Γράμμας σο Μπουτσσάντιλο κο Ρωμαίοι 2:1-29
2 Άρα, να τθερέσα δικαιολογία, κον-ντα τι ισινάν, άμα κρίνεσα ι γιαβερέν. Κάνα κρίνεσα-λεν, σικαβέσα ότι αξίνεσα τι τιμωρίντιβες, σόσκε τούι σο κρίνεσα-λεν κερέσα ο ίδια πράγματα.
2 Αλλά τζανάσα ότι κάνα ο Ντεβέλ κρίνελα οντουλέν σο κερένα ασακέ πράγματα, κρίνελα δίκαια.
3 Τούι σο κρίνεσα οντουλέν σο κερένα ασακέ πράγματα αλλά κερέσα ο ίδια, αμντίνεσα ότι κα νασές ντουρ ντα να κα κρίνελ-τουτ ο Ντεβέλ;
4 Ή να χάλα-τουτ ανάγκη σο σικαβέλα τούκε ο Ντεβέλ μπαρό λατσσιπέ, σο τζιτζίνελα τούκε ντα κερέλα μπαρί υπομονή; Να αγαβέσα ότι ο Ντεβέλ πι λατσσιμάσαρ μανγκέλα τι κερέλ-τουτ τι μετανιώνες;
5 Αλλά άμα ισινάν πφαρέ σορέσκο ντα να μανγκέσα τι μετανιώνες, ανέσα ι μπαρί χολί ι Ντεβλέσκι οπρά-τούτε. Ο Ντεβέλ κα σικαβέλ ανταγιά μπαρί χολί κο ντιβές σο κα κρίνελ ι τζενέν δίκαια.
6 Βοβ κα ντελ παλάλ κο κάθε εκ οντουλά σο κερντάς.
7 Κα ντελ ζωή για πάντα οντουλέντε σο να τσσιναβένα τι κερέν ο λατσσιπέ.* Ασακέ τζενέ μανγκένα τι τθερέν δόξα ντα ζωή σο ναστί καταστραφίντιβελα.
8 Όμως, ο Ντεβέλ κα σικαβέλ πι μπαρί χολί οντουλένγκε σο μανγκένα εμ τι χαν-πες ντα να ντένα καν κι αλήθεια, αλλά κερένα γκεραλέ* πράγματα.
9 Κα τθερέν στεναχώρια σαρέ ο τζενέ σο κερένα* ο γκεραλιπέ, ο Ιουδαίοι πρώτα αλλά ο Μπαλαμέ-ντα.
10 Αλλά κα τθερέν δόξα ντα ειρήνη σαρέ ο τζενέ σο κερένα ο λατσσιπέ, ο Ιουδαίοι πρώτα αλλά ο Μπαλαμέ-ντα,
11 σόσκε ο Ντεβέλ να ξεχωρίνελα ι τζενέν.
12 Σαρέ οντουλά σο να ισινέ τελάλ κατά Νόμος ι Μωυσίσκο ντα αμαρτιντέ, κα μερέν παρόλο σο να τθερένας νόμος τι κρίνελ-λεν. Αλλά σαρέ οντουλά σο αμαρτιντέ τελάλ κατά Νόμος κα δικάντιβεν αντικάς σαρ βακερέλα ο Νόμος.
13 Δίκαιοι κο γιακχά κι Ντεβλέσκε νανέ οντουλά σο ασουνένα ο Νόμος, αλλά κα βακέρντιβεν δίκαιοι οντουλά σο κερένα ο Νόμος.
14 Ο τζενέ σο ισί γιαβερέ τθεμένταρ να τζανένα ο Νόμος ι Ντεβλέσκο. Αλλά κάνα νικιόλα λένταρ τι κερέν ο πράγματα σο βακερέλα ο Νόμος, σικαβένα ότι ο νόμος ισί αντρέ λένγκε γκίστε.
15 Βον σικαβένα ότι ανταβά σο σικλιαρέλα ο Νόμος ισί γραμμέ λένγκε γκίστε, ντα λένγκι συνείδηση* συμφωνίνελα λέντζαρ. Αντικάς, λένγκι γκοντί βακερέλα λένγκε άμα οντουβά σο κερντέ ισί γκεραλό ή λατσσό.
16 Ανταβά κα αβέλ-πες κο ντιβές σο ο Ντεβέλ, αντράλ κατά Χριστός Ιησούς, κα κρίνελ ο γκεραντέ πράγματα ι τζενένγκε, αντικάς σαρ βακερένα ο λατσσέ αμπέρια σο μουτθαβάβα.
17 Τούι σο βακέρντιβεσα Ιουδαίος ντέσα μπέσα κο νόμος ντα ισαρέσα-τουτ σο ισινάν κο λαός κι Ντεβλέσκο.
18 Τζανέσα οντουβά σο μανγκέλα ο Ντεβέλ ντα αγαβέσα καλά πράγματα ισί σωστά, σόσκε σικλιαρντέ-τουτ κατά Νόμος.
19 Ισινάν σίγουρος ότι σικαβέσα ι κορορένγκε κάι τι τζαν ντα ντέσα φως οντουλέντε σο ισί κο καρανίκι.
20 Αμντίνεσα ότι τσσουβέσα γκοντί ι ντινιλένγκε ντα σικλιαρέσα χουρντέ τσσαβέν, σόσκε αγαβέσα ο σημαντικά πράγματα ι σικλιαριμάσκε ντα ι αληθειάκε σο ισί κο Νόμος.
21 Τούι, όμως, σο σικλιαρέσα ι γιαβερέν, να σικλιαρέσα το νεαυτός; Τούι σο βακερέσα: «Μα τσορ», τσορέσα;
22 Τούι σο βακερέσα: «Μα κερ λουμνιπέ οπράλ τι μπιαβέστε»,* κερέσα-λες ανταβά; Τούι σο τζουνγκάσα κατά είδωλα, τσορέσα ναούς;
23 Τούι σο ισαρέσα-τουτ επειδή τζανέσα ο νόμος, να ανέσα λατζ κο Ντεβέλ σο να ντέσα καν κο Νόμος;
24 «Ο τζενέ σο ισί γιαβερέ τθεμένταρ τζάνα κόντρα κι Ντεβλέσκο ναβ πουμαρέ λαφίντζαρ ιτιρί τουμένταρ», σαρ ισί γραμμέ.
25 Η περιτομή ανέλα λατσσιπέ σάντε άμα κερέσα ο Νόμος. Αλλά άμα να ντέσα καν κο Νόμος, ισί σαρ μα τι κερντάνας ποτές περιτομή.
26 Αλλά άμα εκ τζενό σο να κερντάς περιτομή κερέλα ο δίκαια πράγματα σο ισί κο Νόμος, να κα αβέλ κο γιακχά κι Ντεβλέσκε σαρ τι κερντάς περιτομή;
27 Ντα ο τζενό σο να κερντάς πι σωμάστε περιτομή αλλά κερέλα ο Νόμος, κα κρίνελ τουτ σο να ντέσα καν κο νόμος παρόλο σο τθερέσα ο Νόμος ντα κερντάν περιτομή.
28 Ιουδαίος νανέ οντουβά σο ισί αβριάλ Ιουδαίος, ντα η περιτομή νανέ κάτι σο αβέλα-πες αβριάλ, κο σώμας.
29 Ιουδαίος ισί οντουβά σο ισί αντράλ Ιουδαίος. Ντα λέσκι περιτομή ισί η περιτομή ι γκίσκι σο να αβέλα-πες αντράλ κατά νόμος αλλά αντράλ κατά άγιος πνεύμας. Ανταβά τζενό λέλα ισαριπέ κατά Ντεβέλ, να λέλα-λες κατά τζενέ.
Υποσημειώσεις
^ Γιαβέρσοϊ «σο νταϊντίνενα καζόμ κερένα ο λατσσιπέ».
^ Γιαβέρσοϊ «μπίλατσσε, κακά».
^ Γιαβέρσοϊ «Κα τθερέλ στεναχώρια η ψυχή κάθε τζενέσκι σο κερέλα».
