Ο Δεύτερος Γράμμας σο Μπουτσσάντιλο κο Κορίνθιοι 1:1-24
1 Ανταβά γράμμας μπουτσσάντιβελα μάνταρ κατά Παύλος, σο ισινόμ απόστολος ι Χριστόσκο, ι Ιησούσκο, αντικάς σαρ μανγκέλα ο Ντεβέλ, ντα κατά Τιμόθεος αμαρέ πφραλέσταρ. Ανταβά γράμμας ισί ι Ντεβλέσκε κχανγκιριάκε κι Κόρινθος ντα σαρέ ι αγιόνγκε σο ισί σαρί κι Αχαΐα:
2 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
3 Δοξασμέ τι αβέλ ο Ντεβέλ σο ισί ο Ντατ αμαρέ Κυριόσκο, ι Ιησού Χριστόσκο, ο Ντατ σο τζιτζίνελα* ι τζενένγκε αντράλ πι γκίσταρ ντα ο Ντεβέλ σο κοβλιαρέλα λένγκι ντουκχ* σο-ντα τι νακχένα.
4 Βοβ κοβλιαρέλα αμαρί ντουκχ σαρέ κο στεναχώριες σο τθεράσα. Ντα επειδή ο Ντεβέλ κοβλιαρέλα αμαρί ντουκχ, μπορίνασα αμέν-ντα τι κοβλιαράς ι γιαβερένγκι ντουκχ σαρέ κο στεναχώριες σο τθερένα.
5 Τσσίντασα μπουτ ι Χριστόσκε ντα κοβλιόλα μπουτ αμαρί ντουκχ χάρη κο Χριστός.
6 Οτθάρ, κάνα τθεράσα στεναχώριες, κοβλιόλα τουμαρί ντουκχ ντα σώντιβενα. Ντα κάνα κοβλιόλα αμαρί ντουκχ, κοβλιόλα τουμαρί-ντα ντουκχ, ντα ανταβά βοηθίνελα-τουμέν τι νταϊντίνεν ο ίδια πράγματα σο τσσίντασα αμέν-ντα.
7 Τθεράσα μπαρί σιγουριά τουμένγκε, σόσκε τζανάσα ότι, τσσίντενα ο ίδια πράγματα σο τσσίντασα αμέν ντα κα κοβλιόλ τουμαρί ντουκχ σαρ κοβλιόλα αμαρί-ντα.
8 Πφραλάλεν, μανγκάσα τι τζανέν λατσσές σο στεναχώρια νακχλάμ κι Ασία.* Τσσιντιντάμ αζόμ μπουτ σο ναστί νταϊντίναας αμαρέ ζοριάσαρ ντα νταράας μπουτ ατζέ-ντα αμαρέ ζωγιάκε.
9 Πακιάας ότι κα μεράας. Ανταβά αβιλό-πες για μα τι ντας μπέσα αμαρέ νεαυτόστε, αλλά κο Ντεβέλ σο τζουβντιαρέλα ι μουλέν.
10 Σωντάς-αμέν κατά μεριπέ ντα κα σώνελ-αμέν, ντα ντάσα λέσκε μπέσα* ότι κα συνεχίνελ τι σώνελ-αμέν.
11 Μπορίνενα τουμέν-ντα τι βοηθίνεν-αμέν κάνα μολίνενα* ι Ντεβλές αμένγκε. Επειδή άμα μπουτ τζενέ κα κερέν προσευχή αμένγκε, ο Ντεβέλ κα ασουνέλ ντα κα σικαβέλ αμένγκε λατσσιπέ, ντα αντικάς μπουτ τζενέ κα βακερέν λέσκε ευχαριστώ.
12 Ισαράσα-αμέν σο τθεράσα πάκι συνείδηση,* σόσκε τζουβντιάσα εκ άγια ζωή ντα να ισινάμ ντουέ μουένγκε κάνα ισινάμ ι τζενέντζαρ κο ντουνιάς, ντα ατζέ πο μπουτ κάνα ισινάμ τουμέντζαρ. Σικαβάσα λατσσιπέ σαρ ο Ντεβέλ ντα να βασίντιβασα κι τζενένγκε γκοντιαβέρ λάφια.
13 Να γραφίνασα τουμένγκε καεκχέ γιαβερέ πραγμάσκε, αλλά σάντε ι πραγματένγκε σο διαβάνενα* ντα αγαβένα, ντα πακιάβα ότι να κα τσσιναβέν τι αγαβέν ντιπ λατσσές* ανταλά πράγματα.
14 Μερικοί τουμένταρ αγαντέν ότι αμέν ισινάμ εκ λόγος για τι ισαρέν-τουμέν, σαρ τουμέν-ντα κα αβέν εκ λόγος για τι ισαράς-αμέν κο ντιβές αμαρέ Κυριόσκο, κι Ιησούσκο.
15 Οτθάρ, επειδή ισινόμας σίγουρος ανταλέσκε, μανγκάβας τι αβάβ τουμέντε εκ δεύτερη φαρ για τι χαιρίνεν πάλι,*
16 σόσκε μανγκάβας τι αβάβ τουμέντε κάνα κα τζαβ κάρινγκ κι Μακεδονία, τι βουρτίναβ τουμέντε κατά Μακεδονία, ντα σοράν σο κα τζαβ κι Ιουδαία, τι αβέν τουμέν-ντα παλά-μάντε μέχρι εκχέ τθανέστε.
17 Να ισινέ σάντε λάφια σο βακερντόμ ότι μανγκάβα τι αβάβ. Ντα να σκεφτιντόμ τι κεράβ οντουβά σο μανγκάβας με, ντα αντικάς τι βακεράβ πρώτα «Βα» ντα σοράν «Νάα».
18 Μπορίνενα τι ντεν μπέσα κο Ντεβέλ ότι οντουβά σο βακεράσα τουμένγκε ισί μπαγιά. Να βακεράσα πρώτα «βα» ντα σοράν «νάα».
19 Ο Τσσαβό ι Ντεβλέσκο-ντα, ο Ιησούς Χριστός, σο λέσκε μουτθαντάμ τουμένγκε αμέν, δηλαδή με ο Σιλουανός* ντα ο Τιμόθεος, να βακερέλα πρώτα «βα» ντα σοράν «νάα», αλλά ο «βα» σο βακερέλα ισί πάντα «βα».
20 Σο-ντα λάφι ντινάς ο Ντεβέλ αβιλό «βα» αντράλ κατά Ιησούς. Άκ’ σόσκε λέσκε ναβέστε βακεράσα κο Ντεβέλ «Αμήν», για τι δοξάνας-λες.
21 Αλλά οντουβά σο σικαβέλα σίγουρα ότι τουμέν ντα αμέν ισινάμ ι Χριστόσκε ντα οντουβά σο τραμπιντάς-αμέν ισί ο Ντεβέλ.
22 Βοβ τσσουντάς πι σφραγίδα οπρ’ αμέντε ντα ντινάς πο πνεύμας αντρέ αμαρέ γκίστε. Ανταλέσαρ σο κερντάς σικαβέλα αμένγκε ότι σίγουρα κα ντελ-αμέν οντουβά σο κα αβέλ.
23 Επειδή μανγκάβα τι γλιτώναβ-τουμέν κατά στεναχώρια, να αβιλόμ ατζέ κι Κόρινθος. Ο Ντεβέλ τζανέλα ότι ανταβά ισί μπαγιά.
24 Αμέν να κεράσα κουμάντος τουμαρί πίστη, αλλά υπηρετίνασα γιεκ τουμέντζαρ για τι αβέν χαρούμενοι τουμέν, σόσκε τουμαρί πίστη κερέλα-τουμέν τι ατσσόν τουμαρέ πιντρέντε.
Υποσημειώσεις
^ Γιαβέρσοϊ «σο λοκχιαρέλα λένγκο γκι, σο ντέλα-λεν ζορ».
^ Κι Πουρανί Μπαλαμανί ισινέ ο λάφι «ελπίδα».
^ Κι Πουρανί Μπαλαμανί ισινέ ο λάφι «δέηση». Ισί εκ τατί προσευχή σο κερέλα εκ τζενό ντιπ αντράλ πι γκίσταρ ντα νικαβέλα μπουτ ζουρανέ συναισθήματα.
^ Ή μπέκιμ «ι πραγματένγκε σο τζανένα-λεν λατσσές».
^ Κι Πουρανί Μπαλαμανί βακέρντιβελας «τι αγαβέν μέχρι κο τέλος».
^ Ή μπέκιμ «τι αβάβ τουμέντε για τι λεν λατσσιπέ ντούι φαρ».
^ Βακέρντιβελας Σίλας-ντα.
