O Jevreja svako berš slavindže i Pasha ko 14. dive ando masek nisan. Odova čerdže te šaj te setinen pe so o Jehova oslobodindža ljen ando ropstvo ko Egipat hem igardža ljen ki Obećimi phuv. Ko 33. berš ki amari era, o Isus hem oljese apostolija slavindže i Pasha ki jekh soba, upre ko jekh čher ko Jerusalim. Ko krajo andi večera, o Isus phendža: „Jekh tumendar ka izdajini man.“ O apostolija but iznenadindže pe hem pučlje lje: „A ko ka ovel odova?“ O Isus odgovorindža ljendže: „Okova kase ka dav akava maro.“ Tegani dindža o maro e Judase, kova hine pendžardo sar Juda Iskariotski. Odmah palo odova, o Juda uštindža hem ikljilo andi soba.

Palo odova, o Isus molindža pe, phaglja o maro hem dindža lje pe apostolendže so ačhilje oljeja. Ov phendža ljendže: „Han akava maro. Ov predstavini mo telo kova ka dav tumendže.“ Palo odova, ljelja o vino, molindža pe hem dindža lje e apostolendže. O Isus phendža ljendže: „Pijen akava vino. Odova predstavini mo rat kova ka dav te šaj te oven oprostime e manušenge grehija. Obećinava tumendže so ka oven kraljija mancar ko nebo. Čeren akava svako berš te šaj te setinen tumen koro mande.“ E Isusese sledbenikija, dži avdije čerena akava svako berš ki isto rat. Odova sastanak akana vičini pe e Gospodaresi večera.

 Ked završindža pe i večera, o apostolija počmindže te svađinen pe koj tano oljendar najbaro. Ama, o Isus phendža ljendže: „Najbaro tumendar tano okova kova pes dikhela sar najtikno hem so nane odobor važno.“

„Tumen hijen me amala. Vačerava tumendže sa so mo Dad mangela te phenav tumendže. Pana hari ka džav ko mo Dad ko nebo. Tumen ka ačhoven, hem o manuša ka džanen so hijen me učenikija ked ka dikhen so mangena jekh jekhe. Valjani te mangen jekh jekhe sar so me mangljum tumen.“

Ko krajo, o Isus molindža pe hem rodindža ando Jehova te arakhi sa oljese učenikonen. Molindža e Jehova te pomožini ljen te šaj te čeren o buča zajedno hem ko mir. Isto adžahar, molindža pe te posvetini pe e Devljeso nav. Palo odova, o Isus hem o apostolija džilabdže džilja koljencar hvalindže e Jehova hem sare ikljilje avri. Alo o vreme te astaren e Isuse.