Ked o Mojsije hine ki planina Sinaj, o Jehova phenđa lese te ćerel jekh posebno šatori, kova vićinđa pe sveto šatori. Odothe o Izraelcija šaj hine te služinen lese. On valjanđe te len peja odova šatori kuri god te đan.

O Jehova phenđa: „Vaćer e manušenđe svako te del kobor šaj hem odoleja te ćerel pe o šatori.“ O Izraelcija dinđe zlato, srebro, bakar, skupocena bara hem nakit. Isto ađahar, dinđe vuna, lan, životinjsko koža hem but avera buća. Odobor but buća dinđe so o Mojsije morandilo te phenel: „Ćedinđam dovoljno! Ma anen ništa više.“

But murša hem đuvlja kola đanđe šukar te ćeren odija buti, pomožinđe te ćerel pe o šatori. O Jehova dinđa len mudrost te šaj šukar te ćeren i buti. Disave sivđe hem vezinđe, a avera redinđe o bara hem ćerđe razna buća ando zlato hem ando kaš.

O manuša ćerđe o šatori baš ađahar sar so phenđa lenđe o Jehova. On ćerđe jekh but šuži zavesa koja delinđa o šatori ko duj delija. Jekh deo vićinđa pe Svetinja, a aver Svetinja upro svetinje. Ki Svetinja upro svetinje hine ćhivdo o kovčeg ando savez. Ov hine ćerdo ando kaš akacija hem ando zlato. A ki Svetinja hine zlatno svećnjako, astali hem oltari kaj tharela pe hine o kad. Ko dvoro hine bakarno posuda panjese hem baro oltari. O kovčeg ando savez setinćerđa e Izraelcen ko olengo obećanje so ka oven poslušna e Jehovase. Đaneja li so značini o lafi  savez? Odova tano jekh posebno obećanje.

O Jehova birinđa e Arone hem olese ćhaven te služinen ko šatori sar sveštenikija. On valjanđe te brininen pe ando šatori hem te den žrtva e Jehovase. Samo o Aron hine prvosvešteniko hem samo ov šaj hine te khuvel ki Svetinja upro svetinje. Odova ćerđa jekh puti ko berš ked dinđa žrtva aso pe grehija, aso pe familijake grehija hem aso grehija kotar celo izraelsko narodo.

O Izraelcija završinđe o šatori jekh berš palo odova so ikljilje ando Egipat. Akana hine len than kuri šaj hine te služinen e Devlese.

E Jehovasi slava hine ko sveto šatori hem ov ćhivđa jekh oblako upro šatori. Sa đi o oblako hine upro šatori, o Izraelcija aćhilje ko isto than. Ama, ked o oblako vazdinđa pe, odova hine lenđe znak so valjani te đan ando odova than. Tegani, valjanđe te ćeden o sveto šatori hem te đan kuri o oblako igari len.