HRIŠĆANSKO DŽIVDIPE

Diso nevo kotar masek januar

MUK

Kotar januar 2018. berš ko sastankija ko radno dive ka dikha o beleške hem o video materijali kova tano ko elektronsko izdanje ki Biblija sikljovibase (nwtsty), iako odova pana nane ki amari čhib. Odova isi samo ko elektronsko formati hem šaj te arakhipe ki amari internet stranica jw.org, ama akana isi samo ki englesko čhib. Sa akala informacije ka pomožinentu pohor hem pošukar te spreminetu sastankose. Isto adžahar, odova ka pomožinitu te ove popaše amare Dadeja, e Jehova, kova tano pherdo mangipa.

BELEŠKE

O beleške dena amen informacije kotar buča andi kultura hem kotar geografska thana hem so značinena disave lafija ja izrazija.

Matej 12:20

O fitilji kova čurini: I lampa koja koristijape ko purano vakti hine jekh tikno phuvjako čaro kuri hine čhivdo o maslinovo ulje. O laneno fitilji hinelje jag sa dži o ulje na trošijape. O Grčko izraz „o fitilji kova čurini“ mothovi o fitilji kova pana hinelje žaro, sa dži i jag na mudardilji. Ko Isaija 42:3 hine vačerdo so o Isus ka haljol sar tano e manušendže; ov niked ne bi ljela odija najtikni nada e manušendar kola tane ponizime hem koljendar na akharipe gajlja.

Matej 26:13

Čače: O Grčko lafi amin tano ljendo kotar Hebrejsko lafi amen, kova značini „nek ovel adžahar“ ja „adžahar tano“. O Isus but puča vačerdža akava lafi angljeder diso te phenel ja ked dija po lafi ja ked pheja disavo proročanstvo. Odoljeja mothodža odova sostar vačeri tano čačutno hem so šaj te verujina. Disave phenena so samo o Isus adžahar koristija akava lafi. Ked vačeripe duj puča (amin amin), sar soj tano ko Jovaneso Jevanđelje, tegani odova lafi prevedinipe „čače, čače“ (Jv 1:51).

VIDEO MATERIJALI

Slike, ilustracije, kratka filmija bizo glaso hem animacije kola mothovena razna detaljija kola tane pisime ki Biblija.

Vitfaga, Maslinsko gora hem Jerusalim

Akava film mothovi o drumo kova khuvela ko Jerusalim kotar istočno strana kaj tano o avdisutno gav Et-Tur (vačeripe so angljeder vičlijape Vitfaga), ov hine tano ko jekh najučo than ki Maslinko gora. I Vitanija hine istočno kotar Vitfaga, ki istočno strana ki Maslinko gora. O Isus hem oljese učenikija hineljen tabijati te soven ki Vitanija (ko odova than avdije tani i diz El-Azarija, a ki arapsko čhib odova značini „e Lazareso than“), ko čher kaj bešlje i Marta, i Marija hem o Lazar (Mt 21:27; Mr 11:11; Lu 21:37; Jv 11:1). Ov šaj dželo kotar oljengo čher ko Jerusalim e drumoja kova tano mothovdo ko akava film. Isto adžahar, ko 9. nisan ko 33. berš ki amari era, o Isus ko her khudža ko Jerusalim, ov šaj alo drumoja kotar Vitfaga prekalji Maslinsko gora.

O drumo kotar Vitanija dži i Vitfaga
Vitfaga
Maslinsko gora
Dolina Kedron
O than kuri hine o hram

E patumako kokalo posavdo baskija

Ki slika tani mothovdi i kopija ando kokalo kotar manušesi patum, ko kova hine kovimi i sastronalji baskija koja hine bari 11,5 santinja. O pravo kokalo kova hine kovimo e baskija arakhljape ko 1968. berš, dži hanljape diso ko severno Jerusalim hem avela kotar vakti ked živije o Rimljanja. Odova tano jekh arheološko dokaz kova mothovi so odola baskije šaj hine sar odola so koristijepe ked džiko hine osudimo te merel, adžahar so hine kovimo ko stubo. Akija baskija šaj te ovel isto sar okija so koristije o rimska vojnikija te kovinen e Isuse ko stubo. Ko akava than kuri hanljape, arakhljape jekh kutija ando bar. Ko asavke kutije hine tane čhivde o šuke kokala ando mulo manuš kaso telo čirnilo. Akava mothovi so džiko ko hine mudardo ko stubo šaj hine te ovel parumo (Mt 27:35).

AMARO HRIŠĆANSKO ĐIVDIPE HEM SLUŽBA – RADNO SVESKA