I Jestira hine Jevrejka koja živindža ki persijsko diz Susan. Angljeder but berša, o Navuhodonosor phanlja olake porodica hem ljegardža ljen kotar Jerusalim. Barjardža la olako rođako, o Mardohej, kova hine sluga ando persijsko kralj Asvir.

O kralj Asvir manglja te birini pese nevi kraljica. Oljese sluge andže ljese e najšuže čhajen ko celo kraljevstvo, maškaro kola hine hem i Jestira. Kotar sa odola, o kralj birindža e Jestira te ovel kraljica. O Mardohej phendža e Jestirače te na vačeri soj tani Jevrejka.

Jekh ponosno manuš kova vičindža pe Aman, hine čhivdo upro sa o knezija. Ov manglja sa o manuša te pokloninen pe oljese. Ama, o Mardohej na manglja te čerel odova. O Aman but holjandža hem manglja te mudari lje. Ked o Aman šundža so o Mardohej tano Jevrejin, čerdža plan te mudari sa e Jevrejen ki phuv. Ov phendža e kraljose: „O Jevreja tane but opasna hem mora te oslobodina amen oljendar. O Asvir phendža ljese: „Čer odova so mislineja soj tano najšukar.“ Palo odova, dindža lje vlast te anel o zakon. O Aman andža zakon te mudaren pe sa o Jevreja ko 13. dive ko masek adar. O Jehova dikhlja sa odova.

I Jestira na džandža aso akava zakon. Odoljese, o Mardohej bičhaldža lače i kopija kotar akava zakon hem phendža lače: „Dža ko kraljo hem vačer oljeja.“ I Jestira phendža ljese: „Svako ko ka džal ko kraljo, a nane vičimo ka ovel mudardo, a man o kralj na vičindža 30 dive! Ama, ka džav. Ako pružini po žezlo premalo mande, ka ačhovav dživdi, a ako na, ka merav.“

I Jestira dželji anglo kraljo. Ked dikhlja la, ov pružindža premalo late po žezlo. Oj alji uzo ljeste, hem ov pučlja la sar šaj te pomožini la. Oj phendža: „Mangava te  vičinav tut hem e Amane te oven me gostija.“ Dži hine koro late, oj vičindža ljen paljem te aven. Ked alje o dujto puti, o kralj paljem pučlja la sar šaj te pomožini la. Oj phendža: „Neko mangela te mudari man hem me narodo. Molinava tut, spasin amen.“ O kralj pučlja la: „Ko mangela te mudari tumen?“ Oj phendža: „Akava lošno Aman!“ O Asvir odobor holjandža so naredindža odmah te mudaren e Amane.

Ama, o zakon so andža o Aman naštindža niko te poništini, čak ni o kralj. Odoljese o kralj čhivdža e Mardoheje te ovel upro knezija hem dindža lje vlast te anel nevo zakon. O Mardohej andža zakon so o Jevreja šaj te braninen pe ked ka oven napadime. Ko 13. dive ko masek adar, o Jevreja pobedindže pe dušmanen. Kotar odova dive, on svako berš slavindže odija pobeda.