I Jezavelja but holjanđa ked šunđa so ulo e Valese prorokonenđe. Oj bićhalđa poruka e Ilijase: „Tajsa, ka ove mudardo sar e Valese prorokija.“ O Ilija but darandilo hem našlja ki pustinja. Uduri phenđa e Jehovase: „Našti više te izdržinav. Mangava te merav.“ O Ilija hine umorno hem lelja le o sojbe talo jekh kaš.

Palo disavo vreme, jekh anđeo vazdinđa le ando sojbe hem phenđa lese: „Hajde, ušti hem ha.“ Tegani o Ilija dikhlja i pogača koja hine peki upro tate bara hem jekh khoro pani. Ov halja maro, pilja pani hem palem suća. O anđeo palem vazdinđa le ando sojbe hem phenđa lese: „Ha, sose valjani tuće snaga aso drumo ko kova valjani te đa.“ Odolese, o Ilija pana hari halja. Palo odova, ov pođinđa ko drumo kova trajinđa 40 dive hem 40 raća, sa đi na reslja ki planina Horiv. Odothe o Ilija khuvđa ki jekh pećina te sovel. Ama, o Jehova pućlja le: „Ilija, so ćereja akate?“ O Ilija odgovorinđa lese: „O Izraelcija na ićerđe pe ko odova so obećinđe tuće. On uništinđe te oltarija hem mudarđe te prorokonen. A akana hem man mangena te mudaren.“

Ko odova o Jehova phenđa lese: „Ikljov, mangava diso te mothovav tuće.“ Tegani počminđa te phudel bari bavlal. Pali bavlal hine zemljotres, a palo odova dikhlja bari jag. Ko krajo, o Ilija šunđa prijatno hem tiho glaso. Tegani o Ilija ućharđa po muj pe ogrtačeja hem ikljilo andi pećina. O Jehova pućlja le sose našlja, a o Ilija phenđa: „Kotar sa o prorokija samo me aćhiljum đivdo, a akana mangena hem man te mudaren.“ Ama, o Jehova phenđa lese: „Na hijan samo tu. Ko Izrael isi pana 7 000 manuša kola verno služinena maje. Đa hem ćhiv e Jeliseje te ovel proroko ko to than.“ O Ilija odmah đelo te ćerel odova so phenđa lese o Jehova. So mislineja, da li o Jehova hem tuće ka pomožini ako ćereja odova so rodela tutar? Sigurno! Hajde te dikha so ulo ko Izrael đi na pelo boršim.