Ked hijam amare phralencar hem phenjencar šaj hem amen osetinaja amen sar o kralj David, kova phenđa: „Kobor tano šukar hem prijatno ked o phralja živinena ko jekhipe!“ (Psalam 133:1). Odova jekhipe na avela prekali rat. Svako amendar valjani diso te ćerel te šaj te ova ko jekhipe.

1. Soj tano posebno ko Devleso narodo?

Ako đaja ko sastankija ki disavi aver phuv, šaj na ka haljove i ćhib, ama ka osetine tut ka phene ćhere hijan. Sose? Odolese so koristinaja ista publikacije đi proučinaja e Devleso Lafi. Isto ađahar, amen mothovaja mangipe jekh jekhese. Kuri god te živina sare amen služinaja e Jehovase ko jekhipe (Sofonija 3:9, fusnota).

2. So šaj te ćere te šaj te ovel jekhipe?

Ko Devleso Lafi pisini: „Mangen jekh jekhe, celone vileja“ (1. Petrova 1:22). Sar šaj te ićere tut ko akava savet? Umesto te dikhe odova soj tano lošno ko avera, de sa tutar te dikhe odova soj tano šukar. Ma družin tut samo okolencar kola tane sar tute, već trudin tut pošukar te penđare okolen kola tane averćhane tutar. Sare amen valjani te da sa amendar te na ćera razlika maškaro manuša, već te poštujina sa e manušen. (Čitinen 1. Petrova 2:17.) a

3. So šaj te ćera ako povredinaja jekh jekhe?

Amen hijam ko jekhipe, ama na hijam savršena. Disavo puti šaj te dukhava jekh jekhe. Odolese, e Devleso Lafi phenela amenđe: „Ando vilo oprostinen jekh jekhese. . . Sar so o Jehova ando vilo oprostinđa tumenđe, ađahar ćeren hem tumen.“ (Čitinen Kološanima 3:13.) But putija amen povredinaja e Jehova, ama ov svako puti oprostini amenđe. Odolese, ov hem amendar ađićeri te oprostina amare phralese ja phenjaće. Ako tu nekas povredinđan, de sa tutar te pomirine tut oleja. (Čitinen Matej 5:23, 24.) b

 SIKLJOV POBUTER

4. Ma ćer razlika maškaro manuša

Valjani te manga sa e phralen hem e phenjen. Ama, ako tano neko averćhane amendar, tegani odova šaj te ovel pharo. So šaj te pomožini amenđe? Čitinen Dela apostolska 10:34, 35, hem palo odova vaćeren ando akala pućiba:

• O Jehova na dikhela koj tano ko hem olese služinena sa o manuša. Premalo odova, sar amen valjani te dikha upro manuša kola tane averćhane amendar?

• Sar o manuša odothe kaj tu živineja dikhena jekh upro aver? So mislineja, da li isi diso so tu valjani te menjine koro tute?

Čitinen 2. Korinćanima 6:11-13, hem palo odova vaćeren ando akava pućibe:

• So mislineja, sar šaj te ove pana popaše e phralencar hem e phenjencar kola tane averćhane tutar?

5. Ando vilo oprostin hem ćer te ovel mir

O Jehova uvek spremno oprostini amenđe, iako amen niked na ka valjani te oprostina olese. Čitinen Psalam 86:5, hem palo odova vaćeren ando akala pućiba:

• So kotar akava stih sikljovaja ando Jehova?

• Sose hijan zahvalno aso odova so o Jehova oprostini tuće?

• Sose disavo puti šaj te ovel amenđe pharo te ova ko jekhipe averencar?

Sar šaj te ova sar o Jehova hem te aćhova ko jekhipe amare phralencar hem phenjencar? Čitinen Poslovice 19:11, hem palo odova vaćeren ando akava pućibe:

• So šaj te ćere ako neko nervirini tut hem povredini tut?

 Disavo puti šaj ka povredina nekas. So šaj tegani te ćera? Dikhen o VIDEO, hem palo odova vaćeren ando akava pućibe.

• So ćerđa jekh phen te šaj te ovel ko mir avera phenjaja?

 SO SIKLJILJAM

Tu šaj te ćere te ovel jekhipe ki skupština ađahar so ka oprostine hem ka mothove mangipe sa e phralenđe hem e phenjenđe ki skupština.

Te ponovina

• So ka pomožini tuće te na ćere razlika maškaro manuša?

• So šaj te ćera ako povredinaja jekh jekhe?

• Sose valjani sar o Jehova te oprostina jekh jekhese?