Hari palo odova so krstinđa pe, o Isus počminđa te propovedini: „E Devleso Kraljevstvo tano paše.“ Olese učenikija hine oleja đi putujinđa ki Galileja hem ki Judeja. Ked irinđa pe ki pi diz, ko Nazaret, o Isus khuvđa ki sinagoga, phravđa o svitak kotar Isaija hem anglo sarinende počminđa te čitini: „O Jehova dinđa maje o sveti duh te šaj te propovedinav i šukar vest.“ So značinđe odola lafija? Iako o manuša manglje te dikhen sar o Isus ćerela čudija, o glavno razlog sose ov dobinđa o sveti duh hine te propovedini i šukar vest. Palo odova phenđa: „Akava proročanstvo ispuninđa pe avdije.“

Palo odova, o Isus đelo ko Galilejsko more. Uduri arakhlja štare učenikonen, kola hine ribarija. Ov phenđa lenđe: „Aven mancar! Više na ka astaren e maćhen, nego e manušen.“ Olenge anava hine Petar, Andrija, Jakov hem Jovan. On odmah mukhlje pi buti hem đelje palo Isus. On propovedinđe kotar Devleso Kraljevstvo ki celo Galileja. Propovedinđe ko sinagoge, ko pazarija hem ko ulice. But manuša đelje palo lende. Ando Isus vaćerđa pe kotar na, čak hem ki Sirija.

Sar nakhlja o vreme, o Isus dinđa moć pe učenikonenđe te saćaren e manušen hem te ikalen lendar e demonen. Avera đelje oleja đi propovedinđa, kotar diz ki diz hem kotar gav ko gav. But verna đuvlja, maškaro kola hine i Marija Magdalena, i Jovana, i Susana hem avera, brininđe pe kotar Isus hem kotar olese učenikija.

O Isus sikavđa pe učenikonen te propovedinen hem palo odova bićhalđa len ko dizja hem ko gava. Đi propovedinđe ki Galileja, but manuša prihvatinđe i šukar vest hem krstinđe pe. Odolese so but manuša manglje te oven e Isusese učenikija, ov phenđa so on tane sar jekh njiva koja tani spremno asi žetva. Ov phenđa: „Molinen e Jehova te bićhali pobuter radnikija asi žetva.“ Palo odova, birinđa 70 učenikija hem bićhalđa len duj po duj te propovedinen ki Judeja. On propovedinđe ando Devleso Kraljevstvo sa e manušenđe. Ked  irinđe pe, o učenikija jedva ađićerđe te vaćeren e Isusese sar nakhlje. O Beng naštine ništa te ćerel te ćhinavi len te propovedinen.

O Isus manglja olese učenikija te nastavinen te propovedinen hem ked ov ka irini pe ko nebo. Odolese phenđa lenđe: „Propovedinen i šukar vest ki celo phuv. Sikaven e manušen ando Devleso Lafi hem krstinen len.“