8. LEKCIJA
Sose o Devel dozvolini o lošnipe hem i patnja?
1. Sar o lošnipe počminđa?
O Devel dozvolinđa e manušenđe te vladinen dovoljno dugo, te bi mothovi pe so on našti te rešinen e manušenge problemija
O lošnipe ki phuv počminđa ked o Beng vaćerđa o prvo hovajbe. Ko početko, o Beng hine savršeno anđeo, ama „na aćhilo zoralo ko ćaćipe“ (Jovan 8:44). Ov manglja o manuša te obožavinen ole, a na e Devle, kova jedino isi le pravo ko odova. O Beng hovavđa e prvona đuvlja, e Eva, hem ubedinđa la te šunel ole, a na e Devle. Sar so i Eva na šunđa e Devle, ađahar hem o Adam na šunđa le. E Adamesi odluka anđa i patnja hem o meribe. Čitin Postanak 3:1-6, 19.
Ked o Beng ubedinđa e Eva te na šunel e Devle, odoleja ov počminđa i pobuna protiv e Devlesi vrhovno vlast. But manuša đelje ki e Bengesi strana hem odbacinđe e Devle sar pe Vladare. Ađahar, o Beng ulo „vladari akale svetoso.“ Čitin Jovan 14:30 hem 1. Jovanova 5:19.
2. Da li o manuša hem o anđelija hine len disavo nedostatak ked o Devel stvorinđa len?
Sa so o Devel ćerđa tano savršeno. O anđelija hem o manuša kolen ov stvorinđa hine sposobna savršeno te šunen e Devle (Ponovljeni zakoni 32:4, 5). O Devel dinđa amenđe sloboda te birina maškaro odova soj tano šukar hem soj tano lošno. Akija sloboda dela amenđe prilika te mothova amaro mangipe premalo Devel. Čitin Jakovljeva 1:13-15 hem 1. Jovanova 5:3.
3. Sose o Devel dozvolini pana te trajini i patnja?
Jekh određeno vreme, o Jehova dozvolinđa te trajini i pobuna protiv olesi vrhovno vlast. Sose? Te mothovi so e manušenge vladavine našti te anen ništa šukar e manušenđe (Propovednik 7:29; 8:9). Palo 6 000 berš, kobor o manuša vladinena, jasno dićhola so o manušikane vladarija našti te ciden o maribe, o kriminal, i nepravda hem o nabormipa. Čitin Jeremija 10:23 hem Rimljanima 9:17.
E Devlesi vladavina tani pošukar andi e manušengi, sose anela šukaripe okolenđe kola prihvatinena la (Isaija 48:17, 18). Pana hari, o Jehova ka uništini sa e manušenge vlastija. Samo o manuša kola birinena te šunen e Devle ka živinen ki phuv (Isaija 11:9). Čitin Danilo 2:44.
Dikh o kratko film Zašto Bog dopušta da patnja traje?
4. Koja prilika isi amen sebepi e Devleso strpljenje?
O Beng vaćerđa so o manuša služinena e Devlese samo sebepi i korist. Tu šaj te dokažine soj tano odova hovajbe! E Devleso strpljenje dela amenđe vreme te mothova da li mangaja o Devel te ovel amaro vladari ja o manuš. Amare đivdipaja mothovaja ki kasi strana hijam. Čitin Jov 1:8-12 hem Poslovice 27:11.
5. Sar šaj te mothova so birinđam e Devle te ovel amaro Vladari?
Amare odluke mothovena da li mangaja o Devel te ovel amaro Vladari
Amen šaj te mothova so birinđam e Devle te ovel amaro Vladari, ađahar so kotar e Devleso Lafi sikljovaja sar te obožavina le ko ispravno način hem ađahar ćeraja (Jovan 4:23). Ako sar o Isus, na mešinaja amen ki politika hem na đaja ko maribe, tegani ka mothova so o Beng nane amaro vladari. Čitin Jovan 17:14.
O Beng koristini pi moć te bi o nemoral hem o lošna buća dićhona sar diso šukar. Ked cidaja amen kotar asavke buća, disave amare amala ja rođakija šaj te asan ja te protivinen pe amenđe (1. Petrova 4:3, 4). Odolese, amen valjani te birina. Da li ka ova amala okolencar kola marena amenđe muj ja okolencar kola mangena e Devle? Da li ka šuna olese mudra zakonija kola dinđa amenđe sose mangela amen? Ako ćeraja odova, tegani ka mothova so o Beng hovavđa ked phenđa so nijekh manuš na ka šunel e Devle ked isi le pharipa. Čitin 1. Korinćanima 6:9, 10; 15:33.
E Devleso mangipe premalo manuša uverini amen so o lošnipe hem i patnja ka ovel len krajo. Okola kola verujinena e Devlese hem birinena le te ovel olengo Vladari, ka uživinen ko večno đivdipe ki phuv. Čitin Jovan 3:16.
