1-2. Kova tano o prvo razlog sose valjani te đana odova so pisini ki knjiga Otkrivenje?

 DA LI nekad dikhljan nekaso album? Đi dikheja o slike, bute manušen na penđareja. Ama, kotar jekhvar terdiljan ki jekh slika. Sose? Odolese so tu hijan ki odija slika. Đi dikheja la, trudineja tut te setine tut ked slikinđan tut hem kaj hine odova. Trudineja tut te penđare hem avere manušen kola tane ki odija slika. Odija slika akana tani tuće but važno.

² I knjiga Otkrivenje tani sar odija slika. Sose? Najhari ando duj razlogija. Sar prvo, akija knjiga tani pisimi amenđe. Ko početko koro late pisini: „O Otkrivenje ando Isus Hrist, kova dinđa le o Devel, te mothovi pe robonenđe odova so pana hari ka desini pe“ (Otkr. 1:1). Odova so pisini ki odija knjiga nane sa e manušenđe, već samo olese slugenđe. Odolese hem amen učestvujinaja ko odova te ispuninen pe o proročanstvija andi odija knjiga. Avere lafencar, amen hijam „ki slika.“

3-4. Ked valjani te ispuninen pe o proročanstvija ando Otkrivenje hem ko so odova valjani te podstaknini amen?

³ O dujto razlog odnosini pe ko vreme ked odola proročanstvija ispuninena pe. O apostol Jovan vaćerđa odolestar ked phenđa: „Legardo sveto duhoja aljum „ko Gospodeso dive“ (Otkr. 1:10). O Jovan akala lafija pisinđa ko 96. berš hem tegani e „Gospodeso dive“ hine but dur (Mat. 25:14, 19; Luka 19:12). Ama, premalo  jekh biblijako proročanstvo, akava dive počminđa ko 1914. berš. Tegani, o Isus počminđa te vladini sar Kralj ko nebo. Kotar odova berš, o proročanstvija ando Otkrivenje, kola odnosinena pe upro Devleso narodo, počminđe te ispuninen pe. Akava mothovi so avdije živinaja „ko Gospodeso dive.“

⁴ Sebepi odova, valjani hor te razmislina odolestar so pisini ko Otkrivenje 1:3: „Bahtalo tano okova kova čitini hem okola kola šunena o lafija kotar akava proročanstvo hem kola ićerena pe ko odova so pisini koro leste, sose tano paše o vreme odova te ispunini pe.“ Ćaće, but tano važno te čitina, te šuna o lafija kotar akava proročanstvo hem te ićera amen ko odova so pisini koro leste. Ama, soj tano odova so valjani te šuna?

5. Sar i knjiga Otkrivenje mothovi kobor tano važno te služina e Jehovase ko ispravno način?

⁵ Ko prvo poglavlje ko Otkrivenje dikhaja so o Isus but šukar đanela sa so ovela ko skupštine (Otkr. 1:12-16, 20; 2:1). Odova so o Isus phenđa e skupštinenđe ki Mala Azija mothovi so ov sa đanela. Tegani, ov dinđa len jasna savetija kola pomožinđe lenđe te haljon da li služinena e Jehovase ko ispravno način. Odova so phenđa lenđe odnosini pe hem upro Devleso narodo avdije. So sikljovaja akalestar? Amaro vođa, o Isus Hrist, đanela savo tano amaro amalipe e Jehovaja. Ov legari amen, štitini amen hem sa dikhela. Đanela so valjani te ćera te šaj hem ponodri te ova paše e Jehovaja. Kola e Isusese savetija valjani hem amen avdije te šuna?

6. (a) Premalo Otkrivenje 2:3, 4, kova problemi hine len o hrišćanija ki skupština Efes? (b) So sikljovaja odolestar?

⁶ Čitin Otkrivenje 2:3, 4. Na valjani te našala o mangipe kova hine amen ko početko. O Isus e hrišćanenđe ki skupština Efes phenđa so istrajno služinđe e Jehovase, iako hine len bare pharipa. Ama, o problemi hine so našalđe o mangipe kova hine len ko početko. Te šaj te služinen e Jehovase ko ispravno način, on morandilje palem te ovel len odova mangipe. Nane dovoljno samo te ova istrajna nego hem te đana sose istrajinaja. E Jehovase tano važno na samo so ćeraja, već hem sose odova ćeraja. Ov mangela te služina lese odolese so mangaja le hem hijam lese zahvalna (Posl. 16:2; Mar. 12:29, 30).

7. (a) Premalo Otkrivenje 3:1-3, kova problemi hine len o hrišćanija ko Sard? (b) So amen valjani te ćera?

⁷ Čitin Otkrivenje 3:1-3. Valjani hem ponodri te aćhova đangavde. O hrišćanija ki skupština ko Sard hine len jekh aver problemi. On jekh vreme hine but revna, ama više na hine. Odolese o Isus phenđa lenđe te oven „đangavde.“ So sikljovaja akalestar? Amen đanaja so o Jehova niked na ka bistrel odova so ćerđam angleder (Jevr. 6:10). Ama, na valjani te mislina so odova tano dovoljno hem so akana na valjani više ništa te ćera. Iako šaj našti te ćera odova so angleder ćerđam, amen valjani hem ponodri te „ćera buti e Jehovase“ hem te aćhova đangavde đi o krajo (1. Kor. 15:58; Mat. 24:13; Mar. 13:33).

8. Premalo Otkrivenje 3:15-17, so sikljovaja ando odova so hine phendo e hrišćanenđe ki Laodikija?

 ⁸ Čitin Otkrivenje 3:15-17. Valjani te ova revna hem te služina e Jehovase celone vileja. Odova so o Isus phenđa e hrišćanenđe ki Laodikija mothovi so on hine len jekh aver problemi. Đi služinđe e Jehovase, olengi služba hine „mlako.“ Sebepi so hine lenđe sa jekh, o Isus phenđa soj tane „jadna hem ćorore.“ On valjanđe te oven revna đi služinđe e Jehovase (Otkr. 3:19). So sikljovaja ando odova? Ako našalđam amari revnost, valjani te ćera ko odova te ova pana pobuter zahvalna aso sa o buća kola dela amen o Jehova hem olesi organizacija (Otkr. 3:18). Amenđe na valjani te ovel važno samo te ovel amen šukar životi, već mangaja amari služba e Jehovase te ovel amenđe ko prvo than.

9. Premalo odova so o Isus phenđa e hrišćanenđe ko Pergam hem ki Tijatira, sostar valjani te cida amen?

⁹ Valjani te cida amen ando sikljoviba kola avena ando otpadnikija. O Isus ukorinđa disave hrišćanen ki skupština Pergam sose ćerđe podele maškaro phralja (Otkr. 2:14-16). Ov pohvalinđa e hrišćanen ki Tijatira sose cidinđe pe kotar sikljoviba kola avena ando Beng hem podstakninđa len te aćhon „zorale“ ko ćaćipe (Otkr. 2:24-26). O hrišćanija kolengi vera na hine zorali hem kola ićerđe pe ko hovavne sikljoviba, valjanđe te pokajinen pe. So sikljovaja ando odova? Valjani te cida amen ando sikljoviba kola na avena ando Jehova. O otpadnikija šaj samo te „dićhon so mangena e Devle, ama na živinena ađahar“ (2. Tim. 3:5). Ako hor proučinaja e Devleso Lafi, ka ovel polokho te penđara kola tane odola hovavne sikljoviba hem te cida amen olendar (2. Tim. 3:14-17; Juda 3, 4).

10. So šaj pana te sikljova ando odova so o Isus phenđa e skupštinenđe ko Pergam hem ki Tijatira?

¹⁰ Valjani te cida amen andi svako vrsta kotar nemoral. O phralja ki skupština Pergam hem ki Tijatira hine len pana jekh problemi. O Isus osudinđa disaven ko odola skupštine sose ćerđe nemoral (Otkr. 2:14, 20). So sikljovaja ando odova? Iako šaj beršencar služinaja e Jehovase hem šaj isi amen disave zaduženja, na valjani te ađićera ando Jehova  te phanel pe jaćha ako ćeraja nemoral (1. Sam. 15:22; 1. Petr. 2:16). Iako ko sveto o manuša ko nemoral dikhena sar diso soj tano normalno, amen ipak valjani te ićera amen ko odova so o Jehova rodela amendar (Ef. 6:11-13).

11. So sikljiljam đi akana? (Dikh o okvir „ So sikljiljan?“)

¹¹ So sikljiljam đi akana? Dikhljam kobor tano važno te služina e Jehovase ko ispravno način. Ako dikhaja so diso na ćeraja šukar, odmah valjani te menjina odova (Otkr. 2:5, 16; 3:3, 16). O Isus phenđa pana disave buća e skupštinenđe ki Mala Azija. Akana ka dikha so phenđa lenđe.

12. So šaj te sikljova ando odova so o Isus phenđa e phralenđe ki Smirna hem ki Filadelfija? (Otkrivenje 2:10).

¹² Akana ka dikha so o Isus phenđa e phralenđe ki skupština Smirna hem ki Filadelfija. Ov phenđa lenđe te na daran ando progonstvo sose o Jehova ka nagradini len ako ka aćhon lese verna. (Čitin Otkrivenje 2:10; 3:10.) So sikljovaja ando odova? Amen ađićeraja te ovel amen progonstvo hem odolese valjani te ova spremna te istrajina (Mat. 24:9, 13; 2. Kor. 12:10). Sose tano važno te na bistra odova?

13-14. Sar upro Devleso narodo utičinena o događaja kolendar vaćeri pe ko Otkrivenje 12. poglavlje?

¹³ I knjiga Otkrivenje phenela so e Devleso narodo ko amaro vreme, „ko Gospodeso dive“, ka doživini progonstvo. Ko 12. poglavlje pisini so palo odova so o Isus ulo Kralj, ko nebo hine jekh maribe. O Mihajlo, o Isus Hrist hem o anđelija borinđe pe protiv o Satana hem o demonija (Otkr. 12:7, 8). E Devlese dušmanija našalđe o maribe hem hine fordime ki phuv kuri počminđe te ćeren bare problemija e manušenđe (Otkr. 12:9, 12). Ama, so kotar tegani desini pe e Devlese narodoja?

¹⁴ Ko Otkrivenje pisini so ćerela o Satana. Odolese so više našti te đal ko nebo, ov napadini e pomazanikonen kola tane ki phuv sose on tane predstavnikija ando Devleso Kraljevstvo hem „svedočinena ando Isus“ (Otkr. 12:17; 2. Kor. 5:20; Ef. 6:19, 20). Sar ispuninđa pe akava proročanstvo?

15. Kas predstavinđe o „duj svedokija“ ando kola vaćeri pe ko Otkrivenje ko 11. poglavlje hem so ulo olencar?

¹⁵ O Satana ćhivđa e Devlese dušmanen te napadinen e phralen kola predvodinđe ko odova te propovedini pe i  šukar vest. Ki knjiga Otkrivenje odola phralja hine predstavime sar „duj svedokija“ kola hine mudarde * (Otkr. 11:3, 7-11). Ko 1918. berš, ofto ando odola phralja hine osudime ko phanlipe hem svako olendar dobinđa but bari kazna. But manuša mislinđe so i buti koja o pomazanikija tegani ćerđe hine ćhinavdi.

16. So ulo ko 1919. berš hem so o Beng kotar tegani pana ćerela?

¹⁶ O proročanstvo ando Otkrivenje kotar 11. poglavlje vaćeri so o „duj svedokija“ ka irinen pe ko životi palo jekh kratko vreme. Odova proročanstvo ispuninđa pe ko jekh but zanimljivo način. Na nakhlja ni berš dive, o phralja hine oslobodime ando phanlipe. Ko mart, ko 1919. berš, o phralja ikljilje ando phanlipe hem sa olenge kazne hine poništime. Samo so ikljilje, on počminđe te propovedinen i šukar vest. Ama, odova na ćhinavđa e Benge te ćerel problemija e Devlese narodose. Kotar tegani, o Beng ćerđa e Devleso narodo te ovel le baro progonstvo kova hine sar „reka“ (Otkr. 12:15). Odolese, sarinenđe valjani istrajnost hem vera (Otkr. 13:10).

17. Koja neočekivano pomoć dobini e Devleso narodo, iako o Satana ćerela lenđe problemija?

¹⁷ Ki knjiga Otkrivenje ko 12. poglavlje pisini so e Devleso narodo ka dobini pomoć koja na očekujini. Ki knjiga Otkrivenje pisini so i „phuv“ ka nakhavi i „reka“ ando progonstvo (Otkr. 12:16). Baš odova ovela ko disave situacije. Podijekh puti, e Devlese narodose pomožinena o postabilna elementija ando Satanaso sveto, sar soj tano disavo pravosudno sistemi. But putija, e Jehovase sluge dobinđe disave sudska slučaja sebepi kola hine len pobari sloboda. Sar koristinđe odija sloboda? Ađahar so koristinđe svako prilika te ćeren o zadatko kova o Jehova dinđa len (1. Kor. 16:9). So sa uključini odova zadatko?

18. Koja važno buti ćerela e Devleso narodo ko poslednja dive?

¹⁸ O Isus phenđa so olese učenikija ka vaćeren i „šukar vest ando [Devleso]  Kraljevstvo“ ki celo phuv angleder te avel o kraj (Mat. 24:14). Đi ćerena odova, olenđe pomožininena jekh grupa ando anđelija ili jekh anđeo. Ko Otkrivenje pisini so o anđeo „legari i večno šukar vest te phenel la okolenđe kola živinena ki phuv – svakona nacijaće, svakone plemese, svakona ćhibjaće hem svakone narodose“ (Otkr. 14:6).

19. So pana uključini i poruka koja propovedinaja?

¹⁹ E Devleso narodo na vaćeri samo i šukar vest. Isto ađahar, on pomožinena e anđelenđe te ćeren odova sostar vaćeri pe ko Otkrivenje kotar 8-10. poglavlje. Odola anđelija objavinena nekobor pharipa kola ka aven upro okola kola odbacinena e Devleso Kraljevstvo. E Jehovase Svedokija objavinena i poruka koja tani sar „kukudi hem jag“ hem koja mothovi e Devlesi osuda upro e Bengeso sveto (Otkr. 8:7, 13). O manuša valjani te đanen so o kraj tano paše te šaj te ćeren promene ko po životi hem te oven spasime (Sof. 2:2, 3). Ama, akija poruka na sviđini pe sa e manušenđe. Valjani amenđe hrabrost te vaćera akija poruka. Ki bari nevolja, i završno poruka andi osuda pana pobuter ka holjanćeri e manušen (Otkr. 16:21).

20. Sostar ka vaćera ko avera duj člankija?

²⁰ Amen ćaće valjani te šuna „o lafija kotar akava proročanstvo“, odolese so učestvujinaja ko odova te ispuninen pe o lafija kola tane pisime ko Otkrivenje (Otkr. 1:3). Ama, sar šaj verno te istrajina ko progonstvo hem ponodri te propovedina akala poruke? Ko odova ka pomožinen amen duj buća. Sar prvo, odova so o Otkrivenje vaćeri ando Devlese dušmanija. Sar dujto, o blagoslovija kola ka dobina ako ka aćhova verna e Jehovase. Ando akala buća ka vaćera ko avera duj člankija.