O Mojsije hem o Aron đelje te vaćeren e faraonese odova so vaćerđa lenđe o Devel: „Ako na mukheja me narodo te đal, ka mukhav o obadija te oven ki celo phuv.“ O obadija tane bare maćha kola hana e manušen hem e životinjen. Tegani, o obadija napadinđe e Egipćanen, hem e ćororen hem e barvalen. On pherđe celo egipatsko phuv. Ama, ki phuv Gesem, kuri živinđe o Izraelcija, na hine obadija. O prva trin nevolje hine hem aso Egipćanija hem aso Izraelcija, a avera nevolje hine samo aso Egipćanija. O faraon phenđa: „Molinen e Jehova te cidel akala obadija. Tegani ka mukhav tumare narodo te đal.“ Ama, ked o Jehova cidinđa o obadija, o faraon palem na manglja te mukhel e narodo te đal. Palo sa odova so ulo, o faraon hem ponodri aćhilo zorale šereso.

O Jehova phenđa: „Ako o faraon na mukhela me narodo, tegani e Egipćanenge životinje ka naborsaljon hem ka meren.“ Tajsato dive, o životinje počminđe te meren. Ama, e Izraelcenge životinje na mulje. Hem akava puti, o faraon na mukhlja e narodo te đal.

O Jehova phenđa e Mojsijese te đal ko faraon, te lel praho hem te fordel le ko vazduh. O praho širinđa pe hem ućharđa celo egipatsko phuv. Tegani e Egipćanenđe hem olenge životinjenđe ikljilje rane kola but dukhavđe len. Ama, o faraon ni pali akija nevolja na manglja te mukhel len.

Odolese, o Jehova palem bićhalđa e Mojsije ko faraon te phenel lese: „Pana na mangeja te mukhe  me narodo? Tajsa ka đal bari kukudi ki akija phuv.“ Tajsato dive, o Jehova mukhlja kukudi, gromija hem jag. Odija hine najbari oluja koja hine ko Egipat. Sa o kašta hem o biljke hine uništime, a ko Gesem na hine ništa. O faraon phenđa: „Molinen e Jehova te ćhinavi akava! Palo odova ka mukhav tumen te đan.“ Ama, ked ćhinavđa te đal i kukudi hem o boršim, o faraon palem na mukhlja e narodo te ikljol ando Egipat.

Tegani, o Mojsije phenđa: „A akana, o skakavcija ka han sa so aćhilo ando odova so uništinđa i kukudi.“ Palo odova, pojavinđe pe but skakavcija hem halje sa so aćhilo ko njive hem ko kašta. O faraon palem phenđa: „Molinen e Jehova te spasini amen ando skakavcija.“ Ama, iako o Jehova cidinđa len, o faraon palem na manglja te mukhel e narodo.

O Jehova phenđa e Mojsijese: „Vazde to vas upre ko nebo.“ Ko odova trenutko, o nebo kaljilo. Trin dive o Egipćanja hine ki tomnina, naštine ništa te dikhen. Ama, odothe kuri živinđe o Izraelcija hine svetlost.

O faraon phenđa e Mojsijese: „Tu hem to narodo šaj te đan. Mukhen samo tumare životinjen akate.“ O Mojsije phenđa lese: „Mora te la amare životinjen te šaj te da len sar žrtva amare Devlese.“ O faraon hine but holjamo. Počminđa te vićini: „Cide tut mandar! Ako pana jekh puti ikljiljan anglo me jaćha, ka mudarav tut!“