1-2. (a) Sose na hijam iznenadime so isi amen pharipa? (b) Sostar ka vaćera ko akava članko?

 SAR e Jehovase sluge, amen avdije na iznenadini amen so isi amen odobor bare pharipa. Amen haljovaja so ki Biblija pisini so „mora te nakha bare pharipa, angleder so ka khuva ko Devleso Kraljevstvo“ (Dela 14:22). Isto ađahar, đanaja so disave amare problemija ka rešinen pe tek ked ka avel o nevo sveto kuri „na ka ovel više meribe, ni muke, ni rojbe, ni dukha“ (Otkr. 21:4).

² O Jehova na zaštitini amen ando pharipa, ama dela amen snaga te šaj te istrajina. Palo odova so phenđa kobor bare pharipa hine len ov hem o phralja ko Rim, o apostol Pavle phenđa: „Ama ko sa odova pobedinaja sose pomožini amen okova kova manglja amen“ (Rimlj. 8:35-37). Odova značini so o Jehova šaj te pomožini amenđe čak hem đi trajini amaro pharipe. Ko akava članko ka dikha, sar o Jehova pomožinđa e Josifese hem sar šaj te pomožini hem amenđe.

3. So kotar jekhvar desinđa pe e Josifese?

³ O Jakov but manglja pe najtikne ćhave, e Josife (Post. 37:3, 4). Odolese, e Josifese phralja hine ljubomorna upro leste. Jekh dive, on bikinđe le disave manušenđe ando Madijan. Odola manuša legarđe e Josife but dur, ko Egipat. Ked reslje othe, on bikinđe le e Petefrijese kova hine e faraoneso dvoranin. Šaj samo te zamislina kobor meninđa pe e Josifeso životi. Ko jekh trenutko, ov  hine pe dadeso najmanglo ćhavo, a ko aver hine robo ko Egipat (Post. 39:1).

4. Sar šaj hem amen te oven amen pharipa sar so hine le o Josif?

⁴ Ki Biblija pisini so „o pharipa... desinena pe svakone manušese“ (Prop. 9:11). Amen šaj te oven amen pharipa kola isi len hem avera manuša (1. Kor. 10:13). Ja šaj te oven amen problemija odolese so hijam e Isusese učenikija. Na primer, neko šaj te marel amenđe muj, te protivini pe amenđe ja šaj čak te ova progonime sebepi amari vera (2. Tim. 3:12). Ama, ko sa odola pharipa, o Jehova šaj te pomožini amenđe te ova uspešna. Akana ka dikha sar ov pomožinđa e Josifese.

5. So o Petefrije haljilo? (Postanak 39:2-6)

⁵ Čitin Postanak 39:2-6. O Petefrije dikhlja so o Josif tano but sposobno hem bućarno ćhavo. Ama, đanđa hem sose tano asavko. Ov dikhlja „so o Jehova pomožini lese ko sa so ćerela.“ b Sebepi odova, ov ćhivđa le te ovel oleso lično sluga hem upravitelj ko oleso ćher hem upro sa so hine le. Odolese, o Jehova blagoslovinđa e Petefrije.

6. Sar hine e Josifese đi hine ko Petefrijeso ćher?

⁶ Šaj li te zamisline sar hine e Josifese? So ov najviše manglja? Da li manglja o Petefrije te dikhel kobor tano bućarno hem te nagradini le sebepi odova? Pa, najverovatno najviše manglja te ovel oslobodimo hem te irini pe ćhere. Iako o Josif hine le bare zaduženja, ov pana hine robo hem odova ko manuš kova na služinđa e Jehovase. O Jehova na podstakninđa e Petefrije te oslobodini e Josife, a đanaja so e Josifeso životi ulo sa pološno.

7. Sar e Josifesi situacija ulji sa pološno? (Postanak 39:14, 15)

⁷ Sar so pisini ko 39. poglavlje ki knjiga Postanak, e Petefrijesi romni ćhivđa jakh upro Josif hem manglja te sovel oleja. Ama, svako puti o Josif phenđa laće  so na mangela te ćerel odova. Ko krajo, oj hine odobor holjami upro Josif so optužinđa le so manglja te silujini la. (Čitin Postanak 39:14, 15.) Ked o Petefrije šunđa odova, fordinđa e Josife ko phanlipe kuri hine nekobor berš (Post. 39:19, 20). Ama, savo hine odova phanlipe? O hebrejsko lafi kova o Josif koristinđa e lafese „phanlipe“ šaj te prevodini pe hem sar „jama.“ Odova značini so uduri hine bari tomina hem o Josif odothe osetinđa pe so niko našti te pomožini lese (Post. 40:15, fusn.). Isto ađahar, i Biblija mothovi so o Josif ko pre hem ki men hine le lancija (Ps. 105:17, 18). E Josifesi situacija hine sa pološno. Ko jekh trenutko, ov hine robo kolese šaj hine te verujini pe, a akana tano ko phanlipe.

8. Ko so šaj te ova sigurna, iako amaro problemi ovela sa pobaro?

⁸ Da li dijekhvar te problemija hine sa pobare, iako ando vilo molinđan tu e Jehovase? Odova šaj te ovel sose o Jehova na štitini amen kotar pharipa ko sveto kuri vladini o Beng (1. Jov 5:19). Ama, jekh buti niked ma bistri: O Jehova na phanela pe jaćha anglo te pharipa, ov brinini pe tutar (Mat. 10:29-31; 1. Petr. 5:6, 7). Ov čak dela po lafi: „Niked na ka aćhavav tut hem niked na ka irinav tuće mo dumo“ (Jevr. 13:5). O Jehova šaj te pomožini amenđe te istrajina čak iako amen mislinaja so amaro problemi našti te rešini pe. Akana ka dikha sar pomožinđa e Josifese.

9. So mothovi amenđe so o Jehova na bisterđa upro Josif đi hine ko phanlipe? (Postanak 39:21-23)

⁹ Čitin Postanak 39:21-23. Čak ked e Josifese hine najpharo, o Jehova pomožinđa lese te ovel uspešno. Sar o Petefrije, hem o upravitelj ando phanlipe počminđa te poštujini e Josife hem te verujini lese. Odolese ćhivđa le te nadgledini avere manušen kola hine ko phanlipe. Ki Biblija pisini so „o upravitelj ando phanlipe više na nadgledinđa ništa ando odova sostar o Josif brininđa pe.“ O Josif akana hine le sostar te razmislini, hine le but šukar buti. Odija hine ćaće bari promena! Ama, sar šaj jekh manuš kova hine osudimo so manglja te silujini e romnja ando faraoneso dvoranin te ovel jekh baro manuš ki odija diz? Ko Postanak 39:23 pisini: „O Jehova hine e Josifeja hem o Jehova dinđa le uspeh ko sa so ćerđa.“

10. Sose šaj o Josif mislinđa so nane le uspeh ko sa so ćerđa?

¹⁰ Hajde palem te razmislina sar hine e Josifese. Palo odova so hine nepravedno optužimo hem ćhivdo ko phanlipe, da li o Josif mislinđa so hine le uspeh ko sa so ćerđa? So ov najviše manglja? Da li manglja anglo e upravnikose jaćha te mothovi soj tano šukar manuš? Pa, najverovatno jedino so manglja hine te ovel oslobodimo. Ov čak jekhe manušese kova hine ko phanlipe phenđa te vaćeri e faraoneja odolestar te oslobodini le (Post. 40:14). Ama, odova manuš bisterđa odova te phenel e faraonese hem o Josif pana duj berš hine ko phanlipe (Post. 40:23; 41:1, 14). O Jehova hem ponodri pomožinđa e Josifese. Akana ka dikha sar.

11. Sar o Jehova pomožinđa e Josifese hem sar odova pomožinđa te ispunini pe e Jehovasi namera?

¹¹ Đi o Josif hine ko phanlipe, o faraon dikhlja duj sune. Ov manglja te đanel so značinena odola duj sune. Ked šunđa so o  Josif šaj te phenel lese odova, ov odmah phenđa pe manušenđe te anen le koro leste. Uzi Jehovasi pomoć, o Josif šaj hine te phenel lese so značinena odola sune. Isto ađahar, e faraone oduševinđe o savetija kola o Josif dinđa le. Odolese, ov ćhivđa le te ovel upravniko ando oleso dvoro (Post. 41:38, 41-44). Kasnije, ko Egipat hine baro bokhalipe. Ama, hem ki diz Hanan, ko than kaj živinđa e Josifesi porodica. Akana, o Josif šaj hine te pomožini pe porodicaće hem ađahar te arakhi i loza prekali koja valjanđa te avel o Isus Hrist, o Mesija.

12. Sar o Jehova pomožinđa e Josifese?

¹² Razmislin ando disave buća kola ulje ko Josifeso životi. Ko ćhivđa e Petefrije te obratini pažnja upro Josif kova hine robo? Ko ćhivđa e upravniko ando phanlipe te mangel e Josife, jekhe obično zatvoreniko? Ko ćerđa o faraon te dikhel odola sune hem ko pomožinđa e Josifese te vaćeri so značinena odola sune? Ko podstakninđa e faraone te ćhivel e Josifese te ovel upravniko ando kraljeso dvoro? (Post. 45:5). Amen đanaja so o Jehova pomožinđa e Josifese. Iako e Josifese phralja manglje te mudaren le, o Jehova promeninđa odija situacija ko diso šukar hem ađahar ispuninđa pi namera.

13. Da li o Jehova uvek ka ćerel diso ked hijam ki phari situacija? Objasnin.

¹³ So šaj te sikljova ando odova so desinđa pe e Josifese? Ked hijam ko pharipa, da li odova značini so Jehova uvek ka ćerel diso te rešini amare problemija? Da li ov utičini ko sa so desini pe ko amaro životi hem da li sebepi odova šaj te phena so aso sa o lošna buća kola desinena pe amenđe isi šukar razlog? Na, i Biblija na vaćeri odolestar (Prop. 8:9; 9:11). Ama, jekh buti đanaja: Ked god isi amen pharipa, o Jehova šunela amare molitve (Ps. 34:15; 55:22; Is. 59:1). Uzo odova, ov mangela te pomožini amenđe te ikljova ko krajo amare problemencar. Ama, sar ćerela odova?

14. Sar o Jehova pomožini amenđe ked isi amen pharipa?

 ¹⁴ Jekh način sar o Jehova pomožini amen tano ađahar so dela amen uteha hem ohrabrenje hem odova baš tegani ked amenđe valjani (2. Kor. 1:3, 4). Odova desinđa pe e phralese kova vićini pe Eziz. Ov živini ko Turkmenistan hem duj berš hine osudimo ko phanlipe sebepi pi vera. Ov phenela: „Odova sabaj ked valjanđum te ikljovav ko sudo, jekh phral čitinđa maje o stiho ando Isaija 30:15. Odothe pisini: ’Arakhen o mir hem o pouzdanje, odova ka ovel tumari snaga.‘ Akava stih pomožinđa man te ovel man mir hem te osloninav man upro Jehova. Odova so hor razmislinđum ando akava stih, pomožinđa maje celo vreme đi hijum le ko phanlipe.“ Da li šaj te setine tut ked o Jehova tuće pomožinđa ađahar so dinđa tut uteha hem ohrabrenje baš tegani ked valjanđa tuće?

15-16. So sikljovaja andi Tori?

¹⁵ But putija, tek ked nakhela amaro problemi, amen haljovaja sar o Jehova pomožinđa amenđe. Amari phen koja vićini pe Tori uverinđa pe ko odova. Olako ćhavo šov berš hine le rak hem ko krajo mulo. Savi bari dukh hine la ko po vilo! Oj phenela: „Mislinava so nane pobari dukh nego ked jekh daj našalji pe ćhave.“ Oj pana phenela: „Sigurno hijum so but roditeljija ka složinen pe mancar so jekh andi najphari buti ko životi tani te dikhe te ćhave sar patini.“

¹⁶ Iako i Tori hine but tužno đi dikhlja pe ćhave sar patini, oj kasnije razmislinđa odolestar kobor o Jehova pomožinđa laće te istrajini. Oj phenela: „Ked razmislinava ando odova vreme, dikhava kobor  o Jehova pomožinđa maje đi mo ćhavo hine nabormo. Na primer, ked o Mejson hine but nabormo hem našti hine te primini posete, o phralja bi vozinena duj ili trin satija đi i bolnica. Uvek neko bešlja mancar ki čekaonica hem spremno pomožinđe man so god valjanđa maje. Isto ađahar, o phralja hem o phenja brininđe pe aso amare materijalna potrebe. Čak hem ked hine amenđe najpharo, uvek hine amen odova so valjanđa amenđe.“ O Jehova dinđa amare phenjaće odova so valjanđa laće te šaj te istrajini, a odova isto ćerđa hem e Mejsonese. (Dikh o okvir „ O Jehova dinđa amen baš odova so valjanđa amenđe“.)

17-18. So ka pomožini tuće te haljove hem te cenine i pomoć koja o Jehova mothovi tuće ked isi tut pharipa? (Psalam 40:5)

¹⁷ Čitin Psalam 40:5. E manušese kova mangela te ukljel ki planina, jedino cilj tano te resel đi o vrh. Ama đi ukljela, ov terđola te odmorini pe hem te dikhel kobor tani i priroda šuži. Isto ađahar hem amen valjani te terđova hem te razmislina ando odova kobor o Jehova pomožini amen ked isi amen disavo pharipe. Ko krajo ando svako dive, puć tut: „Da li dikhava sar o Jehova avdije blagoslovinđa man? Iako mo problemi pana trajini, da li haljovava sar o Jehova pomožini maje te istrajinav?“ Probin te setine tut barem jekh buti ki koja o Jehova pomožinđa tuće.

¹⁸ Svako amendar molini pe e Jehovase te nakhel oleso problemi hem odova tano normalno (Fil. 4:6). Ama, isto ađahar valjani te razmislina kola blagoslovija o Jehova dela amen avdije. Ov dela po lafi so ka zorjaćeri amen hem so ka pomožini amenđe te istrajina. Odolese, mothov so hijan zahvalno e Jehovase. Ka dikhe so sar pomožinđa e Josifese, ađahar ka pomožini hem tuće te ove uspešno hem te istrajine ko svako toklo pharipe (Post. 41:51, 52).