Ο Ευαγγέλιος σο Γραφιντάς ο Ματθαίος 24:1-51
-
ΣΗΜΑΔΙ ΣΟ ΚΑ ΣΙΚΑΒΕΛ Ο ΒΟΥΡΤΙΠΕ Ι ΧΡΙΣΤΟΣΚΟ (1-51)
24 Σαρ νασέλας ο Ιησούς κατά ναός, γκιλέ πασέ λέσκε μαθητές για τι σικαβέν λέσκε σαρ ισινέ κερντό ο ναός.
2 Βοβ βακερντάς: «Ντικχένα-λεν σαρέ ανταλά; Μπαγιά βακεράβα τουμένγκε: Σαρέ ο μπαρά σο ισί ατθέ κα περέν. Καέκ μπαρ να κα ατσσόλ οπράλ γιαβερέστε».
3 Καζόμ μπεσέλας κο Βες κι Ζιτινίνγκο,* ο μαθητές γκιλέ πασέ ντα πουτσλέ-λες χωρίς τι ασουνέν ο γιαβερά: «Βάκερ αμένγκε, κάνα κα αβέν-πες ανταλά, ντα καβά κα αβέλ ο σημάδι σο κα σικαβέλ το βουρτιπέ* ντα ο τελευταία ντιβεσά ανταλέ ντουνιάσκε;»*
4 Ο Ιησούς βακερντάς λένγκε: «Τθερέν τουμαρί γκοντί μα τι χουχαβέλ-τουμέν καέκ,
5 σόσκε μπουτ τζενέ κα αβέν, κα λεν μο ναβ ντα κα βακερέν: “Με ισινόμ ο Χριστός”, ντα κα χουχαβέν μπουτέν.
6 Τουμέν κα ασουνέν τι αβέν-πες τζένγκια* ντα κα λεν αμπέρι τζενγκίνγκε. Ντικχέν μα τι νταρέν, σόσκε πρέπει τι αβέν-πες ανταλά, αλλά νανέ ατζέκ ο τέλος.
7 »Κα χαλ-πες τθεμ γιαβερέ τθεμέσαρ ντα βασίλειος γιαβερέ βασιλειόσαρ ντα κα αβέλ μποκχ ντα σεισμοί τθαν τθανέστε.
8 Σαρέ ανταλά ισί αρχή ζουρανέ ντουκχένγκι.
9 »Αζομάν ο τζενέ κα τζαν τουμέντζαρ κόντρα ντα κα μουνταρέν-τουμέν, ντα σαρέ ο τθεμά κα μισίνεν-τουμέν ιτιρί μι ναβέσταρ.
10 Μπουτ τζενέ αζομάν κα χασαρέν πουμαρί πίστη,* κα προδόνεν ο εκ ι γιαβερές ντα κα μισίνεν ο εκ ι γιαβερές.
11 Κα νικιόν μπουτ τζενέ σο κα βακερέν ότι ισί προφήτες ντα κα χουχαβέν μπουτέν.
12 Ντα επειδή κα αβέλ πο μπουτ ο γκεραλιπέ,* η αγάπη ι πο μπουτέ τζενένγκι κα σουρντιόλ.
13 Αλλά κον κα νταϊντίνελ μέχρι κο τέλος κα σώντιβελ.
14 Ντα ανταλά λατσσέ αμπέρια ι Βασιλειάκε κα μουτθάντιβεν σαρί κι πφουβ για τι ασουνέν-λεν σαρέ ο τθεμά,* ντα αζομάν κα αβέλ ο τέλος.
15 »Σαρ βακερντάς ο προφήτης Δανιήλ, κα ντικχέν ο τζουνγκαλό πράγμας σο ανέλα καταστροφή τι ατσσόλ άγιε τθανέστε (ο τζενό σο διαβάνελα* τι τσσουβέλ πι γκοντί τι κχελέλ).
16 Αζομάν οντουλά σο ισί κι Ιουδαία τι νασέν κο βεσά.
17 Κον ισί κι νταράτσα μα τι γουλίλ τι λελ πράγματα πι κχερέσταρ
18 ντα κον ισί κο χωράφι μα τι βουρτίνελ τι λελ πο αβραϊνέ σέα.
19 Τιμωρία κα τσσίντεν ο κχαμνιά ντα ο τζουβλιά σο ντένα τσουτσί οντουλά ντιβεσά!
20 Προσευχίντιβεν* μα τι χρειαζίντιβελ τι νασέν βεν ή Σάββατος.
21 Σόσκε αζομάν κα αβέλ-πες μπαρί στεναχώρια, ασακί σο να αβιλί-πες κατά αρχή ι ντουνιάσκι μέχρι ακανά ούτε κα αβέλ-πες γιαβέρ φαρ.
22 Ντα άμα ο Ντεβέλ να κα κερέλας τι αβέν πο χάνικ οντουλά ντιβεσά, να κα σώντιβελας καέκ τζενό. Αλλά μάξους ι τραμπιμέ τζενένγκε κα κερέλ τι αβέν πο χάνικ οντουλά ντιβεσά.
23 »Αζομάν άμα καέκ τζενό κα βακερέλ τουμένγκε: “Ντικχέν! Ακατέ ισί ο Χριστός” ή “Οκουτέ!” μα πακιάν-λες ανταβά.
24 Σόσκε κα αβέν τζενέ σο κα βακερέν ότι ισί ο Χριστός ντα ότι ισί προφήτες. Κα κερέν σαβέ τι μανγκές μπαρέ θαύματα για τι χουχαβέν, άμα αβέλα-πες, ατζέ-ντα ι τραμπιμέ τζενέν.
25 Βακεράβα-λεν τουμένγκε για τι τθερέν τουμαρί γκοντί.*
26 Οτθάρ, άμα κα βακερέν τουμένγκε: “Ντικχέν! Ισί κι έρημος”, μα τζαν ή “Ντικχέν! Ισί κο αντραϊνέ δωμάτια”, μα πακιάν-λες ανταβά.
27 Σαρ η αστραπή λέλα-πες σαρό κο ουρανός,* αντικάς κα αβέλ ο βουρτιπέ-ντα* ι τζενέσκε Τσσαβέσκο.
28 Κάι ισί ο μουλό,* οτθέ κα γκιντίντιβεν ο αετοί.
29 »Αμέσως σοράν κατά στεναχώρια οντουλέ ντιβεσένγκι, ο κχαμ κα καλιόλ, ο τσσιμούτ* κα τσσιναβέλ τι λελ-πες, ο τσεργανιά κα περέν κατά ουρανός ντα ο ζουρανέ πράγματα ι ουρανόσκε κα ιζράν κατά μπαρό κουνιαϊπέ.
30 Αζομάν κα ντικχίντιβελ κο ουρανός ο σημάδι ι τζενέσκε Τσσαβέσκο, ντα σαρέ ο λαοί ι πφουβιάκε κα τσαλαβέν πουμαρό γκέσι* κατά στεναχώρια ντα κα ντικχέν ι τζενέσκε Τσσαβές τι αβέλ ζοριάσαρ ντα μπαρέ δοξάσαρ οπράλ κο σύννεφα κι ουρανόσκε.
31 Βοβ κα μπουτσσαβέλ πι αγγελόν κάνα η σάλπιγγα κα ασούντιβελ ζουρανές, ντα βον κα γκίντεν λέσκε τραμπιμέ τζενέν κατά σταρ μπαρμπαλιά, κατά εκ μπάντα ι ουρανόσκι μέχρι κι γιαβέρ.
32 »Σικλιόν ακανά κατά χχελινγκίν ακαβά παράδειγμας:* Κάνα λάκο νεβό κλαδίς αβέλα κοβλό ντα νικαβέλα φύλλα, τζανένα ότι ο νιλάι ισί πασέ.
33 Αντικάς τουμέν-ντα, κάνα κα ντικχέν-λεν σαρέ ανταλά, τι τζανέν ότι βοβ ισί πασέ, ισί κι πόρτα.
34 Μπαγιά βακεράβα τουμένγκε ότι ο τζενέ σο τζουβντιόνα ανταλέ βακιτίστε* να κα μερέν μέχρι τι αβέν-πες σαρέ ανταλά.
35 Ο ουρανός ντα η πφουβ κα χασάρντιβεν, αλλά μο λάφια να κα χασάρντιβεν.
36 »Οντουλέ ντιβεσέσκε ντα οντουλέ σαατίσκε καέκ να τζανέλα, ούτε ο άγγελοι ι ουρανόσκε ούτε ο Τσσαβό, αλλά σάντε ο Ντατ.
37 Σαρ ισινέ ο ντιβεσά σο τζουβντιόλας ο Νώε, αντικάς κα αβέλ ο βουρτιπέ-ντα* ι τζενέσκε Τσσαβέσκο.
38 Οντουλά ντιβεσά πριν τι αβέλ ο Κατακλυσμός, ο τζενέ χάνας ντα πίνας, ο μουρσά ντα ο τζουβλιά παντρίνενας, μέχρι οντουβά ντιβές σο ο Νώε τσσουντάς-πες κι κιβωτός,
39 ντα να ντινέ σημασία μέχρι σο αβιλό ο Κατακλυσμός ντα καταστραφιντάς-λεν σαριλέν. Αντικάς κα αβέλ-πες κο βουρτιπέ-ντα κι τζενέσκε Τσσαβέσκο.
40 Αζομάν ντούι τζενέ κα αβέν κο χωράφι. Ο εκ κα λιντιόλ ντα ο γιαβέρ να κα λιντιόλ.
41 Ντούι τζουβλιά κα μορέν γκιβ κο ντριμένι. Η εκ κα λιντιόλ ντα η γιαβέρ να κα λιντιόλ.
42 Οντουλέσκε, τι αβέν τζανγκαντέ, σόσκε να τζανένα καβά ντιβές αβέλα τουμαρό Κύριος.
43 »Αλλά τι τζανέν ακαβά: Άμα ο τζενό κα τζανέλας σο σαάτι* κα αβέλας ο τσορ* αντρέ κι ιράτ, κα ατσσόλας τζανγκαντό ντα να κα μουκχέλας τι πουτρέλ λέσκο κχερ.
44 Οτθάρ, τι αβέν τουμέν-ντα έτοιμοι, σόσκε ο Τσσαβό ι τζενέσκο αβέλα εκ σαάτι σο να μπεσένα τι αβέλ.
45 »Κον ισί μπαγιά ο πιστός ντα γκοντιαβέρ δούλος, σο λέσκο κύριος τσσουντάς-λες υπεύθυνος πι υπηρετόντε για τι ντελ-λεν χαμπέ κο σωστός βακίτι;
46 Ευτυχισμέ ισί οντουβά δούλος άμα λέσκο κύριος, κάνα κα αβέλ, κα ντικχέλ-λες τι κερέλ πι μπουτί!
47 Μπαγιά βακεράβα τουμένγκε: Κα τσσουβέλ-λες υπεύθυνος σαρέ πι πραγματέντε.
48 »Αλλά άμα οντουβά γκεραλό δούλος κα βακερέλ αντρά-πέσταρ: “Μο κύριος αργίνελα”,
49 ντα κα αρχίνελ τι νταπέλ ι γιαβερέ δουλόν ντα τι χαλ ντα τι πιλ οντουλέντζαρ σο ισί σικλέ τι ματιόν,
50 ο κύριος οντουλέ δουλόσκο κα αβέλ εκ ντιβές σο βοβ να μπεσέλα λέσκε ντα εκ σαάτι σο βοβ να τζανέλα
51 ντα κα ντελ-λες ι πο μπαρί τιμωρία ντα κα τσσουβέλ-λες οντουλέντζαρ σο ισί ντουέ μουένγκε. Οτθέ κα ροβέλ ντα κα σικίνελ πο ντανά.*
Υποσημειώσεις
^ Γιαβέρσοϊ «Όρος των Ελαιών».
^ Γιαβέρσοϊ «πόλεμοι».
^ Γιαβέρσοϊ «κα περέν».
^ Γιαβέρσοϊ «μπίλατσσιπε, κακία».
^ Κι Πουρανί Μπαλαμανί βακέρντιβελας «τι ντιντιόλ μαρτυρία σαρέ κο τθεμά».
^ Δηλαδή σο διαβάνελα ι προφητεία ι Δανιηλίσκι.
^ Ατθέ, ανταβά λάφι μανγκέλα τι βακερέλ «μα τσσιναβέν τι προσευχίντιβεν».
^ Γιαβέρσοϊ «Ντάβα-τουμέν τεμπί, δηλαδή προειδοποίηση».
^ Κι Πουρανί Μπαλαμανί βακέρντιβελας «αστραπή σο νικιόλα κατά ανατολή ντα λέλα-πες μέχρι κι δύση».
^ Ο πουρανό μπαλαμανό λάφι βακερέλα μουλέ τζενέσκε ή ζωόσκε.
^ Γιαβέρσοϊ «φεγγάρι».
^ Γιαβέρσοϊ «κολίν».
^ Κι Πουρανί Μπαλαμανί βακέρντιβελας «ακαγιά παραβολή».
^ Κι Πουρανί Μπαλαμανί ισινέ ο λάφι «γενιά».
^ Κι Πουρανί Μπαλαμανί βακέρντιβελας «καλέ σκοπιάτε».
^ Γιαβέρσοϊ «τσορνό».
^ Ανταβά σικαβέλα ότι κα τθερέλ χολί ντα κα καλιόλ λέσκο γκι.
