Ο Γράμμας σο Γραφιντάς ο Ιάκωβος 1:1-27

  • Πρώτα λάφια (1)

  • Η υπομονή ανέλα ευτυχία (2-15)

    • Η πίστη σο ατσσόλα ζουρανί κο δοκιμασίες (3)

    • Κάνα μανγκένα κάτι κατά Ντεβέλ, τι τθερέν πίστη (5-8)

    • Ο πράγματα σο μανγκέλα ο γκι γκερένα κι αμαρτία ντα κο μεριπέ (14, 15)

  • Σαρέ ο λατσσέ δώρα αβένα οπράλ (16-18)

  • Οντουλά σο ασουνένα ντα κερένα ο λάφι ι Ντεβλέσκο (19-25)

    • Τζενό σο ντικχέλα-πες κο ανιάς (23, 24)

  • Η λατρεία σο ισί πάκι ντα νανέ μαγαριμέ (26, 27)

1  Με ο Ιάκωβος σο ισινόμ δούλος ι Ντεβλέσκο ντα ι Κυριόσκο, ι Ιησού Χριστόσκο, κεράβα σελιάμι* κο 12 φάρες σο ισί τρουγιμέ μπουτέ τθανέντε: 2  Πφραλάλεν, τι τθερέν μπαρί χαρά κάνα κα νακχέν σαβέ τι μανγκές δοκιμασίες, 3  σόσκε τζανένα ότι τουμαρί πίστη σο κα ατσσόλ ζουρανί κο δοκιμασίες κα ντελ-τουμέν ατζέ πο μπουτ ζορ για τι κερέν υπομονή. 4  Αλλά άμα να κα τσσιναβέν τι κερέν υπομονή,* ανταγιά υπομονή κα σικλιαρέλ-τουμέν ντιπ λατσσές, να κα τθερέν καέκ ελάττωμας ντα να κα λειπίνελ τουμένταρ τίποτα. 5  Οτθάρ, άμα κάποιος τουμένταρ νανέ μπουτ γκοντιαβέρ, πρέπει τι μανγκέλ σοφία κατά Ντεβέλ, ντα ο Ντεβέλ κα ντελ-λες, σόσκε ντέλα σαριλέντε σαρέ πι γκίσαρ ντα να ρόντελα τι αρακχέλ λάθη καεκχέστε. 6  Αλλά κάνα μανγκέλα κάτι κατά Ντεβέλ, τι τθερέλ πίστη ντα τι αβέλ ντιπ σίγουρος, σόσκε ο τζενό σο νανέ σίγουρος ισί σαρ ο κύματα ι ντεριαβάκε σο γκερέλα-λεν η μπαρμπάλ εκ ακατάρ εκ οκουτάρ. 7  Ανταβά τζενό δεν πρέπει τι μπεσέλ ότι κα ντελ-λες κάτι ο Ιεχωβά.* 8  Να τζανέλα σο μανγκέλα ντα νανέ σταθερός σαρέ οντουλέντε σο κερέλα. 9  Ο τσορορό πφραλ* τι χαιρίνελ* σο βαντίντιλο οπρέ κο γιακχά κι Ντεβλέσκε. 10  Ντα ο χουλανό τι χαιρίνελ σο πελό τελέ κο γιακχά κι τζενένγκε, σόσκε κα χασάρντιβελ* σαρ ο λουλούδια. 11  Κάνα νικιόλα ο κχαμ, ανέλα μπαρί κάψα ντα σουκιαρέλα ο φυτά, λένγκε λουλούδια περένα ντα λένγκο σουκαριπέ χασάρντιβελα. Αντικάς ο χουλανό-ντα κα μερέλ καζόμ τθάβντελα παλάλ κο χουλανιπέ. 12  Ευτυχισμέ ισί ο τζενό σο κερέλα υπομονή κάνα τθερέλα δοκιμασία, σόσκε κάνα κα νακχαβέλ ι δοκιμασία, σοράν κα λελ ο στεφάνι ι ζωγιάκο, σο ντινάς πο λάφι ο Ιεχωβά* οντουλέντε σο μανγκένα-Λες. 13  Καέκ κάνα νακχέλα δοκιμασία μα τι βακερέλ: «Κατά Ντεβέλ ισί ανταγιά δοκιμασία». Επειδή ο Ντεβέλ ναστί δοκιμάντιβελα μπέτι πραγματέντζαρ ντα βοβ να δοκιμάνελα καεκχές. 14  Αλλά ο κάθε εκ δοκιμάντιβελα κάνα ταρτίντιβελα κατά πράγματα σο μανγκέλα λέσκο γκι ντα χουχάντιβελα ανταλένταρ.* 15  Κάνα ανταλά πράγματα σο μανγκέλα αβένα μπουτ ζουρανέ λέσκε γκίστε, κερένα-λες τι αμαρτίνελ,* ντα σοράν η αμαρτία γκερέλα-λες κο μεριπέ.* 16  Πφραλάλεν, σο μανγκάβα-τουμέν μπουτ, μα χουχάντιβεν. 17  Σαρέ ο λατσσέ ντα ο τέλεια δώρα αβένα οπράλ, σόσκε αβένα κατά Ντατ σο λατσσαρντάς ο κχαμ, ο τσσιμούτ* ντα ο τσεργανιά.* Βοβ να αλλάνελα σαρ η βουτσσάλ σο αλλάνελα θέση. 18  Αντάς-αμέν κι ζωή αντράλ κατά αλήθεια, σόσκε ανταβά ισινέ σο μανγκέλας τι κερέλ για τι αβάς ο πρώτοι* σο τραμπίντιλε αντράλ οντουλένταρ σο λατσσαρντάς. 19  Ακαβά τι τζανέν, πφραλάλεν σο μανγκάβα-τουμέν μπουτ: Κάθε τζενό πρέπει τι αβέλ έτοιμος τι ασουνέλ, αλλά μα τι σιγκιαρέλ τι κερέλ λάφι ντα μα τι σιγκιαρέλ τι χολιάνελ, 20  σόσκε ο τζενό σο ισί χολιαμέ να κερέλα οντουβά σο ισί δίκαιος κο γιακχά κι Ντεβλέσκε. 21  Οτθάρ, νικαβέν τουμαρέ ζωγιάταρ σο-ντα μαγαριπέ ισί ντα σο-ντα γκεραλό πράγμας ατσσιλό.* Ντα δεχτίνεν κοβλέ γκίσαρ ο λάφι ι Ντεβλέσκο ντα μουκχέν τι νικαβέλ ρίζες τουμαρέ γκίστε, σόσκε ανταβά λάφι μπορίνελα τι σώνελ-τουμέν.* 22  Όμως, κερέν οντουβά σο βακερέλα ο λάφι ι Ντεβλέσκο ντα μα ασουνέν-λες σάντε, σόσκε αντικάς κα χουχαβένας τουμαρό νεαυτός πραγματέντζαρ σο ντικχίντιβενα τουμένγκε σωστά. 23  Άμα εκ τζενό ασουνέλα ο λάφι ι Ντεβλέσκο, αλλά να κερέλα-λες, ισί σαρ εκ τζενό σο ντικχέλα πο μούι κο ανιάς.* 24  Βοβ ντικχέλα-πες, αλλά σοράν νασέλα ντα μπιστρέλα σαρ ισί. 25  Όμως, οντουβά σο ρόντελα ντιπ λατσσές κο τέλειος νόμος σο ανέλα ελευθερία ντα ντέλα καν κο νόμος ανταβά, νανέ τζενό σο ασουνέλα ντα σοράν μπιστρέλα. Κερέλα ο νόμος, ντα κα αβέλ ευτυχισμέ σο κερέλα-λες. 26  Άμα εκ τζενό πακιάλα ότι ντέλα λατρεία ι Ντεβλές σωστά* αλλά να κερέλα κουμάντος πι τσσιπ, χουχαβέλα πο γκι, ντα σινανέ ντέλα λατρεία.* 27  Η λατρεία* σο ισί πάκι ντα νανέ μαγαριμέ κο γιακχά κι Ντεβλέσκε αμαρέ Νταντέσκε ισί ακαγιά: Τι βοηθίνελ εκ τζενό οντουλέν σο να τθερένα νταντές ή νταγιά ντα ι χηρέν κο στεναχώριες σο νακχένα ντα τι ατσσικιαρέλ πο νεαυτός πάκι κατά ντουνιάς.

Υποσημειώσεις

Γιαβέρσοϊ «μπουτσσαβάβα χαιρετίσματα».
Γιαβέρσοϊ «άμα η υπομονή κα τελειώνελ ι μπουτί σο κερέλα αντρέ τουμέντε».
Ντικχ Λεξικός.
Γιαβέρσοϊ «Ο πφραλ σο να τθερέλα μπαρί θέση κι κοινωνία».
Κι Πουρανί Μπαλαμανί βακέρντιβελας «τι ισαρέλ-πες».
Γιαβέρσοϊ «κα μερέλ».
Ντικχ Λεξικός.
Γιαβέρσοϊ «ντα αστάρντιβελα σαρ τι πελό κι παγίδα».
Κι Πουρανί Μπαλαμανί βακέρντιβελας «μπιανέλα ο μεριπέ».
Γιαβέρσοϊ «μπιανένα ι αμαρτία».
Γιαβέρσοϊ «φεγγάρι».
Γιαβέρσοϊ «αστέρια».
Κι Πουρανί Μπαλαμανί ισινέ ο λάφι «πρώτοι καρποί».
Ή μπέκιμ «σο-ντα γκεραλό πράγμας ισί μπερεκέτι». Ο λάφι «γκεραλό» βακέρντιβελα εμ «μπίλατσσο» εμ «κακός».
Γιαβέρσοϊ «τι σώνελ τουμαρί ψυχή».
Γιαβέρσοϊ «καθρέφτης».
Γιαβέρσοϊ «ότι τθερέλα ι σωστή θρησκεία».
Γιαβέρσοϊ «ντα λέσκι θρησκεία να τθερέλα αξία».
Κι Πουρανί Μπαλαμανί βακέρντιβελας «Η θρησκεία».