1-2. (a) Sose okola kola akana sigende lelje pe valjani te osloninen pe upro Jehova? (Psalam 37:3, 4) (b) Sostar ka vaćera ko akava članko?

DA LI valjani te khuven ko brako ja akana sigende leljen tumen? Sigurno jedva ađićerđen o dive ked ka živinen zajedno. Ama, okola soj tane ko brako ka ovel len disave pharipa hem anglo lende ka oven disave važna odluke. Odova sar akana anena o odluke hem sar rešinena o problemija, ka utičini ko odova kobor ka oven bahtale. Ako osloninena tumen upro Jehova ka anen mudra odluke, ka oven pana popaše jekh jekheja hem ka oven pana pobahtale. Ama, ako na ićerena tumen ko Devlese savetija, verovatno na ka nakhen šukar ko brako hem na ka oven bahtale. (Čitin Psalam 37:3, 4.)

² Iako akava članko tano pisimo okolenđe so akana sigende lelje pe, isto ađahar, ko akava članko ka vaćera hem kotar problemija kola sa o bračna parija šaj te ovel len. Ka dikha so šaj te sikljova kotar Devlese verna sluge ando purano vreme. Olendar ka sikljova but buća kola šaj te primenina ko amaro životi hem ko amaro brako. Isto ađahar, ka dikha so šaj te sikljova ando bračna parija kotar amaro vreme.

3-4. Kola pharipa šaj te ovel len okola so akana sigende lelje pe?

³ Čim neko khuvela ko brako, o manuša phenena lenđe so valjani te živinen sar sa avera manuša. Na primer, o roditeljija hem i familija šaj te phenen lenđe so valjani sig posig te ovel len ćhave. Ja avera amala šaj te phenen lenđe so valjani te ovel len po ćher hem te pheren le.

⁴ Ako na razmislinena šukar, on šaj te anen disave odluke sebepi kola šaj te khuven ko bare dugija. Te šaj te irinen o dugija, o solduj valjani te ćeren buti. Odolese, šaj na ka ovel len dovoljno vreme te proučinen i Biblija, te ovel len porodično proučibe hem redovno te đan ki služba. Sebepi i buti, šaj na ka aven redovno ko sastankija sose valjani te zaradinen pobuter pare ja sose darana te na aćhon bizi buti. Ađahar, on našalena i prilika pobuter te služinen e Jehovase hem te den e Jehovase po najšukar.

5. So sikljiljan ando Klaus hem andi Marisa?

⁵ But iskustvija mothovena so o materijalna buća našti te ćeren amen bahtale. Te dikha so sikljilje o Klaus hem i Marisa. * Ked lelje pe, o solduj hine len buti, but pare hem šukar živinđe. Ama, on na hine ćaće bahtale. O Klaus phenela: „Hine amen sa so mangljam. Ama, niked na razmislinđam sar te služina e Jehovase pobuter. Te ovav iskreno, amaro životi hine but pharo hem stresno.“ Šaj hem tumen đi akana haljiljen so o materijalna buća na anđe tumenđe bahtalipe. Ako tano ađahar, ma obeshrabrinen tumen. Akana ka dikha disave primerija kola šaj te pomožinen tumenđe te dikhen so valjani te menjinen. Sar prvo, te dikha so o roma šaj te sikljon ando kralj Josafat.

6. Premalo Poslovice 3:5, 6, so ćerđa o kralj Josafat ked jekh bari vojska manglja te napadini le?

⁶ Romalen, da li tano podijekh puti tumenđe pharo sebepi o odgovornostija kola isi tumen? Ako tano ađahar, but ka sikljon ando kralj Josafat. Sar kralj, ov valjanđa te brinini pe kotar sa o manuša. So ov ćerđa te šaj te ispunini pi odgovornost? Ov ćerđa sa so šaj te zaštitini pe narodo. Okolo dizja ki Juda ćerđa bare zidija te šaj te zaštitini e manušen hem olesi vojska hine la pobuter ando 1 160 000 vojnikija (2. Let. 17:12-19). Kasnije, o Josafat hine ko jekh baro problemi. O Amoncija, o Moavcija hem o manuša ando Sir phenđe so ka napadinen le (2. Let. 20:1, 2). So ov ćerđa? Ov molinđa e Jehova te pomožini le hem te del le snaga. Ađahar, ov mothovđa so  ićeri pe ko savet kova pisini ko Poslovice 3:5, 6. (Čitin.) Olesi molitva koja tani pisimi ki 2. Letopisa 20:5-12, mothovi kobor baro poverenje hine le upro Jehova. Sar o Jehova odgovorinđa ki olesi molitva?

7. Sar o Jehova odgovorinđa ki Josafatesi molitva?

⁷ O Jehova odgovorinđa e Josafatese prekalo Levit kova vićinđa pe Jazilo. O Jehova phenđa: „Astaren tumare thana, terđoven, ništa ma ćeren hem dikhen sar ka spasini tumen o Jehova“ (2. Let. 20:13-17). Ađahar na valjanđa te ovel jekh maribe. Ama, odola smernice na alje kotar disavo manuš, nego kotar Jehova. O Josafat hine le but baro poverenje upro Jehova hem ćerđa sa so o Jehova phenđa lese. Ked pođinđe ko maribe, ov ko prvo redo ćhivđa e manušen te đilaben, a na pe iskusno vojnikonen. O Jehova ćerđa odova so obećinđa e Josafatese hem pobedinđa olenge dušmanen (2. Let. 20:18-23).

8. So o roma šaj te sikljon ando Josafat?

⁸ Romalen, tumen šaj but te sikljon ando kralj Josafat. Sar oleste hem tumen hijen odgovorna te brininen tumen tumare porodicaće. Ked hijan ko problemija, šaj mislineja so kokri šaj te rešine len. Ama, ma oslonin tut upro tute. Umesto odova, molin tut e Jehovase te pomožini tut. Isto ađahar, celone vileja molin tut te romnjaja. Rode pomoć ando Jehova ađahar so ka proučine oleso Lafi hem amare publikacije hem ićer tut ko savetija kola o Devel dela tut. Avera šaj na ka složinen pe odoleja so ćereja hem šaj ka phenen tuće so hijan dilino sose ićereja tut ko savetija andi Biblija. Šaj ka phenen tuće so o materijalna buća šaj te zaštitinen hem tut hem te porodica. Ama, tegani setin tut ko Josafat. Ov hine le poverenje ano Jehova hem odova mothovđa odoleja so ćerđa. Sar so o Jehova na aćhavđa e Josafate, ov sigurno so na ka aćhavi ni tut (Ps. 37:28; Jevr. 13:5). So o bračna parija valjani te ćeren te šaj te ovel len bahtalo životi?

9. So šaj te phena ando prorok Isaija hem andi olesi romni?

⁹ E Isaijase hem olese romnjaće hine najvažno te služinen e Jehovase. O Isaija hine prorok. Verovatno hem olesi romni hine la poklo proročko zadatko, sose oj hine vićimi proročica (Is. 8:1-4). Sar bračno par, on ćhivđe e Jehova ko prvo than. On tane but šukar primer amenđe kola hijam ko brako!

10. Sose tano šukar o bračna parija te proučinen e biblijake proročanstvija?

¹⁰ Tumen kola hijen ko brako šaj te oven sar o Isaija hem olesi romni ako dena sa tumendar te služinen e Jehovase. Pana pobaro poverenje upro Jehova ka ovel tumen ako proučinena e biblijake proročanstvija hem odova sar ispuninđe pe (Titu 1:2). * Šaj te razmislinen so šaj tumen te ćeren te šaj te ispunini pe disavo proročanstvo kotar Biblija. Na primer, o Isus phenđa so i šukar vest ka propovedini pe ki celo phuv angleder te avel o  kraj. Razmislinen sar tumen pomožinena te ispuninen pe odola lafija (Mat. 24:14). Ked hijen uverime so e biblijake proročanstvija ispuninena pe, tumen ka den sa tumendar te služinen e Jehovase pana pobuter.

11. So i Priskila hem o Akila šaj hine te ćeren hem sose?

¹¹ Okola so akana sigende khuvđe ko brako but šaj te sikljon andi Priskila hem ando Akila. On živinđe ko Rim. Palo odova so šunđe i šukar vest, on ulje hrišćanija. Uduri živinđe but šukar. Ama, ked o car Klaudije naredinđa sa o Jevreja te mukhen o Rim, olengo životi but menjinđa pe. On morandilje te mukhen po than, te đan te živinen ko aver than hem uduri te počminen te ćeren pi buti. Ama, da li odola pharipa ćhinavđe len te ćhiven o Kraljevstvo ko prvo than? Naravno so na! Čim reslje ko Korint, on duj ćerđe sa so šaj te pomožinen e skupštinaće hem zajedno e Pavleja ohrabrinđe bute phralen hem phenjen. Kasnije, on đelje hem ko avera dizja te propovedinen (Dela 18:18-21; Rimlj. 16:3-5). On duj ćerđe but buća hem odova anđa lenđe baro bahtalipe!

12. Sose o bračna parija valjani te ćhiven pese ciljija?

¹² O bračna parija avdije šaj te oven sar i Priskila hem o Akila ako ćhivena o Kraljevstvo ko prvo than. Đi tane ki veza, šukar bi ovela jekh ćhavo hem jekh ćhaj te vaćeren kotar pe ciljija. Ked ćhivena pese ciljija hem ked dena sa pestar te ispuninen len, on pana pošukar ka dikhen sar o Jehova pomožini lenđe (Prop. 4:9, 12). Te dikha o primer ando Rasel hem andi Elizabet. O Rasel phenela: „Đi hijam le ki veza, amen vaćerđam ando amare ciljija.“ I Elizabet phenela: „Amen vaćerđam odolestar sose na mangljam disave buća kola ka oven kasnije ko amaro životi te ćhinaven amen te ispunina amare ciljija.“ Sebepi odova, o Rasel hem i Elizabet đelje te živinen ki Mikronezija kuri valjanđa pobuter objaviteljija.

13. Premalo Psalam 28:7, sose tano šukar te ovel amen poverenje upro Jehova?

 ¹³ Sar o Rasel hem i Elizabet, but bračna parija odlučinđe jednostavno te živinen te šaj pana pobuter te propovedinen hem te sikaven e manušen. Ked o rom hem i romni ćhivena pese ciljija te šaj pana pobuter te služinen e Jehovase hem ked dena sa pestar te ispuninen odola ciljija, ka ovel len but blagoslovija. On ka dikhen sar o Jehova brinini pe olendar, ka ovel len pana pobaro poverenje upro Jehova hem ka oven but bahtale. (Čitin Psalam 28:7.)

14. Sar o apostol Petar hem olesi romni mothovđe so verujinena ko odova so pisini ko Matej 6:25, 31-34?

¹⁴ Isto ađahar, o bračna parija šaj but te sikljon ando apostol Petar hem andi olesi romni. Šov masek đi o berš dive palo odova so upoznajinđa e Isuse, o apostol Petar valjanđa te anel jekh važno odluka. Ov brininđa pe kotar pi porodica ađahar so hine ribari. Ama, ked o Isus vićinđa le te đal oleja, o Petar morandilo te razmislini kotar pi romni (Luka 5:1-11). Ov anđa odluka te đal e Isuseja hem te propovedini. Odija odluka hine ćaće šukar. Ama, šaj te phena so e Petaresi romni podržinđa odija odluka. I Biblija mothovi so palo odova so o Isus uskrsninđa, disavo vreme hem oj putujinđa e Petareja (1. Kor. 9:5). Sebepi so hine šukar romni, o apostol Petar šaj hine te pisini odolestar sar o roma hem o romnja valjani te ponašinen pe (1. Petr. 3:1-7). O Petar hem olesi romni verujinđe e Jehovase so ov ka brinini pe olendar sa đi o Kraljevstvo ćhivena ko prvo than. (Čitin Matej 6:25, 31-34.)

15. So sikljiljan ando Tijago hem andi Ester?

¹⁵ Ako beršencar hijen ko brako, so šaj te ćeren te ovel tumen želja te ćeren pobuter e Jehovase? Šukar tano te sikljon ando avera bračna parija. Na primer, ki Stražarsko kula šaj te čitinen o serije ando člankija „Oni spremno služe.“ Asavke člankija pomožinđe e Tijagose hem e Esteraće ando Brazil te ovel len pana pobari želja te služinen odothe kaj valjani pana pobuter objaviteljija. O Tijago phenela: „Ked čitinđam odola iskustvija hem ked dikhljam sar o Jehova pomožinđa pe slugenđe, hem amen mangljam te probina hem te dikha sar o Jehova brinini pe amendar.“ Ko krajo, on đelje te živinen ko Paragvaj kuri kotar 2014. berš služinena ki portugalsko ćhib. I Ester phenela: „But mangaja o stih ando Efešanima 3:20. But putija dikhljam sar odola lafija ispuninena pe ko amaro životi.“ Ked pisinđa e phralenđe ko Efes, o Pavle phenđa so o Jehova ka del amen pobuter nego so rodaja olestar. Kobor tane ćaćutne odola lafija.

16. Kastar o bračna parija šaj te roden savet ked mangena te ćhiven pese disave ciljija?

¹⁶ Okola kola akana sigende lelje pe šaj te sikljon ando avera bračna parija kola sikljilje te osloninen pe upro Jehova. Odola bračna parija šaj tane beršencar ki punovremeno služba. Sose na rodena olendar savet ked mangena te ćhiven tumenđe disave ciljija? Ađahar šaj te mothoven so isi tumen poverenje upro Jehova  (Posl. 22:17, 19). Isto ađahar, hem o starešine šaj te pomožinen tumen te ćhiven tumenđe disave ciljija hem te ispuninen len.

17. So šaj te sikljova ando Klaus hem andi Marisa?

¹⁷ Podijekh puti, isi amen cilj te služina e Jehovase ko jekh način, ama o Jehova isi le aver plani amenđe. Te dikha palem o primer ando Klaus hem andi Marisa. On hine trin berš ko brako hem đelje ki Finska te služinen ki gradnja andi amari podružnica. Ked šunđe so samo šov masek šaj te aćhon ki gradnja, on hine hari razočarime. Ama, sigate palo odova, on hine vićime ko jekh kurs te sikljon i arapsko ćhib. Akana on tane bahtale sose ki jekh aver phuv šaj te služinen ko arapsko područje. Ked setini pe ko odova vreme, i Marisa phenela: „Ked valjani te ćere diso nevo hem te mothove so isi tut potpuno poverenje ano Jehova, šaj te ovel but pharo. Ama, me dikhljum sar o Jehova ko razna načinija brinini pe amendar. Palo sa odova so nakhljum, mo poverenje ano Jehova tano but pobaro.“ Sar so akava primer mothovi, šaj te ova sigurna so o Jehova ka brinini pe amendar ako isi amen poverenje ano leste.

18. Sar šaj o bračna parija te mothoven so isi len poverenje ano Jehova?

¹⁸ O brako tano poklon ando Jehova (Mat. 19:5, 6). Ov mangela o bračna parija te uživinen ko po brako (Posl. 5:18). Tumen so akana sigende leljen tumen, razmislinen so ka ćeren ko tumaro životi. Da li mothovena so hijen zahvalna aso sa o poklonija kola o Jehova dinđa tumen? Molinen tumen e Jehovase. Ko oleso Lafi roden o savetija kola odnosinena pe upro tumende. Palo odova, ićeren tumen ko savetija kola o Jehova dela tumen. Ako tano tumenđe o Jehova ko prvo than, šaj te oven sigurna so ka ovel tumen bahtalo životi.