Ο Πρώτος Γράμμας σο Γραφιντάς ο Πέτρος 1:1-25
1 Με ο Πέτρος, σο ισινόμ απόστολος ι Ιησού Χριστόσκο, γραφίναβα τουμένγκε σο ισινέν για χάνικ ανταλέ ντουνιάστε ντα ισινέν τρουγιμέ κο Πόντος, κι Γαλατία, κι Καππαδοκία, κι Ασία ντα κι Βιθυνία. Τουμέν τραμπίντιλεν
2 αντικάς σαρ τθερέλας πι γκοντιάτε ο Ντεβέλ, αμαρό Ντατ. Ντινάς-τουμέν ο άγιος πνεύμας για τι αγιάνελ-τουμέν, ντα αντικάς τι ντεν-λες καν ντα τι αβέν πάκι αντράλ κατά ρατ ι Ιησού Χριστόσκο.
Προσευχίντιβαβα τι τθερέν ατζέ πο μπουτ μπαρό λατσσιπέ ντα ειρήνη.
3 Δοξασμέ τι αβέλ ο Ντεβέλ σο ισί ο Ντατ αμαρέ Κυριόσκο, ι Ιησού Χριστόσκο, σόσκε τζιτζισάλο* αμένγκε μπουτ ντα κερντάς-αμέν τι μπιάντιβας πάλι για τι τθεράς εκ τζουβντί ελπίδα. Τθεράσα ανταγιά ελπίδα επειδή ο Ιησούς Χριστός ιστίντιλο κατά μουλέ.
4 Ο Ντεβέλ κερντάς-αμέν τι μπιάντιβας πάλι για τι τθεράς εκ κληρονομιά σο να χαλάντιβελα, ισί ντιπ πάκι ντα ναστί καταστραφίντιβελα. Ο Ντεβέλ ατσσικιαρέλα ανταγιά κληρονομιά τουμένγκε κο ουρανός.
5 Η ζορ ι Ντεβλέσκι αρακχαβέλα-τουμέν σόσκε τθερένα πίστη για τι λεν ι σωτηρία σο ισί έτοιμη τι σικάντιβελ κο τελευταία ντιβεσά.
6 Οτθάρ, ισινέν μπουτ χαρούμενοι, ατζέ-ντα άμα χρειαζίντιβελα για χάνικ βακίτι τι νακχέν διάφορες δοκιμασίες σο ανένα τουμένγκε στεναχώρια.
7 Ανταλά νακχένα-λεν για τι σικάντιβελ ότι τουμαρί πίστη ατσσόλα ζουρανί κο δοκιμασίες, ντα εκ ασακί πίστη τθερέλα μπουτ πο μπαρί αξία κατά χρυσάφι σο χασάρντιβελα παρόλο σο νακχέλα* αντράλ κατά γιακ.* Ανταγιά πίστη κα κερέλ-τουμέν τι λεν ισαριπέ ντα δόξα κάνα κα σικάντιβελ ο Ιησούς Χριστός.
8 Παρόλο σο να ντικχλέν-λες ποτές, μανγκένα-λες. Παρόλο σο να ντικχένα-λες ακανά, σικαβένα πίστη λέστε, πουτάρντιβελα τουμαρό γκι ντα τθερένα μπαρί* χαρά.
9 Χάρη κι πίστη σο τθερένα κα σώντιβεν* χαράσαρ.
10 Ο προφήτες σο κερντέ λάφι ι Ντεβλέσκε μπαρέ λατσσιμάσκε σο ντιντιλό τουμέντε ρόντενας μπουτ λατσσές για τι αγαβέν καζόμ σημαντική ισί ανταγιά σωτηρία.
11 Ο Ντεβέλ αντράλ πι πνευμάσταρ βακερντάς λένγκε ότι ο Χριστός κα τσσίντελας μπουτ ντα σοράν κα δοξάντιβελας. Οτθάρ, βον προσπαθίνενας τι ρόντεν σο κα αβέλας-πες ι Χριστόσαρ ντα κάνα κα αβέλας-πες ανταβά.
12 Ο Ντεβέλ σικαντάς λένγκε ότι ο προφητείες σο βακερένας να γραφιντέ-λεν πουμένγκε αλλά τουμένγκε. Ο προφήτες γραφιντέ οντουλά σο μουτθάντιλε τουμένγκε, ντα τουμέν ασουντέν ανταλά πράγματα οντουλένταρ σο μουτθαντέ τουμένγκε ο λατσσέ αμπέρια αντράλ κατά άγιος πνεύμας σο ισί κατά ουρανός. Ατζέ-ντα ο άγγελοι μανγκένα μπουτ τι αγαβέν ανταλά πράγματα.
13 Οτθάρ, ετοιμάνεν τουμαρί γκοντί για τι κερέν μπουτ πράγματα. Ατσσόν γκοντιαβέρ σαρέ κο πράγματα. Μπεσέν με μπαρί σιγουριά ι μπαρέ λατσσιμάσκε σο κα λεν κάνα κα σικάντιβελ ο Ιησούς Χριστός.
14 Κάνα να τζανένας ι Ντεβλές, κερένας ο μπέτι πράγματα σο μανγκέλας τουμαρό γκι. Ακανά ισινέν τσσαβέ ι Ντεβλέσκε σο ντένα-λες καν, οτθάρ μα μουκχέν ανταλά πράγματα τι κερέν-τουμέν κουμάντος.
15 Αλλά σαρ ο Ντεβέλ σο ντινάς-τουμέν βίκος ισί Άγιος, αντικάς τουμέν-ντα τι αβέν άγιοι σαρέ οντουλέντε σο κερένα,
16 σόσκε ισί γραμμέ: «Πρέπει τι αβέν άγιοι, επειδή με ισινόμ άγιος».
17 Ντα άμα κερένα προσευχή κο Ντατ, σο κρίνελα ι κάθε εκχές οντουλένγκε σο κερέλα χωρίς τι ξεχωρίνελ ι τζενέν, τι σικαβέν οντουλέντζαρ σο κερένα ότι νταρένα κατά Ντεβέλ κο χάνικ ντιβεσά σο ισινέν ανταλέ ντουνιάστε.
18 Τζανένα ότι ο πράγματα σο χαλάντιβενα, σαρ ισί ο ασήμι ή ο χρυσάφι, να ελευθερωντέ-τουμέν κατά ζωή σο τουμαρέ παππούδες σικλιαρντέ-τουμέν τι τζουβντιόν σινανέ.
19 Αλλά ελευθερωντάς-τουμέν ο ρατ ι Χριστόσκο σο τθερέλα μπαρί αξία ντα σο ισί σαρ ο ρατ εκχέ πάκι μπρακέσκο σο να τθερέλα ελάττωμας.
20 Ισί μπαγιά ότι ο Χριστός τραμπίντιλο κατά Ντεβέλ πριν τι μπιάντιβεν τζενέ κι πφουβ, αλλά σικάντιλο κο τέλος κι ντιβεσένγκο χάρη τουμένγκε.
21 Αντράλ λέσταρ πακιαντέν κο Ντεβέλ, σο τζουβντιαρντάς-λες κατά μουλέ ντα ντινάς-λες δόξα, ντα αντικάς τι τθερέν πίστη ντα σιγουριά* κο Ντεβέλ.
22 Καθαρισάλεν* επειδή ντένα καν κο αληθινός σικλιαριπέ, οτθάρ-ντα μανγκένα μπαγιά* ι πφραλέν. Αλλά ακανά μανγκέν μπουτ ο εκ ι γιαβερές αντράλ τουμαρέ γκίσταρ.
23 Τουμέν μπιάντιλεν πάλι, αλλά ανταγιά φαρ αντράλ κατά ζορ ι άγιε πνευμάσκι σο ναστί καταστραφίντιβελα, αντράλ κατά λάφι ι Ντεβλέσκο σο τζουβντιόλα για πάντα.
24 Σαρ βακερέλα η Γραφή, «σαρέ ο τζενέ ισί σαρ τσαρ, ντα σαρό λένγκο σουκαριπέ* ισί σαρ εκ άγριος λουλούδι. Η τσαρ σουκιόλα ντα ο λουλούδι περέλα,
25 αλλά ο λάφι ι Ιεχωβάσκο* ατσσόλα για πάντα». Ντα ανταβά «λάφι» ισί ο λατσσέ αμπέρια σο μουτθάντιλε τουμένγκε.
Υποσημειώσεις
^ Γιαβέρσοϊ «καθαρίντιβελα».
^ Γιαβέρσοϊ «γιανγκ».
^ Γιαβέρσοϊ «δοξασμέ».
^ Γιαβέρσοϊ «κα σώντιβελ τουμαρί ψυχή».
^ Κι Πουρανί Μπαλαμανί βακέρντιβελας «ελπίδα».
^ Γιαβέρσοϊ «Καθαριντέν τουμαρί ψυχή».
^ Γιαβέρσοϊ «οτθάρ-ντα να κερένα-τουμέν ότι μανγκένα».
^ Κι Πουρανί Μπαλαμανί ισινέ ο λάφι «δόξα».
