Ο Πρώτος Γράμμας σο Γραφιντάς ο Ιωάννης 5:1-21
5 Κον πακιάλα ότι ο Ιησούς ισί ο Χριστός μπιάντιλο κατά Ντεβέλ, ντα κον μανγκέλα ι Νταντές μανγκέλα οντουλές-ντα σο μπιάντιλο λέσταρ.
2 Κάνα μανγκάσα ι Ντεβλές ντα κεράσα λέσκε εντολές, μανγκάσα ι Ντεβλέσκε τσσαβέν-ντα.
3 Αντικάς σικαβάσα ότι μανγκάσα ι Ντεβλές, άμα κεράσα λέσκε εντολές. Ντα λέσκε εντολές νανέ πφαρέ,
4 επειδή κον* μπιάντιλο κατά Ντεβέλ νικίνελα ι ντουνιάς. Ντα αμαρί πίστη βοηθιντάς-αμέν τι νικίνας ι ντουνιάς.
5 Κον μπορίνελα τι νικίνελ ι ντουνιάς; Νανέ οντουβά σο πακιάλα ότι ο Ιησούς ισί ο Τσσαβό ι Ντεβλέσκο;
6 Ο Ιησούς Χριστός αβιλό πανίσαρ ντα ρατέσαρ. Να αβιλό σάντε πανίσαρ, αλλά εμ πανίσαρ εμ ρατέσαρ. Ντα ο άγιος πνεύμας σικαβέλα-λες ανταβά, σόσκε ο πνεύμας ισί η αλήθεια.
7 Τριν ισί οντουλά σο σικαβένα κον ισί ο Ιησούς:
8 ο άγιος πνεύμας, ο πανί ντα ο ρατ. Ο τριν-ντα σικαβένα ο ίδιος πράγμας.
9 Άμα πακιάσα οντουλά σο βακερένα ο τζενέ, σίγουρα πρέπει τι πακιάς ο λάφια ι Ντεβλέσκε σο ισί πο μπαρέ, επειδή ο Ντεβέλ σικαβέλα κον ισί λέσκο Τσσαβό.
10 Οντουβά σο πακιάλα κο Τσσαβό κι Ντεβλέσκο τθερέλα αντρέ πι γκίστε οντουβά σο βακερντάς λέσκε ο Ντεβέλ. Οντουβά σο να πακιάλα κο Ντεβέλ νικαντάς-λες ψεύτης, σόσκε να πακιαντάς ι Ντεβλέσκε λάφια σο τθερένα τι κερέν λέσκε Τσσαβέσαρ.
11 Ντα ανταλά ισί ο λάφια σο βακερντάς ο Ντεβέλ: Βοβ ντινάς-αμέν ζωή για πάντα, ντα ανταγιά ζωή ισί λέσκε Τσσαβέστε.
12 Κον τθερέλα ι Τσσαβές τθερέλα ανταγιά ζωή. Κον να τθερέλα ι Ντεβλέσκε Τσσαβές να τθερέλα ανταγιά ζωή.
13 Γραφίναβα-λεν τουμένγκε ανταλά για τι τζανέν ότι τθερένα ζωή για πάντα, τουμέν σο πακιάνα κο ναβ κι Ντεβλέσκε Τσσαβέσκο.
14 Ισινάμ σίγουροι* ότι σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα, βοβ ασουνέλα-αμέν.
15 Ντα άμα τζανάσα ότι ασουνέλα σο-ντα τι μανγκάς λέσταρ, τζανάσα ότι κα τθεράς οντουλά σο μανγκλάμ λέσταρ.
16 Άμα εκ τζενό κα ντικχέλ πι πφραλές τι κερέλ αμαρτία σο να γκερέλα κο μεριπέ, κα προσευχίντιβελ λέσκε, ντα ο Ντεβέλ κα ντελ ζωή λέστε, βα, οντουλέντε σο να κερένα αμαρτία σο γκερέλα κο μεριπέ. Υπαρχίντιβελα αμαρτία σο γκερέλα κο μεριπέ. Να βακεράβα λέσκε τι μολίνελ ι Ντεβλές ανταλέ αμαρτιάκε.
17 Κάθε γκεραλό* πράγμας ισί αμαρτία. Όμως, υπαρχίντιβελα αμαρτία σο να γκερέλα κο μεριπέ.
18 Τζανάσα ότι κον μπιάντιλο κατά Ντεβέλ να συνεχίνελα τι αμαρτίνελ, αλλά οντουβά σο μπιάντιλο κατά Ντεβέλ* αρακχαβέλα-λες, ντα ο Μπενγκ* ναστί καπτίνελα-λες.*
19 Τζανάσα ότι αβάσα κατά Ντεβέλ, αλλά σαρό ο ντουνιάς ισί κο βαστά κι Μπενγκέσκε.*
20 Τζανάσα όμως ότι ο Τσσαβό ι Ντεβλέσκο αβιλό ντα ντινάς-αμέν τι αγαβάς λατσσές ο πράγματα σο ισί αχόρτ* για τι σικλιάς ο πράγματα οντουλέσκε σο ισί αληθινός. Ντα ισινάμ ενωμέ οντουλέσαρ σο ισί αληθινός αντράλ λέσκε Τσσαβέσταρ, κατά Ιησούς Χριστός. Βοβ ισί ο αληθινός Ντεβέλ ντα λέσταρ αβέλα η ζωή σο ατσσόλα για πάντα.
21 Μο τσσαβορέ, αρακχαβέν-τουμέν κατά είδωλα.
Υποσημειώσεις
^ Κι Πουρανί Μπαλαμανί βακέρντιβελας «σο-ντα».
^ Γιαβέρσοϊ «Μπορίνασα τι κεράς λάφι κο Ντεβέλ χωρίς τι νταράς».
^ Γιαβέρσοϊ «μπίλατσσο, κακός».
^ Δηλαδή ο Ιησούς Χριστός, ο Τσσαβό ι Ντεβλέσκο.
^ Κι Πουρανί Μπαλαμανί βακέρντιβελας «πφιρνό». Γιαβέρσοϊ «γκεραλό, μπίλατσσο».
^ Γιαβέρσοϊ «ναστί ασταρέλα-λες».
^ Κι Πουρανί Μπαλαμανί βακέρντιβελας «πφιρνέσκε».
^ Γιαβέρσοϊ «ντινάς-αμέν ι ικανότητα τι σκεφτίνας».
