Hari palo 1940. berš, mo dad hem mi daj počminđe te proučinen i Biblija e Jehovase svedokonencar. Iako odova kurs na nastavinđa pe, mi daj pana dobinđa o časopisija Stražarska kula hem Probudite se! Ko 1950. berš ko Njujork hine međunarodno kongres hem meklje đelje ko odova kongres.

Sigate palo odova, o phral Lorens Džefriz alo koro amende. Ov ćaće trudinđa pe te pomožini man te penđarav o ćaćipe. Ki početka, mislinđum so o Svedokija na valjani te oven neutralna, već so valjani te učestvujinen ki politika hem te đan ko maribe. Phenđum lese: „Ako svako manuš ki Amerika na đala ko maribe, tegani o dušmanija ka aven hem ka len amendar i phuv.“ Ama, odova phral penđa maje: „So mislineja, so bi o Devel o Jehova ćerela ako bi sare ki Amerika služinena olese hem ako bi avela o dušmani te napadini len?“ Odola olese lafija, sar hem avera buća kola phenđa maje, pomožinđe man te haljovav so na hijum le u pravu. Kotar tegani hine man but bari želja te sikljovav ando ćaćipe.

Satencar čitinđum o purane izdanja andi Stražarsko kula hem Probudite se! kola mi daj ćhivđa ko podrum. Sar đelo o vreme, haljiljum so arakhljum o ćaćipe hem odolese počminđum te proučinav e phraleja Džefriz. Isto ađahar, počminđum te đav redovno ko sastankija. Mangljum odova so proučinđum hem odolese počminđum te đav ki služba sar nekršteno objavitelj. Me ciljija ko životi menjinđe pe ked haljiljum so „paše tano o baro dive e Jehovaso“ (Sof. 1:14). Odolese, mo cilj više na hine te đav ko fakultet, već mangljum te pomožinav e manušenđe te sikljon ando Devel.

Ko 13. jun ko 1956. berš završinđum i srednjo škola hem trin dive palo odova krstinđum man ko jekh pokrajinsko sastanko. Tegani, na đanđum kobor  o Jehova ka blagoslovini man sebepi odova so odlučinđum te služinav olese hem te sikavav averen olestar.

Šov masek palo odova so krstinđum man, uljum stalno pioniri. Ki Naša služba za Kraljevstvo ko decembar ko 1956. berš, hine jekh članko kova vićinđa pe „Da li šaj te služine odothe kuri tani pobari potreba?“ Me hijum le jekh ando odola kola šaj te ćeren odova hem mangljum te vaćerav i šukar vest averenđe (Mat. 24:14).

Selinđum man ki diz Edžfild, ki Južno Karolina. Ki odija skupština hine samo štar objaviteljija, a me hijum le o panđto. O sastankija ićerđam ko jekhe phraleso ćher. Svako masek đeljum prekalo 100 satija ki služba. Hijum le but zauzeto sebepi so predvodinđum ki služba hem ićerđum o sastankija. So pobuter buća ćerđum ki skupština, pana pobuter sikljiljum ando Jehova.

Jekh romni kolaja proučinđum i Biblija hine la pi firma aso pogrebna usluge ki diz Džonston. Odija diz hine nekobor kilometrija dur ando than kuri me živinđum. Oj ponudinđa maje nekobor dive ko kurko te ćerav buti odothe hem mukhlja jekh tikni zgrada te koristina sar amari dvorana.

O phral koleja proučinđum hine le jekh ćhavo kova vićinđa pe Džoli Džefriz. Ov selinđa pe ando Bruklin hem ulo mo partneri asi služba. Tegani, živinđam ki jekh tikni prikolica koja dinđa amen jekh phral.

O plate ko jug hine but tikne. Zaradinđam duj ja trin dolarija ko dive. Jekh puti, đeljum ki radnja te ćinav diso hajbase hem trošinđum o zadnja pare kola hine man. Ama, ked ikljiljum andi radnja, jekh manuš alo uzo mande hem phenđa maje: „Da li valjani tuće buti? Šaj te dav tut jekh dolari ko jekh sati.“ Trin dive čistinđum o gradilište. Tegani dikhljum so o Jehova mangela te pomožini maje te aćhovav ki diz Edžfild. Iako na zaradinđum but, ipak ko 1958. berš šaj hine te đav ko međunarodno kongres kova ićerđa pe ko Njujork.

Ko dujto dive ko odova kongres, desinđa pe diso but šukar. Upoznajinđum man e phenjaja Rubi Vedlington, koja služinđa sar stalni pionir ki diz Galatin, ko Tenesi. Odolese so solduj mangljam i misionarsko služba, đeljam ko sastanak asi škola Galad kova ićerđa pe ko odova kongres. Kasnije, počminđam te pisina lila jekh jekhese. Palo odova, o phralja vićinđe man te ićerav jekh govor ki olaki skupština hem tegani pućljum la te ovel mi romni. Selinđum man ki olaki skupština hem ko 1959. berš venčinđam amen.

Ked hine man 23. berš, počminđum te služinav sar sluga andi skupština (akana odova vićini pe koordinator ando starešinstvo) ki diz Galatin. Amen hijam le prvo skupština koja o phral Čarls Tompson posetinđa sar pokrajinsko nadgledniko. Iako hine le baro iskustvo, ov pućlja man so valjani e phralenđe hem sar avera pokrajinska  nadglednikija brininena pe ando skupštine. Olestar sikljiljum so angleder te anav bilo koja odluka, but tano šukar te pućav averen so mislinena odolestar.

Ko maj ko 1964. berš, hijum le vićimo te đav jekh masek ko Seminar aso naimenuijme phralja ko Saut Lansing, ko Njujork. O phralja kola ićerđe odija škola pomožinđe man te ovel man pana pobari želja te sikljovav ando Jehova hem te ovav pana popaše oleja.

Ko januar ko 1965. berš, i podružnica zamolinđa amen te služina ki pokrajinsko služba. Amari pokrajina hine but bari, kotar Noksvil, Tenisi đi o Ričmond, Virdžinija. Isto ađahar, odothe hine o skupštine kotar severno Karolina, Kentaki hem Zapadno Virdžinija. Posetinđam samo o skupštine kuri hine o phralja kola hine kale, odolese so o zakon ando rasna podele ko jug andi Amerika na dozvolinđa amenđe te posetina o skupštine kuri hine o parne. O phralja hine but ćorore. Odolese sikljiljam te delina olencar odova so hine amen. Jekh phral kova beršencar služinđa sar pokrajinsko nadgledniko, sikavđa man jekh but važno buti. Ov phenđa maje: „Ov lenđe phral. Ki skupština, ma ponašin tut samći hijan lengo gazda. Tu šaj te pomožine lenđe jedino ako on upro tute dikhena sar upro po phral.“

Đi posetinđam jekh tikni skupština, i Rubi počminđa te proučini jekha ternja romnjaja. Odija romni hine la jekh ćhaj koja hine la jekh berš. Sebepi so ki odija skupština na hine ko te proučini olaja, i Rubi proučinđa olaja prekalo lila. Aver puti ked đeljam te posetina odija skupština, dikhljam so odija romni avela redovno ko sastankija. Ked duj phenja alje ki odija skupština te služinen sar specijalna pionirija, on počminđe te proučinen odola romnjaja hem hari palo odova oj krstinđa pe. Ama palo 30 berš ko 1995. berš, ko Betel, ko Paterson, jekh terni phen alji te vaćeri me romnjaja. Odija terni phen hine i ćhaj andi odija romni kolaja proučinđa i Rubi. Oj hem olako rom tegani hine ko 100. razred ki škola Galad.

Amari dujto pokrajina hine ki centralno Florida. Tegani valjanđe amenđe vorda hem ćinđam vorda kola na hine odobor skupa. Ama, već ko prvo kurko ked počminđam te vozina len, on ruminđe pe, a na hine amen pare te namestina len. Vićinđam jekhe phrale aso kova mislinđam so šaj te pomožini amen. Ov zamolinđa jekhe pe radniko te namestini o vorda, ama na rodinđa amendar pare aso odova. Ov samo phenđa: „Na valjani te platinen.“ Čak hem dinđa amen pare. Akava mothovđa amenđe kobor o Jehova brinini pe ando pe sluge hem kobor amen valjani te ova phravde vastese.

Ked god posetinđam disavi skupština, amen sućam ko phralja. Sar đelje o berša, hine amen but šukar amala. Jekh dive, počminđum te pisinav o izveštaj asi skupština ki koja hijam le odova kurko hem o lil mukhljum ani pisaćo mašina. Ama, raćate ked irinđum man ćhere, haljiljum so o tikno ki odija porodica kuri sućam, pipinđa o dugme ki pisaćo mašina. Ov baš „pomožinđa“ maje, palem morandiljum te pisinav o izveštaj. Beršencar zadinđum le sebepi odova.

Ko 1971. berš, dobinđum jekh lil ko kova pisinđa so o phralja zamolinđe man te služinav sar oblasno nadgledniko ko Njujork. Amen hijam le but iznenadime. Ked selinđam amen odothe, hine man samo 34 berš. Hijum le prvo phral kova hine kalo hem kova služinđa sar oblasno nadgledniko. A o phralja ćaće but šukar dočekujinđe amen.

Sar oblasno nadgledniko, uživinđum svako kurko ko pokrajinska sastankija te sikavav averen ando Jehova. But ando pokrajinska nadglednikija hine len pobaro iskustvo mandar. Jekh olendar ićerđa govor ko mo krštenje. A aver hine o Teodor Džeres, kova kasnije ulo član ando Vodeće telo. Odothe hine but iskusna phralja kola služinđe ko Betel, ko Bruklin. Hijum le but zahvalno so o pokrajinska nadglednikija hem o phralja ando Betel pomožinđe man te osetinav man šukar. Kokri dikhljum kobor odola pastirija osloninena pe upro Devleso Lafi hem kobor podupirinena e Devlesi organizacija. On hine but ponizna hem sebepi odova hine maje lokho te služinav sar oblasno nadgledniko.

Ko 1974. berš, o Vodeće telo birinđa jekh aver grupa ando phralja te služinen sar oblasna nadglednikija  hem ađahar me palem irinđum man ki pokrajinsko služba. Ama, akava puti ki severno Karolina. Ko odova vreme, o kale hem o parne ko jug andi Amerika šaj hine te oven zajedno hem odolese o skupštine spojinđe pe. O phralja hem o phenja hine but bahtale sebepi odova.

Ko kraj ando 1976. berš, počminđum te služinav ki jekh pokrajina ki Džordžija, maškar i Atlanta hem o Kolumbus. Pana setinava man ked morandiljum te ićerav o govor aso parujbe aso panđ kale ćhave kola mulje sose disave manuša tharđe olengo ćher. E ćhavengi daj morandilji te đal ki bolnica sebepi so hine la bare povrede. But phralja, kola hine hem kale hem parne, alje ki bolnica te utešinen e ćhavenge roditeljen. Tegani šaj hine te dikhav kobor baro mangipe hine maškaro olende. Ked e Devlese sluge mothovena asavko mangipe, on šaj te istrajinen ko but bare pharipa.

Ko 1977. berš hijam le zamolime te đa ko Betel, ko Bruklin hem nekobor masek te pomožina ko jekh projekat. Hari angleder te završini pe odova projekat, duj phralja ando Vodeće telo pućlje man da li šaj i Rubi hem me te aćhova ko Betel. Amen phenđam so mangaja.

Ko Betel, 24 berš ćerđum buti ko Službeno odeljenje. But putija, o phralja ando odova odeljenje valjani te odgovorinen ko disave phare pućiba. O phralja ando Vodeće telo uvek dena amen uputstvija kola temeljinena pe ko načelija andi Biblija. Odola uputstvija pomožinena e phralenđe ko Službeno odeljenje te odgovorinen ko razna pućiba. On služinena hem sar osnova asi obuka aso pokrajinska nadglednikija, starešine ja pionirija. Sebepi odova, e Jehovasi organizacija tani pana pozorali hem pana postabilno.

Kotar 1995. đi o 2018. berš, posetinđum nekobor skupštine sar predstavniko ando glavno sedište, kova angleder vićinđa pe zonsko nadgledniko. Hine man prilika te upoznajinav hem te ohrabrinav e phralen ando Odbor andi podružnica, e beteliten hem e misionaren. Ama, đi on vaćerđe pe iskustvija, on amen ohrabrinđe. Na primer, ked ko 2000. berš đeljam te posetina e phralen ki Ruanda, tegani o phralja hem o betelitija vaćerđe amenđe sar preživinđe o genocid ko 1994. berš. But olendar našalđe pe manglen. Ama, iako nakhlje but bare pharipa, on hine len vera, nada hem radost.

Akana isi amen prekalo 80 berš. Ko zadnja 20 berš, služinava ko Odbor andi podružnica, ki Amerika. Iako niked na đeljum ko fakulteti, o Jehova hem olesi organizacija dinđe man najšukar obrazovanje. Sebepi odova, buten šaj hine te sikavav ando Devleso Lafi, a odova but pomožinđa lenđe (2. Kor. 3:5; 2. Tim. 2:2). Šaj hine te dikhav sar odova so sikavi e Devleso Lafi pomožini e manušenđe te ovel len pošukar životi hem te oven paše e Jehovaja (Jak. 4:8). Ked god šaj, i Rubi hem me ohrabrinaja averen te ceninen odova so isi len prilika te sikljon ando Jehova hem te sikaven averen ando oleso Lafi. Odija tani bari čast koja e Devleso sluga šaj te ovel le!