Οντουβά σο αβιλό-πες κι Ιεριχώ σικλιλέ-λες ο γιαβερά-ντα λαοί κι Χαναάν. Ο βασιλιάδες λένγκε αποφασιντέ τι γκιντίντιβεν για τι κερέν πόλεμος ι Ισραηλιτέντζαρ. Αλλά ο Γαβαωνίτες τθερένας εκ γιαβέρ σχέδιος. Αφού ιριαντέ πουρανέ ντα πφαραντέ σέα, γκιλέ κο Ιησούς του Ναυή ντα βακερντέ λέσκε: “Αβιλάμ ντουράλ. Ασουντάμ ι Ιεχωβάσκε ντα σικλιλάμ σαρέ οντουλά σο κερντάς τουμένγκε κι Αίγυπτος ντα κο Μωάβ. Ντεν τουμαρό λάφι ότι να κα κερέν πόλεμος αμέντζαρ ντα αμέν κα αβάς τουμαρέ υπηρέτες”.

Ο Ιησούς του Ναυή πακιαντάς ι Γαβαωνιτέν ντα συμφωνιντάς μα τι κερέλ πόλεμος λέντζαρ. Σοράν από τριν ντιβεσά, σικλιλό ότι βον να ισινέ οντουτθάρ σο βακερντέας ότι αβιλέ. Ισινέ κατά τθεμ Χαναάν. Ο Ιησούς του Ναυή πουτσλάς ι Γαβαωνιτέν: “Σόσκε βακερντέν αμένγκε ψέματα;” Βον βακερντέ: “Νταρασάλαμ! Τζανάσα ότι ο Ιεχωβά τουμαρό Ντεβέλ κερέλα πόλεμος τουμένγκε. Μολίνασα-τουμέν, μα μουνταρέν-αμέν”. Ο Ιησούς του Ναυή ατσσικιαρντάς πο λάφι ντα να μουνταρντάς-λεν.

Χάνικ πο σοράν, παντς βασιλιάδες κατά Χαναάν ντα λένγκο στρατός νταραντέ ι Γαβαωνιτέν. Ο Ιησούς του Ναυή ντα ο στρατός λέσκο σαρί  ιράτ πφιρένας για τι τζαν τι αρακχαβέν-λεν. Ο πόλεμος αρχισάλο ντιπ πρωί κο γιαβέρ ντιβές. Ο Χαναναίοι νασλέ τθαβντιμάσαρ. Κατέ-ντα τι τζάνας, ο Ιεχωβά περαβέλας οπρά-λέντε μπαρό χαλάζι. Σοράν, ο Ιησούς του Ναυή μανγκλάς κατά Ιεχωβάς τι ατσσόλ ο κχαμ εκχέ τθανέστε. Σόσκε μανγκλάς κατά Ιεχωβά τι κερέλ-λες ανταβά αφού ο κχαμ να ατσσιλόας ποτές εκχέ τθανέστε; Επειδή ο Ιησούς του Ναυή ντέλας μπέσα κο Ιεχωβά. Ο κχαμ να πελό για εκ σαστό ντιβές μέχρι τι νικίνεν ο Ισραηλίτες ι βασιλιαδέν κατά Χαναάν ντα λένγκο στρατός.