1. Soj tani e Jehovasi volja avdije?

 E JEHOVASI volja avdije tani te propovedini pe i šukar vest ko celo sveto (Mar. 13:10; 1. Tim. 2:3, 4). O Jehova ćhivđa e Isuse te nadgledini o propovedibe. Odolestar haljovaja kobor tano odova važno e Jehovase. Šaj te ova sigurna so o Isus šukar ćerela pi buti hem so angleder te avel o krajo, ov ka ćerel odova so o Jehova mangela (Mat. 24:14).

2. Sostar ka vaćera ko akava članko?

² Ko akava članko, ka dikha sar o Isus prekalo „verno hem razborito robo“ dela amen duhovno hrana hem organizujini amen te propovedina (Mat. 24:45). Isto ađahar, ka dikha sar šaj svako amendar te podupirini odova so ćerela o Isus hem o verno hem razborito robo.

3. Savi vlast o Isus dobinđa?

³ O Isus vodini o propovedibe. Sose šaj te ova sigurna ko odova? Hari angleder te đal ko nebo, ov disave pe učenikoncar đelo ki gora, ki Galileja. Tegani phenđa lenđe: „Maje tani dindi sa i vlast ko nebo hem ki phuv.“ Pana phenđa lenđe: „Odolese, đan hem ćeren učenikonen ando manuša kotar sa o narodija“ (Mat. 28:18, 19). Akatar dikhaja so o Isus dobinđa hem i vlast te vodini o propovedibe.

4. Sose šaj te ova sigurna so o Isus hem avdije nadgledini o propovedibe?

⁴ O Isus phenđa so ka propovedini pe hem ka ćeren pe učenikija „kotar sa o narodija“ hem so ov ka ovel pe učenikoncar „sa o dive đi o svršetko ando akava poretko“  (Mat. 28:20). Akava mothovi so o Isus hem avdije nadgledini o propovedibe.

5. Sar amen pomožinaja te ispuninen pe o lafija ando Psalam 110:3?

⁵ O Isus na brininđa pe odolestar da li ka oven dovoljno manuša kola ka propovedinen i šukar vest ko poslednja dive. Ov đanđa so o proročanska lafija ando jekh psalmista ka ispuninen pe. Odova psalmista phenđa: „To narodo spremno ka pođini tuvaja ko dive ked e vojska ka legare ko maribe“ (Ps. 110:3). Ako hem tu propovedineja i šukar vest, tu podržineja e Isuse hem e verno hem razborito robe hem pomožineja te ispuninen pe o lafija ando akava proročanstvo. Ama, hajde te dikha kola pharipa šaj te oven amen đi propovedinaja.

6. Savo pharipe šaj te ovel amen đi propovedinaja?

⁶ Đi propovedinena, e Devlese sluge šaj te ovel len protivljenje. O otpadnikija, o religiozna vođe hem o političarija vaćerena hovajbe amendar. Ko odola hovajba šaj te verujinen amare amala, amari familija ili amare kolege ki buti. On šaj ka mangen te ćhinaven amen te služina e Jehovase. Ko disave phuvja, o protivnikija maltretirinena, napadinena hem čak ćhivena ko phanlipe amare phralen hem phenjen. Ama, sa akava na iznenadini amen. Sose? Odolese so o Isus phenđa: „Sa o narodija ka mrzinen tumen sebepi mo anav“ (Mat. 24:9). Odova so o manuša mrzinena amen tano dokaz so hijam ki Jehovasi strana (Mat. 5:11, 12). Palo progonstvo bešela o Beng. Ama, ov nane pozoralo ando Isus. Sebepi so ov pomožini amen, amen šaj te propovedina e manušenđe kotar sa o narodija. Hajde te dikha sar uspinaja ko odova.

7. Kola dokazija isi amen so ispuninena pe o lafija ando Otkrivenje 14:6, 7?

⁷ Pana jekh pharipe kova šaj te ovel amen đi propovedinaja tano so šaj te arakha manušen kola vaćerena aver ćhib. Ki vizija koja dinđa e Jovanese, o Isus prorekninđa so odova na ka ćhinavi amen te propovedina sa e manušenđe. (Čitin Otkrivenje 14:6, 7.) Sar ispuninđa pe odova? Avdije propovedinaja bute manušenđe ko celo sveto. Ko amaro sajt, o manuša šaj te čitinen amare publikacije kola tane prevodime ko prekalo 1 000 ćhibja. O Vodeće telo odobrinđa te prevodini pe ko prekalo 700 ćhibja i knjiga Ov bahtalo zauvek! kolaja proučinaja e manušencar. Aso manuša so na šunena isi snimime but videa, a okolenđe so na dikhena isi publikacije ko Brajevo pismo. Ćaće, anglo amare jaćha dikhaja sar ispuninena pe o proročanstvija andi Biblija. O „manuša ando sa o narodija kola vaćerena razna ćhibja“ sikljona te vaćeren i „čisto ćhib“ ando ćaćipe (Zah. 8:23; Sof. 3:9). Sa akava tano dokaz so avdije o Isus vodini o delo ando propovedibe.

8. Sar upro manuša utičini i šukar vest?

⁸ Avdije, prekalo ofto milionija manuša ko 240 phuvja tane deo andi Jehovasi organizacija, hem svako berš nekobor hiljade manuša krstinena pe. Odova tano baro broj, ama o broj nane najbitno. Najvažno tano so odola manuša razvijinena šukar osobine hem uravena i  „nevi ličnost“ (Kol. 3:8-10). But olendar više na ćerena nemoral, nane nasilna hem na ćerena razlike maškaro manuša. Upro lende ispunini pe o proročanstvo ando Isaija 2:4 kuri pisini so o manuša više „na ka sikljon te maren pe.“ Ked dikhena amaro ponašanje, o manuša tane privucime ki amari organizacija hem dikhena so sledinaja e Isuse (Jov. 13:35; 1. Petr. 2:12). Amenđe šaj na hine lokho te menjina amen, ama uzi Isusesi pomoć uspinđam ko odova.

9. Premalo Matej 24:45-47, so o Isus phenđa so ka ovel ko vreme ando krajo?

⁹ Čitin Matej 24:45-47. O Isus prorekninđa so ko vreme ando krajo ka ćhivel „e verno hem e razborito robe“ te del amen hrana ko pravo vreme. Avdije dikhaja so odova robo dela sa pestar šukar te ćerel po zadatko. O Isus prekali odija grupa ando pomazime phralja dela duhovno hrana „ko pravo vreme“ hem e Devlese narodose hem okolenđe kola mangena te đanen o ćaćipe. Odola manuša na mislinena soj tane gospodarija andi amari vera (2. Kor. 1:24). On haljilje so o Isus tano „vođa hem zapovedniko“ ando Devleso narodo (Is. 55:4).

10. Koja knjiga, ando akala soj tane mothovde ki slika, pomožinđa tuće te ove e Jehovase svedoko?

¹⁰ Kotar 1919. berš, o verno hem o razborito robo ikalđa razna publikacije kola pomožinđe e manušenđe te sikljon o ćaćipe. Ko 1921. berš, ikalđa i knjiga E Devlesi harfa koja pomožinđa e manušenđe te sikljon o osnovna sikljoviba ando Devleso Lafi. Sar đelo o vreme, ikalđa hem avera publikacije kola pomožinđe e manušenđe. Koja knjiga pomožinđa  tuće te haljove o ćaćipe? Da li tani odija i knjiga „Nek o Devel ovela istinito“, O ćaćipe kova legari ko večno životi, Tu šaj zauvek te živine ko raj ki phuv, O spoznanje kova legari ko večno životi, So i Biblija ćaće sikavi?, So sikavi amen i Biblija? ili i nevi knjiga Ov bahtalo zauvek!? Sa akala publikacije but pomožinđe amenđe te ćera učenikonen hem hine baš odova so tegani valjanđa amenđe.

11. Sose sarinenđe valjani i duhovno hrana?

¹¹ I duhovno hrana na valjani samo e manušenđe kola mangena te penđaren o ćaćipe, već sarinenđe. O apostol Pavle pisinđa: „I zorali hrana tani e zrelo manušenđe.“ Isto ađahar, phenđa so ako primeninaja odova so sikljovaja, odova ka pomožini amenđe te penđara „soj tano šukar, a soj tano lošno“ (Jevr. 5:14). Šaj te ovel amenđe but pharo te ićera amen ko Jehovase merilija, odolese so avdije živinaja ko vreme kuri o manuša nane len nisave merilija. Ama, o Isus phenđa so i duhovno hrana šaj te zorjaćeri amen. Odija hrana avela ando Devleso Lafi. O verno hem o razborito robo pripremini hem dela amen i duhovno hrana, a o Isus vodini odole robe.

12. Sar amen sar o Isus mothovđam so but ceninaja e Devleso anav?

¹² Sar o Isus, hem amen mothovđam so but ceninaja e Devleso anav (Jov. 17:6, 26). Na primer, ko 1931. berš dobinđam anav e Jehovase svedokija. Odoleja mothovđam soj tano amenđe važno e Devleso anav hem so mangaja te ova vićime palo oleso anav (Is. 43:10-12). Kotar oktobar ando odova berš, e Devleso anav hine ćhivdo  ki naslovno strana ando akava časopis. Uzo odova, ko prevod Novi svet hine ćhivdo e Devleso anav ko svako than kuri hine ikaldo. Akava tano averćhane kotar odova so ćerđe o crkve, sose on ko but thana ikalđe e Jehovaso anav ko pe Biblije.

13. Sose hijam uverime so o Isus vodini amen prekalo „verno hem razborito robo“? (Jovan 6:68)

¹³ O Isus prekalo „verno hem razborito robo“ organizujinđa pe sledbenikonen. On tane deo andi jekh organizacija koja pomožini e manušenđe te služinen e ćaćutne Devlese. So tu mislineja andi odija organizacija? Šaj mislineja isto odova so o apostol Petar phenđa e Isusese: „Koro kaste bi đaja? Tu isi tut o lafija ando večno đivdipe“ (Jov. 6:68). Savo bi amaro životi ovela ked na bi ovaja deo andi Jehovasi organizacija? Prekali odija organizacija, o Isus Hrist dinđa amen sa so valjani amenđe te šaj te aćhova verna e Jehovase. Isto ađahar, prekalo late sikavi amen sar šaj pana pošukar te ćera amari služba. Uzo odova, ov pomožini amenđe te urava „i nevi ličnost“ te šaj pana pobuter te ugodina e Jehovase (Ef. 4:24).

14. Sar pomožinđa tuće odova so hijan deo andi Jehovasi organizacija ki pandemija kotar koronavirus?

¹⁴ Ko akava pharo vreme, o Isus dela amen but šukar smernice. Odova šaj hine te dikha ki pandemija kotar koronavirus. O manuša ko sveto na đanđe so te ćeren, ama o Isus prekali amari organizacija dinđa amen jasna smernice sar te arakha amen. Ko smernice  kola dobinđam, hine phendo so valjani te akhara maske ked hijam maškaro manuša hem te ićera distanca. E starešinenđe hine phendo te oven ko kontakt sarinencar andi skupština te šaj te đanen savo tano olengo sastipe hem te pomožinen len te aćhon paše e Jehovaja (Is. 32:1, 2). Prekalo izveštaija ando Vodeće telo, amen dobinđam smernice hem baro ohrabrenje.

15. Kola smernice dobinđam ando odova sar te ićera amare sastankija hem sar te ćera i služba ki pandemija hem so ulo sebepi odova?

¹⁵ Ko period andi pandemija kotar koronavirus, dobinđam jasna smernice sar te ićera amare sastankija hem sar te đa ki služba. Samći prekali rat, počminđam prekalo video-poziv te ićera amare sastankija, pokrajinska sastankija hem kongresija. Isto ađahar, počminđam te svedočina prekalo lila hem prekalo telefoni. O Jehova ćaće blagoslovinđa amaro trud. Disave podružnice phenđe so o broj ando objaviteljija ko olenge phuvja but barilo. Isto ađahar, but objaviteljija hine len šuže iskustvija ki služba. (Dikh o okvir „ O Jehova blagoslovini amen đi propovedinaja“.)

16. Ko so šaj te ova sigurna?

¹⁶ Disave mislinđe so e Jehovasi organizacija hine previše oprezno ki pandemija. Ama, svako puti o smernice kola dobinđam hine but mudra (Mat. 11:19). Ked razmislinaja ando odova sar o Isus legari pe narodo, amen hijam sigurna so bizo obzir so te ovel, o Jehova hem oleso Ćhavo tane uvek amencar. (Čitin Jevrejima 13:5, 6.)

17. Sar osetineja tut soj tano o Isus Hrist to vođa?

¹⁷ Amen hijam but bahtale so o Isus nadgledini i organizacija. Koro amende na dikhela pe kotar koja kultura ja nacija avaja ili koja ćhib vaćeraja. Prekalo verno hem razborito robo, amen dobinaja duhovno hrana ko pravo vreme hem smernice sar šaj pana pošukar te ćera amari služba. Isto ađahar, sare sikljovaja sar te urava i nevi ličnost hem te manga jekh jekhe. Amen ćaće šaj te ova ponosna soj tano o Isus Hrist amaro vođa.