1. Ked sa o pomazanikija ka oven lende ko nebo?

 NEKOBOR berš angleder, e Jehovase sluge pućlje pe: „Ked o poslednjo pomazaniko ka ovel lendo ko nebo“? Beršencar mislinđam so disave pomazanikija palo Armagedon šaj jekh vreme ka oven ko raj ki phuv. Ama, andi Stražarsko kula kotar 15. jul 2013. berš haljiljam so sa o pomazanikija kola tane pana ki phuv ka oven lende ko nebo angleder o Armagedon (Mat. 24:31).

2. So šaj disave te pućen pe hem sostar ka vaćera ko akava članko?

² Ama, disave šaj te pućen pe: „So ka ovel e avere bakrencar kola verno ka služinen e Jehovase đi ka trajini i bari nevolja?“ (Jov. 10:16; Mat. 24:21). Disave šaj brininena pe so ked o pomazime phralja hem phenja ka oven lende ko nebo na ka ovel ko te pomožini len hem te vodini len. Hajde te razmotrina duj izveštaija andi Biblija kola šaj ćhivđe len te razmislinen ađahar. Palo odova, ka dikha sose nane amen razlogija te brinina amen.

SO NA KA OVEL?

3-4. So disaven šaj te brinini hem sose?

³ Disave šaj brininena pe so o avera bakre ka ćhinaven te služinen e Jehovase ked o pomazime phralja ando Vodeće telo na ka oven othe te predvodinen len. Šaj osetinena pe ađahar sebepi disave izveštaija andi Biblija. Te dikha duj primerija. Prvo primer tano ando prvosveštenik o Jodaj. Ov hine e Jehovaso verno sluga. Ov hem olesi romni, i Josaveta, spasinđe jekhe tikne ćhave kova vićinđa pe Joas hem pomožinđe lese te ovel šukar kralj hem te ovel verno e Devlese. Sa đi o Jodaj hine đivdo, o  Joas služinđa e Jehovase hem ćerđa šukar buća. Ama, ked o Jodaj mulo, o Joas sigate počminđa te ćerel odova soj tano lošno. Ov ćerđa odova so phenđe lese o lošna knezija hem irinđa po dumo e Jehovase (2. Let. 24:2, 15-19).

⁴ O dujto primer tano ando hrišćanija kotar dujto veko. O poslednjo apostol kova mulo hine o Jovan. Đi hine đivdo, ov pomožinđa bute hrišćanenđe te aćhon verna e Jehovase (3. Jov. 4). Sar sa avera apostolija, hem o Jovan dinđa sa pestar te arakhi o skupštine ando otpadnikija (1. Jov. 2:18; 2. Sol. 2:7). Ama, ked o Jovan mulo, but đene ki skupština ulje otpadnikija. Palo nekobor berš, akala otpadnikija ko sa o skupštine sikavđe o hovavne sikljoviba.

5. Savo zaključak na valjani te ana ked razmislinaja ando akala duj izveštaija?

⁵ Da li akala duj izveštaija mothovena so diso slično ka ovel avere bakrencar ked o pomazanikija ka oven lende ko nebo? Da li tegani e Jehovase sluge ki phuv ka ćhinaven te služinen lese sar so ćerđa o Joas ili ka oven otpadnikija sar o hrišćanija ko dujto veko? O odgovor tano na. Amen šaj te ova sigurna so ked o pomazanikija ka đan ko nebo, o avera bakre hem ponodri ka služinen e Jehovase ko ispravno način hem so ov ka brinini pe olendar. Ama, sose šaj te ova sigurna ko odova?

E JEHOVASO NARODO UVEK KA SLUŽINI LESE KO ISPRAVNO NAČIN

6. Ando kola trin vremenska periodija akana ka vaćera?

⁶ Sose šaj te ova sigurna so čak hem ko najpharo vreme, e Jehovase sluge na ka ćhinaven te služinen lese ko ispravno način? Odolese so ki Biblija pisini so o vreme ko kova amen živinaja tano averćhane kotar vreme ked živinđe o Izraelcija hem o hrišćanija kotar dujto veko. Akana ka razmotrina trin vremenska periodija: (1) o vreme ando purano Izrael, (2) o vreme palo odova so o apostolija mulje hem (3) amaro vreme ja o vreme „kotar obnova“ (Dela 3:21).

7. Sose o verna Izraelcija na obeshrabrinđe pe ked o kraljija hem but avera đene ćerđe lošna buća?

⁷ O vreme ando purano Izrael. Hari angleder te merel, o Mojsije phenđa e Izraelcenđe: „Đanava so palo mo meribe ka ruminen tumen hem ka ciden tumen ando drumo ko kova zapovedinđum tumenđe te đan“ (Pon. zak. 31:29). Isto ađahar, o Mojsije phenđa lenđe so ako pobuninena pe ka oven bićhalde ko ropstvo (Pon. zak. 28:35, 36). Da li ćaće ulo odova? Ja. Beršencar, but kraljija ćerđe lošna buća anglo Jehovase jaćha hem ćhivđe e manušen te služinen e hovavne devlenđe. Sebepi odova, o Jehova kazninđa e lošno manušen ko Izrael hem više na mukhlja e izraelsko kraljen te vladinen upro lende (Jezek. 21:25-27). Ama, ked o verna Izraelcija dikhlje so o Jehova ispuninđa odova so phenđa, odova dinđa len snaga hem ponodri verno te služinen lese (Is. 55:10, 11).

8. Da li valjani te iznenadini amen so ko dujto veko i hrišćansko skupština ruminđa pe? Objasnin.

⁸ O vreme palo odova so o apostolija mulje. Da li valjani te iznenadini amen so ko dujto veko i hrišćansko skupština ruminđa pe? Na. O Isus prorekninđa so ka ovel baro otpadništvo (Mat. 7:21-23; 13:24-30, 36-43). O apostolija o Pavle, o Petar hem o Jovan phenđe so već ko  prvo veko počminđe te ispuninen pe e Isusese lafija (2. Sol. 2:3, 7; 2. Petr. 2:1; 1. Jov. 2:18). Ko dujto veko, o otpadnikija, kola angleder hine hrišćanija, ulje deo ando Baro Vavilon, avere lafencar, deo andi hovavni religija. Kotar akava dikhaja so e Isusese lafija ispuninđe pe.

9. Sar tano amaro vreme averćhane ando vreme kotar purano Izrael hem kotar vreme ked živinđe o hrišćanija ando dujto veko?

⁹ „O vreme kotar obnova.“ Amaro vreme tano averćhane ando vreme kotar purano Izrael hem kotar vreme ando baro otpadništvo kova počminđa ko dujto veko. Sar vićini pe amaro vreme? Obično phenaja so živinaja ko vreme ando „poslednja dive“ (2. Tim. 3:1). Ama, i Biblija mothovi so ked počminđe o poslednja dive, tegani počminđa hem jekh považno hem podugačko period kova vićini pe „vreme kotar obnova“ (Dela 3:21). Odova period ka trajini sa đi e Devleso Kraljevstvo na ka ćerel o manuša te oven savršena hem te ovel raj ki phuv. Ov počminđa kotar 1914. berš. So tegani hine obnovimo? Tegani, o Isus hine ćhivdo te ovel Kralj ko nebo. O Jehova palem hine le Kralj kova predstavinđa le, nasledniko ando verno kralj, o David. Ama, odova Kraljevstvo na hine jedino so o Jehova obnovinđa. Sigate palo odova, o Jehova pomožinđa pe slugenđe palem te služinen lese ko ispravno način (Is. 2:2-4; Jezek. 11:17-20). Da li palem ka khuvel o otpadništvo maškaro Devleso narodo?

10. (a) Da li isi diso so šaj te ćhinavi amen te služina e Jehovase? (Isaija 54:17) (b) Sose utešinena amen asavke proročanstvija?

¹⁰ Čitin Isaija 54:17. Razmislin ando akava proročanstvo: „Nisavo oružje kova tano ćerdo protiv tute na ka ovel uspešno.“ Akala lafija ispuninena pe avdije. Ama, ko amaro vreme ispunini pe hem akava: „O Jehova ka sikavi sa te ćhaven hem te ćhave ka ovel len baro mir. Ki pravda ka ove utemeljimi [. . .] nisostar na ka dara hem na ka ovel tut razlog asi dar, i dar na ka ukljel tut“ (Is. 54:13, 14). Čak hem „o devel akale svetoso“, o Beng, na ka šaj te ćhinavi e Devlese narodo te sikavi e manušen ando Jehova (2. Kor. 4:4). E Jehovaso narodo služini lese ko ispravno način hem odova niko našti te rumini. Ađahar ka ovel ki celo večnost. Nisavo oružje kova  tano ćerdo protiv amende na ka ovel uspešno!

SO KA OVEL?

11. So uverini amen so o Jehova ka brinini pe ando baro mnoštvo ked o pomazanikija ka đan ko nebo?

¹¹ So ka ovel ked o pomazanikija ka đan ko nebo? Ma bistri so o Isus tano amaro Pastiri. Ov tano poglavari ki hrišćansko skupština. O Isus phenđa: „Jekh tano tumaro Vođa – o Hrist“ (Mat. 23:10). O Isus, kova vladini kotar nebo, uvek ka brinini pe ando pe učenikija. Odolese, on nane sostar te daran. Naravno, amen na đanaja svako detalji ando odova sar o Hrist ko odova vreme ka vodini amen. Odolese, hajde te razmotrina disave primerija kola šaj te ohrabrinen amen.

12. Sar o Jehova brininđa pe ando po narodo (a) ked o Mojsije mulo? (b) ked o Ilija dobinđa aver zadatko? (Dikh i slika.)

¹² Angleder o Izraelcija te khuven ki Obećimi phuv, o Mojsije mulo. So tegani ulo e Devlese narodoja? Da li o Jehova ćhinavđa te pomožini pe narodose? Na. Sa đi hine lese verna, ov dinđa len odova so valjanđa lenđe. Angleder o Mojsije te merel, o Jehova phenđa lese so o Isus Navin ka ovel vođa. O Mojsije beršencar sikavđa le te ovel šukar vođa (Izl. 33:11; Pon. zak. 34:9). Uzo odova, othe hine hem avera sposobna murša kola predvodinđe sar soj tane o poglavarija kola hine ćhivde upro hiljada, šel, pinda hem deš manuša (Pon. zak. 1:15). Uvek hine ko te brinini pe ando Devleso narodo. Aće te dikha e Ilijaso primer. Ov beršencar trudinđa pe te pomožini e Izraelcenđe te služinen e Jehovase. Ama, kasnije o Jehova dinđa le jekh aver zadatko ko jug andi Judeja (2. Kralj. 2:1; 2. Let. 21:12). Da li neko brininđa pe ando manuša kotar desetoplemensko kraljevstvo? Ja. O Ilija beršencar dinđa obuka e Jelisejese. Odothe hine hem „e prorokonenge ćhave“ kola isto dobinđe obuka (2. Kralj. 2:7). Sar so dikhaja, hine but manuša kola šaj hine te brininen pe ando Devleso narodo. O Jehova ćerela odova hem avdije.

13. Premalo Jevrejima 13:5b, so o Jehova obećinđa? (Dikh i slika.)

¹³ Akana ked razmotrinđam akala primerija, so mislineja so ka ovel ked o poslednjo pomazaniko ka đal ko nebo? Na valjani te brinina amen. Ki Biblija pisini so o Jehova niked na ka aćhavi pe  narodo. (Čitin Jevrejima 13:5b.) Sar o Mojsije hem o Ilija, jekh tikni grupa ando pomazanikija kola avdije predvodinena haljona kobor tano važno te den obuka averenđe. Beršencar, o phralja ando Vodeće telo dena obuka okolenđe kola tane deo ando avera bakre te predvodinen ki organizacija. Na primer, on organizujinena but škole kuri dena obuka e starešinenđe, e pokrajinsko nadglednikonenđe, okolenđe soj tane članija ando Odbor, nadglednikija ko Betel hem avera. O Vodeće telo lično dinđa obuka okolenđe so služinena sar olenge pomoćnikija ko različita odeljenja. Odola pomoćnikija već akana isi len but odgovornostija ki organizacija. On tane već spremna te brininen pe ando avera bakre palo odova so o pomazanikija ka đan ko nebo.

14. Koja but važno buti haljiljam?

¹⁴ Akana avaja đi i najvažno buti: Ked o poslednjo pomazaniko ka ovel lendo ko nebo, hari angleder te završini pe i bari nevolja, e Jehovaso narodo akate ki phuv ka nastavini verno te služini lese. Amen đanaja so ko odova vreme i koalicija ando narodija, koja ki Biblija vićini pe Gog ando Magog, ka napadini e Devlese narodo (Jezek. 38:18-20). Ama, odova napad na ka ovel uspešno hem na ka ćhinavi e Devlese narodo verno te služini lese. O Jehova sigurno ka izbavini pe narodo. Ki vizija, o apostol Jovan dikhlja sar o „baro mnoštvo“ avela andi „bari nevolja“ (Otkr. 7:9, 14). Amen hijam sigurna so o Jehova ka spasini pe slugen.

15-16. Premalo Otkrivenje 17:14, so o pomazanikija ka ćeren ko maribe ando Armagedon hem sose odova ohrabrini amen?

¹⁵ Ipak, disave šaj te pućen pe: „Ama, so ka ćeren o pomazanikija ked ka đan ko nebo?“ I Biblija phenela so o politička elementija ka „borinen pe e Bakreja“. Naravno so na ka pobedinen. Ko Devleso Lafi pisini: „O bakro ka pobedini len“. Ko ka pomožini lese? O stih phenela „okola soj tane vićime, birime hem  verna“. (Čitin Otkrivenje 17:14.) Koj tane on? O pomazanikija kola ka uskrsninen. Ked o poslednjo pomazaniko ka đal ko nebo, hari angleder te završini pe i bari nevolja, jekh ando olengo prvo zadatko ka ovel te borinen pe. Savo zanimljivo zadatko! Disave pomazanikija angleder te oven e Jehovase svedokija hine vojnikija. Ama, ked penđarđe e Jehova, on sikljilje sar te živinen averencar ko mir (Gal. 5:22; 2. Sol. 3:16). Na ćerđe više odova so angleder ćerđe. Ama, ked ka đan ko nebo, zajedno e Isuseja hem e anđelencar ka borinen pe protiv e Devlese dušmanija.

¹⁶ Razmislin akalestar. Ki phuv, disave pomazanikija tane phure, čak naborme. Ama, ked ka đan ko nebo, on ka oven moćna hem besmrtna stvorenja kaso zadatko ka ovel te borinen pe zajedno pe moćno Kraljeja, e Hristeja. Palo Armagedon, on zajedno e Isuseja ka pomožinen e manušenđe te oven savršena. Tegani, on šaj te pomožinen pe phralenđe hem phenjenđe kotar nebo pobuter nego so šaj hine te pomožinen len ked hine nesavršena manuša.

17. Sar đanaja so sa e Jehovase sluge ka oven ko bezbedno than ked ka avel o Armagedon?

¹⁷ Da li tu hijan jekh ando avera bakre? Ako ja, tegani so valjani te ćere ked ka počmini o maribe ando Armagedon? Nek ovel tut poverenje ko Jehova hem ićer tut ko olese smernice. Sar šaj te ćere odova? Ki Biblija pisini: „Khuven ko tumare sobe kaj ka oven ko sigurno hem phanen o udara palo tumende. Garaven tumen samo hari đi na nakhela o gnev“ (Is. 26:20). Sa e Devlese sluge, okola soj tane ko nebo hem okola soj tane ki phuv, ka oven ko bezbedno than ko odova vreme. Sar o apostol Pavle, amen hijam uverime so „ni o vlastija, ni odova soj tano akana, ni odova so ka avel. . . našti te ulavi amen ando Devleso mangipe“ (Rimlj. 8:38, 39). Niked ma bistri so o Jehova mangela tut hem so niked na ka aćhavi tut!