Ο Φαρισαίοι μισίνενας ι Ιησούς ντα μανγκένας τι αρακχέν εκ λόγος για τι ασταρέν-λες. Βακερένας ότι να ισινέ σωστός τι κερέλ λατσσές ι νασφαλέν κο Σάββατος επειδή ισινέ ο ντιβές σο έπρεπε τι ξεκουράντιβεν. Εκ Σάββατος, ο Ιησούς ντικχλάς εκχέ κορορές τι μπεσέλ κο ντρομ ντα τι μανγκέλ λοβέ. Βακερντάς πι μαθητένγκε: “Ντικχέν σαρ η ζορ ι Ντεβλέσκι κα βοηθίνελ ανταλέ μουρσές”. Ο Ιησούς ναμιντάς πο τσουνγκέρ τσικάσαρ για τι λατσσαρέλ κοβλί τσικ, ντα σοράν τσσουντάς-λα οπράλ κο γιακχά κι μουρσέσκε. Ο Ιησούς βακερντάς λέσκε: “Τζα, τθοβ το γιακχά κο πανί Σιλωάμ”. Ο τζενό κερντάς-λες ανταβά ντα σοράν, για πρώτη φαρ πι ζωγιάτε, μπορίνελας τι ντικχέλ.

Ο τζενέ σαστισάλε ντα βακερντέ: “Ανταβά τζενό ισί οντουβά σο μπεσέλας ντα μανγκέλας λοβέ ή ισί κάποιος γιαβέρ σο μοιάζελα λέστε;” Ο τζενό βακερντάς: “Με ισινόμ, οντουβά σο μπιάντιλο κορορό!” Σοράν πουτσένας-λες: “Σαρ αβέλα-πες ακανά τι ντικχές;” Κάνα βακερντάς λένγκε σο αβιλόας-πες, λιντέ-λες ντα γκερντέ-λες κο Φαρισαίοι.

Ο μουρς βακερντάς κο Φαρισαίοι: “Ο Ιησούς τσσουντάς τσικ μι γιακχίντε ντα βακερντάς μάνγκε τι τζαβ τι τθοβάβ-λεν. Κερντόμ-λες, ντα ακανά ντικχάβα”. Ο Φαρισαίοι βακερντέ: “Άμα ο Ιησούς κερέλα λατσσές ι τζενέν κο Σάββατος, λέσκι ζορ νανέ κατά Ντεβέλ”. Γιαβερά όμως βακερντέ: “Άμα λέσκι ζορ να ισινέ κατά Ντεβέλ, να κα μπορίνελας με τίποτα τι κερέλ κάτι ασακό”.

Ο Φαρισαίοι ντινέ βίκος ι κορορέσκε νταντές ντα νταγιά ντα πουτσλέ-λεν: “Σαρ αβέλα-πες ακανά  τι ντικχέλ τουμαρό τσσαβό;” Βον νταρένας σόσκε ο Φαρισαίοι βακερντέας ότι κον κα πακιάλας κο Ιησούς κα νασκιαρένας-λες κατά συναγωγή. Οτθάρ βακερντέ: “Να τζανάσα. Πουτσέν-λες”. Ο Φαρισαίοι πουτσλέ γιαβερά-ντα πράγματα ι κορορές μέχρι σο βοβ βακερντάς λένγκε: “Βακερντόμ τουμένγκε σαρέ οντουλά σο τζανάβα. Σόσκε συνεχίνενα τι πουτσέν-μαν;” Ο Φαρισαίοι χολιασάλε ντα φουρτιντέ-λες αβρί.

Ο Ιησούς γκιλό τι αρακχέλ ι μουρσές ντα πουτσλάς-λες: “Πακιάσα κο Μεσσίας;” Βοβ βακερντάς: “Κα πακιάβας άμα τζανάβας κον ισινέ”. Ο Ιησούς βακερντάς: “Με ισινόμ ο Μεσσίας”. Σο πακιάσα, σικαντάς ο Ιησούς λατσσιπέ οντουλέσαρ σο κερντάς; Να κερντάς σάντε λατσσές ανταλέ τζενές, αλλά βοηθιντάς-λες τι τθερέλ πίστη-ντα.