1. Sose šaj te phena so o Beng tano sar jekh lovco?

O LOVCO isi le samo jekh cilj – te astari hem te mudari e životinja. Odolese ov koristini razna zamke. Čak hem i Biblija vaćeri odolestar (Jov 18:8-10). Sar ćerela odova? Ov posmatrini odola životinja. Kaj đala? So ćerela? Koja tani najšukar zamka asi odija životinja? O Satana tano sar odova lovco. Ov posmatrini amen. Dikhela kaj đaja hem so ćeraja. Palo odova, ov birini jekh zamka asi koja nadini pe so ka astari amen tegani ked amen na očekujinaja. Ama, iako peljam ki disavi zamka, i Biblija phenela so amen ipak šaj te ikljova olatar. Isto ađahar, sikavi amen so šaj te ćera te na pera ko odola zamke.

2. Kola tane e Bengese duj najbare zamke?

² E Satanase duj najbare zamke tane o ponos hem i pohlepa. * Već beršencar o Beng uspešno koristini akala zamke. Ov tano sar o manuš kova astari e ćirikljen ki zamka (Ps. 91:3). Ama, amen šaj te izbegnina e Bengese zamke odolese so o Jehova sikavi amen kola metode ov koristini (2. Kor. 2:11).

3. Sose i Biblija vaćeri ando disave ponosna hem pohlepna manuša?

³ O Jehova prekalo averenge primerija upozorini amen kobor tane o ponos hem i pohlepa opasna. Isto ađahar, đi ka vaćera ando odola primerija, ka dikha sar disave kola beršencar služinđe e Jehovase pelje ki e Bengese zamka. Da li odova značini so hem amen ka pera ki zamka te ova ponosna  ja pohlepna? Na. Odolese so o Jehova dinđa te pisinen pe disave primerija kola služinena amenđe „sar upozorenje“ (1. Kor. 10:11). Ov đanela so amen šaj te sikljova ando odola primerija hem ađahar te naša ando e Bengese zamke.

4. So šaj te ovel ako hijam ponosna?

⁴ O Satana mangela te ova ponosna. Ov đanela so ako ovaja ponosna, amen ka ova sar oleste hem ka našala o večno životi (Posl. 16:18). Odolese, o apostol Pavle upozorinđa so jekh manuš šaj te ovel ponosno hem te ovel osudimo isto sar o Beng (1. Tim. 3:6, 7). Akava šaj te desini pe svakonese amendar, bizo obzir da li hijam neve ko ćaćipe ja beršencar služinaja e Jehovase.

5. Premalo Propovednik 7:16, 20, sar šaj jekh manuš te mothovi soj tano ponosno?

⁵ O ponosna manuša tane sebična. O Satana mangela te mislina pobuter amendar nego ando Jehova, posebno ked hijam ko pharipa. Na primer, da li neko nekad phenđa hovajbe tutar? Da li doživinđan disavi nepravda? O Satana bi mangela, ked odova desini pe, te holjane upro Jehova ja upro te phralja. Uzo odova, ov mangela te misline so jedino način sar šaj te rešine odova problemi tano te le o problemi ko tekle vasta, a na te ćere ađahar sar so o Jehova sikavi amen prekalo poklo Lafi. (Čitin Propovednik 7:16, 20.)

6. So šaj te sikljove ando jekhe phenjako primer andi Holandija?

⁶ Razmislin ando odova so phenđa jekh phen andi Holandija, kola odobor nervirinđe averenge mane so na manglja više ni te družini pe olencar. Oj phenela: „Hijum le but usamljeno hem naštinđum te oprostinav lenđe. Phenđum me romese soj tano pošukar te selina amen ki aver skupština.“ Ama, palo odova so dikhlja e masekosi emisija aso mart 2016. berš, oj menjinđa po mišljenje. Ki odija emisija hine vaćerdo ando odova sar valjani te dikha ko averenge mane. Oj  phenela: „Haljiljum so me valjani te ovav ponizno hem te priznajinav me greške, a na te pokušinav te menjinav e phralen hem e phenjen ki skupština. Odija emisija pomožinđa maje te razmislinav ando Jehova hem so ov isi le pravo te phenel amenđe so te ćera.“ So sikljovaja ando akava? Ked isi tut disavo problemi, razmislin ando Jehova. Molin tut olese te pomožini tut upro avera te dikhe ađahar sar so ov dikhela. Toklo nebesko Dad dikhela olenge greške, ama ov mangela te oprostini lenđe. Ov mangela hem tu te ćere odova (1. Jov. 4:20).

7. So doživinđa o kralj Ozija?

⁷ Odolese so hine ponosno, o kralj Ozija na šunđa o savet hem ćerđa diso so na hine le pravo te ćerel. Ov hine but sposobno manuš. Pobedinđa ko but mariba, gradinđa bare dizja hem hine but uspešno zemljoradniko. O ćaćutno Devel blagoslovinđa le (2. Let. 26:3-7, 10). Ki Biblija pisini: „Ked ulo moćno, oleso vilo odobor ulo oholo so kokri pes igarđa ki propast.“ O Jehova phenđa so samo o sveštenikija šajinđe te prinosinen o kad ko hram. Ama, o kralj Ozija ćerđa diso so na hine le pravo te ćerel. Ov khuvđa ko hram hem prinosinđa o kad. E Jehovase na sviđinđa pe odova hem odolese ćerđa te ovel le guba. Đi o krajo ando poklo đivdipe, o Ozija hine le guba (2. Let. 26:16-21).

8. Sar odova so pisini ki 1. Korinćanima 4:6, 7 pomožini amenđe te na ova ponosna?

⁸ Da li hem amen šaj te ova ponosna hem te grešina sar o Ozija? Te dikha o primer ando Hose. Ov hine but uspešno ki pi buti hem hine but poštujimo starešina ki skupština. Ićerđa govorija ko pokrajinska sastankija hem ko kongresija, a o pokrajinska nadglednikija pućlje le aso savet. Ov phenela: „Ama, me osloninđum man upro me sposobnostija hem mo iskustvo, a na upro Jehova. Mislinđum so hijum zoralo hem na šunđum e Jehovase upozorenja hem savetija.“ O Hose ćerđa but ozbiljno greh hem odolese hine isključimo. Palo nekobor berš, o Hose palem irinđa pe. Ov phenela: „O Jehova sikavđa man so najvažno buti nane te ovel tut titula, već te ćere o buća kola ov rodela tutar te ćere.“ Niko amendar na valjani te bistrel so o sposobnostija kola isi amen hem o zaduženja kola dobinaja ki skupština  avena ando Jehova. (Čitin 1. Korinćanima 4:6, 7.) Ako hijam ponosna, o Jehova na ka koristini amen.

9. So ćerđe o Satana hem i Eva odolese so hine pohlepna?

⁹ Ked razmislinaja andi pohlepa, verovatno prvo ko perela amenđe ki godi tano o Satana, o Beng. Ov hine e Jehovaso anđeo hem sigurno hine le but zadatkija. Ama, ov manglja diso pobuter. Ov manglja o manuša te služinen olese, a na e Jehovase. O Satana mangela hem amen te ova sar oleste. Odolese, ov ćhivela amen te na ova zadovoljna odoleja so isi amen, već te manga pobuter. Prvo puti odova ćerđa ked vaćerđa e Evaja. O Jehova e Adamese hem e Evaće dinđa sa so valjanđa lenđe aso habe. On šajinđe te han „kotar svako kaš ko vrt“, ama samo kotar jekh naštinđe te han (Post. 2:16). Ama, o Beng ćhivđa e Eva te razmislini so valjani te hal kotar o kaš kova hine zabranimo. I Eva na ceninđa odova so hine la, oj manglja diso pobuter. Ko krajo đanaja so ulo, oj grešinđa hem mulji (Post. 3:6, 19).

10. So ulo e Davideja ked ulo pohlepno?

¹⁰ O Jehova but blagoslovinđa e Davide. Dinđa le šukar sastipe, baro položaj hem pomožinđa lese but putija te pobedini pe neprijateljen. O David hine zahvalno aso odola buća kola o Jehova dinđa le hem phenđa so našti ni te đenel len kobor tane (Ps. 40:5). Ama, ko jekh trenutko, ov ulo pohlepno hem bisterđa sa so dinđa le o Jehova. Više na hine zadovoljno odoleja so o Jehova dinđa le nego manglja te ovel le diso pobuter. Iako već hine le nekobor romnja, ov manglja tuđona romnja iako đanđa so odova nane šukar. Odija romni hine i Vitsaveja, a olako rom vićinđa pe Urija Hetejin. O David hine sebično hem odolese suća e Vitsavejaja hem oj aćhilji khamni. Ka phene so odova na hine dovoljno so ćerđa, nego hem naredinđa o Urija te ovel mudardo (2. Sam. 11:2-15). Sostar o David razmislinđa? Da li mislinđa so o Jehova na dikhela so ćerela? Iako o David beršencar služinđa e Jehovase, ov ulo pohlepno hem sebepi odova hine le but bare dukha. Ama, ov kasnije priznajinđa so grešinđa hem pokajinđa pe. Kobor samo hine zahvalno so o Jehova oprostinđa lese (2. Sam. 12:7-13).

11. Premalo Efešanima 5:3, 4, sar šaj te borina amen protiv i pohlepa?

 ¹¹ So sikljovaja ando e Davideso primer? Ako hijam zahvalna e Jehovase aso sa o buća kola dela amen, na ka ova pohlepna. (Čitin Efešanima 5:3, 4.) Amen valjani te ova zadovoljna odoleja so isi amen. Ked počminaja te proučina i Biblija nekasa, amen sikavaja le svako dive te razmislini andi jekh šukar buti koja o Jehova dela le. Ako odova ćerela jekh kurko, tegani ka ovel le efta buća aso so šaj ki molitva te zahvalini pe e Jehovase (1. Sol. 5:18). Da li hem tu ćereja odova? Ako razmislineja ando sa o buća kola o Jehova dinđa tut, odova ka pomožini tut te ove zahvalno. Ked hijam zahvalna, ka ova hem zadovoljna. A ked hijam zadovoljna, i pohlepa na ka astari amen ki pikli zamka.

12. So ćerđa o Juda Iskariotski odolese so ulo pohlepno?

¹² Odolese so o Juda Iskariotski ulo pohlepno, ov izdajinđa e Isuse. Ama, o Juda na hine uvek asavko manuš (Luka 6:13, 16). O Isus birinđa le te ovel jekh ando apostolija. Ov hine le poverenje upro Juda hem odolese dinđa le odgovornost te brinini pe andi kutija aso prilogija. O Isus hem o apostolija koristinđe odola pare te ućharen pe troškija đi hine ki služba. Odola pare tane slična sar o prilogija kola amen daja avdije. Ama palo disavo vreme, o Juda počminđa te ćorel odola pare, iako but putija šunđa e Isuse sar vaćeri e manušenđe so na valjani te oven pohlepna (Mar. 7:22, 23; Luka 11:39; 12:15). Ama, o Juda na šunđa odola upozorenja.

13. Ked dićhilo so o Juda ulo pohlepno?

¹³ Kobor o Juda ulo pohlepno dićhilo hari angleder te merel o Isus. O Isus hem olese apostolija, i Marija hem olaki phen i Marta, hine ko gostija ko gubavco kova vićinđa pe Simon. Đi halje maro, i Marija uštinđa hem ćhorđa ko e Isuseso šero o ulje kova hine but skupo. O Juda hem avera učenikija but holjanđe. Avera učenikija šaj holjanđe odolese so mislinđe so odola pare šaj hine te trošinen pe aso avera buća. Ama, o Juda hine le aver razlog sose holjanđa. Ov hine ćor hem manglja te ćorel odola pare. Palo odova, odolese so ulo pohlepno, ov izdajinđa e Isuse aso 30 srebrnikija, so hine i cena aso jekh robo (Jov. 12:2-6; Mat. 26:6-16; Luka 22:3-6).

14. Sar jekh bračno par primeninđa o lafija ando Luka 16:13?

¹⁴ O Isus phenđa pe učenikonenđe: „Našti te oven robija hem e Devlese hem e barvalipase.“ (Čitin Luka 16:13.) Odova važini hem avdije. Te dikha sar jekh par andi Rumunija primeninđa akala lafija ko poklo đivdipe. On hine len prilika te ćeren buti ki jekh barvali phuv. Akava par phenela: „Hine amen but baro dugo ki banka, odolese ki početka mislinđam so akija buti tani sar blagoslov ando Jehova.“ Ama, odova hine hem o problemi. Ako bi prihvatinena odija buti, tegani ne bi ovela len but vreme te služinen e Jehovase. Palo odova so čitinđe o članko „Ostanimo verni Jehovi nepodeljenog srca“ ki Stražarsko kula kotar 15. avgust 2008. berš, on anđe jekh odluka. On phenena: „Ako bi amaro razlog sose đeljam ki aver phuv ovela te zaradina pobuter pare, tegani odova bi značini so amaro amalipe e Jehovaja ćhivaja ko dujto than. Haljiljam so tegani amaro amalipe e Jehovaja ka slaboni.“ Odolese odbinđe odija buti. So ulo palo odova? O rom arakhlja buti ki pi phuv koja obezbedinđa lenđe sa so valjanđa lenđe aso đivdipe. I romni phenela: „O Jehova uvek  ka pomožini pe slugenđe.“ Akava bračno par tano bahtalo so birinđe o Jehova te ovel olengo gospodari, a na o pare.

15. Sose šaj te ova sigurna so šaj te naša ando e Satanase zamke?

¹⁵ So valjani te ćera ako primetinaja so uljam ponosna ja pohlepna? Valjani te menjina amen. O Pavle phenđa so okolen kas o Beng „đivde astarđa“ ki pi zamka šaj te ikljon olatar (2. Tim. 2:26). Odova ćerđa o David. Ov šunđa e Nataneso savet hem pokajinđa pe sebepi so hine pohlepno. Ađahar, ov palem ulo amal e Jehovaja. Niked ma bistri soj tano o Jehova pozoralo ando Satana. Ako prihvatinaja e Jehovasi pomoć, amen šaj te naša andi bilo koja zamka koja o Beng šaj te ćhivel anglo amende.

16. So šaj te pomožini amen te cida amen ando e Bengese zamke?

¹⁶ Naravno, ovela bi najšukar niked te na pera ki nijekh e Bengesi zamka. Odova šaj te ćera samo odolese so o Jehova pomožini amen. Ama, niked na valjani te mislina so hijam odobor zorale hem te phena so odova niked našti te desini pe amenđe. Čak hem e Jehovase verna sluge kola but berša služinena lese šaj te oven ponosna ja pohlepna. Odolese, molin tut e Jehovase svako dive te pomožini tut te dikhe da li odola osobine utičinena upro to način sar razmislineja ja upro odova so ćereja (Ps. 139:23, 24). De sa tutar niked te na dozvoline te ove ponosno ja pohlepno.

17. So pana hari ka ovel amare dušmaneja, e Bengeja?

¹⁷ Već hiljade berša, o Satana mangela te astari e Devlese slugen ki zamka. Ama, pana hari ka ovel phanlo hem ko krajo uništimo (Otkr. 20:1-3, 10). Jedva ađićeraja odova dive. Ama, đi na avela odova dive, pazin tut ando e Satanase zamke. De sa tutar niked te na dozvoline te ove ponosno ja pohlepno. Ov odlučno te suprostavine tut e Bengese hem „ov ka našel“ tutar (Jak. 4:7).