Ο Ιεχωβά ντινάς πο λάφι κο Ιακώβ ότι κα αρακχαβέλας-λες σαρ αρακχαντάας τον Αβραάμ ντα τον Ισαάκ. Ο Ιακώβ μπεσλό εκχέ τθανέστε σο βακέρντιβελας Χαρράν. Οτθέ παντρισάλο, κερντάς μπαρί φαμιλί ντα αβιλό μπουτ χουλανό.

Σοράν ο Ιεχωβά βακερντάς κο Ιακώβ: “Τζα παλάλ τι τθεμέστε”. Οτθάρ ο Ιακώβ ντα λέσκι φαμιλί ξεκινιντέ πουμαρό μπαρό ταξίδι για τι βουρτίνεν παλάλ. Καζόμ κερένας ο ταξίδι, γκιλέ μερικά τζενέ κο Ιακώβ ντα βακερντέ λέσκε: “Αβέλα το πφραλ ο Ησαύ ντα τθερέλα πέσαρ 400 μουρσέν!” Ο Ιακώβ νταρασάλο ότι ο Ησαύ μανγκέλας τι κερέλ κακός λέστε ντα λέσκε φαμιλιάτε. Κερντάς προσευχή κο Ιεχωβά ντα βακερντάς: “Σε παρακαλώ, αράκχαβ-μαν μι πφραλέσταρ”. Ο γιαβέρ ντιβές, ο Ιακώβ μπουτσσαντάς δώρα κο Ησαύ μπουτέ μπρακέν, μπουσνιέν, γκουρουβέν, καμηλέν ντα χχερέν.

Οντιά ιράτ, καζόμ ο Ιακώβ ισινέ κορκορό, ντικχλάς εκχέ άγγελος! Ο άγγελος αρχιντάς τι ουσαρέλ λέσαρ. Ουσαρένας μέχρι το πρωί. Παρόλο σο ο Ιακώβ ντινάας-πες, να τσσιναντάς τι ουσαρέλ ι αγγελόσαρ. Ο άγγελος βακερντάς λέσκε: “Μουκχ-μαν τι νασάβ”. Αλλά ο Ιακώβ βακερντάς: “Να μουκχάβα-τουτ, μέχρι τι ευλογίνες-μαν”.

Ο άγγελος τελικά ευλογιντάς-λες. Ακανά ο Ιακώβ τζανέλας ότι ο Ιεχωβά να κα μουκχέλας τον Ησαύ τι κερέλ λέσκε κακός.

Οντουβά πρωί, ο Ιακώβ ντικχλάς ντουράλ τον Ησαύ ντα ι 400 μουρσέν. Ο Ιακώβ τσσιντιντάς πο ανγκλάλ πι φαμιλιάταρ ντα πελό  μόσαρ ανγκλάλ πι πφραλέστε εφτά φαρ. Ο Ησαύ τθαβντισάλο πι πφραλέστε ντα λιντάς-λες σικίς αγκαλιά. Ο ντούι πφραλά ασταρντέ τι ροβέν ντα αγαπισάλε. Σαρ αμντίνεσα ότι νιωσάλο ο Ιεχωβά ανταλέσκε σο κερντάς ο Ιακώβ;

Σοράν, ο Ησαύ βουρτισάλο πι κχερέστε, ντα ο Ιακώβ πιρέ κχερέστε. Ο Ιακώβ τθερέλας 12 μουρσέν. Ο ναβά λένγκε ισινέ Ρουβήν, Συμεών, Λευί, Ιούδας, Δαν, Νεφθαλί, Γαδ, Ασήρ, Ισσάχαρ, Ζαβουλών, Ιωσήφ ντα Βενιαμίν. Εκ λέσκε τσσαβένταρ, τον Ιωσήφ, χρησιμοποιηντάς-λες ο Ιεχωβά για τι σώνελ Πι λαός. Τζανέσα σαρ; Για τι ντικχάς.