Ο Ευαγγέλιος σο Γραφιντάς ο Μάρκος 8:1-38
-
Ο Ιησούς ντέλα σταρ χιλιάδες τζενέν τι χαν (1-9)
-
Μανγκένα τι σικάντιβελ λένγκε σημάδι (10-13)
-
Η μαγιά ι Φαρισαιόνγκι ντα ι Ηρωδίσκι (14-21)
-
Ο Ιησούς σαστιαρέλα εκχέ κορορές κι Βηθσαϊδά (22-26)
-
Ο Πέτρος βακερέλα ότι ο Ιησούς ισί ο Χριστός (27-30)
-
Ο Ιησούς βακερέλα ότι κα μερέλ (31-33)
-
Κον ισί μπαγιά μαθητής ι Ιησούσκο (34-38)
8 Οντουλά ντιβεσά, γκιντισάλε πάλι μπουτ τζενέ, ντα να τθερένας τίποτα τι χαν. Οτθάρ, ο Ιησούς ντινάς βίκος ι μαθητέν ντα βακερντάς λένγκε:
2 «Τζιτζίναβα ι τζενένγκε, σόσκε ισί τριν ντιβεσά ακανά μάντζαρ ντα να τθερένα τίποτα τι χαν.
3 Άμα κα μπουτσσαβάβ-λεν λένγκε κχερέντε μποκχαλέ, να κα νταϊντίνεν κο ντρομ, ντα μερικοί λένταρ ισί ντουράλ».
4 Αλλά λέσκε μαθητές βακερντέ λέσκε: «Κάι τι αρακχέλ εκ τζενό μαντρό ατθέ κι ερημιά για τι τσαλιαρέλ αζόμ τζενέν;»
5 Αζομάν πουτσλάς-λεν: «Καζόμ μαντρέ τθερένα;» Βον βακερντέ: «Εφτά».
6 Ντα βακερντάς κο τζενέ τι μπεσέν τελέ. Σοράν λιντάς ο εφτά μαντρέ, κερντάς εκ προσευχή για τι βακερέλ ευχαριστώ κο Ντεβέλ, πφανγκλάς-λεν ντα ντινάς-λεν πι μαθητέντε για τι ιλιαβέν-λεν κο τζενέ, ντα βον ιλιαντέ-λεν λέντε.
7 Τθερένας χάνικ χουρντέ ματσσέ-ντα. Αφού ευχαριστιντάς ι Ντεβλές, βακερντάς λένγκε τι ιλιαβέν ο ματσσέ-ντα.
8 Αντικάς, χαλέ ντα τσαλιλέ, γκιντιντέ οντουλά σο ατσσιλέ ντα πφερντέ εφτά μπαρέ σεβλιά.*
9 Οτθέ ισινέ πασέ σταρ χιλιάδες μουρσά. Σοράν βακερντάς λένγκε τι νασέν.
10 Μπουτ σουγκό τσσουντάς-πες κι βάρκα πι μαθητέντζαρ ντα αβιλό κι Δαλμανουθά.
11 Οτθέ αβιλέ ο Φαρισαίοι ντα αρχισάλε τι χαν-πουμέν λαφίντζαρ λέσαρ. Βακερντέ λέσκε τι σικαβέλ λένγκε σημάδι κατά Ντεβέλ,* για τι δοκιμάνεν-λες.
12 Αζομάν τσσιντιντάς γκίσαρ ντα βακερντάς: «Σόσκε μανγκένα τι ντικχέν εκ σημάδι ο τζενέ σο τζουβντιόνα ανταλέ βακιτίστε;* Μπαγιά βακεράβα: Να κα ντικχέν καέκ σημάδι».
13 Σοράν μουκχλάς-λεν, τσσουντάς-πες πάλι κι βάρκα ντα γκιλό κι γιαβέρ μπάντα κι ντεριαβάκι.
14 Μπισταρντέ όμως τι λεν μαντρέ παλά-πουμέντε ντα να τθερένας τίποτα κι βάρκα εκτός εκχέ μαντρέσταρ.
15 Ντα ακαλέ λαφίντζαρ βακερντάς λένγκε τι τθερέν πουμαρί γκοντί: «Τι τθερέν πουταρντέ τουμαρέ γιακχά. Τι αρακχαβέν-τουμέν κατά μαγιά ι Φαρισαιόνγκι ντα κατά μαγιά ι Ηρωδίσκι».
16 Οτθάρ, βον αρχισάλε τι χαν-πες ο εκ ι γιαβερέσαρ σόσκε να τθερένας μαντρό.
17 Κάνα ο Ιησούς ντικχλάς-λες ανταβά, βακερντάς λένγκε: «Σόσκε χάνα-τουμέν ι μαντρέσκε; Ατζέ να τσσινέλα τουμαρί γκοντί ντα να αγαβένα; Ατζέκ ισί τουμαρό γκι αζόμ πφαντό σο ναστί αγαβέλα;
18 Μήπως “παρόλο σο τθερένα γιακχά, να ντικχένα, ντα παρόλο σο τθερένα κανά, να ασουνένα;” Να ντένα-τουμέν γκοντί
19 κάνα πφανγκλόμ ο παντς μαντρέ ι παντζέ χιλιάδες μουρσένγκε καζόμ σεβλιά πφερντέ μαντρέντζαρ γκιντιντέν;» Βον βακερντέ λέσκε: «Δώδεκα».
20 «Κάνα πφανγκλόμ ο εφτά μαντρέ ι σταρέ χιλιάδες μουρσένγκε, καζόμ μπαρέ σεβλιά πφερντέ μαντρέντζαρ γκιντιντέν;» Ντα βον βακερντέ λέσκε: «Εφτά».
21 Αζομάν βακερντάς λένγκε: «Ατζέ να αγαβένα;»
22 Ντα ερεσλέ κι Βηθσαϊδά. Οτθέ αντέ λέσκε εκχέ κορορές ντα μολιντέ-λες τι ασταρέλ-λες.
23 Βοβ λιντάς ι κορορές κατά βας ντα νικαντάς-λες αβρί κατά γκαβ. Τσσουνγκιαρντάς οπράλ λέσκε γιακχίντε ντα σοράν τσσουντάς πο βαστά οπρά-λέστε ντα πουτσλάς-λες: «Ντικχέσα τίποτα;»
24 Ο τζενό βαντιντάς πο γιακχά ντα βακερντάς: «Ντικχάβα τζενέν, αλλά ντικχίντιβενα μάνγκε σαρ δέντρα σο πφιρένα».
25 Πάλι τσσουντάς πο βαστά οπράλ κι τζενέσκε γιακχά ντα σαστιαρντάς-λες.* Αντικάς ο τζενό ντικχέλας-λεν σαρέ ντιπ λατσσές.
26 Οτθάρ, μπουτσσαντάς-λες λέσκε κχερέστε ντα βακερντάς λέσκε: «Μα τζα αντρέ κο γκαβ».
27 Σοράν ο Ιησούς ντα λέσκε μαθητές νασλέ για τι τζαν κο γκαβά σο ισί κι Καισάρεια κι Φιλιππόσκι, ντα κο ντρομ πουτσέλας-λεν: «Κάνα ο τζενέ κερένα λάφι μάνγκε, κον βακερένα ότι ισινόμ;»
28 Βον βακερντέ λέσκε: «Ο Ιωάννης,* γιαβερά όμως βακερένα ο Ηλίας ντα γιαβερά εκ κατά προφήτες».
29 Ντα πουτσλάς-λεν: «Τουμέν όμως κον βακερένα ότι ισινόμ;» Ο Πέτρος βακερντάς λέσκε: «Ισινάν ο Χριστός».
30 Αζομάν ντινάς-λεν εντολή μα τι βακερέν καεκχέσκε κον ισινέ.
31 Ντα αρχισάλο τι σικλιαρέλ-λεν ότι ο Τσσαβό ι τζενέσκο πρέπει τι τσσίντελ μπουτ ντα τι κερντιόλ πέρα κατά πρεσβύτεροι, κατά μπαρέ ιερείς ντα κατά γραμματείς, τι μερέλ ντα τι ιστίλ τριν ντιβεσά σοράν.
32 Ντα να σακιντίνελας τι βακερέλ ανταβά λάφι. Αλλά ο Πέτρος λιντάς-λες χάνικ πο οκόρινγκ ντα ντινάς βίκος οπρά-λέστε.
33 Αζομάν βοβ μπολντιντάς-πες, ντικχλάς πι μαθητέν ντα ντινάς βίκος οπράλ κο Πέτρος ακαλέ λαφίντζαρ: «Τζα παλά-μάντε, Μπενγκ! Σόσκε να τθερέσα τι γκοντιάτε ι Ντεβλέσκε πράγματα, αλλά ι τζενένγκε».
34 Σοράν ντινάς βίκος ι μπουτέ τζενέν σο ισινέ οτθέ ντα πι μαθητέν ντα βακερντάς λένγκε: «Άμα εκ τζενό μανγκέλα τι αβέλ παλά-μάντε, τι τσσιναβέλ τι τζουβντιόλ πέσκε, τι βάντελ πι ντουκχένγκο κας* ντα μα τι τσσιναβέλ τι πφιρέλ παλά-μάντε.
35 Σόσκε κον μανγκέλα τι σώνελ πι ζωή* κα χασαρέλ-λα, αλλά κον κα χασαρέλ πι ζωή* μάνγκε ντα ι λατσσέ αμπερίνγκε κα σώνελ-λα.
36 Μπαγιά, σο λατσσιπέ κα ντικχέλ ο τζενό άμα κα αβέλ λέσκο σαρό ο ντουνιάς αλλά κα χασαρέλ πι ζωή;*
37 Ή σο κα ντέλας ο τζενό για τι λελ παλάλ πι ζωή;*
38 Ο τζενέ σο τζουβντιόνα ανταλέ βακιτίστε* να ντένα καν* κο Ντεβέλ ντα ισί αμαρτωλοί. Κον κα λατζάλ ανγκλά-λέντε μάνγκε ντα μι λαφίνγκε, ο Τσσαβό ι τζενέσκο-ντα κα λατζάλ λέσκε κάνα κα αβέλ πι Νταντέσκε ζοριάσαρ* γιεκ ι άγιε αγγελόντζαρ».
Υποσημειώσεις
^ Γιαβέρσοϊ «κοφίνες».
^ Κι Πουρανί Μπαλαμανί βακέρντιβελας «ουρανός».
^ Κι Πουρανί Μπαλαμανί ισινέ ο λάφι «γενιά».
^ Γιαβέρσοϊ «ντα κερντάς-λες λατσσές».
^ Γιαβέρσοϊ «Ο Ιωάννης ο Βαφτιστής».
^ Γιαβέρσοϊ «ψυχή».
^ Γιαβέρσοϊ «ψυχή».
^ Γιαβέρσοϊ «ψυχή».
^ Γιαβέρσοϊ «ψυχή».
^ Κι Πουρανί Μπαλαμανί ισινέ ο λάφι «γενιά».
^ Γιαβέρσοϊ «νανέ πιστοί».
^ Κι Πουρανί Μπαλαμανί βακέρντιβελας «δοξάσαρ».
