Ο Γράμμας σο Μπουτσσάντιλο κο Εβραίοι 2:1-18
2 Οτθάρ, ισί μπουτ σημαντικός τι ντας ατζέ πο μπαρί προσοχή κο λάφια σο ασουντάμ για μα τι νασάς ποτές κατά πίστη.
2 Σικάντιλο ότι τθερέλα ζορ ο λάφι ι Ντεβλέσκο σο μουτθάντιλο αντράλ κατά άγγελοι, ντα κάθε τζενό σο αμαρτιντάς ντα να ντινάς καν κο Ντεβέλ τιμωρισάλο δίκαια.
3 Άρα, αμέν σαρ κα γλιτώνας άμα να κα ντας σημασία κι σωτηρία σο ισί αζόμ μπαρί; Ανταγιά σωτηρία μουτθαντάς-λα πρώτα αμαρό Κύριος, ντα οντουλά σο ασουντέ-λες βακερντέ αμένγκε ντιπ οντουλά σο ντικχλέ ντα ασουντέ.
4 Ο Ντεβέλ-ντα σικαβέλας ότι οντουλά σο βακερένας ισινέ μπαγιά, σόσκε κερέλας θαύματα ντα σαβέ τι μανγκές μπαρέ πράγματα ντα ντέλας ο άγιος πνεύμας πι υπηρετόντε αντικάς σαρ μανγκέλας.
5 Ο Ντεβέλ να τσσουντάς αγγελόν τι κερέν κουμάντος ι πφουβ σο κα αβέλ, σο ανταλέ πφουβιάκε βακεράσα.
6 Αλλά σαρ γραφιντάς κάποτε εκ τζενό: «Σο ισί ο τζενό ντα τθερέσα-λες τι γκοντιάτε ή ο τσσαβό ι τζενέσκο ντα φροντίνεσα-λες;
7 Κερντάν-λες τι αβέλ χάνικ πο τελέ κατά άγγελοι. Ντινάν-λες δόξα ντα τσσουντάν-λες τι κερέλ κουμάντος οντουλά σο λατσσαρντάν.
8 Σαρέ ο πράγματα τσσουντάν-λεν τελάλ λέσκε πιντρένταρ». Αφού ντινάς-λεν σαρέ λέστε, ο Ντεβέλ να μουκχλάς τίποτα σο να κα κερέλας κουμάντος λέσκο Τσσαβό. Ακανά όμως να ντικχάσα ατζέ τι κερέλ κουμάντος σαρέ ο πράγματα.
9 Αλλά οντουβά σο ντικχάσα ισί ότι κο Ιησούς, σο αβιλόας χάνικ πο τελέ κατά άγγελοι, ακανά ντιντιλί-λες δόξα σόσκε τσσιντιντάς μπουτ μέχρι σο μουλό. Αντράλ κατά μπαρό λατσσιπέ ι Ντεβλέσκο μουλό ι κάθε τζενέσκε.
10 Σαρέ ο πράγματα υπαρχίντιβενα για τι δοξάντιβελ ο Ντεβέλ ντα υπαρχίντιβενα αντράλ λέσταρ. Για τι κερέλ μπουτέ τσσαβέν τι δοξάντιβεν, ντικχλάς ότι ισινέ λατσσό τι μουκχέλ Οντουλές σο Πουταρντάς ο Ντρομ τι τσσίντελ μπουτ για τι μπορίνελ* τι σώνελ-λεν.
11 Ο Ιησούς γιεκ οντουλέντζαρ σο αγιάνελα-λεν τθερένα ι ίδιε νταντές. Οτθάρ, να λατζάλα τι βακερέλ ότι ισί λέσκε πφραλά,
12 σόσκε βακερέλα: «Κα μουτθαβάβ το ναβ μι πφραλένγκε. Αντρέ κι κχανγκιρί κα ισαράβ-τουτ με ύμνους».
13 Ντα πάλι βακερέλα: «Με κα νταβ μπέσα λέστε». Ντα πάλι: «Ντικχέν! Με ντα ο χουρντέ τσσαβέ, σο ντινάς-μαν ο Ιεχωβά».*
14 Άρα, αφού ο «χουρντέ τσσαβέ» τθερένα σώμας,* βοβ-ντα αβιλό τζενό σωμάσαρ για τι καταστραφίνελ αντράλ πι μεριμάσταρ οντουλές σο τθερέλα ι ζορ τι ανέλ μεριπέ, δηλαδή ι Μπενγκές,
15 ντα τι ελευθερώνελ σαρέ οντουλέν σο ισινέ δούλοι σαρί πουμαρί ζωή επειδή νταρένας κατά μεριπέ.
16 Βοβ να βοηθίνελα αγγελόν, αλλά οντουλέν σο ισί προσάγγονα ι Αβρααμίσκε.
17 Οτθάρ, έπρεπε τι αβέλ σαρέ κο πράγματα σαρ ισί λέσκε «πφραλά» για τι αβέλ αρχιερέας* σο τζιτζίνελα* ντα σο ισί πιστός κι υπηρεσία κι Ντεβλέσκι. Αντικάς κα μπορίνελας τι ντελ εκ θυσία για τι συγχωρίντιβεν ο αμαρτίες ι λαόσκε ντα τι κερέλ-λεν τι αβέν πάλι αμαλά* ι Ντεβλέσαρ.
18 Βοβ τσσιντιντάς μπουτ κάνα δοκιμασάλο, οτθάρ μπορίνελα τι βοηθίνελ οντουλέν σο δοκιμάντιβενα.
Υποσημειώσεις
^ Δηλαδή τι τθερέλ ο ιδιότητες ντα ο ικανότητες σο χρειαζίντιβενα.
^ Γιαβέρσοϊ «τθερένα ρατ ντα σώμας».
^ Γιαβέρσοϊ «φίλοι».
