Sar nakhlja o vreme, o Valtasar ulo kralj ko Vavilon. Jekh rat, vićinđa ki jekh bari gozba e najvažna manušen ando celo kraljevstvo. Ov naredinđa pe slugenđe te anen o zlatna čaše so lelja len o Navuhodonosor ando Jehovaso hram. O Valtasar hem olese gostija pilje ando odola čaše hem slavinđe pe devlen. Ando jekh puti, pojavinđa pe manušikano vas hem počminđa te pisini o lafija ko zido kola niko na haljilo.

O Valtasar but darandilo. Ov vićinđa pe mađioničaren hem phenđa: „Ako neko tumendar vaćeri maje so značinena akala lafija, ka ćerav le te ovel o trito najmoćno manuš ko Vavilon.“ On trudinđe pe te objasninen o lafija, ama nijekh olendar naštinđa te ćerel odova. Alji i kraljica hem phenđa lese: „Isi jekh manuš so vićini pe Danilo, ov hem angleder e Navuhodonosorese objasninđa but buća. Ov šaj te objasnini hem tuće so značinena akala lafija.“

O Danilo alo ko kralj. O Valtasar phenđa lese: „Ako šaj te čitine hem te objasnine maje akala lafija, ka dav tut jekh zlatno lanco hem ka ćerav tut te ove o trito najmoćno manuš ko Vavilon.“ O Danilo phenđa lese: „Na mangava te de man ništa, ama ka vaćerav tuće so značinena akala lafija. To dad, o Navuhodonosor, hine but ponosno, ama o Jehova ponizinđa le. Tu đaneja sa odova, a palem pijeja kotar zlatna čaše ando Devleso hram. Odolese, o Devel pisinđa akala lafija: mene, mene, tekel hem farsin. Akala lafija značinena so o Medijancija hem o Persijancija ka osvojinen o Vavilon, a tu na ka ove više kralj.“

Ko odova vreme, o manuša mislinđe so o Vavilon našti niko te osvojini. Ki akija diz hine bare  zidija kola štitinđe la hem okolo celo diz hine hor reka. Ama, odija rat, o Medijancija hem o Persijancija napadinđe o Vavilon. O persijsko kralj, o Kir, ćerđa i reka te đal ki aver strana hem ađahar o vojnikija šaj hine te resen đi dizjake udara. Ked reslje đi ko udara, on hine phravde! On khuvđe ki diz, osvojinđe o Vavilon hem mudarđe e kralje. Tegani o Kir ulo kralj ko Vavilon.

Ko prvo berš ked počminđa te vladini, o Kir objavinđa: „O Jehova phenđa maje te obnovinav oleso hram ko Jerusalim. Sare so služinena e Jehovase, šaj te đan uduri hem te pomožinen ako mangena.“ Nakhlja 70 berš sar hine uništimi i diz, hem tegani but Jevreja irinđe pe ko Jerusalim sar so obećinđa o Jehova. Da li dikheja sar o Jehova koristinđa e Kire te šaj te pomožini pe narodose?