Ο Δεύτερος Γράμμας σο Γραφιντάς ο Πέτρος 3:1-18
3 Πφραλάλεν, ανταβά ισί ακανά ο δεύτερος γράμμας σο γραφίναβα τουμένγκε. Σαρ κο πρώτος γράμμας, εμ ανταλέστε μανγκάβα τι ανάβ τουμαρέ γκοντιάτε πράγματα για τι μπορίνεν τι σκεφτίνεν γκοντιαβέρ τροπόσαρ.
2 Κεράβα-λες ανταβά για τι ντεν-τουμέν γκοντί ο λάφια σο βακέρντιλε κο πουρανέ μπρεσά κατά άγιοι προφήτες ντα ι εντολή ι Κυριόσκι σο Σώνελα-αμέν. Ανταγιά εντολή ντιντιλί αντράλ τουμαρέ αποστολόνταρ.
3 Τι τζανέν ακαβά σημαντικός πράγμας: Κο τελευταία ντιβεσά κα αβέν τζενέ σο κα πρασάν ο λατσσέ πράγματα ντα κα πφιρέν αντικάς σαρ μανγκέλα λένγκο γκι.
4 Βον κα βακερέν: «Ντινάς πο λάφι ότι κα βουρτίνελ, αλλά κάι ισί; Οντουλέ ντιβεσέσταρ σο αμαρέ παππούδες σοτέ ο σοϊπέ ι μεριμάσκο, σαρέ ο πράγματα ατσσιλέ αντικάς σαρ ισινέ κάνα ο Ντεβέλ λατσσαρντάς ι ντουνιάς».
5 Ανταλά τζενέ να μανγκένα τι ντεν-πες γκοντί ότι κο πουρανέ μπρεσά υπαρχίντιβελας ο ουρανός ντα η πφουβ ντα ότι ι Ντεβλέσκε λαφίσαρ η πφουβ τσσουβντιλί αβριάλ κατά πανί ντα ισινέ πανί εμ οπράλ εμ τελάλ κατά πφουβ.
6 Ανταλά πράγματα καταστραφιντέ ι τζενέν αζομάν. Ανταβά αβιλό-πες κάνα ο πανί ιτσσαρντάς σαρί ι πφουβ.
7 Αντράλ κατά λάφι ι Ντεβλέσκο ο ουρανός ντα η πφουβ σο υπαρχίντιβενα ακανά ισί για τι πφαμπόν κι γιακ* ντα ατσσόνα μέχρι κο ντιβές σο κα κρίνελ ο Ντεβέλ ι τζενέν ντα κα καταστραφίνελ ι πφιρνέν.*
8 Όμως, μα μπιστρέν, πφραλάλεν, ότι ι Ιεχωβάσκε* εκ ντιβές ισί σαρ χίλια μπρεσά ντα χίλια μπρεσά σαρ εκ ντιβές.
9 Ο Ιεχωβά* να αργίνελα τι κερέλ οντουβά σο βακερντάς, σαρ πακιάνα μερικοί. Οκιά μπάνταρ, κερέλα υπομονή τουμέντζαρ επειδή να μανγκέλα τι καταστραφίντιβελ καέκ αλλά τι μετανιώνεν σαρέ.
10 Όμως, ο ντιβές ι Ιεχωβάσκο* κα αβέλ σαρ τσορ.* Οντουβά ντιβές ο ουρανός κα χασάρντιβελ ντα κα κερέλ ζουρανό θόρυβος ντα ο πράγματα κο ουρανός ντα κι πφουβ κα πφαμπόν ντα κα καταστραφίντιβεν, ντα η πφουβ ντα οντουλά σο αβένα-πες λάτε κα σικάντιβεν.
11 Αφού σαρέ ανταλά κα καταστραφίντιβεν ασακέ τροπόσαρ, σκεφτίνεν σο τζενέ πρέπει τι αβέν τουμέν. Πρέπει τι αβέν τζενέ σο τθερένα άγια συμπεριφορά ντα τι κερέν πράγματα σο σικαβένα αφοσίωση κο Ντεβέλ,
12 καζόμ μπεσένα τι αβέλ ο ντιβές ι Ιεχωβάσκο* ντα τθερένα-λες συνέχεια τουμαρέ γκοντιάτε.* Αντράλ οντουλέ ντιβεσέσταρ ο ουρανός κα καταστραφίντιβελ αντρέ κι γιακ, ντα ο πράγματα κο ουρανός ντα κι πφουβ κα πφαμπόν ντα κα λιώνεν!
13 Αλλά αμέν μπεσάσα τι αβέλ νεβό ουρανός ντα νεβί πφουβ σαρ βακερντάς ο Ντεβέλ, ντα οτθέ κα αβέλ πάντα δικαιοσύνη.
14 Οτθάρ, πφραλάλεν, αφού μπεσένα ανταλέ πραγματένγκε, τι κερέν ο πο λατσσό σο μπορίνενα, ντα αντικάς ο Ντεβέλ τι ντικχέλ κο τέλος ότι ισινέν ντιπ πάκι, ντιπ σωστοί ντα ότι τθερένα ειρήνη λέσαρ.
15 Ντα τι ντικχέν ι υπομονή αμαρέ Κυριόσκι ότι ισί σωτηρία, αντικάς σαρ γραφιντάς τουμένγκε ο Παύλος-ντα, αμαρό αγαπημέ πφραλ, ι γκοντιαβέρ λαφίντζαρ σο σικαντάς λέσκε ο Ντεβέλ.
16 Γραφιντάς ανταλέ πραγματένγκε σαρέ πι γραμματέντε. Όμως, μερικά πράγματα ανταλέ γραμματέντε ισί δύσκολα, ντα οντουλά σο να αγαβένα λατσσές* ντα σο ισί μπίζουρανε κι πίστη αλλάνενα λένγκο νόημας, σαρ κερένα κο γιαβερά-ντα λάφια κι Γραφιάκε, ντα επειδή κερένα-λες ανταβά κα καταστραφίντιβεν.
17 Οτθάρ, τουμέν, πφραλάλεν, αφού τζανένα ανταλά πράγματα πο τζανγκλέ, τι αρακχαβέν-τουμέν. Αντικάς, να κα χουχάντιβεν γιεκ λέντζαρ κατά ψεύτικα πράγματα σο σικλιαρένα ο πφιρνέ τζενέ ντα να κα τσσιναβέν τι ατσσόν σταθεροί.
18 Αλλά τι κερέν ο πο λατσσό για τι λεν ατζέ πο μπουτ μπαρό λατσσιπέ αμαρέ Κυριόσταρ κατά Ιησούς Χριστός σο Σώνελα-αμέν ντα τι σικλιόν ατζέ πο μπουτ λέσκε. Λέστε τι αβέλ η δόξα εμ ακανά εμ για πάντα. Αμήν.
Υποσημειώσεις
^ Γιαβέρσοϊ «γιανγκ».
^ Γιαβέρσοϊ «γκεραλέν, μπίλατσσεν».
^ Γιαβέρσοϊ «τσορνό».
^ Γιαβέρσοϊ «ντα μανγκένα σαρέ τουμαρέ γκίσαρ τι αβέλ, αγαβένα ότι αβέλα μπουτ σουγκό».
^ Γιαβέρσοϊ «ντα οντουλά σο να σικλιόνα».
