O Savle hine rimsko građanin kova bijandilo ko Tars. Ov hine farisej kova but šukar džandža o jevrejsko zakon. Ov but mrzindža e hrišćanen. Dželo ko oljenge čhera te astari hem e muršen hem e džuvljen kola hine hrišćanja. Ked arakhlja ljen, igardža ljen ko phanljipe. Jekh puti terdilo hem dikhlja sar o nasilna manuša barencar mudardže e Stefane.

Ama, o Savle na hine zadovoljno te astari samo e hrišćanen ko Jerusalim. Ov pučlja e prvosvešteniko te bičhalji lje ko Damask te šaj hem odothe te astari e hrišćanen. Ked o Savle reslja paše ko Damask, zoralji svetlost hine okolo ljeste, hem ov pelo telje ki phuv. Tegani šundža o glaso sar phenela: „Savle, sose progonineja man?“ O Savle pučlja: „Ko hijan tu?“ Ov odgovorindža: „Me hijum o Isus. Dža ko Damask hem me ka sikavav tut so valjani te čere.“ O Savle ulo kororo hem odoljese morandilje te doljen lje kotar vas hem te igaren lje ki diz.

Ko Damask, hine jekh verno hrišćanin kova vičindža pe Ananija. Ki jekh vizija o Isus phendža ljese: „Dža ko e Judaso čher, ki ulica koja vičini pe Prava, hem rode jekhe manuše kova vičini pe Savle.“ Ama, o Ananija phendža ljese: „Gospode, šundžum odolje manušese! Ov čerdža but lošna buča teklje učenikonendže hem fordindža ljen ko phanljipe!“ Ama, o Isus phendža ljese: „Dža koro ljeste sose birindžum e Savle te propovedini o šukar haberi bute manušendže.“

Ked o Ananija arakhlja e Savle, ov phendža ljese: „Savle, phrala, o Isus bičhaldža man te šaj paljem te dikhe.“ Palo odova, o Savle šajindža paljem te dikhel. Ov sikljilo ando Isus hem ulo oljeso učenik hem krstindža pe. Zajedno avere hrišćanencar,  o Savle propovedindža ko sinagoge. Sare kola šundže lje hine but iznenadime so ov sikavi e manušen e Isusestar. On phendže: „Da li tano ov odova manuš kova progonindža e Isusese učenikonen?“

Trin berš o Savle propovedindža e manušendže kola živindže ko Damask. O Jevreja mrzindže e Savle hem čerdže plan sar te mudaren lje. Ama, o phralja šundže odoljese hem pomožindže lje te našel. On čhivdže lje ki jekh korpa hem mukhlje lje kotar jekh otvor kova hine ko zido.

Ked o Savle dželo ko Jerusalim, manglja te propovedini zajedno e phraljencar. Ama, sarine darandilje oljestar. Odothe hine o Varnava kova ljelja e Savle hem igardža lje koro apostolija te šaj te uverini ljen so o Savle čače but menindža pe. O Savle počmindža hrabro te propovedini o šukar haberi zajedno e phraljencar hem e phenjencar ko Jerusalim. Palo odova, ov ulo pendžardo sar Pavle.