Ki Galileja, o Isus reslja pe peklje učenikonencar. Ov dindža ljen jekh but važno zapovest: „Džan hem čeren učenikonen ando sa o manuša. Sikaven ljen o buča kola me sikavdžum tumen, hem krstinen ljen.“ Palo odova, obećindža ljendže: „Ma bistren, uvek ka ovav tumencar.“

Palo oljeso uskrsenje, o Isus 40 dive pojavindža pe bute peklje učenikonendže ki Galileja hem ko Jerusalim. Ov sikavdža ljen but važna buča hem čerdža but čudija. Ama, o Isus akana ki Maslinsko gora reslja pe peklje apostolencar zadnjo puti. Ko Jerusalim, o Isus već phendža peklje apostolendže: „Ma ikljoven ando Jerusalim. Adžičeren odova so mo Dad obećindža.“

Ama, oljese apostolija na haljilje ko so ov mislindža. Odoljese pučlje lje: „Da li tu akana ka ove izraelsko kralj?“ O Isus phendža: „Pana na alo o vreme kova o Jehova odredindža te ovav kralj. Pana hari, o sveti duh ka del tumen zoraljipe hem ka oven meklje svedokija. Džan hem propovedinen ko Jerusalim, ki Judeja, ki Samarija hem sa dži o krajo e phuvjako.“

Tegani o Isus dželo ko nebo hem o oblakija učhardže lje. Oljese učenikija dikhlje ko nebo, ama više naštindže te dikhen lje.

O apostolija dželje kotar Maslinsko gora ko Jerusalim. Sar so uvek čerdže, reslje pe ki soba upre ko čher hem molindže pe. Adžičerdže o Isus te del ljen neve uputstvija.