Γράμμας σο Μπουτσσάντιλο κο Ρωμαίοι 9:1-33
9 Σαρ τζενό σο τζάλα παλάλ κο Χριστός, βακεράβα ι αλήθεια, να χουχαβάβα. Μι συνείδηση* αντράλ κατά άγιος πνεύμας βακερέλα
2 ότι τθεράβα μπαρί στεναχώρια ντα ντουκχ σο να νασέλα αντρά-μάνταρ.
3 Πο λατσσές τι αβάβας με ντουρ κατά Χριστός ντα τι τθεράβας αρμάν οπρά-μάντε μάξους μι πφραλένγκε, σο ισί ο τζενέ μι φαράταρ.
4 Βον ισί Ισραηλίτες, ντα λεν τραμπιντάς ο Ντεβέλ για τι κερέλ-λεν πο τσσαβέ.* Σικαντάς λένγκε πι δόξα, κερντάς συμφωνία λέντζαρ, ντινάς-λεν ο Νόμος, μουκχλάς-λεν τι ντεν-λες άγια υπηρεσία ντα ντινάς-λεν πο λάφι ότι κα τθερέν λέσκι ζαμ.
5 Βον αστάρντιβενα αμαρέ παππουδένταρ, ντα λένταρ αβιλό ο Χριστός σαρ τζενό. Ο Ντεβέλ, σο κερέλα κουμάντος σαρέ ο πράγματα, τι αβέλ δοξασμέ για πάντα. Αμήν.
6 Όμως, ανταβά να μανγκέλα τι βακερέλ ότι να αβιλό-πες ο λάφι σο βακερντάς ο Ντεβέλ, σόσκε νανέ μπαγιά «Ισραήλ» σαρέ οντουλά σο αστάρντιβενα κατά Ισραήλ.
7 Ντα νανέ σαρέ τσσαβέ ι Αβρααμίσκε σάντε επειδή ισί λέσκε προσάγγονα. Ο Ντεβέλ βακερντάς κο Αβραάμ: «Οντουλά σο κα βακέρντιβεν το προσάγγονα κα αβέν αντράλ κατά Ισαάκ».
8 Ανταβά σικαβέλα ότι ο τσσαβέ σο κερντάς ο Αβραάμ νανέ μπαγιά ο τσσαβέ ι Ντεβλέσκε, αλλά ο τσσαβέ σο αβένα αντράλ κατά λάφι σο ντινάς ο Ντεβέλ ισί προσάγγονα ι Αβρααμίσκε κι Ντεβλέσκε γιακχά.
9 Ο λάφι σο ντινάς ο Ντεβέλ ισινέ ακαβά: «Ο γιαβέρ μπρες ασακό βακίτι, κα αβάβ ντα η Σάρρα κα τθερέλ τσσαβές».
10 Ο Ντεβέλ όμως να ντινάς πο λάφι σάντε αζομάν, ντινάς-λες κάνα η Ρεβέκκα-ντα ατσσιλί κχαμνί διδυμέντε κατά Ισαάκ, σο αμέν αστάρντιβασα λέσταρ.
11 Πριν τι μπιάντιβεν ντα πριν τι κερέν καέκ λατσσιπέ ή γκεραλιπέ,* ο Ντεβέλ βακερντάας πο τζανγκλέ κας κα τραμπίνελας. Σόσκε ο Ντεβέλ τραμπίνελα κας μανγκέλα, ντα για τι τραμπίνελ να ατσσόλα οντουλέντε σο κερέλα ο τζενό.
12 Οτθάρ βακέρντιλο λάκε: «Ο πο μπαρό κα αβέλ δούλος ι πο χουρντέσκο».
13 Σαρ ισί γραμμέ: «Οντουλές σο μανγκλόμ με ισινέ ο Ιακώβ, αλλά οντουλές σο μισιντόμ ισινέ ο Ησαύ».
14 Άρα, σο κα βακεράς; Ισί ο Ντεβέλ άδικος; Σίγουρα όχι!
15 Ο Ντεβέλ βακερέλα κο Μωυσής: «Κα τζιτζίναβ* οντουλέσκε σο τραμπίναβα ντα κα σικαβάβ ότι αγαβάβα ι ντουκχ οντουλέσκι σο μανγκάβα».
16 Άρα, ανταβά να αβέλα-πες επειδή εκ τζενό μανγκέλα-λες ή κερέλα σο νακχέλα λέσκε βαστένταρ ανταλέσκε, αλλά αβέλα-πες κατά Ντεβέλ σο τζιτζίνελα* ι γιαβερένγκε.
17 Η Γραφή βακερέλα κο Φαραώ: «Άκ’ σόσκε μουκχλόμ-τουτ τι ατσσός τζουβντό: για τι σικαβάβ αντράλ τούταρ μι ζορ ντα για τι κεράβ μο ναβ τι μουτθάντιβελ σαρί κι πφουβ».
18 Άρα, ο Ντεβέλ τζιτζίνελα* κάσκε μανγκέλα, αλλά κον μανγκέλα τι αβέλ πφαρέ σορέσκο μουκχέλα-λες τι αβέλ ασακό τζενό.
19 Ισί τζενέ σο μπορεί τι πουτσέν-μαν: «Σόσκε ο Ντεβέλ αρακχέλα λάθη αμέντε; Κον μπορίνελα τι τζαλ κόντρα οντουλέντε σο μανγκέλα τι κερέλ;»
20 Αλλά κον ισινάν τούι για τι τζας κόντρα τι λαφίντζαρ κο Ντεβέλ; Αβέλα-πες εκ πράγμας σο λατσσάρντιλο τι βακερέλ οντουλέσκε σο λατσσαρντάς-λες: «Σόσκε λατσσαρντάν-μαν αντικάς;»
21 Να τζανένα ότι οντουβά σο λατσσαρέλα πράγματα τσικάταρ τθερέλα ο δικαίωμας τι λατσσαρέλ ι ίδιε τσικάταρ εμ κάτι* σημαντικός εμ κάτι γιαβέρ σο νανέ σημαντικός;
22 Αντικάς ισί ι Ντεβλέσαρ-ντα. Βοβ μανγκλάς τι σικαβέλ πι χολί ντα πι ζορ καζόμ κερέλας μπουτ υπομονή ντα νταϊντίνελας οντουλέν* σο χολιασκιαρένας-λες. Βον αξίνενα τι καταστραφίντιβεν.
23 Ντα κερντάς-λες ανταβά για τι σικαβέλ πι μπαρί δόξα οντουλέντε* σο κα τζιτζίνελας* λένγκε. Βοβ προετοιμαντάς-λεν για τι λεν δόξα.
24 Αμέν ισινάμ οντουλά σο ντινάς-λεν βίκος, εμ κατά Ιουδαίοι εμ κατά τζενέ σο ισί γιαβερέ τθεμένταρ.
25 Ισί σαρ βακερέλα κο Ωσηέ-ντα: «Οντουλά σο να ισινέ μο λαός κα βακεράβ ότι ισί μο λαός, ντα οντιά σο να ισινέ μι αγαπημέ κα βακεράβ ότι ισί μι αγαπημέ.
26 Ντα οντουλέ τθανέστε σο βακέρντιλο λένγκε: “Να ισινέν μο λαός”, οτθέ βον κα βακέρντιβεν “τσσαβέ ι τζουβντέ Ντεβλέσκε”».
27 Ατζέκ, ο Ησαΐας βακερέλα ζουρανές ακαλά λάφια σο τθερένα τι κερέν ι Ισραηλίσαρ: «Παρόλο σο ο τσσαβέ ι Ισραηλίσκε μπορεί τι αβέν αζόμ μπουτ σαρ ο κούμι* ι ντεριαβάκο, σάντε χάνικ κα σώντιβεν.
28 Σόσκε ο Ιεχωβά* κα κρίνελ ι πφουβ ντα κα κερέλ-λες ανταβά σουγκό».
29 Ντα σαρ βακερντάας ο Ησαΐας: «Άμα ο Ιεχωβά,* σο ισί ο αρχηγός ι ουρανόσκο, να κα μουκχέλας προσαγγονίν αμέντε, κα αβάας σαρ ο Σόδομα ντα κα μοιάζαας κο Γόμορρα».
30 Άρα, σο κα βακεράς; Ότι ο τζενέ σο ισί γιαβερέ τθεμένταρ, παρόλο σο να προσπαθιντέ τι κερέν ι δικαιοσύνη, βακέρντιλε δίκαιοι αντράλ κατά πίστη.
31 Αλλά ο Ισραηλίτες, παρόλο σο προσπαθιντέ τι κερέν ο δίκαιος νόμος, ναστί κερντέ ντιπ ανταβά νόμος.
32 Σόσκε; Επειδή αμντίνενας ότι κα αβένας δίκαιοι αντράλ οντουλένταρ σο κερένας ντα όχι αντράλ κατά πίστη. Βον πελέ οπράλ κο «μπαρ».
33 Σαρ ισί γραμμέ: «Τσσουβάβα κι Σιών εκ μπαρ σο κα κερέλ ι τζενέν τι περέν ντα εκ μπαρό μπαρ σο κα τσσιναβέλ λένγκο ντρομ, αλλά οντουβά σο τθερέλα πι πίστη λέστε να κα λατζάντιβελ».
Υποσημειώσεις
^ Γιαβέρσοϊ «υιοθετιμέ τσσαβέ».
^ Γιαβέρσοϊ «μπίλατσσιπε, κακός».
^ Κι Πουρανί Μπαλαμανί ισινέ ο λάφι «σκεύος».
^ Κι Πουρανί Μπαλαμανί ισινέ ο λάφι «σκεύη».
^ Κι Πουρανί Μπαλαμανί ισινέ ο λάφι «σκεύη».
^ Γιαβέρσοϊ «η κισάι».
