1. Καβά ισί εκ τρόπος σο σικαβέλα ο Ιεχωβά ότι πφαμπόλα αμένγκε σαρ βακερένα ο εδάφια Εφεσίους 6:​10-13; Εξηγίνεν.

ΕΚ ΤΡΟΠΟΣ σο σικαβέλα ο Ιεχωβά ότι πφαμπόλα αμένγκε, σο ισινάμ λέσκε υπηρέτες, ισί ότι βοηθίνελα-αμέν τι τζας κόντρα αμαρέ ντουσμανίντζαρ. Ο πιο μπαρέ ντουσμάνια σο τθεράσα ισί ο Μπενγκ ντα ο δαίμονες. Ο Ιεχωβά βακερέλα αμένγκε τι αρακχαβάς-αμέν λένταρ ντα ντέλα-αμέν σαρέ οντουλά σο χρειαζίντιβασα για τι τζας λέντζαρ κόντρα. (Διαβάνεν Εφεσίους 6:​10-13) Άμα λάσα βοήθεια κατά Ιεχωβά ντα τθεράσα λέσκε μπαρί εμπιστοσύνη, κα τζας κόντρα κο Μπενγκ. Τθεράσα οντιά σιγουριά σο τθερέλας ο απόστολος Παύλος-ντα, σο γραφιντάς: «Άμα ο Ντεβέλ ισί αμέντζαρ, κον κα τζαλ αμέντζαρ κόντρα;»​—Ρωμ. 8:31.

2. Σο κα ντικχάς ανταλέ μαθημάστε;

² Σαρ αληθινοί Χριστιανοί, να ντάσα μπουτ προσοχή κο Μπενγκ ντα κο δαίμονες. Οντουβά σο τθεράσα αμαρέ γκοντιάτε ισί τι σικλιάς ι Ιεχωβάσκε ντα τι υπηρετίνας-λες. (Ψαλμ. 25:5) Αλλά χρειαζίντιβελα τι τζανάς οντουλένγκε σο κερέλα ο Μπενγκ. Σόσκε; Για μα τι χουχαβέλ-αμέν. (2 Κορ. 2:​11· υποσ.) Ανταλέ μαθημάστε, κα ντικχάς σο κερέλα ο Μπενγκ ντα λέσκε δαίμονες για τι χουχαβέν ι τζενέν ντα κα σικλιάς σαρ τι τζας λέντζαρ κόντρα.

3, 4. (α) Καλά ισί ο μπενγκαλέ πράγματα; (β) Πακιάνα μπουτ τζενέ κο μπενγκαλέ πράγματα;

³ Ο Μπενγκ ντα ο δαίμονες χρησιμοποιήνενα ο μπενγκαλέ πράγματα, ή γιαβέρτουλους ο πνευματισμός, για τι χουχαβέν ι τζενέν. Οντουλά σο κερένα ασακέ πράγματα βακερένα ότι τζανένα ή κερένα πράγματα σο ο γιαβερά να τθερένα  ι ζορ τι τζανέν ή τι κερέν. Για παράδειγμας, οντουλά σο ντορικιαρένα ή μελετίνενα ο τσεργανιά βακερένα ότι ντικχένα σο κα αβέλ-πες ανγκλ’ αμέντε. Γιαβερά μπορεί τι κερένα-πες ότι κερένα λάφι ι μουλέντζαρ. Ισί τζενέ σο κερένα μαγεία ντα μπορεί τι πφάντενα ι γιαβερέν μαγικέ λαφίντζαρ. *

⁴ Πακιάνα μπουτ τζενέ κι ζορ σο τθερένα ο μπενγκαλέ πράγματα; Εκ έρευνα σο αβιλί-πες 18 τθεμέντε κι Λατινική Αμερική ντα κι Καραϊβική σικαντάς ότι περίπου 1 κο 3 τζενέ πακιάνα κι μαγεία ντα γιαβερέ ασακέ πραγματέντε ντα σχεδόν αζόμ ισί ο τζενέ-ντα σο πακιάνα ότι μπορίνενα τι κερέν λάφι ι μουλέντζαρ ή ι δαιμονέντζαρ. Εκ γιαβέρ έρευνα αβιλί-πες 18 τθεμέντε κι Αφρική. Οτθέ, πιο μπουτ κατά επκάς τζενέ βακερντέ ότι πακιάνα κι μαγεία. Όμως, κάι-ντα τι τζουβντιάς πρέπει τι αρακχαβάς-αμέν κατά μπενγκαλέ πράγματα, σόσκε ο Μπενγκ κερέλα σο νακχέλα λέσκε βαστέσταρ για τι χουχαβέλ «σαρέ ι ντουνιάς».​—Αποκ. 12:9.

5. Σαρ ντικχέλα ο Ιεχωβά ο μπενγκαλέ πράγματα;

⁵ Ο Ιεχωβά ισί “ο Ντεβέλ σο λέσταρ αβέλα η αλήθεια”. (Ψαλμ. 31:5) Σαρ ντικχέλα ο μπενγκαλέ πράγματα; Μισίνελα-λεν! Ο Ιεχωβά βακερντάς κο Ισραηλίτες: «Καέκ τζενό αντρέ κο λαός δεν πρέπει τι πφαμπαρέλ πι τσσαβές ή πι τσσαγιά σαρ θυσία, τι ντορικιαρέλ, τι αβέλ μάγος, τι ρόντελ για σημάδια, τι κερέλ μάγια, τι πφάντελ γιαβερέν μαγικέ λαφίντζαρ, τι τζαλ οντουλέντε σο ντορικιαρένα ή τι μανγκέλ τι σικλιόλ διάφορα πράγματα κατά μουλέ. Επειδή ο Ιεχωβά τζουνγκάλα οντουλένταρ σο κερένα ανταλά πράγματα». (Δευτ. 18:​10-12) Ο Χριστιανοί νανέ υποχρεωμέ τι ντεν καν κο Νόμος σο ντινάς ο Ιεχωβά κο Ισραηλίτες. Αλλά τζανάσα ότι αντιβές ντικχέλα ο μπενγκαλέ πράγματα σαρ ντικχέλας-λεν αζομάν-ντα.​—Μαλ. 3:6.

6. (α) Σαρ κερέλα ζιάνι ο Μπενγκ κο τζενέ αντράλ κατά μπενγκαλέ πράγματα; (β) Σο αβέλα-πες κάνα μεράσα σαρ βακερέλα ο εδάφιος Εκκλησιαστής 9:5;

⁶ Ο Ιεχωβά προειδοποιήνελα-αμέν ι μπενγκαλέ πραγματένγκε σόσκε τζανέλα ότι ο Μπενγκ χρησιμοποιήνελα-λεν για τι κερέλ ζιάνι κο τζενέ. Αντράλ ανταλέ πραγματένταρ κερέλα ι τζενέν τι πακιάν λέσκε ψέματα. Εκ ανταλέ ψεματένταρ ισί ότι ο μουλέ τζουβντιόνα κάπου γιαβερτθέ. (Διαβάνεν Εκκλησιαστής 9:5) Επίσης, αντράλ κατά μπενγκαλέ πράγματα ο Μπενγκ νταραβέλα ι τζενέν ντα ατσσικιαρέλα-λεν ντουρ κατά Ιεχωβά. Τθερέλα πι γκοντιάτε τι κερέλ ι τζενέν σο κερένα μπενγκαλέ πράγματα τι τθερέν εμπιστοσύνη κο δαίμονες ντα όχι κο Ιεχωβά.

7. Σο βακερέλα αμένγκε ο Ιεχωβά;

⁷ Σαρ ντικχλάμ πιο οπρέ, ο Ιεχωβά βακερέλα αμένγκε οντουλά σο χρειαζίντιβελα τι τζανάς για μα τι χουχάντιβας κατά Μπενγκ ντα λέσκε δαιμονένταρ. Ντικχέν μερικά πράγματα σο μπορίνασα τι κεράς για τι τζας κόντρα κο Μπενγκ ντα κο δαίμονες.

8. (α) Καβά ισί ο πιο σημαντικός τρόπος για τι τζας κόντρα κο δαίμονες; (β) Σαρ σικαβέλα ο εδάφιος Ψαλμός 146:4 ο ψέμας σο σικλιαρέλα ο Μπενγκ ι μουλένγκε;

⁸ Τι διαβάνεν ο Λάφι ι Ντεβλέσκο ντα τι σκεφτίνεν οντουλά σο διαβάνενα. Ανταβά ισί ο πιο σημαντικός τρόπος για μα τι  χουχάντιβας κατά ψέματα ι δαιμονένγκε. Ο Λάφι ι Ντεβλέσκο τσσινέλα μπουτ σαρ σπαθίς ντα σικαβέλα ο ψέματα ι Μπενγκέσκε. (Εφεσ. 6:​17) Για παράδειγμας, ο Λάφι ι Ντεβλέσκο πουτσσαρέλα ο ψέμας ότι ο μουλέ κερένα λάφι ι τζουβντέντζαρ. (Διαβάνεν Ψαλμός 146:4) Ντα ανέλα αμαρέ γκοντιάτε ότι σάντε ο Ιεχωβά τθερέλα ι ζορ τι βακερέλ σο κα αβέλ-πες ανγκλ’ αμέντε. (Ησ. 45:​21· 46:​10) Άμα να τσσιναβάσα τι διαβάνας ο Λάφι ι Ντεβλέσκο ντα τι σκεφτίνας οντουλά σο διαβάνασα, να κα πακιάς ο ψέματα σο μανγκένα τι πακιάς ο δαίμονες ντα κα μισίνας-λεν.

9. Καλά ισί μερικά μπενγκαλέ πράγματα σο κερένα ο τζενέ;

⁹ Μα τι κερέν τίποτα σο τθερέλα σχέση ι μπενγκαλέ πραγματέντζαρ. Σαρ αληθινοί Χριστιανοί, ποτές να κεράσα μπενγκαλέ πράγματα. Για παράδειγμας, να τζάσα κο μέντιουμ ντα να προσπαθίνασα τι κεράς λάφι ι μουλέντζαρ εκχέ γιαβερέ τροπόσαρ. Σαρ ντικχλάμ κο γιαβέρ μάθημας, να κεράσα έθιμα σο κερένα ο τζενέ κο κηδείες επειδή πακιάνα ότι ο μουλέ τζουβντιόνα κάπου γιαβερτθέ. Ντα να τζάσα οντουλέντε σο μελετίνενα ο τσεργανιά ή ντορικιαρένα για τι σικλιάς σο κα αβέλ-πες ανγκλ’ αμέντε. (Ησ. 8:​19) Τζανάσα ότι σαρέ ανταλά πράγματα ισί μπουτ επικίνδυνα ντα μπορίνενα τι περαβέν-αμέν κο βαστά κι Μπενγκέσκε ντα κι δαιμονένγκε.

10, 11. (α) Σο κερντέ μερικά τζενέ κο πρώτος αιώνας κάνα σικλιλέ ι αλήθεια; (β) Σαρ βακερέλα ο εδάφιος 1 Κορινθίους 10:​21, σόσκε πρέπει τι αβάς σαρ ο πρώτοι Χριστιανοί, ντα σαρ κα κεράς-λες ανταβά;

¹⁰ Φουρτίνεν ή καταστραφίνεν ο πράγματα σο τθερένα σχέση ι δαιμονέντζαρ. Κο πρώτος αιώνας, τζουβντιόνας κι Έφεσος τζενέ σο κερένας μπενγκαλέ πράγματα. Κάνα σικλιλέ ι αλήθεια, κερντέ αμέσως αλλαγές. «Μπουτ οντουλένταρ σο ασχολίντιβενας πραγματέντζαρ σο τθερένας τι κερέν με τη μαγεία γκιντιντέ πουμαρέ βιβλία ντα πφαμπαρντέ-λεν ανγκλάλ σαριλέντε». (Πράξ. 19:​19) Κερντέ σο νακχέλας λένγκε βαστέσταρ για τι τζαν κόντρα κο δαίμονες.  Λένγκε βιβλία σο κερένας λάφι για τη μαγεία ισινέ μπουτ πααλίς. Αλλά αντίς τι ντεν-λεν γιαβερτθέ ή τι μπικινέν-λεν, πφαμπαρντέ-λεν. Οντουβά σο μανγκένας πιο μπουτ ισινέ τι κερέν ι Ιεχωβάσκο γκι, οτθάρ να χάλας-λεν ανάγκη σο ισινέ πααλίς ο βιβλία.

¹¹ Σαρ κα μοιάζας κο Χριστιανοί σο τζουβντιόνας κο πρώτος αιώνας; Ισί λατσσό τι φουρτίνας ή τι καταστραφίνας σο-ντα πράγμας ισί-αμέν ντα τθερέλα σχέση ι δαιμονέντζαρ. Ανταλά ισί ο πράγματα-ντα σο ιρίνα ή τθερένα ο τζενέ για τι ντελ-λεν μπαχ, για μα τι λεν-λεν γιακχάταρ ή για τι αρακχαβέν-πες κατά δαίμονες.​—Διαβάνεν 1 Κορινθίους 10:21.

12. Σο πρέπει τι πουτσάς-αμέν κάνα σκεφτίνασα σο διασκέδαση τραμπίνασα;

¹² Σκεφτίνεν λατσσές σο διασκέδαση τραμπίνενα. Πουτσέν-τουμέν: “Μήπως διαβάναβα βιβλία, περιοδικά ή άρθρα κο Ίντερνετ σο τθερένα σχέση ι δαιμονέντζαρ; Σο γκιλιά, σο ταινίες ντα σο βιντεοπαιχνίδια τραμπίναβα; Μήπως κάτι κι διασκέδαση μιρί τθερέλα σχέση ι μπενγκαλέ πραγματέντζαρ; Μήπως σικαβέλα τζατζίες, σουκαρνιά ντα γιαβερά ασακέ πράγματα; Μήπως νακχαβέλα μάνγκε ότι ο πράγματα σο τθερένα σχέση με τη μαγεία νανέ μπέτι πράγματα;” Βέβαια, να τθερένα σχέση ι δαιμονέντζαρ σαρέ ο μασάλια ή ο ιστορίες σο νανέ μπαγιά. Κάνα σκεφτίνενα σο διασκέδαση τραμπίνενα, κερέν σο νακχέλα τουμαρέ βαστέσταρ για τι ατσσόν ντουρ σαρέ οντουλένταρ σο μισίνελα ο Ιεχωβά. Μανγκάσα τι κεράς ο πιο λατσσό για τι “ατσσικιαράς πάκι αμαρί συνείδηση” ανγκλάλ αμαρέ Ντεβλέστε.​—Πράξ. 24:​16. *

13. Σο δεν πρέπει τι κεράς;

 ¹³ Μα βακερέν ιστορίες σο τθερένα σχέση ι δαιμονέντζαρ. Πρέπει τι μοιάζας κο Ιησούς. (1 Πέτρ. 2:​21) Πριν τι αβέλ κι πφουβ, ο Ιησούς τζουβντιόλας κο ουρανός ντα τζανέλας μπουτ πράγματα ι Μπενγκέσκε ντα ι δαιμονένγκε. Αλλά να βακερέλας ιστορίες ι πραγματένγκε σο κερντέας. Ο Ιησούς μανγκέλας τι σικλιαρέλ ι τζενέν ι Ιεχωβάσκε, όχι ι Μπενγκέσκε. Αμέν μοιάζασα κο Ιησούς άμα να βακεράσα ιστορίες σο τθερένα σχέση ι δαιμονέντζαρ. Αλλά σικαβάσα “ότι αμαρό γκι πφερντιλό χαρά εκχέ λατσσέ πραγμάσταρ”, δηλαδή κατά αλήθεια.​—Ψαλμ. 45:1.

14, 15. (α) Σόσκε δεν πρέπει τι νταράς κατά δαίμονες; (β) Σο σικαβέλα ότι ο Ιεχωβά αρακχαβέλα πι λαός αντιβές;

¹⁴ Μα νταρέν κατά δαίμονες. Κο ντουνιάς αντιβές, μπορεί τι αβέν-πες αμένγκε μπέτι πράγματα. Εκ ατύχημας, εκ νασφαλιπέ ή ατζέ-ντα ο μεριπέ μπορεί τι αβέν ξαφνικά. Αλλά δεν πρέπει τι αμντίνας ότι ο δαίμονες κερένα-λεν ανταλά. Η Γραφή βακερέλα ότι «κάτι σο να μπεσάσα μπορεί τι αβέλ σαριλένγκε». (Εκκλ. 9:​11) Ο Ιεχωβά σικαντάς ότι ισί μπουτ πιο ζουρανό κατά δαίμονες. Για παράδειγμας, ο Ντεβέλ να μουκχλάς ι Μπενγκές τι μουνταρέλ τον Ιώβ. (Ιώβ 2:6) Κο ντιβεσά κι Μωυσίσκε, ο Ιεχωβά σικαντάς ότι ισινέ πιο ζουρανό κατά παπάζια κι Αίγυπτος σο ισινέ μάγοι. (Έξοδ. 8:​18· 9:​11) Ο Ιησούς, ι Ιεχωβάσκε ζοριάσαρ, σικαντάς ότι ισινέ πιο ζουρανό κατά Μπενγκ ντα λέσκε δαιμονένταρ κάνα φουρτιντάς-λεν κατά ουρανός τελέ κι πφουβ. Ντα ατζεχάνικ, κα φουρτίνελ-λεν κι άβυσσος, ντα οτθέ να κα τθερέν ι ζορ τι κερέν ζιάνι καεκχέσκε.​—Αποκ. 12:9· 20:2, 3.

¹⁵ Ντικχάσα μπουτ πράγματα σο σικαβένα ότι ο Ιεχωβά αρακχαβέλα πι λαός αντιβές. Σκεφτίνεν: Βακεράσα ντα σικλιαράσα ι αλήθεια σαρί κι πφουβ. (Ματθ. 28:​19, 20) Αντικάς, πουτσσαράσα ο πφιρνίματα ι Μπενγκέσκε. Ο Μπενγκ σίγουρα κα τσσιναβέλας σαρέ οντουλά σο κεράσα κο έργος άμα ισινέ λέσκε βαστέστε, αλλά νανέ. Οτθάρ να χρειαζίντιβελα τι νταράς κατά δαίμονες. Τζανάσα ότι «ο γιακχά ι Ιεχωβάσκε ντικχένα σαρί ι πφουβ για τι βοηθίνελ πι ζοριάσαρ οντουλέν σο υπηρετίνενα-λες σαρέ πουμαρέ γκίσαρ». (2 Χρον. 16:9) Κάνα ισινάμ πιστοί  κο Ιεχωβά, ο δαίμονες ναστί κερένα αμένγκε ζιάνι σο κα ατσσόλ για πάντα.

16, 17. Σικαβέν εκχέ παραδειγμάσαρ σόσκε πρέπει τι αβάς μπίνταρανε για τι τζας κόντρα κο δαίμονες.

¹⁶ Πρέπει τι αβάς μπίνταρανε για τι τζας κόντρα κο δαίμονες, ντα ατζέ πιο μπουτ κάνα αμαρέ αμαλά ή αμαρέ τζενέ να συμφωνίνενα αμέντζαρ. Αλλά ο Ιεχωβά ευλογίνελα οντουλέν σο ισί μπίνταρανε. Σκεφτίνεν για παράδειγμας εκχέ πφενιά σο βακερένα λάκε Έρικα ντα τζουβντιόλα κι Γκάνα. Ισινέ 21 μπρεσένγκι κάνα δεχτιντάς τι κερέλ μελέτη. Λάκο ντατ σο ισί παπάζι ντα μάγος, μπεκλεντίνελας λάταρ τι κερέλ εκ έθιμος, τι χαλ μας σο ντιντιλόας σαρ θυσία λέσκε ντεβλέντε. Κάνα η Έρικα να μανγκλάς τι κερέλ-λες, λάκε τζενέ βακερντέ ότι ανέλας λατζ λένγκε ντεβλένγκε. Πακιάνας ότι κα νασφάλιβενας κι γκοντί ντα κο σώμας σαρ τιμωρία οντουλέ ντεβλένταρ.

¹⁷ Η φαμιλί ι Ερικάκι προσπαθιντάς τι τσσουβέλ-λα τι κερέλ ο έθιμος ζορίσαρ, αλλά βόι να κερντάς-λες, παρόλο σο έπρεπε τι νασέλ κατά κχερ. Ο πφραλά λιντέ-λα πουμαρέ κχερέντε. Αντικάς, ο Ιεχωβά ντινάς κι Έρικα ι ευλογία τι τθερέλ εκ νεβί φαμιλί, Μαρτυρέν σο αβιλέ σαρ πφραλά ντα πφενιά λάκε. (Μάρκ. 10:​29, 30) Παρόλο σο λάκε τζενέ να μανγκένα-λα κι φαμιλί ντα πφαμπαρντέ λάκε πράγματα, η Έρικα ατσσιλί πιστή κο Ιεχωβά, μπολντιλί, ντα ακανά ισί τακτική σκαπάνισσα. Να νταρέλα κατά δαίμονες. Η Έρικα βακερέλα: «Κεράβα προσευχή κάθε ντιβές τι τθερέν μο τζενέ ι ευλογία τι σικλιόν ι Ιεχωβάσκε ντα τι τθερέν ι ελευθερία σο ανέλα η υπηρεσία αμαρέ λατσσέ Ντεβλέσκι».

18. Καλά ευλογίες κα αβέν άμα τθεράσα εμπιστοσύνη κο Ιεχωβά;

¹⁸ Να κα νακχάς σαρέ εκ ασακί μπαρί δοκιμασία. Αλλά σαρέ πρέπει τι τζας κόντρα κο δαίμονες ντα τι τθεράς εμπιστοσύνη κο Ιεχωβά. Άμα κεράσα-λες ανταβά, κα τθεράς μπουτ ευλογίες, να κα πακιάς ο ψέματα ι Μπενγκέσκε ντα να κα μουκχάς ι νταρ κατά δαίμονες τι κερέλ-αμέν τι τσσιναβάς τι υπηρετίνας ι Ιεχωβάς. Ο πιο σημαντικός ισί ότι κα αβάς πιο λατσσέ αμαλά ι Ιεχωβάσαρ. Ο μαθητής Ιάκωβος γραφιντάς: «Ντεν καν ι Ντεβλές, αλλά τζαν κόντρα κο Μπενγκ, ντα κα νασέλ τουμένταρ. Πλησιάνεν ι Ντεβλές, ντα βοβ κα πλησιάνελ-τουμέν».​—Ιακ. 4:7, 8.