Ο ΑΓΧΟΣ ισί σαρ εκ μπαρό πφαριπέ αντρέ αμαρέ γκίστε. (Παρ. 12:​25) Νακχλέν καέκ φαρ αζόμ μπουτ άγχος τουμαρέ ζωγιάτε; Νιωθίνενα μπάζιμα ότι να νταϊντίνενα γιαβέρ; Άμα βα, να ισινέν σάντε τουμέν. Μπουτ αμένταρ αρακχαβάσα εκχέ νασφαλέ τζενές, χασαρντάμ κο μεριπέ εκχέ τζενές σο μανγκάας, νακχλάμ εκ φυσική καταστροφή ή κάτι γιαβέρ σο λιντάς ι ζορ αμαρέ σωμάσκι, αμαρέ γκοντιάκι ντα αμαρέ γκίσκι. Αλλά σο κα βοηθίνελ-αμέν για μα τι περαβέλ-αμέν ο άγχος; a

Ο παράδειγμας ι Δαβιδίσκο σικλιαρέλα-αμέν μπουτ πράγματα για μα τι περαβέλ-αμέν ο άγχος. Βοβ νακχλάς μπουτ δυσκολίες πι ζωγιάτε ντα μπάζιμα ερεσλόας μέχρι κο μεριπέ. (1 Σαμ. 17:​34, 35· 18:​10, 11) Σο κερντάς ο Δαβίδ για μα τι περαβέλ-λες ο άγχος; Σαρ μπορίνασα τι μοιάζας λέστε;

Ι Δαβιδίσκε, αβιλέ μπουτ προβλήματα σαρέ γιεκ. Ντικχέν για παράδειγμας σο αβιλό-πες κάνα ο Δαβίδ γκεραβέλας-πες κατά βασιλιάς Σαούλ σο μανγκέλας τι μουνταρέλ-λες. Αζομάν σο ο Δαβίδ ντα λέσκε μουρσά βουρτισάλε εκχέ τζενγκίσταρ, πφαμπιλό λένγκο γκι κάνα ντικχλέ ότι ο ντουσμάνια τσορντέας λένγκε πράγματα, πφαμπαρντέας λένγκε κχερά ντα λιντέας δούλοι λένγκε φαμιλίν. Σο κερντάς ο Δαβίδ; «Ο Δαβίδ ντα ο μουρσά σο ισινέ λέσαρ ροντέ αζόμ ζουρανές σο να ατσσιλί-λεν γιαβέρ ζορ ροϊμάσκε». Κάτι σο πφανγκλάς ατζέ πο μπουτ λέσκο γκι ισινέ ότι ο μουρσά σο ντέλας λένγκε μπέσα «βακερένας ότι κα μουνταρένας-λες μπαρέντζαρ». (1 Σαμ. 30:​1-6) Ο Δαβίδ νακχέλας τριν μπαρέ προβλήματα: Λέσκι φαμιλί ισινέ κι ντουσμανίνγκε βαστά, λέσκε μουρσά μανγκένας τι μουνταρέν-λες ντα ο βασιλιάς Σαούλ συνεχίνελας τι κουλαντίνελ-λες. Σκεφτίνεν σο μπαρό άγχος ανέλας λέσκε ανταβά!

Σο κερντάς σοράν; Χωρίς τι χασαρέλ σαάτι, «αβιλό πο ζουρανό αντράλ κατά Ιεχωβά πι Ντεβλέσταρ». Σαρ κερντάς-λες ανταβά; Ο Δαβίδ ισινέ σικλό τι προσευχίντιβελ κο Ιεχωβά τι βοηθίνελ-λες ντα τι ντελ-πες γκοντί σαρ βοηθιντάας-λες ανγκλέ. (1 Σαμ. 17:​37· Ψαλμ. 18:2, 6) Αγαντάς ότι χρειαζίντιβελας ι Ιεχωβάσκι βοήθεια, οτθάρ πουτσλάς-λες σο τι κερέλ. Κάνα ο Δαβίδ λιντάς απάντηση κατά Ιεχωβά, κερντάς σουγκό οντουβά σο βακέρντιλο λέσκε. Οτθάρ, βοβ ντα λέσκε μουρσά ευλογισάλε κατά Ιεχωβά ντα λιντέ παλάλ πουμαρέ φαμιλίν ντα πουμαρέ πράγματα. (1 Σαμ. 30:​7-9, 18, 19) Ντικχλέν ο τριν πράγματα σο κερντάς ο Δαβίδ; Προσευχισάλο κο Ιεχωβά, ντινάς-πες γκοντί σαρ βοηθιντάας-λες ανγκλέ ντα κερντάς σο βακερντάς λέσκε. Σαρ μπορίνασα τι μοιάζας κο Δαβίδ; Ντικχέν τριν τρόπους.

1. Προσευχίντιβεν. Κάνα ντικχάσα ότι ασταρέλα-αμέν ο άγχος, μπορίνασα τι κεράς προσευχή κο Ιεχωβά τι βοηθίνελ-αμέν ντα τι ντελ-αμέν σοφία. Μπορίνασα τι νικαβάς ο πφαριπέ οπρ’ αμένταρ άμα κα ντας αμαρέ σαατίσταρ για τι προσευχίντιβας ντα τι πουτράς αμαρό γκι λέστε. Ή μπορίνασα τι κεράς εκ χουρντί προσευχή αντρ’ αμένταρ άμα ναστί κεράσα κάτι γιαβέρ οντιά στιγμή. Κάθε φαρ σο μανγκάσα κατά Ιεχωβά τι βοηθίνελ-αμέν, σικαβάσα ότι ντάσα λέσκε μπέσα σαρ ο Δαβίδ σο βακερντάς: «Ο Ιεχωβά ισί μο βράχος ντα μο κάστρος, Οντουβά σο σώνελα-μαν. Μο Ντεβέλ ισί μο βράχος, σο λέστε τθάβνταβα». (Ψαλμ. 18:2) Κερέλα μπαγιά λατσσιπέ η προσευχή; Εκ σκαπάνισσα, η Καλία, βακερέλα: «Σοράν κατά προσευχή, τθεράβα ειρήνη. Η προσευχή βοηθίνελα-μαν τι σκεφτίναβ σαρ ο Ιεχωβά, ντα μι  μπέσα λέστε μπαριόλα». Βα, η προσευχή ισί εκ μπαρό δώρος κατά Ιεχωβά σο βοηθίνελα-αμέν για μα τι περαβέλ-αμέν ο άγχος.

2. Ντεν-τουμέν γκοντί. Νακχλέν τουμαρέ ζωγιάτε δοκιμασίες σο ναστί κα νταϊντίνενας άμα να κα τθερένας ι Ιεχωβάσκι βοήθεια; Κάνα ντάσα-αμέν γκοντί σαρ βοηθιντάς ο Ιεχωβά εμ αμέν αλλά εμ πι υπηρετόν ανγκλέ, πφερντιάσα ζορ αντρ’ αμέντε ντα ντάσα λέσκε πο μπουτ μπέσα. (Ψαλμ. 18:​17-19) «Γραφίναβα εκχέ τθανέστε σαρέ ο απαντήσεις σο ντινάς ο Ιεχωβά μι προσευχιέντε», βακερέλα εκ πρεσβύτερος, ο Τζόσουα. «Ανταβά βοηθίνελα-μαν τι ανάβ μι γκοντιάτε ο ντιβεσά σο μανγκλόμ κάτι συγκεκριμέ κατά Ιεχωβά ντα βοβ ντινάς-μαν ντιπ οντουβά σο χρειαζίντιβαβας». Βα, κάνα σκεφτίνασα λατσσές σο κερντάς ο Ιεχωβά αμένγκε, λάσα νεβί ζορ για τι μαράς-αμέν ι αγχόσαρ.

3. Κερέν σο βακερέλα ο Ιεχωβά. Πριν τι αποφασίνας σο τι κεράς, ισί λατσσό τι ρόντας κι Ντεβλέσκο Λάφι για τι λας ι πο λατσσί συμβουλή. (Ψαλμ. 19:7, 11) Μπουτ τζενέ ντικχλέ ότι, κάνα ρόντενα λατσσές εκ εδάφιος, αγαβένα πο λατσσές σαρ τι κερέν-λες πουμαρέ ζωγιάτε. Εκ πρεσβύτερος, ο Τζάροντ, βακερέλα: «Ο ροντιπέ βοηθίνελα-μαν τι ντικχάβ σαρέ ο πράγματα σο τθερένα τι κερέν εκχέ εδαφιόσαρ ντα τι αγαβάβ σο βακερέλα μάνγκε ο Ιεχωβά. Αντικάς, ατσσόνα λατσσές αντρέ μι γκίστε οντουλά σο διαβάναβα για τι κεράβ λέσκι συμβουλή». Κάνα μανγκάσα ι συμβουλή ι Ιεχωβάσκι κατά Γραφή ντα κεράσα-λα, ισί πο εύκολος αμένγκε μα τι περαβέλ-αμέν ο άγχος.

Ο Δαβίδ αγαβέλας ότι, για μα τι περαβέλ-λες ο άγχος, χρειαζίντιβελας ι Ιεχωβάσκι βοήθεια. Εκτιμίνελας μπουτ σο τθερέλας πασέ πέστε ι Ιεχωβάς, οτθάρ βακερντάς: «Επειδή ο Ντεβέλ ντέλα-μαν ζορ, μπορίναβα τι νικλιάβ ο βουτσσέ ντουβάρια. Ο αληθινός Ντεβέλ ιριαβέλα-μαν ζοριάσαρ». (Ψαλμ. 18:​29, 32) Μπέκιμ νιωθίνασα ότι ο δοκιμασίες ισί σαρ μπουτ βουτσσέ ντουβάρια ανγκλ’ αμέντε. Αλλά ι Ιεχωβάσκε βοηθειάσαρ, μπορίνασα τι νικλιάς σο-ντα δοκιμασίες μοιάζενα ντουβαρίσαρ! Βα, κάνα προσευχίντιβασα κο Ιεχωβά τι βοηθίνελ-αμέν, ντάσα-αμέν γκοντί σαρέ οντουλά σο κερντάς αμένγκε ντα κεράσα σο βακερέλα, μπορίνασα τι αβάς σίγουροι ότι κα ντελ-αμέν ι ζορ ντα ι σοφία σο χρειαζίντιβασα για μα τι περαβέλ-αμέν ο άγχος!