Ο Δεύτερος Γράμμας σο Μπουτσσάντιλο κο Κορίνθιοι 11:1-33
11 Παρόλο σο ντικχίντιβαβα σαρ εκ τζενό σο νανέ λογικός, κα μανγκάβας τι αντιχίνεν-μαν. Αλλά ισί μπαγιά ότι τουμέν αντιχίνενα-μαν.
2 Πφαμπάβα τουμένγκε μπουτ, σαρ πφαμπόλα τουμένγκε ο Ντεβέλ, σόσκε με ο ίδιος νισανλιντόμ-τουμέν εκχέ μουρσέσαρ για τι σικαβάβ-τουμέν κο Χριστός σαρ εκ τερνί τσσάι.*
3 Αλλά νταράβα ότι οντουβά σο αβιλό-πες κι Εύα, σο χουχαντάς-λα ο σαπ πι πφιρνιμάσαρ,* μπορεί τι αβέλ-πες τουμένγκε-ντα, ότι τουμαρί γκοντί μπορεί τι χουχάντιβελ ντα τι χασαρέν τουμαρί πάκι ντα αληθινή αγάπη σο τθερένα ι Χριστόσκε.
4 Βακεράβα-λες ανταβά επειδή άμα εκ τζενό αβέλα ντα μουτθαβέλα γιαβερέ Ιησούς οντουλέσταρ σο μουτθαντάμ αμέν ή άμα οδηγίνελα τουμαρί γκοντί εκ γιαβέρ ζορ σο ισί διαφορετική κατά ζορ* σο οδηγίνελα-τουμέν μέχρι ακανά ή άμα εκ τζενό ανέλα γιαβερά λατσσέ αμπέρια οντουλένταρ σο δεχτιντένας, ανταλά πράγματα αντιχίνενα-λεν εύκολα.
5 Πακιάβα ότι τίποτα να σικαβέλα ότι ισινόμ πο τελέ τουμαρέ αποστολόνταρ σο κερένα-πες ότι ισί μπουτ οπρέ.
6 Αλλά ατζέ-ντα άμα να κεράβα λάφι μπουτ λατσσές, τζανάβα ι Ντεβλές. Ισί μπαγιά ότι ανταβά σικαντάμ-λες τουμένγκε ντιπ λατσσές σαρέ κο πράγματα.
7 Μουτθαντόμ τουμένγκε ο λατσσέ αμπέρια ι Ντεβλέσκε ντα να μανγκλόμ τουμένταρ λοβέ. Τσσουντόμ μο νεαυτός αζόμ τελέ για τι κεράβ λατσσιπέ τουμένγκε. Ισί αμαρτία ανταβά σο κερντόμ;
8 Γιαβερέ κχανγκιρίνταρ λιντόμ βοήθεια, ντα ανταβά ισί σαρ τι τσορντόμ λένταρ για τι υπηρετίναβ τουμέν.
9 Όμως, κάνα ισινόμας τουμέντζαρ ντα τθεράβας ανάγκη, να μανγκλόμ καεκχέσταρ τίποτα, σόσκε ο πφραλά σο αβιλέ κατά Μακεδονία βοηθιντέ-μαν σαρέ κο ανάγκες σο τθεράβας. Βα, κερντόμ ο πο λατσσό για μα τι μανγκάβ τουμένταρ τίποτα ντα να κα τσσιναβάβ τι κεράβ-λες ανταβά.
10 Βακεράβα ι αλήθεια σαρ ο Χριστός, οτθάρ να κα τσσιναβάβ τι ισαράβ-μαν ανταλέσκε σαρί κι Αχαΐα.
11 Σόσκε να μανγκλόμ τουμένταρ τίποτα; Επειδή να μανγκάβα-τουμέν; Ο Ντεβέλ τζανέλα ότι μανγκάβα-τουμέν.
12 Ισί τζενέ σο ισαρένα-πες ντα βακερένα ότι ισί απόστολοι σαρ ισινάμ αμέν. Οτθάρ, να κα τσσιναβάβ τι κεράβ ανταβά σο κεράβα για μα τι τθερέν λόγος τι ισαρέν-πες.
13 Ασακέ τζενέ ισί ψεύτικοι απόστολοι, χουχαβένα ι γιαβερέν οντουλέντζαρ σο κερένα, ντα κερένα-πες απόστολοι ι Χριστόσκε.
14 Ανταβά να κερέλα-μαν τι σαστίναβ, σόσκε ατζέ-ντα ο Μπενγκ κερέλα-πες λατσσό άγγελος.
15 Οτθάρ, νανέ παράξενος σο λέσκε υπηρέτες κερένα-πες ότι κερένα ο σωστός. Όμως, κο τέλος κα κρίντιβεν οντουλένταρ σο κερντέ.
16 Βακεράβα πάλι: Καέκ μα τι πακιάλ ότι να ισινόμ λογικός. Όμως, δεχτίνεν-μαν ατζέ-ντα άμα πακιάνα ότι να ισινόμ λογικός, ντα αντικάς τι ισαράβ-μαν με-ντα χάνικ.
17 Να κεράβα λάφι ακανά σαρ κα κερέλας ο Κύριος, αλλά ισαράβα-μαν σαρ κα ισαρέλας-πες εκ τζενό σο νανέ λογικός.
18 Αφού μπουτ τζενέ ισαρένα-πες ι ντουνιάσκε πραγματένγκε, κα ισαράβ-μαν με-ντα.
19 Αφού τουμέν βακερένα ότι ισινέν αζόμ λογικοί, αντιχίνενα χαράσαρ ι τζενέν σο νανέ λογικοί.
20 Αντιχίνενα ατζέ-ντα οντουλέν σο κερένα-τουμέν τι αβέν δούλοι, οντουλέν σο χάνα τουμαρέ περιουσίες,* οντουλέν σο λένα τουμένταρ ζορίσαρ σο-ντα τθερένα, οντουλέν σο βακερένα ότι ισί πο οπρέ τουμένταρ ντα οντουλέν σο ντένα-τουμέν σαμάρι κο μούι.
21 Λατζάσα σο βακεράσα-λεν ανταλά, σόσκε μπορεί τι ντικχίντιβασα μπίζουρανε τουμαρέ γιακχίντε.
Αλλά άμα γιαβερά τζενέ να λατζάνα τι ισαρέν-πες, με-ντα να λατζάβα τι ισαράβ-μαν, ατζέ-ντα άμα κα ντικχίντιβελας εκχέ τζενέσκε ότι να ισινόμ λογικός.
22 Εβραίοι ισί; Με-ντα ισινόμ. Ισραηλίτες ισί; Με-ντα ισινόμ. Αστάρντιβενα κατά Αβραάμ; Με-ντα αστάρντιβαβα λέσταρ.
23 Υπηρέτες ι Χριστόσκε ισί; Κεράβα λάφι σαρ τζενό σο να τθερέλα γκοντί ντα βακεράβα ότι με υπηρετιντόμ-λες πο μπαρέ τροπόσαρ: κερντόμ πο μπουτ πράγματα κι υπηρεσία κι Ντεβλέσκι, τσσουντέ-μαν κι φυλακή πο μπουτ φαρ λένταρ, νταπλέ-μαν μπερεκέτι φαρ ντα ερεσλόμ μπουτ φαρ κο μεριπέ.
24 Ο Ιουδαίοι παντς φαρ νταπλέ-μαν ντα κι κάθε φαρ ντινέ-μαν 39 φαρ βουρδαλόσαρ,*
25 τριν φαρ νταπλέ-μαν καστέντζαρ, εκ φαρ φουρτιντέ μάνγκε μπαρά, τριν φαρ ισινόμας οπράλ καραβίστε σο καταστραφισάλο κι ντεριάβ, εκ σαστό ντιβές* ισινόμας ντιπ αντρέ κι ντεριάβ.
26 Μπουτ φαρ κερντόμ ταξίδια, νακχλόμ δυσκολίες λενιέντε, δυσκολίες κατά τσορά,* δυσκολίες μι λαόσταρ, δυσκολίες κατά τζενέ σο ισί γιαβερέ τθεμένταρ, δυσκολίες κι πόλη, δυσκολίες κι ερημιά, δυσκολίες κι ντεριάβ, δυσκολίες ψεύτικε πφραλένταρ,
27 κεράβας πφαρί μπουτί ντα κχινιάβας-μαν, μπουτ φαρ ισινέ ντιβεσά σο ατσσάβας τζανγκαντό, ισινόμας μποκχαλό ντα μεράβας πανίσκε, μπουτ φαρ να τθεράβας τι χαβ, ισινόμας αντρέ κο σιλ ντα να τθεράβας σέα τι ιριάβ.*
28 Εκτός ανταλέ πραγματένταρ, κάθε ντιβές χάλα-μαν ο άγχος σαρέ ι κχανγκιρίνγκε.
29 Κον ισί μπίζουρανο, ντα με να ισινόμ μπίζουρανο; Κον χασαρέλα πι πίστη, ντα με να χολιάναβα;
30 Άμα κα ισαράβ-μαν, κα ισαράβ-μαν ι πραγματένγκε σο σικαβένα ότι ισινόμ μπίζουρανο.
31 Ο Ντεβέλ σο ισί ο Ντατ ι Κυριόσκο, ι Ιησούσκο, Οντουβά σο πρέπει τι δοξάντιβελ για πάντα, τζανέλα ότι να βακεράβα ψέματα.
32 Οντουβά σο κερέλας κουμάντος κι Δαμασκός ντα σο υπηρετίνελας ι βασιλιάς Αρέτας τσσουντάς τζενέν τι αρακχαβέν ι πόλη για τι ασταρέν-μαν,
33 αλλά ο πφραλά τσσουντέ-μαν αντρέ εκχέ σεβλιάτε* ντα γουλιαρντέ-μαν εκχέ παραθυρόσταρ σο ισινέ κο βουτσσέ ντουβάρια, ντα αντικάς νασλόμ λέσκε βαστένταρ.
Υποσημειώσεις
^ Ο πουρανό μπαλαμανό λάφι μανγκέλα τι σικαβέλ εκχέ τζουβλιά σο να σοτάς μουρσέσαρ.
^ Γιαβέρσοϊ «γκεραλιμάσαρ, μπίλατσσιμασαρ».
^ Γιαβέρσοϊ «κατά ζορ ι Ντεβλέσκι».
^ Δηλαδή ο πράγματα σο τθερένα.
^ Μπορεί τι ντινέ-λες εκχέ καστέσαρ ή εκχέ δερμάτινε βουρδαλόσαρ. Ο λάφι «βούρδαλος» βακέρντιβελα εμ «μαστίγιος».
^ Κι Πουρανί Μπαλαμανί βακέρντιβελας «εκ ντισάρα ντα εκ ιράτ».
^ Γιαβέρσοϊ «τσορνέ».
^ Γιαβέρσοϊ «ντα ισινόμας νανγκό».
^ Γιαβέρσοϊ «κοφινάτε».
