Ked o izraelska uhodija alje ki diz Jerihon, on hine ko jekhe romnjako čher, koja vičindža pe Rava. O kralj ando Jerihon šundža odova hem bičhaldža pe vojnikonen ko olako čher. Oj garavdža odolje Izraelcen ko krov hem bičhaldža e vojnikonen te džan ko pogrešno drumo. I Rava phendža e uhodendže: „Ka pomožinav tumen, sose džanava so o Jehova tano tumencar hem so tumen ka osvojinen akija phuv. Ama, molinava tumen, obećinen maje so ka spasinen me porodica.“

On phendže e Ravače: „Obećinaja tuče so niko ando to čher na ka ovel povredimo. Mukh ki tiklji pendžera te visini jekh lolo šelo hem ti porodica ka ovel spasimi.“

I Rava čhivdža jekh šelo te šaj akala duj Izraelcija te huljen andi pendžera. On dželje ko planine hem uduri garavdže pe trin dive, palo odova irindže pe ko Isus Navin. Tegani, o Izraelcija nakhlje i reka Jordan hem spremindže pe te osvojinen i hanansko  phuv. O Jerihon hine i prvo diz koja osvojindže. O Jehova phendža ljendže jekh puti ko dive te phiren okolo i diz hem adžahar te čeren šov dive. A eftato dive odova čerdže efta putija. Tegani o sveštenikija phudindže ko šinga, a o vojnikija vičindže glasno. O zidija ko Jerihon rušindže pe! Ama e Ravako čher, iako hine ko odola zidija, na rušindža pe. I Rava hem olaki porodica spasindže pe, odoljese so hine ljen poverenje ko Jehova.