20. ČLANKO PROUČIBASE
ĐILI 67 Vaćeren i šukar vest!
O mangipe podstaknini amen te propovedina
I šukar vest najangleder mora te propovedini pe sa e narodonđe (MAR. 13:10)
SO KA SIKLJOVA?
Ka sikljova sar o mangipe podstaknini amen te ova revna hem celone vileja te propovedina.
1. So šunđam ko godišnjo sastanko aso 2023. berš?
KO AMARO godišnjo sastanko aso 2023. berš a, dobinđam disave neve objašnjenja hem šunđam but šuže obaveštenja andi amari služba. Na primer, odothe šunđam so disave šaj ka ovel len prilika te oven ki Jehovasi strana, čak hem palo odova so ka ovel uništimo o Baro Vavilon. Isto ađahar, šunđam so kotar novembar 2023. berš, o objaviteljija više na valjani ko po izveštaj asi služba te pisinen odobor detaljija sar angleder. Da li sebepi akala promene više na valjani odobor revno te propovedina? Naravno so na.
2. Sose amari služba ovela sa pohitno sar nakhela svako dive? (Marko 13:10)
2 Sar svako dive nakhela, amari služba ovela sa pohitno. Sose? Odolese so na aćhilo amenđe but vreme. Razmislin so o Isus prorekninđa ando propovedibe ko poslednja dive. (Čitin Marko 13:10.) Premalo izveštaj ando Matej, o Isus phenđa so i šukar vest valjani te propovedini pe ko celo sveto angleder te avel „o kraj“ (Mat. 24:14). Odova izraz odnosini pe ko kraj ando Satanaso lošno sveto. O Jehova odredinđa „o dive hem o vreme“ ked odola događaja ka ispuninen pe (Mat. 24:36; 25:13; Dela 1:7). Svako dive hijam popaše uzo kraj (Rimlj. 13:11). Odolese, valjani te da sa amendar hem ponodri te propovedina.
3. So podstaknini amen te propovedina?
3 Isi jekh važno pućibe kolestar valjani te razmislina: Sose propovedinaja i šukar vest? Sebepi o mangipe. Ked propovedinaja, amen mothovaja so mangaja i šukar vest, e manušen, e Jehova hem oleso anav. Akana ka razmotrina so svako andi akija buti značini.
MANGAJA I ŠUKAR VEST
4. Sar reagujinaja ked šunaja disavi šukar vest?
4 Da li šaj te setine tut sar osetinđan tut ked šunđan disavi šukar vest? Na primer, so bijandilji disavi beba ki porodica ili ked dobinđan ponuda asi buti koja baš valjanđa tuće. Sigurno jedva dikhljan odija šukar vest te vaćere te amalenđe hem te familijaće. Da li diso slično desinđa pe tuće ked šunđan i najšukar vest – i šukar vest ando Kraljevstvo?
5. Sar osetinđan tut ked prvo puti šunđan o ćaćipe ando Devleso Lafi? (Dikh o slike.)
5 Akana razmislin odolestar sar osetinđan tut ked prvo puti šunđan o ćaćipe ando Devleso Lafi. Tegani šunđan so to nebesko Dad but mangela tut, so mangela te ove deo andi olesi porodica, so obećinđa so ka cidel o patnje, so jekh dive šaj te dikhe okolen kola mule tutar hem pana but buća (Mar. 10:29, 30; Jov. 5:28, 29; Rimlj. 8:38, 39; Otkr. 21:3, 4). Ked sa akala buća šunđan, sigurno hijan le but bahtalo (Luka 24:32). Sviđinđa pe tuće odova so sikljiljan hem jedva ađićerđan te vaćere averenđe odolestar. (Uporedin e stihoja ando Jeremija 20:9.)
Ked šunđam i šukar vest ando Kraljevstvo, jedva dikhljam te vaćera averenđe odolestar (Dikh o 5. odlomko)
6. So sikljoveja ando Erne hem i Roža?
6 Aće te dikha jekh primer. Ked amaro phral o Erne b hine le deš berš, oleso dad mulo. Ov phenela: „Pućljum man: ’Da li mo dad đelo ko nebo? Ili više na postojini?‘ Hijum le but ljubomorno upro avera ćhave kola hine len dad.“ O Erne hine le navika te đal ko pe dadeso grobo, te perel ko koćija hem te molini pe: „Devla, molinava tut, mangava te đanav kaj tano mo dad.“ Oko 17 berš palo pe dadeso meribe, o Erne hine le prilika te proučini i Biblija. Ov hine but bahtalo ked šunđa so o mule ništa na đanena, so samći sovena hem so i Biblija obećini so ki budućnost ka uskrsninen (Prop. 9:5, 10; Dela 24:15). Konačno arakhlja o odgovorija ko pe pućiba kola beršencar rodinđa. O Erne hine but bahtalo sebepi sa odova so sikljilo ando Devleso Lafi. Olesi romni i Roža isto počminđa te proučini sose sviđinđa pe laće odova so šunđa. Ko 1978. berš krstinđe pe. O solduj hine but revna hem odolese i šukar vest vaćerđe pe familijaće, pe amalenđe hem sarinenđe kola manglje te šunen. Sebepi odova, on pomožinđe pobuter ando 70 manuša te penđaren e Jehova hem te krstinen pe.
7. So ka ćera ako mangaja o ćaćipe andi Biblija? (Luka 6:45)
7 Ako mangaja o ćaćipe andi Biblija, ka ovel amen bari želja te vaćera averenđe olestar. (Čitin Luka 6:45.) Ka osetina amen sar e Isusese učenikija ando prvo veko kola phenđe: „Amen našti, a te na vaćera ando odova so dikhljam hem so šunđam“ (Dela 4:20). Amen odobor mangaja o ćaćipe so daja sa amendar sare te šunen i šukar vest.
MANGAJA E MANUŠEN
8. So podstaknini amen te vaćera e manušenđe i šukar vest? (Dikh o okvir „ Mang e manušen hem ćer učenikonen“; dikh i slika.)
8 Sar o Jehova hem o Isus, hem amen mangaja e manušen (Posl. 8:31; Jov. 3:16). Amen mothovaja saosećanje okolenđe kola tane „bizo Devel“ hem „bizi nada“ (Ef. 2:12). O manuša sebepi pe problemija, šaj te osetinen pe soj tane ki jekh but bari rupa. A amen šaj te forda lenđe o šelo te šaj te ikljon kotar odija rupa, ađahar so ka vaćera lenđe i šukar vest ando Devleso Kraljevsto. Amaro mangipe hem saosećanje podstaknini amen te da sa amendar te vaćera lenđe i šukar vest. Ked šunena i šukar vest, odova dela len nada, pomožini len te oven bahtale akana hem dela len prilika jekh dive te uživinen ko raj ki phuv (1. Tim. 6:19).
O mangipe hem i saosećajnost premalo manuša podstaknini amen te da sa amendar te propovedina lenđe i šukar vest (Dikh o 8. odlomko)
9. Ko so upozorinaja e manušen hem sose? (Jezekilj 33:7, 8)
9 Amaro mangipe premalo manuša podstaknini amen te upozorina len so ka avel o kraj. (Čitin Jezekilj 33:7, 8.) Isi amen saosećanje premalo manuša hem premali amari familija kola nane e Jehovase svedokija. But olendar živinena po životi, a nane svesna so pana hari ka avel i „bari nevolja savi na hine kotar početak ando sveto pa sa đi akana, a više niked ni na ka ovel“ (Mat. 24:21). Amen mangaja on te đanen so ka desini pe ko vreme ando sudo. Najangleder i hovavni religija ka ovel uništimi, a palo odova ko Armagedon o lošno sveto ka ovel uništimo (Otkr. 16:14, 16; 17:16, 17; 19:11, 19, 20). Molinaja amen sa pobuter manuša te prihvatinen o ćaćipe hem te počminen akana te služinen e Jehovase. Ama, so ka ovel okolencar kola akana na mangena te šunen amen, pa čak hem neko andi amari porodica?
10. Sose valjani hem ponodri te upozorina e manušen ko odova so ka ovel?
10 Sar so vaćerđam ko okova članko, šaj ka ovel e Jehovasi volja te spasini okolen kola ka počminen te meninen pe ked ka dikhen so o Baro Vavilon tano uništimo. Ako tano ađahar, šaj samo te zamislina kobor tano važno akana te vaćera lenđe odolestar. Razmislin ando akava: Odova so ka phena lenđe akana, šaj ka ovel diso ko so tegani ka setinen pe. (Uporedin e stihoja ando Jezekilj 33:33.) Šaj ka razmislinen ando upozorenje kova akana šunđe amendar hem odova ka podstaknini len te služinen e Jehovase angleder so ka ovel but kasno. Sar o čuvari ko phanlipe ko Filipi kova meninđa pe palo jekh but baro zemljotres, šaj okola kola akana na mangena te šunen ka meninen pe palo odova so ka ovel uništimo o Baro Vavilon (Dela 16:25-34).
MANGAJA E JEHOVA HEM OLESO ANAV
11. Sar amen daja e Jehovase i slava, i čast hem i moć? (Otkrivenje 4:11; dikh o slike.)
11 O najvažno razlog sose propovedinaja i šukar vest tano odolese so mangaja e Jehova hem oleso sveto anav. Amari služba tani jekh način sar šaj te hvalina e Devle kole but mangaja. (Čitin Otkrivenje 4:11.) Ando vilo složinaja amen so o Jehova tano dostojno te primini i slava, i čast hem i moć. Amen daja le i slava hem i čast ked e manušenđe vaćeraja ando dokazija so o Devel sa stvorinđa hem so hijam đivde samo sose ov dinđa amen o životi. Amen daja le i moć, ađahar so koristinaja amaro vreme, snaga hem o buća kola isi amen te šaj so pobuter te propovedina (Mat. 6:33; Luka 13:24; Kol. 3:23). Ćaće mangaja te vaćera ando Devel kole but mangaja. Isto ađahar, podstaknime hijam te vaćera averenđe ando oleso anav hem ando odova savo tano ov. Sose?
Amen daja e Jehovase amari moć ked koristinaja amaro vreme, snaga hem o buća kola isi amen te đa ki služba odobor kobor amare okolnostija dozvolinena amenđe (Dikh o 11. odlomko)
12. Sar svetinaja e Jehovaso anav ki služba?
12 Amaro mangipe premalo Jehova, podstaknini amen te svetina oleso anav (Mat. 6:9). Odova značini so sarinenđe vaćeraja so o hovajbe kova o Beng phenđa ando Jehova nane tačno (Post. 3:1-5; Jov 2:4; Jov. 8:44). Ki služba jedva ađićeraja te vaćera okolencar kola ćaće mangena te šunen savo tano o Jehova. Mangaja sare te đanen so olesi najbari osobina tani o mangipe, so oleso način sar vladini tano pravedno hem so oleso Kraljevstvo ka cidel sa o patnje hem ka anel mir sarinenđe ki phuv (Ps. 37:10, 11, 29; 1. Jov. 4:8). Ked e manušenđe vaćeraja sa akala buća ando Jehova, tegani svetinaja oleso anav. Isto ađahar, sar e Jehovase svedokija bahtale hijam so ćeraja odova so ađićeri pe amendar. Sose šaj te phena odova?
13. Sose hijam ponosna so vićinaja amen e Jehovase svedokija? (Isaija 43:10-12)
13 O Jehova birinđa amen te ova olese „svedokija“. (Čitin Isaija 43:10-12.) Angleder nekobor berš, ko jekh lil ando Vodeće telo pisinđa: „Jekh andi najbari čast tani so hijam vićime e Jehovase svedokija.“ c Sose šaj te phena odova? Razmislin ando jekh primer. Ako valjani tuće jekh manuš te ovel to svedoko ko sudo, kas bi birineja? Sigurno nekas kas šukar penđareja, upro kaste isi tut poverenje hem kova isi le šukar anav, sose avera ka ovel len poverenje upro leste. Ko slično način, odoleja so o Jehova birinđa amen te ova olese Svedokija, ov mothovi so šukar penđari amen hem so isi le poverenje so ka vaćera e manušenđe so ov tano ćaćutno Devel. Amenđe tani ćaće bari čast te ova e Jehovase svedokija hem odolese koristinaja svako prilika te vaćera ando oleso anav hem te dokažina so o hovajba kola vaćerena pe olestar nane tačna. Ked ćeraja ađahar, amen postupinaja u skladu amare anaveja – svedočinaja ando Jehova (Ps. 83:18; Rimlj. 10:13-15).
KA PROPOVEDINA SA ĐI O KRAJO
14. Kola šuže buća šaj ka desini pe ki budućnost?
14 Amen jedva ađićeraja te dikha so pana hari ka ovel. Uzi Jehovasi pomoć, nadinaja amen so pana manuša ka prihvatinen o ćaćipe angleder so ka počmini i bari nevolja. Isto ađahar, hijam bahtale so postojini mogućnost čak hem đi trajini i bari nevolja te dikha sar disave manuša cidena pe ando Bengeso sveto hem počminena amencar te slavinen e Jehova (Dela 13:48).
15-16. So valjani hem ponodri te ćera hem đi ked ka ćera odova?
15 Amen valjani te ćera jekh but važno buti koja niked na ka ponovini pe. Isi amen čast te propovedina i šukar vest ando Devleso Kraljevstvo. Ko isto vreme, hem ponodri upozorinaja e manušen so pana hari ka desini pe. O manuša valjani te đanen so akava lošno sveto ka ovel uništimo. Palo odova, ked o vreme ando sudo ka avel, on ka đanen so odova sostar propovedinđam avela ando Jehova (Jezek. 38:23).
16 Odolese, so hijam odlučna te ćera? Amen mangaja spremno hem revno te propovedina odolese so mangaja i šukar vest, mangaja e manušen hem mangaja e Jehova hem oleso anav. Amen ka ćera odova sa đi o Jehova na phenela: „Gotovo!“
ĐILI 54 „Aće o drumo“
a O godišnjo sastanko ićerđa pe ko 7. oktobar ko 2023. berš ki kongresno dvorana ando Jehovase svedokija ko Njuburg, ki Amerika. Celo program kasnije ikljilo ko JW Broadcasting®. O prvo deo ko novembar 2023. berš, a o dujto ko januar 2024. berš.
b Dikh o članko „Biblija menja živote – Oduševili su me jasni i logični odgovori iz Biblije“, andi Stražarsko kula kotar 1. februar, 2015. berš.
