ΚΟ ΜΠΡΕΣΑ σο τζουβντιόλας ο Παύλος, να υπαρχίντιβενας μπουτ καράβια σο λένας σάντε τζενέν. Κον μανγκέλας τι κερέλ ταξίδι, έπρεπε τι πουτσέλ άμα κάποιος τζανέλας καβά καράβι, σο λέλας εμπορεύματα, κα τζάλας οτθέ σο μανγκέλας ντα άμα λέλας τζενέν. (Πράξ. 21:2, 3) Ατζέ-ντα αν εκ καράβι να τζάλας ακριβώς οτθέ σο μανγκέλας ο τζενό, κα αρακχέλας λιμάνια σο οτθέ κα ρόντελας γιαβερέ καραβίσκε για τι γκερέλ-λες πιο πασέ κο τθαν σο μανγκέλας.​—Πράξ. 27:​1-6.

Ο πιο μπουτ φαρ ο ταξίδια κι ντεριάβ αβένας-πες συγκεκριμέ μασεκά, αλλά ο καράβια να νασένας συγκεκριμέ ντιβεσά ή σαάτια. Εκτός κατά μπέτι καιρός, μπουτ φαρ ο πράγματα σο πακιάνας ο τζενέ κερένας-λεν μα τι νασέν πουμαρέ σαατίστε. Για παράδειγμας, μπορεί ο τζενέ σο κερένας μπουτί κο καράβι τι ντικχένας εκ μπέτι σημάδι, σαρ εκ κοράκι σο μπασέλας ή εκ καράβι σο βουλιαξάλο. Ντα μπεκλεντίνενας τι πφούντελ λατσσί μπαρμπάλ για τι νασέν. Κάνα ο τζενό αρακχέλας καράβι σο δεχτίνελας τι λελ-λες, τζάλας κο λιμάνι πι πραγματέντζαρ ντα μπεκλεντίνελας τι βακερέν κάνα κα νασέλ ο καράβι.

Ο ιστορικός Λάιονελ Κάσον βακερέλα: «Κι Ρώμη ισινέ εύκολος τι αρακχέν ο τζενέ καράβι, οτθάρ να χρειαζίντιβελας τι ρόντεν. Ο λιμάνι ισινέ οτθέ σο τσσορντιόνας ο πανιά ι λενιάκε Τίβερη. Οτθέ πασέ, κι πόλη Όστια ισινέ εκ μπαρί πλατεία σο τθερέλας μπουτ πρακτορεία. Μπουτ ανταλένταρ τθερένας-λεν τζενέ σο λένγκι μπουτί ισινέ τι λονταβέν ο καράβια σο τζάνας διάφορε τθανέντε. Για παράδειγμας, για τη Ναρβώνα [κι Γαλλία] ισινέ εκ, για την Καρχηδόνα [κι Τυνησία] εκ γιαβέρ . . . Κον μανγκέλας τι κερέλ ταξίδι χρειαζίντιβελας σάντε τι πουτσέλ κο πρακτορεία καβά καράβι κα νακχέλας οτθάρ σο μανγκέλας τι τζαλ».

Οντουλά σο κερένας ταξίδια κι ντεριάβ τζάνας πιο σουγκό οτθέ σο μανγκένας, αλλά τθερένας κινδύνους-ντα. Ο Παύλος χρησιμοποιήνελας καράβια κο ιεραποστολικά ταξίδια, ντα πιο μπουτ από εκ καράβι βουλιαξάλε.​—2 Κορ. 11:25.