Ο Ευαγγέλιος σο Γραφιντάς ο Ματθαίος 23:1-39
23 Αζομάν ο Ιησούς κερντάς λάφι κο μπουτ τζενέ σο ισινέ γκιντιμέ οτθέ ντα πι μαθητέντε. Βακερντάς:
2 «Ο γραμματείς ντα ο Φαρισαίοι μπεσλέ κι θέση κι Μωυσίσκι.
3 Οτθάρ κερέν σαρέ οντουλά σο βακερένα τουμένγκε, αλλά μα κερέν σο κερένα βον, σόσκε βον γιαβερά βακερένα ντα γιαβερά κερένα.
4 Οντουλά σο τσσουβένα οπράλ κο τζενέ τι βάντεν ισί πφαρέ, αλλά βον να μανγκένα ούτε πουμαρό δάχτυλος τι τσσουβέν για τι βάντεν-λεν.
5 Σαρέ οντουλά σο κερένα, κερένα-λεν για τι ντικχέν-λεν ο τζενέ. Μπαριαρένα πουμαρέ φυλακτήρια* ντα ο κρόσσια πουμαρέ σεΐνγκε.
6 Μπεϊντίνενα* τι μπεσέν κι πο λατσσί θέση κο τραπέζια ντα κο ανγκλαϊνέ* καρέκλες κο συναγωγές,
7 τι χαιρετίνεν-λεν ο γιαβερά κο αγορές ντα τι ντεν-λεν βίκος ο τζενέ “Ραββί”.*
8 Τουμέν όμως μα μουκχέν ι γιαβερέν τι ντεν-τουμέν βίκος “Ραββί”, σόσκε τουμαρό Δάσκαλος ισί εκ τανό, ντα σαρέ τουμέν ισινέν πφραλά.
9 Ντα μα ντεν βίκος καεκχές σο ισί οπράλ κι πφουβ “ντάντε”, σόσκε τουμαρό Ντατ ισί εκ τανό ντα ισί κο ουρανός.
10 Ντα μα μουκχέν ι γιαβερέν τι ντεν-τουμέν βίκος “αρχηγέ”, σόσκε τουμαρό Αρχηγός ισί εκ τανό, ο Χριστός.
11 Αλλά κον τουμένταρ ισί ο πο μπαρό πρέπει τι υπηρετίνελ-τουμέν.
12 Ο Ντεβέλ κα περαβέλ τελέ ι τζενές σο ισαρέλα-πες ντα κα βάντελ οπρέ οντουλές σο ισί ταπεινός.
13 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε πφάντενα κο τζενέ ι πόρτα σο γκερέλα κι Βασιλεία κι ουρανόσκι. Εμ να τσσουβένα-τουμέν αντρέ εμ να μουκχένα οντουλέν σο τζάνα τι τσσουβέν-πες.
14 ——
15 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε τζάνα μπουτ ντουρ κι ντεριάβ ντα κι πφουβ για τι κερέν εκχέ τζενές τι λελ ι Ιουδαιόνγκι θρησκεία. Κάνα βοβ λέλα-λα, κερένα-λες τι αξίνελ ντούι φαρ πο μπουτ τουμένταρ τι τζαλ κι Γέεννα.*
16 »Τιμωρία κα τσσίντεν τουμέν, σο ισινέν κορορέ, αλλά σικαβένα ι γιαβερένγκε κάι τι τζαν, ντα βακερένα: “Άμα εκ τζενό κα χαλ σοβέλ κο ναός, ανταβά νανέ αζόμ σημαντικός. Αλλά άμα κα χαλ σοβέλ κο χρυσάφι κι ναόσκο, ισί υποχρεωμέ τι κερέλ πι σοβέλ”.
17 Ντινιλέ ντα κορορέ ισινέν! Σο ισί πο σημαντικός: ο χρυσάφι ή ο ναός σο λέσταρ αγιάντιβελα ο χρυσάφι;
18 Βακερένα ακαβά-ντα: “Άμα εκ τζενό κα χαλ σοβέλ κο θυσιαστήριος, ανταβά νανέ αζόμ σημαντικός. Αλλά άμα κα χαλ σοβέλ κο δώρος σο ισί οπρά-λέστε, ισί υποχρεωμέ τι κερέλ πι σοβέλ”.
19 Κορορέ ισινέν! Σο ισί πο σημαντικός: ο δώρος ή ο θυσιαστήριος σο λέσταρ αγιάντιβελα ο δώρος;
20 Άρα, κον χάλα σοβέλ κο θυσιαστήριος χάλα σοβέλ εμ κο θυσιαστήριος εμ σαρέ οντουλέντε σο ισί οπρά-λέστε.
21 Ντα κον χάλα σοβέλ κο ναός χάλα σοβέλ εμ κο ναός εμ Οντουλέστε σο μπεσέλα λέστε.
22 Ντα κον χάλα σοβέλ κο ουρανός χάλα σοβέλ κο θρόνος κι Ντεβλέσκο ντα Οντουλέστε σο μπεσέλα οπρά-λέστε.
23 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε ντένα χάνικ* κατά δυόσμος, κατά άνηθος ντα κατά κύμινος, αλλά κερντέν πέρα ο πο σημαντικά πράγματα σο ισί κο Νόμος, δηλαδή τι αβέν δίκαιοι, τι τζιτζίνεν* ι γιαβερένγκε ντα τι τθερέν πίστη.* Ισί μπαγιά ότι έπρεπε τι κερέν ανταλά πράγματα, χωρίς όμως τι κερέν πέρα ο πο σημαντικά.
24 Τουμέν σο ισινέν κορορέ, αλλά σικαβένα ι γιαβερένγκε κάι τι τζαν, νικαβένα ο κουνούπι τουμαρέ ποτηρίσταρ, αλλά μπιλιαβένα* ι γκαμήλα!
25 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε κερένα πάκι αβριάλ ο ποτήρι ντα ο τσαρό, αλλά αντράλ ισί πφερντέ μελ, επειδή τουμαρί γιακχ ισί μπίτσαλι ντα ναστί ατσσικιαρένα τουμαρό νεαυτός.
26 Κορορέα Φαρισαίε, πρώτα κερ πάκι αντράλ ο ποτήρι ντα ο τσαρό, για τι αβέλ αβριάλ-ντα πάκι.
27 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε ισινέν σαρ ασβεστωμέ μεζάρια* σο αβριάλ ντικχίντιβενα σουκάρ, αλλά αντράλ ισί πφερντέ κόκαλα μουλένγκε ντα μαγαριπέ.
28 Αντικάς τουμέν-ντα, αβριάλ ντικχίντιβενα δίκαιοι κο τζενέ, αλλά αντράλ ισινέν πφερντέ χουχαϊπέ ντα πφιρνιπέ.*
29 »Τιμωρία κα τσσίντεν τουμέν, γραμματείς ντα Φαρισαίοι, σο ισινέν ντουέ μουένγκε! Σόσκε λατσσαρένα ι προφητένγκε μεζάρια ντα ζουζίνενα ο μεζάρια ι δίκαιε τζενένγκε
30 ντα βακερένα: “Άμα αμέν κα τζουβντιάας κο ντιβεσά αμαρέ παππουδένγκε, να κα μουνταράας γιεκ λέντζαρ ι προφητέν”.
31 Άρα, κορκορέ τουμέν βακερένα ότι ισινέν τσσαβέ οντουλένγκε σο μουνταρντέ ι προφητέν.
32 Οτθάρ, μπιτισκιαρέν σο-ντα αρχιντέ τουμαρέ παππούδες.
33 »Σαπάλεν, σο ισινέν τσσαβέ οχιάκε, σαρ κα γλιτώνεν ι τιμωρία τι φουρτίντιβεν κι Γέεννα;*
34 Οτθάρ, μπουτσσαβάβα τουμέντε προφητέν, γκοντιαβέρ τζενέν ντα δασκαλόν.* Μερικέν κα μουνταρέν-λεν ντα κα ιμπλαβέν-λεν κο κας ντα γιαβερέν κα νταπέν-λεν βουρδαλόσαρ* τουμαρέ συναγωγέντε ντα κα τζαν λέντζαρ κόντρα τθεμ τθεμέστε.
35 Αντικάς, κα αβέλ οπρά-τουμέντε ο ρατ σαρέ ι δίκαιε τζενένγκο σο τσσορντιλό κι πφουβ, κατά Άβελ μέχρι κο Ζαχαρίας, σο λέσκο ντατ ισινέ ο Βαραχίας. Ι Ζαχαριάς μουνταρντέν-λες ανγκλάλ κο ναός, πασέ κο θυσιαστήριος.
36 Μπαγιά βακεράβα τουμένγκε: Σαρέ ανταλά κα αβέν οπράλ κο τζενέ σο τζουβντιόνα ανταλέ βακιτίστε.*
37 »Ιερουσαλήμ, Ιερουσαλήμ, σο μουνταρέλα ι προφητέν ντα φουρτίνελα μπαρά οντουλένγκε σο μπουτσσάντιβενα λάτε! Καζόμ φαρ μανγκλόμ τι γκίνταβ τι τσσαβέν, σαρ γκίντελα η κχανί πι πιλιτσκέν τελάλ πι πακένταρ! Αλλά τουμέν να μανγκλέν-λες.
38 Ντικχέν! Τουμαρό κχερ* ο Ντεβέλ κα μουκχέλ-λες τσουτσό τουμέντε.
39 Βακεράβα τουμένγκε: Να κα ντικχέν-μαν μέχρι τι βακερέν: “Ευλογημέ ισί οντουβά σο αβέλα κο ναβ κι Ιεχωβάσκο!”»*
Υποσημειώσεις
^ Ισινέ χουρντέ κουτιά σο τθερένας αντρέ λάφια κατά Νόμος ντα ιρίνας-λεν αρακχαϊμάσκε κο τσικάτ ντα κι αριστερή μουσί.
^ Γιαβέρσοϊ «Αρέζελα λένγκε».
^ Γιαβέρσοϊ «πο λατσσέ».
^ Γιαβέρσοϊ «Δάσκαλε».
^ Κι Πουρανί Μπαλαμανί βακέρντιβελας «ο δέκατος».
^ Γιαβέρσοϊ «αφοσίωση».
^ Γιαβέρσοϊ «νακχαβένα».
^ Γιαβέρσοϊ «λιμόρια».
^ Γιαβέρσοϊ «ισινέν ντουέ μουένγκε ντα τζάνα κόντρα κο Νόμος».
^ Ντικχ εδάφιος Ματθ. 23:15, υποσημείωση.
^ Βακερέλα ι μαθητένγκε σο κα σικλιαρένας ανγκλάλ κο τζενέ.
^ Γιαβέρσοϊ «μαστιγιόσαρ».
^ Κι Πουρανί Μπαλαμανί βακέρντιβελας «οπράλ ανταλέ γενιάτε».
^ Δηλαδή ο ναός.
