Πράξεις ι Αποστολόνγκε 2:1-47
2 Κάνα αβέλας-πες ο Μπαρό Ντιβές, η Πεντηκοστή, βον ισινέ σαρέ γιεκ κο ίδιος τθαν.
2 Οτθέ σο να μπεκλεντίνενας, ασούντιλο κάτι κατά ουρανός, σαρ εκ μπουτ ζουρανί μπαρμπάλ, ντα ασούντιλο σαρό κο κχερ σο μπεσένας.
3 Ντα σικάντιλε τσσιμπά λένγκε σο ντικχίντιβενας σαρ γιακ* ντα ιλιάντιλε, ντα οπράλ κο κάθε εκ μπεσλί εκ τανί,
4 ντα πφερντιλέ σαρέ άγιος πνεύμας ντα αρχισάλε τι κερέν λάφι σαβέ τι μανγκές τσσιμπά, αντικάς σαρ σικαβέλας λένγκε ο πνεύμας.
5 Οντουβά βακίτι, ισινέ κι Ιερουσαλήμ Ιουδαίοι σο νταρένας κατά Ντεβέλ ντα αβιλέας σαρέ κατά τθεμά ι πφουβιάκε.
6 Κάνα ασούντιλο ανταβά θόρυβος, γκιντισάλε μπουτ τζενέ ντα σαρέ σαστισάλε, σόσκε ο κάθε εκ ασουνέλας τι κερέν λάφι λέσκε τσσιμπάτε.
7 Ντα ατσσιλέας πουταρντέ μόσαρ ντα βακερένας: «Νανέ Γαλιλαίοι σαρέ ανταλά σο κερένα λάφι;
8 Σαρ αβέλα-πες ο κάθε εκ αμένταρ τι ασουνέλ-λεν πι τσσιμπάτε;
9 Πάρθοι, Μήδοι ντα Ελαμίτες, τζενέ κατά Μεσοποταμία, κατά Ιουδαία ντα κατά Καππαδοκία, κατά Πόντος ντα κατά Ασία,*
10 κατά Φρυγία ντα κατά Παμφυλία, κατά Αίγυπτος ντα κατά τθανά σο ισί κι Λιβύη πασέ κι Κυρήνη, τζενέ σο αβιλέ κατά Ρώμη, εμ Ιουδαίοι εμ οντουλά-ντα σο λιντέ ι Ιουδαιόνγκι θρησκεία,
11 Κρητικοί ντα Άραβες, ασουνάσα-λεν τι κερέν λάφι αμαρέ τσσιμπέντε ι Ντεβλέσκε μπαρέ πραγματένγκε».
12 Βα, σαρέ ατσσιλέας πουταρντέ μόσαρ ντα πουτσένας ο εκ ι γιαβερές: «Σο μανγκέλα τι βακερέλ ανταβά;»
13 Γιαβερά όμως πρασάνας-λεν ντα βακερένας: «Πιλέ μπερεκέτι γκουλντί μολ».*
14 Αλλά ο Πέτρος ιστίντιλο γιεκ ι 11 αποστολόντζαρ ντα βακερντάς λένγκε ζουρανές: «Μουρσάλεν κατά Ιουδαία ντα σαρέ τουμέν σο μπεσένα κι Ιερουσαλήμ, σικλιόν-λες ανταβά ντα ασουνέν λατσσές μο λάφια.
15 Ανταλά τζενέ νανέ ματέ, σαρ αμντίνενα τουμέν, σόσκε ισί ατζέ πρωί.*
16 Οκιά μπάνταρ, αβέλα-πες οντουβά σο βακέρντιλο αντράλ κατά προφήτης Ιωήλ:
17 “«Ντα κο τελευταία ντιβεσά», βακερέλα ο Ντεβέλ, «κα μπουτσσαβάβ μο πνεύμας σαβέ τι μανγκές τζενέντε, ντα τουμαρέ τσσαβέ ντα τουμαρέ τσσαγιά κα βακερέν προφητείες ντα τουμαρέ τερνέ κα ντικχέν φαντασίες ντα τουμαρέ πφουρέ κα ντικχέν σουνέ,
18 ατζέ-ντα κο δούλοι ντα κο δούλες σο τθεράβα κα μπουτσσαβάβ μο πνεύμας οντουλά ντιβεσά, ντα κα βακερέν προφητείες.
19 Ντα κα σικαβάβ θαύματα οπρέ κο ουρανός ντα σημάδια τελέ κι πφουβ, ρατ ντα γιακ ντα μπουτ κάντος.*
20 Ο κχαμ κα αβέλ καρανίκι ντα ο τσσιμούτ* κα αβέλ ρατ πριν τι αβέλ ο μπαρό ντα δοξασμέ ντιβές ι Ιεχωβάσκο.*
21 Ντα κον κα ντελ μπέσα κο ναβ κι Ιεχωβάσκο* κα σώντιβελ»”.
22 »Μουρσάλεν κατά Ισραήλ, ασουνέν ανταλά λάφια: Ο Ντεβέλ σικαντάς τουμένγκε ντιπ λατσσές ότι ο Ιησούς ο Ναζωραίος μπουτσσάντιλο λέσταρ, σόσκε κερντάς αντράλ λέσταρ μπαρέ πράγματα ντα θαύματα τουμέντε, σαρ τζανένα τουμέν-ντα.
23 Ανταλέ μουρσές, σο ντιντιλό τουμαρέ βαστέντε αντικάς σαρ μανγκλάας ντα βακερντάας πο τζανγκλέ ο Ντεβέλ, ντινέν-λες πφιρνέ* τζενέντε ντα ιμπλαντέν-λες κο κας ντα μουνταρντέν-λες.
24 Αλλά ο Ντεβέλ τζουβντιαρντάς-λες ντα ελευθερωντάς-λες κατά μεριπέ, σόσκε να αβέλας-πες τι ατσσόλ πφαντό λέστε.
25 Ο Δαβίδ βακερέλα ακαλά λάφια σο τθερένα τι κερέν ι Χριστόσαρ: “Τθεράβα ι Ιεχωβάς* πάντα ανγκλά-μάντε,* σόσκε βοβ ισί δεξιά μάνταρ για μα τι περάβ ποτές.
26 Οτθάρ, πουτάρντιλο μο γκι ντα μι τσσιπ χαιρισάλι. Ντα καζόμ τζουβντιάβα κα νταβ μπέσα* κο Ντεβέλ,
27 σόσκε να κα μουκχές-μαν* κο Μεζάρι* ντα να κα μουκχές μο σώμας τι κερνιόλ σόσκε ισινόμ αφοσιωμέ τούτε.
28 Σικλιαρντάν-μαν ο ντρομ ι ζωγιάκο. Κα πφερές-μαν μπαρέ χαράσαρ ανγκλά-τούτε”.*
29 »Πφραλάλεν, μουκχέν-μαν τι βακεράβ τουμένγκε μπίνταρανες ι Δαβιδίσκε σο ισινέ αμαρό πάππους. Βοβ μουλό ντα πραχουντέ-λες, ντα λέσκο μεζάρι ισί ατθέ μέχρι αντιβές.
30 Επειδή ισινέ προφήτης ντα τζανέλας ότι ο Ντεβέλ χαλάας λέσκε σοβέλ ότι κα τσσουβέλας εκχές λέσκε προσαγγονίνταρ τι μπεσέλ λέσκε θρονόστε,
31 ντικχλάς σο κα αβέλας-πες ντα βακερντάς ότι ο Χριστός κα ιστίλας κατά μουλέ ντα ότι ο Ντεβέλ να κα μουκχέλας-λες κο Μεζάρι* ντα λέσκο σώμας να κα κερνιόλας.
32 Ο Ντεβέλ τζουβντιαρντάς οντουλέ Ιησούς, ντα σαρέ αμέν ντικχλάμ-λες ανταβά.
33 Οτθάρ, επειδή ο Ιησούς βαντίντιλο δεξιά κατά Ντεβέλ ντα λιντάς κατά Ντατ ο άγιος πνεύμας σο ισινέ τι λελ, μπουτσσαντάς ανταβά σο ντικχένα ντα ασουνένα.
34 Ο Δαβίδ να νικλιντάς κο ουρανός, αλλά βακερέλα: “Ο Ιεχωβά* βακερντάς μι Κυριόσκε: «Μπες δεξιά μάνταρ
35 μέχρι τι κεράβ-τουτ τι ισταβές τι ντουσμανίν* τι πιντρέντζαρ»”.
36 Οτθάρ, τι τζανέλ σαρό ο λαός Ισραήλ ότι ο Ντεβέλ μπαγιά κερντάς-λες εμ Κύριος εμ Χριστός, οντουλέ Ιησούς, σο ιμπλαντέν-λες τουμέν κο κας».
37 Κάνα ασουντέ ανταλά λάφια, αβιλέ λένγκε σαρ τσσουριά αντρέ κο γκι ντα βακερντέ κο Πέτρος ντα κο γιαβερά απόστολοι: «Πφραλάλεν, σο τι κεράς;»
38 Ο Πέτρος βακερντάς λένγκε: «Μετανιώνεν, ντα τι μπολντιόλ ο κάθε εκ τουμένταρ κο ναβ κι Ιησού Χριστόσκο για τι συγχωρίντιβεν τουμαρέ αμαρτίες, ντα κα λεν ο άγιος πνεύμας σαρ δώρος.
39 Σόσκε ο Ντεβέλ ντινάς πο λάφι ότι κα ντελ-λες τουμέντε ντα τουμαρέ τσσαβέντε ντα σαρέ οντουλέντε σο ισί ντουρ, σαρέ οντουλέντε σο κα τραμπίνελ ο Ιεχωβά* αμαρό Ντεβέλ».
40 Ντα μπουτέ γιαβερέ λαφίντζαρ μουτθαβέλας λένγκε ντιπ ο λατσσέ αμπέρια ντα βακερέλας λένγκε: «Σώντιβεν κατά πφιρνέ τζενέ σο τζουβντιόνα ανταλέ βακιτίστε».*
41 Αντικάς, οντουλά σο πακιαντέ χαράσαρ λέσκε λάφια μπολντιλέ, ντα οντουβά ντιβές πασέ τριν χιλιάδες τζενέ* αβιλέ μαθητές.
42 Ντα να τσσιναβένας τι σικλιόν κατά απόστολοι, τι αβέν αμαλά* ο εκ ι γιαβερέσαρ,* τι χαν γιεκ ντα τι προσευχίντιβεν.
43 Πελί νταρ σαριλέντε* ντα αβένας-πες μπερεκέτι θαύματα ντα σημάδια αντράλ κατά απόστολοι.
44 Οντουλά σο πακιαντέ ισινέ σαρέ γιεκ ντα τθερένας γιεκ σαρέ πουμαρέ πράγματα,
45 ντα μπικινένας πουμαρέ πράγματα ντα πουμαρέ περιουσίες ντα ιλιαβένας σαριλέντε ο λοβέ σο λένας. Ντένας κο κάθε εκ οντουβά σο χρειαζίντιβελας.
46 Ντα κάθε ντιβές ισινέ κο ναός ενωμέ, τζάνας ο εκ κο κχερ κι γιαβερέσκο ντα χάνας ντα ιλιαβένας πουμαρέ χαμπίματα μπαρέ χαράσαρ ντα αντράλ πουμαρέ γκίσταρ.
47 Αντικάς, ισαρένας ι Ντεβλές ντα αβέλας ο γκι σαρέ ι λαόσκο λέντζαρ. Ντα κάθε ντιβές ο Ιεχωβά* ανέλας λένγκε γιαβερέ-ντα τζενέν σο σώντιβενας.
Υποσημειώσεις
^ Γιαβέρσοϊ «γιανγκ».
^ Ατθέ, ο λάφι «Ασία» νανέ σαρί η Ασία σαρ τζανάσα-λα αντιβές, αλλά ισί σάντε εκ κομμάτι λάκο σο κερένας-λες κουμάντος ο Ρωμαίοι οντουλά μπρεσά.
^ Γιαβέρσοϊ «νεβί μολ».
^ Κι Πουρανί Μπαλαμανί βακέρντιβελας «ο τρίτος σαάτι ι ντιβεσέσκο». Ισινέ πασέ 9:00 κο πρωί.
^ Γιαβέρσοϊ «τθουβ».
^ Γιαβέρσοϊ «φεγγάρι».
^ Γιαβέρσοϊ «γκεραλέ, μπίλατσσε».
^ Γιαβέρσοϊ «ανγκλάλ μι γιακχίντε».
^ Κι Πουρανί Μπαλαμανί ισινέ ο λάφι «ελπίδα».
^ Γιαβέρσοϊ «να κα μουκχές μι ψυχή».
^ Γιαβέρσοϊ «ανγκλάλ τι μόστε».
^ Γιαβέρσοϊ «εχθρόν».
^ Κι Πουρανί Μπαλαμανί ισινέ ο λάφι «γενιά».
^ Γιαβέρσοϊ «ψυχές».
^ Γιαβέρσοϊ «φίλοι».
^ Γιαβέρσοϊ «τι ντεν ο εκ κο γιαβέρ».
^ Γιαβέρσοϊ «κι κάθε ψυχή».
