1-2. (a) Kola sličnostija isi maškaro amende hem o Jevreja kola irinđe pe ko Jerusalim? (b) Vaćer kola pharipa hine len o Jevreja. (Dikh o okvir „ O vreme ked živinđe o Agej, o Zaharija hem o Jezdra“)

 DA LI disavo puti brinineja tut andi ti budućnost? Šaj našalđan ti buti hem brinineja tut sar ka izdržine te porodica. Ja šaj sebepi i političko situacija ko sveto, o progonstvo ja o protivljenje brinineja tut da li ti porodica ka ovel bezbedno. Da li isi tut asavke problemija? Ako ja, tegani but ka ohrabrini tut te dikhe sar o Jehova pomožinđa e Izraelcenđe kola hine len slična problemija.

² E Jevrejenđe kola celo po životi živinđe ko Vavilon valjanđa bari vera te šaj te aćhaven o barvalipe hem o udobno životi kova hine len hem te đan ki phuv andi koja but đene na đanđe but buća. Samo so reslje, na nakhlja but, upro lende utičinđa i ekonomsko hem i političko situacija koja hine but lošno. Uzo odova, protivinđe pe lenđe hem o okolna narodija. Odolese, disavenđe hine but pharo te den sa pestar te učestvujinen ko odova te obnovini pe e Jehovaso hram. Odolese oko 520. berš angl. n. e., o Jehova bićhalđa duje prorokonen e Ageje hem e Zaharija te pomožinen e narodose te oven palem revna (Ag. 1:1; Zah. 1:1). Sar so ka dikha, odola duj prorokija but ohrabrinđe e narodo. Ama oko 50 berš palo odova so o Jevreja alje ko Jerusalim, e narodose palem valjanđa ohrabrenje. Tegani, o Jezdra kova hine vešto prepisivači ando Devleso Zakon, kotar Vavilon đelo ko Jerusalim te ohrabrini e Devlese narodo hem te podstaknini len te ćhiven e Jehova ko prvo than ko po životi (Jezd. 7:1, 6).

3. Ando kola pućiba ka vaćera ko akava članko? (Poslovice 22:19)

 ³ Odova so o Agej hem o Zaharija phenđe e Devlese narodose but pomožinđa len te ovel len poverenje upro Jehova ked hine len pharipa. Isto ađahar, odova šaj te pomožini hem amenđe te ovel amen poverenje upro Jehova đi nakhaja disavo pharipe. (Čitin Poslovice 22:19.) Đi ka razmotrina i poruka koja o prorokija o Agej hem o Zaharija vaćerđe hem o primer kotar Jezdra, ka dobina odgovor ko akala pućiba: Sar o Izraelcija kola irinđe pe ko Jerusalim iklilje ko krajo pe problemencar? Sose valjani hem ponodri te ćhiva e Devle ko prvo than, iako isi amen pharipa? Sar šaj te ovel amen pana pobaro poverenje upro Jehova đi isi amen disavo pharipe?

4-5. Sose o Jevreja našalđe pi revnost te gradinen e Jehovaso hram?

⁴ O Jevreja kola irinđe pe ko Jerusalim hine len but buti. On sigate obnovinđe e Jehovaso oltari hem ćhivđe o temelji aso hram (Jezd. 3:1-3, 10). Ama, sigate našalđe pi revnost. Sose? Uzo odova so valjanđe te obnovinen o hram, on valjanđe te ćeren pese ćhera, te ćeren buti ko poljija hem te obezbedinen hrana pe porodicaće (Jezd. 2:68, 70). Isto ađahar, olenge dušmanija but protivinđe pe lenđe hem ćerđe planija sar te ćhinaven i gradnja ando hram (Jezd. 4:1-5).

⁵ I ekonomsko hem i političko situacija na hine baš najšukar. Akana olengi phuv hine deo ando persijsko carstvo. Palo odova so o kralj Kir mulo ko 530. berš angl. n. e., oleso nasledniko o Kambiz manglja te osvojini o Egipat. Ked pođinđe ko Egipat, o vojnikija šaj nakhlje kotar izraelsko phuv hem verovatno ando Izraelcija rodinđe hrana, pani hem than kaj šaj te oven, a odova ćerđa lenđe pana pobare problemija. Ked aver kralj počminđa te vladini, o Darije I, pana hine problemija. But manuša pobuninđe pe hem hine građanska nemirija ko persijsko carstvo. Sebepi sa akala problemija, disave Jevreja brininđe pe sar ka izdržinen pe porodica hem mislinđe so nane baš najšukar vreme te gradini pe e Jehovaso hram (Ag. 1:2).

6. Premalo Zaharija 4:6, 7, kola pana pharipa hine len o Jevreja hem ko so o Zaharija uverinđa len?

⁶ Čitin Zaharija 4:6, 7. Uzo odova so hine len ekonomska problemija hem so i političko situacija na hine šukar, o Jevreja hine len hem protivljenje. Ko 522. berš angl. n. e., o dušmanija uspinđe te ubedinen e persijsko vlada te ćhinavi i obnova ando hram. Ama, o Zaharija uverinđa e Jevrejen so o Jehova ka koristini po moćno sveti duh hem so ka pomožini len te nastavinen i obnova iako isi len problemija. Ko 520. berš angl. n. e., o kralj Darije dozvolinđa lenđe te počminen palem te gradinen hem čak dinđa len pare te ćeren odova. Isto ađahar, naredinđa i lokalno vlada te pomožini len te ćeren odova (Jezd. 6:1, 6-10).

7. Sar o Jehova blagoslovinđa e Jevrejen kola irinđe pe ko Jerusalim ked ćhivđe olesi volja ko prvo than?

 ⁷ Prekalo prorokija o Agej hem o Zaharija, o Jehova obećinđa pe narodose so ka pomožini lenđe ako ko prvo than ćhivena i gradnja ando hram (Ag. 1:8, 13, 14; Zah. 1:3, 16). Akala prorokija  but ohrabrinđe len, odolese o Jevreja ko 520. berš angl. n. e. palem počminđe te gradinen o hram hem završinđe le pohari ando panđ berš. Odolese so e Jehovasi volja ćhivđe ko prvo than, iako hine len bare problemija, ov dinđa len odova so valjanđa lenđe aso životi hem hine paše olencar. Odolese šaj hine radosno te služinen e Jehovase (Jezd. 6:14-16, 22).

8. Sar šaj o lafija ando Agej 2:4 te pomožinen amen te ćhiva o Kraljevstvo ko prvo than? (Dikh i fusnota.)

⁸ Odolese so i bari nevolja tani sa popaše, akana tano but važno te šuna i zapovest te đa hem te ćera učenikonen (Mar. 13:10). Ama, podijekh puti šaj tano pharo te da sa amendar ki služba odolese so isi amen finansijska problemija ili protivljenje ki služba. So šaj te pomožini amen te ćhiva o Kraljevstvo ko prvo than? Šaj te ova uverime so „o Jehova, o Komandanti upro sa o vojske“ b tano ki amari strana. Ov ka pomožini amen. Odolese, nane amen sostar te dara. (Čitin Agej 2:4.)

9-10. Sar jekh bračno par dikhlja so e Isusese lafija ando Matej 6:33 tane ćaće?

⁹ Te dikha o primer ando jekh bračno par, o Oleg hem i Irina c, kola služinena sar pionirija. Palo odova so selinđe pe ki jekh skupština te šaj te pomožinen, našalđe pi buti sose i ekonomsko situacija ki odija phuv hine but lošno. Iako skoro berš dive našti hine uvek te arakhen buti, on osetinđe e Jehovaso vas ko po životi hem sar pomožinena len o phralja. So pomožinđa lenđe te ikljon ko krajo pe problemencar? O Oleg, kova ki početka  hine depresivno, phenela: „Odova so pobuter đeljam ki služba, pomožinđa amen te usredsredina amen ko odova soj tano najvažno ko amaro životi.“ Amaro phral hem olesi romni rodinđe buti, ama hem dinđe sa pestar te đan so pobuter ki služba.

¹⁰ Jekh dive, ked irinđe pe ćhere kotar služba, ando po komšija šunđe so jekh olengo paše amal putujinđa oko 160 kilometrija hem aćhavđa lenđe duj pherde kese. O Oleg phenela: „Odova dive palem dikhljam kobor o Jehova hem o phralja brininena pe amendar. Uverime hijam so o Jehova niked na ka bistrel pe slugen, bizo obzir kobor tani olengi situacija phari“ (Mat. 6:33).

11. So šaj te očekujina ako usredsredinaja amen te ćera e Jehovasi volja?

¹¹ O Jehova mangela te usredsredina amen ko odova te spasina e manušengo životi ađahar so ka ćera učenikonen. Sar so dikhljam ko  eftato odlomko, o Agej podstakninđa e Devlese narodo palem te gradinen o hram. Ako ka ćeren odova, o Jehova obećinđa lenđe „so ka blagoslovini len“ (Ag. 2:18, 19). Amen šaj te ova sigurna so o Jehova ka blagoslovini amaro trud ako tani amenđe i služba ko prvo than.

12. Sose e Jezdrase hem e Jevrejenđe valjanđa bari vera?

¹² Ko 468. berš angl. n. e., i dujto grupa ando Jevreja hem o Jezdra pođinđe ando Vavilon ko Jerusalim. Te šaj te ćeren odova, valjanđa lenđe bari vera. Sose? O drumija hine but opasna. On peja valjanđe te len baro zlato hem srebro kova o kralj dinđa aso hram. Sebepi odova, o ćora šaj hine te napadinen len (Jezd. 7:12-16; 8:31). Isto ađahar, ni o Jerusalim na hine bezbedno than. Uduri na hine but manuša. Uzo odova, o zidija hem e dizjake udara valjanđe te popravinen pe. So šaj te sikljova ando Jezdra?

13. Sar o Jezdra zorjaćerđa po poverenje upro Jehova? (Dikh i fusnota.)

¹³ O Jezdra dikhlja sar o Jehova pomožini pe narodose. Beršencar angleder, ko 484. berš angl. n. e, o Jezdra najverovatno živinđa ko Vavilon ked o kralj Asvir naredinđa sa o Jevreja kola živinđe ko persijsko carstvo te oven mudarde (Jest. 3:7, 13-15). O Jezdra hem o Jevreja hine ki bari opasnost. Ked šunđe odova, odobor uznemirinđe pe so postinđe, runđe hem molinđe pe e Jehovase asi pomoć (Jest. 4:3). Šaj samo te zamislina sar osetinđe pe ked šunđe so okola kola planirinđe te mudaren len, ko krajo on hine mudarde (Jest. 9:1, 2). Sa odova so o Jezdra nakhlja, pripreminđa le aso avera kušnje kola hine le ki budućnost hem zorjaćerđa oleso poverenje so o Jehova šaj te zaštitini pe narodo. d

14. So jekh phen sikljilji ked dikhlja sar o Jehova brininđa pe olatar ked hine la pharipa?

¹⁴ Ked dikhaja sar o Jehova pomožini amen ko pharipa, barjola amaro poverenje upro leste. Te razmotrina o primer andi Anastasija koja živini ki Istočno Evropa. Oj našalđa pi buti sose manglja te aćhol neutralno. Olake kolege manglje zorjeja te ćhiven la te ovel ki disavi  političko stranka. Oj phenela: „Prvo puti ko mo životi aćhiljum bizo pare. Ama, molinđum man e Jehovase hem dikhljum sar brinini pe mandar. Čak ked bi palem našalava mi buti, na ka darav. Ako mo nebesko Dad brinini pe mandar avdije, ov ka brinini pe mandar hem tajsa.“

15. So pomožinđa e Jezdrase te ovel le pana pobaro poverenje upro Jehova? (Jezdra 7:27, 28)

¹⁵ O Jezdra dikhlja e Jehovaso vas ko po životi. Ked razmislinđa kobor puti o Jehova angleder brininđa pe olestar, odova pomožinđa lese te ovel le pana pobaro poverenje upro Jehova. Ov phenđa: „Mo Devel o Jehova hine mancar.“ (Čitin Jezdra 7:27, 28.) Slična lafija o Jezdra efta putija pominđa ki pi knjiga (Jezd. 7:6, 9; 8:18, 22, 31).

16. Ko kola situacije šaj te dikha e Jehovaso vas ko amaro životi? (Dikh i slika.)

¹⁶ O Jehova šaj te pomožini amen ked hijam ki disavi phari situacija. Na primer, ked pućaja amare šefe te del amen slobodna dive te đa ko kongres ili ked pućaja le te menini amaro raspored ki buti te šaj te resa ko sa o sastankija, amen daja e Jehovase prilika te blagoslovini amen. Tegani šaj ka ova iznenadime ko kova način o Jehova ka pomožini amen. Ađahar amaro poverenje upro Jehova ka ovel pana pobaro.

17. Sar o Jezdra mothovđa so hine ponizno ked hine le pharipa? (Dikh i slika kotar naslovno strana.)

¹⁷ O Jezdra ponizno molinđa pe e Jehovase asi pomoć. Svako puti ked brininđa pe sar ka ćerel pe odgovornostija, o Jezdra ponizno molinđa pe e Jehovase te pomožini lese (Jezd. 8:21-23; 9:3-5). E Jezdraso stav podstakninđa averen te podržinen le hem te oponašinen olesi vera (Jezd. 10:1-4). Ked but sekirinaja amen da li amari porodica ka ovel la sa so valjani laće ili da li ka ovel bezbedno, tegani valjani te roda e Jehovastar pomoć.

18. So šaj te pomožini amen te ovel amen pana pobaro poverenje upro Jehova?

¹⁸ Ako ponizno rodaja e Jehovastar pomoć hem mukhaja o phralja hem o phenja te pomožinen amen, amaro poverenje upro Jehova ka ovel pana pobaro. Amari phen i Erika koja isi la trin ćhave hine la poverenje upro Jehova, čak hem ked doživinđa jekh bari tragedija. Aso kratko vreme, mulji olaki beba koja hine pana ko vođi hem olako rom. Ando sa odova, oj phenela: „Amen našti angleder  te đana sar o Jehova ka pomožini amen. Ov pomožini amen ko načinija kola na očekujinaja. Haljiljum so ko but molitve o Jehova odgovorinđa maje prekalo phralja hem phenja ađahar so on ćerđe ili phenđe diso. Ako phenava me amalenđe so mučini man, ka ovel lenđe polokho te pomožinen man.“

19-20. So šaj te sikljova ando Jevreja kola našti hine te irinen pe ko Jerusalim?

¹⁹ Amen šaj but buća te sikljova ando Jevreja kola našti hine te irinen pe ko Jerusalim. Disave olendar hine phure, naborme ja hine len disave porodična odgovornostija. Ama, on hine bahtale so šaj hine palo okola kola irinđe pe te bićhalen diso so valjanđa aso hram (Jezd. 1:5, 6). Izgleda so oko 19 berš kasnije, palo odova so reslja i prvo grupa ko Jerusalim, okola kola aćhilje ko Vavilon pana bićhalđe prilogija ko Jerusalim (Zah. 6:10).

²⁰ Ako našti te ćera sa so mangaja e Jehovase ki služba, šaj te ova sigurna so o Jehova cenini amaro trud. O Jehova phenđa e Zaharijase te ćerel jekh kruna ando zlato hem srebro kova bićhalđe o Jevreja kola pana hine ko Vavilon (Zah. 6:11). Akija „kruna“ valjanđa te posetini e Jevrejen ko olenge prilogija kola dinđe ando vilo (Zah. 6:14, fusn.). Amen šaj te ova uverime so o Jehova niked na ka bistrel kobor trudinaja amen te služina lese ked isi amen pharipa (Jevr. 6:10).

21. So ka pomožini amen te ovel amen poverenje upro Jehova hem ponodri?

²¹ Ko akala poslednja dive, sigurno ka oven amen problemija (2. Tim. 3:1, 13) Ama, na valjani but te brinina amen. Setin tut ko Jehovase lafija kola phenđa pe narodose prekalo prorok Agej: „Me hijum tumencar [. . .] Ma daran!“ (Ag. 2:4, 5). Šaj te ova sigurna so o Jehova ka ovel amencar sa đi daja sa amendar te ćera olesi volja. Ako primeninaja odova so phenđe o Agej hem o Zaharija hem ako razmislinaja ando Jezdraso primer, amen ka ovel amen poverenje upro Jehova bizo obzir save problemija ka oven amen ki budućnost.