Amaro Stvoritelj tano pomudro amendar. Sar jekh manglo Dad, ov akhari gajlja amendar. Isto adžahar, amen bizo Devel našti te ovelmen bahtalo dživdipe (Jeremija 10:23). Sar so jekhe čhavore valjani te ljegari o dad hem i daj, isto adžahar hem amen o Devel valjani te ljegari (Isaija 48:17, 18). E biblijake zakonija ljegarenamen hem on tane baro daro ando Devel. Čitinen 2. Timotejese 3:16.

E Jehovase zakonija hem o sikljoviba andi Biblija, sikavenamen sar šaj te ovelmen najšukar dživdipe hem mothovena amendže sar šaj te ovelmen večna berečetija ko vakti so avela. Sebepi so o Devel čerdžamen, amen valjani te šunalje adžahar so ka muka Ov te ljegarimen ko amaro dživdipe. Čitinen Psalam 19:7, 11 hem Pučaribe 4:11.

E biblijake sikljoviba tane o čačipe kola pomožinena amen te haljova so o Devel mangela amendar ko but buča. A o zakonija tane čhivde te vačeren amendže direktno so valjani te čera ko disave buča (5. Mojsieso 22:8). Amen valjani hor te razmislina hem te haljova sar o sikljoviba andi Biblija šaj te ičera ko amaro dživdipe (Godžalje lafija 2:10-12). Na primer, i Biblija sikavi soj tano o dživdipe daro ando Devel. Ked ičeramen ko akava sikljovibe tegani odova ka arakhimen ked hijam ki buti, čhere ja ked vozinaja ko drumo. Čitinen Čeriba e Apostolengo 17:28.

O Isus vačerdža kola duj zakonija tane but važna. O prvo zakon mothovi soj tano važno ko manušeso dživdipe — te pendžari e Devlje, te mangel hem te služini oljese verno. Akava sikljovibe valjani uvek te ljegarimen ked anaja disave odluke (Godžalje lafija 3:6). Ako viljestar ičeramen ko akava sikljovibe  ka ovelmen amaljipe e Devljeja, čače ka ova bahtalje hem ka ovelmen večno dživdipe. Čitinen Matej 22:36-38.

O dujto zakon pomožini amen te ova šukar averenca (1. Korintskonendže 13:4-7). Ako ičeramen ko akava zakon tegani ka manga e manušen sar so o Devel mangelaljen. Čitinen Matej 7:12; 22:39, 40.

E Biblijake sikljoviba sikavena e familjijen sar te mangenpe jekh jekheja (Koloskonendže 3:12-14). E Devljeso Lafi isilje pana jekh sikljovibe kova arakhi e familjijen, a odova tano so o brak valjani te ovel trajno. Čitinen 1. Mojsieso 2:24.

Ked ičeramen ko biblijake sikljoviba odova ka pomožini amen te ovelmen okova so valjani amendže hem te ovelmen rahati. Na primer, ked jekh manuš rodela manušen te čeren buti koro oljeste ov uvek dikhela te ljel džikas kola tane bučarne, kola na hovavena hem na čorena sebepi so ičerenape ko Devljeso Lafi (Godžalje lafija 10:4, 26; Jevrejendže 13:18). E Devljeso Lafi sikavimen te na roda pobuter odoljestar so isimen hem te čhiva o amaljipe e Devljeja ko prvo than, a na o buča so isimen. Čitinen Matej 6:24, 25, 33 hem 1. Timotejese 6:8-10.

Ked ičeramen ko biblijake sikljoviba odova šaj te arakhi amaro sastipe (Godžalje lafija 14:30; 22:24, 25). Na primer, ako ičeramen ko Devljeso zakon te na mačova, adžahar ka arakhamen ando nabormipe hem ando buča kola šaj te anen dži odova te našala amaro dživdipe (Godžalje lafija 23:20). O Jehova mukela e manušen te pijen alkohol, ama na te pijen but te mačoven (Psalam 104:15; 1. Korintskonendže 6:10). E Devljese sikljoviba na pomožinena amen samo ked čeraja diso on hem arakhenamen te ovelmen čista mislija (Psalam 119:97-100). Ama, o čačutne hrišćanija na ičerenape ko Devljese sikljoviba samo odoljese sose tane oljendže šukar. On odova čerena sose mangena te slavinen e Jehova. Čitinen Matej 5:14-16.