσό αμένγκε τι πλησιάνας ι Ντεβλές για ντούι γιαβερά-ντα σημαντικούς λόγους. Πρώτον, μπορίνασα τι τθεράς εκ λατσσί ζωή ακανά. Δεύτερον, τθεράσα εκ σίγουρη ελπίδα για το μέλλον. (Ιερ. 29:11) Για τι ντικχάς ανταλά ντούι λατσσίματα ατζέ πο λατσσές.

9. Σόσκε ισί πο πφερντί αμαρί ζωή κάνα πλησιάνασα ι Ιεχωβάς;

 ⁹ Κάνα ισινάμ λατσσέ αμαλά ι Ιεχωβάσαρ, μπορίνασα τι τθεράς εκ λατσσί ζωή. Μπουτ τζενέ αντιβές βακερένα ότι να υπαρχίντιβελα Ντεβέλ. Οτθάρ, να τζανένα σόσκε υπαρχίντιβενα τζενέ κι πφουβ ντα πακιάνα ότι σιγά σιγά ο τζενέ κα εξαφανίντιβεν. Όμως, αμέν σο διαβάνασα ο Λάφι ι Ντεβλέσκο ισινάμ σίγουροι ότι ο Ντεβέλ «υπαρχίντιβελα ντα ότι ανέλα ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες». (Εβρ. 11:6) Ατζέ-ντα αντιβές, μπορίνασα τι τθεράς πο ευτυχισμέ ζωή επειδή κεράσα οντουβά σο κερντιλάμ τι κεράς, δηλαδή υπηρετίνασα αμαρέ Νταντές, ι Ιεχωβάς.​—Δευτ. 10:12, 13.

10. Σο υπόσχεση ντέλα ο Ιεχωβά οντουλέντε σο ντένα μπέσα λέστε; (Ψαλμός 37:29)

¹⁰ Μπουτέ τζενένγκε, λένγκι ελπίδα τελειώνελα ανταλέ ντουνιάστε​—τζάνα κι μπουτί, παντρίνενα, μπαριαρένα πουμαρέ τσσαβέν ντα γκίντενα λοβέ πουμαρέ πφουριματένγκε. Ανταλά τζενέ νικαβένα ι Ντεβλές πουμαρέ ζωγιάταρ. Οκιά μπάνταρ, ο υπηρέτες ι Ιεχωβάσκε βασίνενα πουμαρί ελπίδα λέστε. (Ψαλμ. 25:3-5· 1 Τιμ. 6:17) Ντάσα μπέσα κο Ντεβέλ σο ισί αμαρό Αμάλ, ντα τζανάσα ότι σο-ντα βακερντάς αμένγκε κα κερέλ-λες. Μπεκλεντίνασα σαρ σαρ σαρέ ι λατσσέ πραγματένγκε σο κα τθεράς κο μέλλον, ειδικά τι ντας λατρεία ι Ιεχωβάς για πάντα κο Παράδεισος.​—Διαβάνεν Ψαλμός 37:29.

11. Καβά γιαβέρ λατσσιπέ τθεράσα κάνα πλησιάνασα ι Ντεβλές, ντα σαρ νιωθίνελα βοβ ανταλέσκε;

¹¹ Υπαρχίντιβενα μπουτ γιαβερά-ντα λόγοι σο κερέλα αμένγκε λατσσιπέ τι πλησιάνας ι Ντεβλές. Φιρειπείν ο Ιεχωβά ντέλα πο λάφι τι συγχωρίνελ αμαρέ αμαρτίες κάνα μετανιώνασα. (Ησ. 1:18) Οτθάρ, να χρειαζίντιβελα τι χαν-αμέν ο τύψεις ι αμαρτιένγκε σο κερντάμ ανγκλέ. (Ψαλμ. 32:1-5) Ντα χαιρίνασα σο τθεράσα ο προνόμιος τι κεράς ι Ιεχωβάσκο γκι. (Παρ. 23:15) Σίγουρα μπορίνενα τι σκεφτίνεν γιαβερά-ντα ευλογίες σο αβένα κάνα ισινάμ αμαλά ι Ιεχωβάσαρ. Για τι ντικχάς ακανά σο μπορίνασα τι κεράς για τι συνεχίνας τι πλησιάνας ι Ντεβλές.

ΣΑΡ ΤΙ ΣΥΝΕΧΙΝΕΝ “ΤΙ ΠΛΗΣΙΑΝΕΝ Ι ΝΤΕΒΛΕΣ”

12. Σο κερντάμ για τι πλησιάνας ατζέ πο μπουτ ι Ντεβλές;

¹² Πριν τι μπολντιάς σαρ Μάρτυρες ι Ιεχωβάσκε, κερντάμ μπουτ πράγματα για τι αβάς αμαλά ι Ιεχωβάσαρ. Σικλιλάμ μπουτ αλήθειες ι Ιεχωβά Ντεβλέσκε ντα ι Ιησού Χριστόσκε, μετανιωσάλαμ αμαρέ αμαρτιένγκε, σικαντάμ πίστη κο Ντεβέλ ντα κερντάμ ο πο λατσσό σο μπορίναας για τι ντας-λες καν. Για τι αβάς ατζέ πο λατσσέ αμαλά ι Ντεβλέσαρ όμως, πρέπει τι συνεχίνας τι κεράς ανταλά πράγματα.​—Κολ. 2:6.

13. Καλά τριν πράγματα κα βοηθίνεν-αμέν τι συνεχίνας τι πλησιάνας ι Ιεχωβάς;

¹³ Σο κα βοηθίνελ-αμέν τι συνεχίνας τι πλησιάνας ι Ιεχωβάς; (1) Πρέπει τι συνεχίνας τι διαβάνας ι Γραφή ντα τι σικλιαράς-αμέν λάταρ. Καζόμ κεράσα-λες ανταβά, να ερεσέλα απλά τι σικλιάς πράγματα ι Ντεβλέσκε. Οκιά μπάνταρ, πρέπει τι προσπαθίνας τι αγαβάς σαρ σκεφτίνελα ο Ντεβέλ, σο μανγκέλα αμένταρ τι κεράς, ντα τι τζουβντιάς σαρ μανγκέλα βοβ. (Εφεσ. 5:15-17) (2) Πρέπει τι μπαριαράς αμαρί πίστη. Ανταβά κεράσα-λες κάνα σκεφτίνασα λατσσές ο μπουτ τρόποι σο σικαντάς αμένγκε πι αγάπη. (3) Πρέπει τι συνεχίνας τι μισίνας ο πράγματα σο προσβαλίνενα ι Ιεχωβάς ντα μα τι κεράς παρέα τζενέντζαρ σο κερένα γκεραλέ πράγματα.​—Ψαλμ. 1:1· 101:3.

14. Σαρ μπορίνασα κάθε ντιβές τι κεράς ι Ιεχωβάσκο γκι; (1 Κορινθίους 10:31) (Ντικχέν ο φωτογραφίες-ντα)

¹⁴ Διαβάνεν 1 Κορινθίους 10:31. Ισί μπουτ σημαντικός τι κεράς ο πράγματα σο τζανάσα ότι κερένα ι Ιεχωβάσκο γκι. Όμως, να ερεσέλα σάντε τι τζας κο έργος ντα κο συναθροίσεις. Αλλά σο-ντα κεράσα κάθε ντιβές αμαρέ ζωγιάτε πρέπει τι κερέλ ι Ιεχωβάσκο γκι. Για παράδειγμας, κάνα βακεράσα ι αλήθεια σαρέ  κο πράγματα ντα κάνα ντάσα οντουλένταρ σο τθεράσα κο γιαβερά, κεράσα ι Ιεχωβάς χαρούμενος. (2 Κορ. 8:21· 9:7) Επίσης, ο Ιεχωβά μανγκέλα τι σικαβάς εκτίμηση για το δώρος ι ζωγιάκο. Πλησιάνασα ατζέ πο μπουτ Οντουλές σο ντινάς-αμέν ι ζωή, κάνα προσοχίνασα καζόμ χάσα ντα πιάσα, ντα κάνα κεράσα γιαβερά-ντα πράγματα για τι τθεράς λατσσί υγεία. Κάνα ο Ιεχωβά ντικχέλα-αμέν τι προσπαθίνας τι κεράς λέσκο γκι σαρέ κο πράγματα αμαρέ ζωγιάτε, ατζέ-ντα άμα ντικχίντιβενα χουρντέ, μανγκέλα-αμέν ατζέ πο μπουτ.​—Λουκ. 16:10.

15. Σαρ μανγκέλα αμένταρ ο Ιεχωβά τι συμπεριφερίντιβας κο γιαβερά;

¹⁵ Ο Ιεχωβά ισί λατσσό σαρέ ι τζενέντζαρ, είτε υπηρετίνενα-λες είτε όχι. (Ματθ. 5:45) Ντα μανγκέλα αμέν-ντα τι κεράς ο ίδιος κο γιαβερά. Για παράδειγμας, μανγκέλα “μα τι βακεράς μπέτι λάφια καεκχέσκε, μα τι χας-αμέν . . . ντα τι αβάς πάντα κοβλέ γκίσκε σαρέ ι τζενέντζαρ”. (Τίτο 3:2) Άρα, ατζέ-ντα άμα ο τζενέ να πακιάνα κο Ιεχωβά, να αμντίνασα ότι ισινάμ πο λατσσέ λένταρ. (2 Τιμ. 2:23-25) Πλησιάνασα ατζέ πο μπουτ ι Ιεχωβάς κάνα συμπεριφερίντιβασα πάντα σαρέ κο τζενέ λατσσιμάσαρ.

ΣΥΝΕΧΙΝΕΝ “ΤΙ ΠΛΗΣΙΑΝΕΝ Ι ΝΤΕΒΛΕΣ” ΑΤΖΕ-ΝΤΑ ΚΑΝΑ ΚΕΡΕΝΑ ΛΑΘΗ

16. Σαρ νιωσάλο ο τζενό σο γραφιντάς ο Ψαλμός 73 αφού υπηρετιντάς ι Ιεχωβάς για κάποιος βακίτι;

¹⁶ Μπάζιμα μπορεί τι νιωθίνεν ότι ο Ιεχωβά νανέ πασέ τουμέντε ιτιρί κατά λάθη σο κερντέν. Σαρ ντικχλάμ πο οπρέ, κάτι ασακό αβιλό-πες ι τζενέσαρ-ντα σο γραφιντάς ο Ψαλμός 73. Βοβ γραφιντάς: «Μο πιντρέ χάνικ ατζέ ντα κα νασένας κατά σωστός ντρομ· παραλίγο τι περάβ». (Ψαλμ. 73:2) Σαρ βακερντάς, “τθερέλας κερκιπέ αντρέ πι γκίστε”, “χασαρντάας πι γκοντί” ντα “ισινέ σαρ ζώος σο να τθερέλας γκοντί” ανγκλάλ κο Ιεχωβά. (Ψαλμ. 73:21, 22) Μήπως νιωθίνελας ότι ιτιρί κατά λάθη σο κερντάας, να  κα συγχωρίνελας-λες ο Ιεχωβά ντα ότι τσσιναντάας τι μανγκέλ-λες;

17. (α) Σο κερντάς ο τζενό σο γραφιντάς οντουβά ψαλμός ατζέ-ντα κάνα χασαρντάς ντιπ πι ζορ; (β) Σο μπορίνασα τι σικλιάς κατά παράδειγμας λέσκο; (Ντικχέν ο φωτογραφίες-ντα)

¹⁷ Άμα ο τζενό σο γραφιντάς ανταβά ψαλμός νιωσάλο ότι ο Ιεχωβά μουκχλάας-λες, νιωσάλο-λες ανταβά σάντε για χάνικ. Ατζέ-ντα κάνα νιωθίνελας μπουτ μπέτι, τζανέλας ότι χρειαζίντιβελας τι πλησιάνελ ι Ιεχωβάς. Γραφιντάς: «Αλλά ακανά ισινόμ συνέχεια τούσαρ [Ιεχωβά]· ασταρέσα-μαν μι δεξί βαστέσταρ. Τι λαφίντζαρ σικαβέσα μάνγκε κατέ τι τζαβ, ντα σοράν κα γκερές-μαν κι δόξα». (Ψαλμ. 73:23, 24) Αμέν-ντα πρέπει τι μανγκάς κατά Ιεχωβά τι ντελ-αμέν ζορ κάνα νιωθίνασα ότι αμαρί πίστη ισί μπίζουρανι ή κάνα χασαράσα αμαρί ζορ ιτιρί αμαρέ λαθίνταρ. (Ψαλμ. 73:26· 94:18) Ατζέ-ντα κάνα κεράσα μπαρέ λάθη, μπορίνασα τι βουρτίνας κο Ιεχωβά ντα τι αβάς σίγουροι ότι βοβ ισί “έτοιμος τι συγχωρίνελ”. (Ψαλμ. 86:5) Ειδικά κάνα χασαράσα ντιπ αμαρί ζορ, ισί σημαντικός τι πλησιάνας ατζέ πο μπουτ αμαρέ Ντεβλές.​—Ψαλμ. 103:13, 14.

“ΠΛΗΣΙΑΝΕΝ Ι ΝΤΕΒΛΕΣ” ΓΙΑ ΠΑΝΤΑ

18. Σόσκε μπορίνασα τι συνεχίνας τι πλησιάνας ι Ιεχωβάς για πάντα;

¹⁸ Μπορίνασα τι συνεχίνας τι πλησιάνας ι Ιεχωβάς για πάντα. Ποτές να κα τσσιναβάς τι σικλιάς λέσκε. Η Γραφή βακερέλα ότι ι Ιεχωβάσκε ντρομά, λέσκι σοφία, ντα οντουλά σο τζανέλα «να τθερένα όρια».​—Ρωμ. 11:33.

19. Σο βακερένα αμένγκε ο Ψαλμοί για το μέλλον;

¹⁹ Κο Ψαλμός 79:13 διαβάνασα: «Αμέν, το λαός ντα ο μπρακέ σο ντέσα-λεν τι χαν, κα βακεράς τούκε ευχαριστώ για πάντα ντα κα βακεράς κο τζενέ σαρέ ο μπρεσά ότι ισινάν δοξασμέ». Καζόμ συνεχίνενα τι πλησιάνεν ι Ντεβλές, μπορίνενα τουμέν-ντα τι αβέν σίγουροι ότι κα τθερέν ευλογίες λέσταρ για πάντα. Κα μπορίνεν τι βακερέν με σιγουριά: «Ο Ντεβέλ ισί ο βράχος μι γκίσκο ντα κα αβέλ μάνγκε για πάντα σο-ντα τθεράβα».​—Ψαλμ. 73:26.