O sveto tano ki opasnost ando nuklearno maribe sose o svetska sile trudinena pe te ovel len sa pobuter nuklearno oružje. Logično tano so o manuša brininena pe, sose so pobuter isi nuklearno oružje, pana pobari tani i opasnost so ka ovel nuklearno maribe. O manuša čak darana so samo jekh nuklearno bomba šaj te legari đi o maribe kova ka uništini celo amaro sveto. Ćaće „živinaja ko sveto kuri šaj te ovel nuklearno maribe“ (Bulletin of the Atomic Scientists).

 Da li šaj te ovel nuklearno maribe? Ako ja, so ka ovel amare phuvjaja? So šaj te ćera ako brininaja amen so jekh dive šaj te ovel nuklearno maribe? So i Biblija phenela?

So ka dikha ko akava članko:

•  Da li ki Biblija pisini so ka ovel nuklearno maribe?

•  Da li o Devel ka dozvolini te ovel nuklearno maribe?

•  So ka ovel amare phuvjaja?

•  So šaj te ćera ako brininaja amen so jekh dive šaj te ovel nuklearno maribe?

•  Da li i Biblija phenela so o Armagedon tano nuklearno maribe?

•  Kova tano e biblijako rešenje aso mariba?

•  Da li ki knjiga Otkrivenje vaćeri pe ando nuklearno maribe?

 Da li ki Biblija pisini so ka ovel nuklearno maribe?

 Ki Biblija na pomini pe o nuklearno maribe. Ama, i opasnost ando nuklearno maribe avdije isi sebepi e manušenge stavija hem o događaija kola pominena pe ki Biblija.

 Uporedin odova so pisini ki Biblija odoleja so desini pe ko sveto:

 E biblijake stihija: E Isusese učenikija pućlje le: „So ka ovel znak andi ti prisutnost hem ando krajo kotar akava sveto?“ Ov phenđa: „Ka uštel o narodo upro narodo hem o kraljevstvo upro kraljevstvo“ (Matej 24:3, 7).

 O događaija ko sveto: But phuvja, so uključini hem okola so isi len nuklearno oružje, sa pobuter khuvena ko mariba.

 „Ko poslednja berša, o sveto ulo but nasilno. Isi sa pobuter hem pobuter konfliktija“ (The Armed Conflict Location & Event Data Project).

 E biblijako stih: „Ko vreme ando krajo, o kralj ando jug ka borini pe [e kraljeja ando sever]“ (Danilo 11:40).

 O događaija ko sveto: Sar so pisini ki Biblija, o suparnička sile hem olenge saveznikija borinena pe ko ka ovel le pobari vlast. Iako on na borinena pe jekh jekheja, on ipak ćedena sa pozoralo nuklearno oružje.

 „Ko poslednja deš berš sa pobuter konfliktija isi maškaro phuvja, a o bare sile podržinena o suparnička strane“ (Upsala program kotar podatkija ando sukobija).

 E biblijake stihija: „Ko poslednja dive ka ovel but pharo vreme. Sose o manuša ka oven [...] nespremna aso bilo savo dogovor, klevetnikija, bizi samokontrola, okrutna“ (2. Timoteju 3:1-3).

 O događaija ko sveto: Sar hem but manuša avdije, o svetska vođe but putija na slažinena pe jekh jekheja. Umesto mirno te rešinen pe konfliktija, on pretinena jekh jekhese maribaja. Sebepi odova, isi pana pobari opasnost ando nuklearno maribe.

 „Ako na arakhaja o način mirno te rešina o konfliktija, but manuša ka meren“ (Samir Saran hem Džejn Harman, Svetsko ekonomsko forum).

 Da li o Devel ka dozvolini te ovel nuklearno maribe?

 I Biblija na vaćeri odolestar. Koro late pisini so ko amaro vreme „odova so ka dikhen o manuša ka daravi len“ (Luka 21:11). Ađahar hine ko Dujto svetsko maribe ked hine fordime o atomska bombe. Ama, i Biblija objasnini sose o Devel dozvolini o mariba. Ako mangeja te đane pobuter, dikh o video Sose o Devel dozvolini te oven o lošnipe hem o muke?

 So ka ovel amare phuvjaja?

 Čak ked bi o manuša koristinena o nuklearno oružje, o Devel na bi dozvolini te ovel uništimo celo sveto. I Biblija phenela so i phuv tani ćerdi te šaj o manuša zauvek te živinen ano late.

 Disave manuša mislinena so ki budućnost ki phuv ka živinen samo hari manuša kola ka borinen pe te aćhon đivde, sose i phuv ka ovel zagadimi sebepi o nuklearno maribe. Ama, i Biblija phenela so o Devel ka cidel sa o posledice kola ulje sebepi o mariba.

 Amaro Stvoritelj ćerđa i phuv ađahar te šaj te obnovini pe. Isto ađahar, hem ov ka koristini pi moć te obnovini i phuv te šaj o manuša večno te živinen ano late (Psalam 37:11, 29; Otkrivenje 21:5).

 So šaj te ćera ako brininaja amen so jekh dive šaj te ovel nuklearno maribe?

 Disave manuša patinena andi „nuklearno zabrinutost“. Odija tani i dar ando nuklearno maribe hem ando posledice kola šaj te oven palo odova. E biblijake obećanja hem savetija šaj te pomožinen amenđe te na dara odobor. Sar?

 I Biblija vaćeri so e manušen hem i phuv ađićeri but šuži budućnost. Odija nada tani sar jekh „sidro andi duša“ sose pomožini amenđe te na brinina amen but (Jevrejima 6:19, fusnota). Isto ađahar, amen šaj te tiknjaćera amare brige ako na razmislinaja but ando lošna buća kola ka oven ki budućnost. Sar so o Isus phenđa „svako dive isi le pe pharipa“ (Matej 6:34).

 Šukar tano te brinina amen ando amaro psihičko hem emocionalno sastipe. Odova šaj te ćera ako ćhivaja amenđe granice ko odova kobor šunaja o vestija ando nuklearna dostignuća kola ćhivena amen te brinina amen andi budućnost. Odova na značini so amen našaja andi stvarnost. Umesto odova, amen ćeraja sa so šaj te na brinina amen ando buća kola našti te kontrolišina.

 Ma razmislin but ando lošna buća, već trudin tut te razmisline ando šukar buća ko to životi.

 Ako sikljoveja ando Devlese obećanja, ka ovel tut nada, radost hem mir.

 Da li i Biblija phenela so o Armagedon tano nuklearno maribe?

 Disave mislinena so o Armagedon tano nuklearno maribe. Sigurno zamislinena kola tane o posledice ando jekh asavko događaj.

 Ama, ked ki Biblija koristini pe o lafi „Armagedon“ mislini pe ko maribe maškaro „kraljija ando celo sveto“ ja o manušikane vlastija hem o Devel (Otkrivenje 16:14, 16). a Ko Armagedon o manuša na ka oven slučajno uništime, sar ked fordela pe jekh bomba. Umesto odova, ko Armagedon, o Devel ka uništini samo e lošno manušen hem sebepi odova ki phuv ka ovel mir (Psalam 37:9, 10; Isaija 32:17, 18; Matej 6:10).

 Kova tano e biblijako rešenje aso mariba?

 O Jehova b ka mothovi pi moć ađahar so ka ćhinavi o mariba maškaro narodija hem ka uništini olengo oružje. Ov odova ka ćerel prekalo po nebesko Kraljevstvo kova ka vladini upri phuv (Danilo 2:44).

 E Devleso Kraljevstvo već akana sikavi e manušen sar te živinen ko mir hem ki sloga. Sebepi so samo jekh vlast ka vladini upri celo phuv, više na ka oven problemija maškaro narodija hem o manuša na ka sikljon te borinen pe (Mihej 4:1-3). So ka ovel sebepi odova? „Svako ka bešel tali pi drakh hem tali pi smokva hem niko na ka daravi len“ (Mihej 4:4).