1. Κον πρέπει τι βακερέλ αμένγκε καγιά ισί η αληθινή θρησκεία;

Ο ΠΙΟ μπουτ θρησκείες βακερένα ότι σικλιαρένα ι αλήθεια ι Ντεβλέσκε. Αλλά ανταβά να μπορίνελα τι αβέλ-πες, επειδή ο θρησκείες σικλιαρένα μπουτ διαφορετικά πράγματα ι Ντεβλέσκε ντα για το τρόπος σο πρέπει τι ντας-λες λατρεία. Σαρ μπορίνασα τι αγαβάς καγιά ισί η αληθινή θρησκεία; Σάντε ο Ιεχωβά μπορίνελα τι βακερέλ αμένγκε.

2. Σαρ μπορίνεσα τι σικλιός ο σωστός τρόπος για τι ντες λατρεία ι Ντεβλές;

² Ο Ιεχωβά ντινάς-αμέν ι Αγία Γραφή για τι μπορίνας τι σικλιάς ο σωστός τρόπος τι ντας-λες λατρεία. Οτθάρ, διάβανε ι Γραφή ντα ο Ιεχωβά κα βοηθίνελ-τουτ τι σικλιός λέσκε λάφια επειδή πφαμπόλα τούκε μπαγιά.​—Ησαΐας 48:17.

3. Σο μανγκέλα ο Ντεβέλ τι κεράς;

³ Μερικά τζενέ βακερένα ότι ο Ντεβέλ δεχτίνελα σαρέ ο θρησκείες, αλλά ο Ιησούς να σικλιαρντάς-αμέν ανταβά. Βοβ βακερντάς: «Να κα νακχέλ κι βασιλεία των ουρανών ο κάθε εκ σο βακερέλα μάνγκε “Κύριε, Κύριε”, αλλά κον κερέλα οντουβά σο μανγκέλα μο Ντατ». Οτθάρ, πρέπει τι σικλιάς σο ισί οντουβά σο μανγκέλα ο Ντεβέλ ντα σοράν τι κεράς-λες αμαρέ ζωγιάτε. Ανταβά ισί μπουτ σημαντικός επειδή ο Ιησούς βακερντάς ότι οντουλά τζενέ σο να ντένα καν ι Ντεβλές ισί σαρ εγκληματίες σο «κερένα μπέτι πράγματα».​—Ματθαίος 7:​21-23.

4. Σο βακερντάς ο Ιησούς για το θέλημας ι Ντεβλέσκο;

⁴ Ο Ιησούς βακερντάς αμένγκε ότι, άμα μανγκάσα τι κεράς ο θέλημας ι Ντεβλέσκο, κα νακχάς δυσκολίες. Βακερντάς: «Τζαν κατά στενή πόρτα, επειδή μπουγλό ντα άνετος ισί ο ντρομ σο οδηγίνελα κι καταστροφή, ντα μπουτ  ισί οντουλά σο τζάνα λέσταρ· αλλά στενή ισί η πόρτα ντα δύσκολος ο ντρομ σο οδηγίνελα κι ζωή, ντα χάνικ ισί οντουλά σο αρακχένα-λες». (Ματθαίος 7:​13, 14) Ο στενός ντρομ ισί ο σωστός τρόπος για τι ντας λατρεία ι Ντεβλές ντα οδηγίνελα κι αιώνια ζωή. Ο μπουγλό ντρομ ισί ο λάθος τρόπος για τι ντας λατρεία ι Ντεβλές ντα οδηγίνελα κο μεριπέ. Αλλά ο Ιεχωβά να μανγκέλα τι μερέλ καέκ τζενό. Ντέλα σαριλέντε ι ευκαιρία τι σικλιόν λέσκε.​—2 Πέτρου 3:9.

5. Σαρ μπορίνεσα τι αγαβές καλά τζενέ τθερένα ι αληθινή θρησκεία;

⁵ Ο Ιησούς βακερντάς ότι μπορίνασα τι αγαβάς καλά τζενέ τθερένα ι αληθινή θρησκεία. Για τι κεράς-λες ανταβά, πρέπει τι ντικχάς σο πακιάνα ντα σο κερένα. Ο Ιησούς βακερντάς: «Οντουλένταρ σο κερένα κα αγαβέν-λεν». Επίσης, βακερντάς: «Κάθε λατσσό δέντρος κερέλα λατσσέ φρούτα». (Ματθαίος 7:​16, 17) Ανταβά να μανγκέλα τι βακερέλ ότι οντουλά σο ντένα λατρεία ι Ντεβλές ισί τέλειοι. Όμως, προσπαθίνενα πάντα τι κερέν οντουβά σο ισί σωστός. Ακανά κα ντικχάς μερικά πράγματα σο κα βοηθίνεν-αμέν τι αγαβάς καλά τζενέ τθερένα ι αληθινή θρησκεία.

6, 7. Σόσκε η αληθινή θρησκεία βασίντιβελα κι Αγία Γραφή; Σο σικλιαρέλα-αμέν οντουβά σο κερέλας ο Ιησούς;

⁶ Αμαρί θρησκεία πρέπει τι βασίντιβελ κι Αγία Γραφή. Η Γραφή βακερέλα: «Ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή, ντα οτθάρ ισί λατσσί για τι σικλιαρέλ-αμέν, για τι ντελ-αμέν συμβουλές, για τι τσσουβάς σε εκ σειράς ο πράγματα, για τι διορθώνελ-αμέν δίκαια, ντα αντικάς ο τζενό ι Ντεβλέσκο τι αβέλ έτοιμος ντα τι μπορίνελ τι κερέλ κάθε λατσσό πράγμας». (2 Τιμόθεο 3:​16, 17) Ο απόστολος Παύλος γραφιντάς κο Χριστιανοί: «Όταν ασουντέν ο λάφι ι Ντεβλέσκο αμένταρ, δεχτιντέν-λες, όχι σαρ ο λάφι τζενένγκο, αλλά, σαρ ισί μπαγιά, σαρ ο λάφι ι Ντεβλέσκο».  (1 Θεσσαλονικείς 2:​13) Η αληθινή θρησκεία βασίντιβελα σάντε κο Λάφι κι Ντεβλέσκο, δηλαδή κι Αγία Γραφή. Να βασίντιβελα κι τζενένγκε λάφια, κο έθιμα ή γιαβερέ πραγματέντε.

⁷ Σαρέ οντουλά σο σικλιαρντάς ο Ιησούς βασίντιβενας κο Λάφι κι Ντεβλέσκο. (Διάβανε Ιωάννης 17:​17) Μπουτ φαρ βακερέλας ο λάφια σο ισινέ γραμμέ κι Αγία Γραφή. (Ματθαίος 4:4, 7, 10) Ο αληθινοί υπηρέτες ι Ντεβλέσκε κερένα οντουβά σο κερέλας ο Ιησούς ντα βασίνενα σαρέ οντουλά σο σικλιαρένα κι Αγία Γραφή.

8. Κάστε πρέπει τι ντας λατρεία, σαρ σικλιαρντάς-αμέν ο Ιησούς;

⁸ Πρέπει τι ντας λατρεία σάντε ι Ιεχωβάς. Ο εδάφιος Ψαλμός 83:​18 βακερέλα: «Τούι, σο βακερένα τούκε Ιεχωβά, ισινάν ο πιο Μπαρό σαρί κι πφουβ». Ο Ιησούς μανγκέλας τι τζανέν ο τζενέ κον ισί ο αληθινός Ντεβέλ ντα σικλιαρντάς-λεν καβά ισί ο ναβ ι Ντεβλέσκο. (Διάβανε Ιωάννης 17:6) Ο Ιησούς βακερντάς: «Κο Ιεχωβά τι Ντεβλέστε πρέπει τι ντες λατρεία ντα σάντε λες πρέπει τι υπηρετίνες». (Ματθαίος 4:​10) Οτθάρ, επειδή ισινάμ υπηρέτες ι Ντεβλέσκε, κεράσα οντουβά σο κερέλας ο Ιησούς. Ντάσα λατρεία σάντε ι Ιεχωβάς, χρησιμοποιήνασα λέσκο ναβ ντα σικλιαράσα ι γιαβερέν καβά ισί ι Ντεβλέσκο ναβ ντα σο κα κερέλ βοβ αμένγκε.

9, 10. Σαρ σικαβάσα ότι μανγκάσα ο εκ ι γιαβερές;

⁹ Πρέπει τι μανγκάς μπαγιά ι τζενέν. Ο Ιησούς σικλιαρντάς πι μαθητέν τι μανγκέν ο εκ ι γιαβερές. (Διάβανε Ιωάννης 13:​35) Να τθερέλα σημασία κατάρ ισινάμ, σο συνήθειες τθεράσα ή άμα ισινάμ χουλανέ ή τσορορέ. Η αγάπη σο τθεράσα ο εκ ι γιαβερέσκε πρέπει τι κερέλ-αμέν τι αβάς ενωμέ σαρ πφραλά ντα πφενιά. (Κολοσσαείς 3:​14) Οτθάρ, να τζάσα κο τζένγκι τι μουνταράς τζενέν. Η Γραφή βακερέλα: «Ο τσσαβέ ι Ντεβλέσκε ντα ο τσσαβέ ι Μπενγκέσκε αγαντίντιβενα ακαλέ πραγμάσταρ: Κον να κερέλα ο σωστός νανέ κατά Ντεβέλ, ούτε οντουβά σο να μανγκέλα πι πφραλές». Επίσης, βακερέλα: «Πρέπει τι μανγκάς ο  εκ ι γιαβερές, όχι σαρ ο Κάιν, σο ισινέ κατά πφιρνό ντα μουνταρντάς πι πφραλές».​—1 Ιωάννη 3:​10-12· 4:​20, 21.

¹⁰ Ντάσα αμαρέ σαατίσταρ, αμαρέ ζοριάταρ ντα αμαρέ πραγματένταρ για τι βοηθίνας ντα τι ενθαρρύνας ο εκ ι γιαβερές. (Εβραίους 10:​24, 25) “Προσπαθίνασα τι κεράς ο λατσσό σαριλένγκε”.​—Γαλάτες 6:10.

11. Σόσκε πακιάσα ότι ο Ιησούς ισί οντουβά σο πουταρντάς ο ντρομ για τι πλησιάνας ι Ντεβλές;

¹¹ Πρέπει τι ντας καν ι Ιησούς σόσκε βοβ πουταρντάς ο ντρομ για τι πλησιάνας ι Ντεβλές. Η Γραφή βακερέλα: «Να μπορίνασα τι σώντιβας αντράλ καεκχέ γιαβερέσταρ, σόσκε να υπαρχίντιβελα γιαβέρ ναβ τελάλ κατά ουρανός σο ντιντιλό κο τζενέ, για τι σώντιβας». (Πράξεις 4:​12) Κο Κεφάλαιος 5 ανταλέ βιβλιόσκο, σικλιλάμ ότι ο Ιεχωβά μπουτσσαντάς ι Ιησούς για τι ντελ πι ζωή σαρ λύτρος οντουλέ τζενένγκε σο ντένα καν. (Ματθαίος 20:​28) Ο Ιεχωβά τραμπιντάς ι Ιησούς για τι κυβερνίνελ σαρ Βασιλιάς σαρί ι πφουβ. Οτθάρ, η Γραφή βακερέλα αμένγκε ότι πρέπει τι ντας καν ι Ιησούς άμα μανγκάσα τι τζουβντιάς για πάντα.​—Διάβανε Ιωάννης 3:36.

12. Σόσκε να ανακατούντιβασα κο πολιτικά πράγματα;

¹² Δεν πρέπει τι ανακατούντιβας κο πολιτικά πράγματα. Ο Ιησούς να ανακατούντιλο κο πολιτικά πράγματα. Όταν δικάνενας-λες, βακερντάς κο Ρωμαίος κυβερνήτης Πιλάτος: «Μι βασιλεία να τθερέλα καέκ σχέση ανταλέ ντουνιάσαρ». (Διάβανε Ιωάννης 18:​36) Σαρ ο Ιησούς, αντικάς αμέν-ντα ισινάμ πιστοί κι Βασιλεία κι Ντεβλέσκι σο ισί κο ουρανός, ντα οτθάρ, καλέ-ντα τθεμέστε τι τζουβντιάς, να ανακατούντιβασα κο πολιτικά πράγματα. Οκιά μπάνταρ όμως, η Γραφή βακερέλα αμένγκε ότι πρέπει τι ντας καν «κο μπαρέ εξουσίες», δηλαδή κο κυβερνήσεις. (Ρωμαίους 13:1) Ντάσα καν κο νόμοι σο τσσουβέλα αμαρό κράτος. Όμως, άμα εκ νόμος τζάλα κόντρα με το νόμοι ι Ντεβλέσκε, κεράσα οντουβά σο κερντέ ο απόστολοι. Βον βακερντέ:  «Πρέπει τι ασουνάς ι Ντεβλές σαρ άρχοντας παρά ι τζενέν».​—Πράξεις 5:​29· Μάρκος 12:17.

13. Καλά ισί ο λατσσέ αμπέρια ι Βασιλειάκε σο βακεράσα κο τζενέ;

¹³ Πακιάσα ότι σάντε η Βασιλεία ι Ντεβλέσκι μπορίνελα τι νασκιαρέλ ο προβλήματα ι ντουνιάσκε. Ο Ιησούς βακερντάς ότι ο «λατσσέ αμπέρια ι βασιλειάκε» κα βακέρντιβενας σαρί κι πφουβ. (Διάβανε Ματθαίος 24:​14) Καέκ κατά τζενένγκε κυβερνήσεις να μπορίνελα τι κερέλ σαρέ οντουλά σο κα κερέλ αμένγκε η Βασιλεία ι Ντεβλέσκι. (Ψαλμός 146:3) Ο Ιησούς σικλιαρντάς-αμέν τι προσευχίντιβας ανταλέ Βασιλειάκε όταν βακερντάς: «Τι αβέλ τι βασιλεία. Τι αβέλ οντουβά σο μανγκέσα, σαρ αβέλα-πες κο ουρανός, αντικάς τι αβέλ-πες οπράλ κι πφουβ-ντα». (Ματθαίος 6:​10) Η Γραφή βακερέλα αμένγκε ότι η Βασιλεία ι Ντεβλέσκι κα καταστραφίνελ σαρέ ι τζενένγκε κυβερνήσεις ντα «βόι κα ατσσόλ για πάντα».​—Δανιήλ 2:44.

14. Καλά τζενέ βακερέσα τούι ότι τθερένα ι αληθινή θρησκεία;

¹⁴ Αφού διαβαντάν οντουλά σο ισί πιο οπρέ, σκέφτινε: “Καλά τζενέ βασίνενα οντουλά σο σικλιαρένα κι Γραφή; Καλά τζενέ βακερένα κο γιαβερά ο ναβ ι Ντεβλέσκο; Καλά τζενέ μανγκένα μπαγιά ο εκ ι γιαβερές ντα πακιάνα ότι ο Ντεβέλ μπουτσσαντάς ι Ιησούς για τι σώνελ-αμέν; Καλά τζενέ να ανακατούντιβενα κο πολιτικά πράγματα; Καλά τζενέ βακερένα ότι σάντε η Βασιλεία ι Ντεβλέσκι μπορίνελα τι νασκιαρέλ αμαρέ προβλήματα;” Σάντε ο Μάρτυρες του Ιεχωβά κερένα-λεν σαρέ ανταλά.​—Ησαΐας 43:​10-12.

15. Σο πρέπει τι κεράς για τι χαιρίνελ ο Ντεβέλ με το τρόπος σο ντάσα-λες λατρεία;

¹⁵ Να ερεσέλα σάντε τι πακιάς ότι υπαρχίντιβελα ο Ντεβέλ. Ατζέ-ντα ο δαίμονες πακιάνα ότι υπαρχίντιβελα ο Ντεβέλ, αλλά να ντένα-λες καν. (Ιακώβου 2:​19) Άμα μανγκάσα τι χαιρίνελ ο Ντεβέλ με το τρόπος σο ντάσα-λες λατρεία,  πρέπει όχι σάντε τι πακιάς ότι υπαρχίντιβελα αλλά τι κεράς-ντα οντουλά σο βακερέλα.

16. Σόσκε δεν πρέπει τι τθεράς καέκ σχέση ι ψεύτικε θρησκειάσαρ;

¹⁶ Για τι κεράς ι Ντεβλές τι χαιρίνελ με το τρόπος σο ντάσα-λες λατρεία, δεν πρέπει τι τθεράς καέκ σχέση ι ψεύτικε θρησκειάσαρ. Ο προφήτης Ησαΐας γραφιντάς: «Νικιόν λάταρ, ατσσικιαρέν τουμαρό νεαυτός πάκι». (Ησαΐας 52:​11· 2 Κορινθίους 6:​17) Ακ σόσκε δεν πρέπει τι κεράς καέκ πράγμας σο τθερέλα τι κερέλ ι ψεύτικε θρησκειάσαρ.

17, 18. Σο ισί η «Βαβυλώνα η Μπαρί», ντα σόσκε πρέπει σουγκό τι νασάς λάταρ;

¹⁷ Σο ισί η ψεύτικη θρησκεία; Ισί η κάθε θρησκεία σο σικλιαρέλα-αμέν τι ντας λατρεία ι Ντεβλές με τρόπος σο τζάλα κόντρα λέσκε Λαφίστε. Η Γραφή ντέλα σαρέ ανταλέ ψεύτικε θρησκειέντε ο ναβ «Βαβυλώνα η Μπαρί». (Αποκάλυψη 17:5) Σόσκε; Μετά κατά Κατακλυσμός σο αβιλό-πες αζομάν σο τζουβντιόλας ο Νώε, ο τζενέ σο μπεσένας κι πόλη της Βαβυλώνας πακιάνας μπουτέ ψεύτικε πραγματέντε. Σοράν, οντουλά πράγματα αρχισάλε τι πακιάν-λεν μπουτ τζενέ σαρί κι πφουβ. Για παράδειγμας, ο τζενέ σο μπεσένας κι Βαβυλώνα ντένας λατρεία σε τριάδες, δηλαδή τρινέ ντεβλέντε μαζί. Αντιβές-ντα, μπουτ θρησκείες σικλιαρένα ότι ο Ντεβέλ ισί Τριάδα, αλλά η Αγία Γραφή σικλιαρέλα ξεκάθαρα ότι υπαρχίντιβελα σάντε εκ αληθινός Ντεβέλ, ο Ιεχωβά, ντα ότι ο Ιησούς ισί λέσκο Τσσαβό. (Ιωάννης 17:3) Επίσης, ο τζενέ σο μπεσένας κι Βαβυλώνα, πακιάνας ότι, όταν μερέλα εκ τζενό, λέσκο γκι συνεχίνελα τι τζουβντιόλ κάπου γιαβερτθέ ντα ότι μπορεί τι βασανίντιβελα κι κόλαση. Ανταβά νανέ μπαγιά.​—Ντικχ ο Σημειώσεις 14, 17 ντα 18 κο παλαϊνέ σελίδες.

¹⁸ Ο Ντεβέλ βακερντάς ότι ατζεχάνικ σαρέ ο ψεύτικες θρησκείες κα καταστραφίντιβεν. (Αποκάλυψη 18:8) Αγαντάν σόσκε πρέπει τι νασές σουγκό κατά ψεύτικη θρησκεία; Ο Ιεχωβά Ντεβέλ μανγκέλα τι κερές-λες ανταβά ακανά σο τθερέσα χρόνος.​—Αποκάλυψη 18:4.

19. Όταν κα αποφασίνες τι υπηρετίνες ι Ιεχωβάς, σαρ κα βοηθίνελ-τουτ βοβ;

 ¹⁹ Όταν κα αποφασίνες τι μουκχές ι ψεύτικη θρησκεία ντα τι υπηρετίνες ι Ιεχωβάς, κάποιοι τι αμαλένταρ ή τι τζενένταρ μπορεί μα τι αγαβέν σόσκε λιντάν ανταγιά απόφαση ντα μπορεί τι ανέν τούκε προβλήματα. Αλλά ο Ιεχωβά να κα μουκχέλ-τουτ. Κα αβές αντρέ λέσκε φαμιλιάτε. Οτθέ κα αρακχές εκατομμύρια τζενέν σο μανγκένα μπαγιά ο εκ ι γιαβερές. Επίσης, κα τθερές ι ελπίδα τι τζουβντιός για πάντα κο νεβό ντουνιάς κι Ντεβλέσκο. (Μάρκος 10:​28-30) Μερικοί τι αμαλένταρ ντα τι τζενένταρ σο να μανγκένα τι υπηρετίνες ι Ιεχωβάς μπορεί πιο σοράν τι μανγκέν τι διαβάνεν ι Αγία Γραφή.

20. Σόσκε ισί σημαντικός τι ντες λατρεία ι Ντεβλές με το σωστός τρόπος;

²⁰ Ατζεχάνικ, ο Ντεβέλ κα νασκιαρέλ σαρό ο πφιρνιπέ ντα λέσκι Βασιλεία κα κυβερνίνελ ι πφουβ. (2 Πέτρου 3:9, 13) Αζομάν η ζωή κα αβέλ μπουτ σουκάρ! Σαρέ κα ντεν λατρεία ι Ιεχωβάς σαρ μανγκέλα βοβ. Οτθάρ, ισί σημαντικός τι αρχίνες από ακανά τι ντες λατρεία ι Ντεβλές με το σωστός τρόπος.