1. Sose hijam sigurna so živinaja „ko poslednja dive“?

DA LI bijandiljan palo 1914. berš? Ako ja, tu živindžan celo to dživdipe ko „poslednja dive“ ando akava sveto (2. Tim. 3:1). Sare amen šundžam ando buča kola o Isus phendža so ka oven ko amaro vreme. Ov phendža so ka oven o mariba, o bokhaljipa, o zemljotresija, o nabormipa, so o bezakonje ka barjol, hem so e Jehovaso narodo ka ovel progonimo (Mat. 24:3, 7-9, 12; Luka 21:10-12). Isto adžahar, amen dikhaja so o manuša tane asavke sar so o apostol Pavle proreknindža. (Dikh o okvir „ Save tane o manuša avdije?“) Sar e Jehovase sluge, uverime hijam so živinaja „ko poslednja dive“ (Mih. 4:1).

2. Ko kola pučiba valjani te dobina o odgovor?

² Kotar 1914. berš nakhlja but vreme. Akana hijam ko poslednja dive ando akava sveto. Odoljese so o krajo tano odobor paše, valjani te džana o odgovorija ko disave važna pučiba: Kola događaja ka oven ko krajo ando „poslednja dive“? So o Jehova mangela amen te čera dži adžičeraja sa odola događaja te oven?

3. Premalo 1. Solunjanima 5:1-3, so ka objavinen o vladarija ko sveto?

³ Čitinen 1. Solunjanima 5:1-3. O Pavle akate vačeri ando „e Jehovaso dive“. Ko akava stiho, „e Jehovaso dive“ odnosini pe ko period kova ka počmini ked ka ovel napadimo o „Baro Vavilon“, ja i hovavni religija, hem završini pe e Armagedoneja (Otkr. 16:14, 16; 17:5). Hari  angljeder te počmini odova „dive“, o vladarija ko sveto ka objavinen „Mir hem sigurnost!“ Disavo puti, odola lafija o vladarija ko sveto koristinena ked mangena te phenen so o odnosija maškaro disave narodija tane pošukar. * Ama, i objava „mir hem sigurnost“ andi koja i Biblija vačeri ka ovel averčhane. Sose? Odoljese so, ked odova ka ovel o manuša ka mislinen so o vladarija čače uspindže te čeren akava sveto te ovel pošukar hem posigurno than e dživdipase. Ama, tegani i „bari nevolja“ ka počmini hem “iznenada ka resel ljen o uništenje” (Mat. 24:21).

4. (a) So valjani pana te džana andi objava „mir hem sigurnost“? (b) So već akana džanaja?

⁴ Amen džanaja disave buča andi objava „mir hem sigurnost“. Ama, isi buča kola na džanaja. Na primer, na džanaja sose o vladarija odova ka objavinen niti sar ka izgledini odija objava. Na džanaja ni da li ka ovel samo jekh objava ja ka oven nekobor asavke objave. So god te ovel, jekh buti džanaja: O vladarija našti te čeren te ovel mir ko sveto, hem odoljese na valjani te mukha te prevarini amen odija objava. Amendže odova samo ka ovel i objava koja i Biblija phendža te adžičera. Oj ka ovel amendže znak so „e Jehovaso dive“ samo sa na počmindža!

5. Premalo 1. Solunjanima 5:4-6, sar šaj te ova spremna aso „e Jehovaso dive“?

⁵ Čitinen 1. Solunjanima 5:4-6. O Pavle phenela amendže so valjani te čera te ova spremna aso „e Jehovaso dive“. Amen na valjani te „sova sar so avera sovena, nego te ova džangavde“. Na primer, valjani te pazina te šaj te ačhova neutralna hem te na ova uključime ko politička buča ko akava sveto. Amen na mangaja te ova „deo ando akava sveto“ (Jov. 15:19). Amen džanaja so samo e Devljeso Kraljevstvo šaj te anel mir ko celo sveto.

6. So amen mangaja te pomožina averendže hem sose?

⁶ Amen mangaja te ačhova džangavde, ama mangaja hem averendže te pomožina te sikljon so phenela i Biblija so ka ovel ko sveto pana hari. Na mangaja te bistra so ked ka počmini i bari nevolja, ka ovel kasno o manuša te počminen te služinen e Devljese. Odoljese tano odobor važno akana te propovedina! *

7. So o Jehova očekujini amendar?

⁷ Ačhilo pana hari vreme angljeder so ka počmini „e Jehovaso dive“, hem  odoljese o Jehova očekujini te da sa amendar te propovedina. Mangaja te ova sigurna so daja sa amendar te čera buti e Jehovase (1. Kor. 15:58). Ked o Isus vačerdža ando važna buča kola ka oven ko poslednja dive ov proreknindža hem so amen ka čera: „Angljeder o sa, ko sa o narodija valjani te propovedini pe o šukar haberi“ (Mar. 13:4, 8, 10; Mat. 24:14). Razmislin hari: Svako puti ked džaja ki služba, amen pomožinaja te ispunini pe akava proročanstvo andi Biblija.

8. Sose šaj te phena so amaro delo napredujini?

⁸ So šaj te phena, sar napredujini amaro delo? Svako berš, sa pobuter manuša šunena o šukar haberi. Na primer, razmislin kobor pobuter objaviteljija isi ko poslednja dive. Ko 1914. berš hine 5 155 objaviteljija ko 43 phuvja. Avdije isi koro 8,5 milionja objaviteljija ko 240 phuvja. Ama, amari buti pana nane završimi. Amen hem ponodri valjani te propovedina so e Devljeso Kraljevstvo jedino šaj te rešini e manušenge problemija (Ps. 145:11-13).

9. Sose valjani te propovedina o šukar haberi?

⁹ Amaro zadatko te propovedina ka ovel završimo ked o Jehova odova ka phenel. Kobor vreme ačhilo e manušendže šukar te pendžaren e Jehova hem e Isuse Hriste? (Jov. 17:3). Amen odova na džanaja. Ama, džanaja so dži na počmini i bari nevolja, svako ko „ispravno [dikhela] ko večno dživdipe“ pana šaj te prihvatini o šukar haberi hem te odlučini te služini e Jehovase (Dela 13:48). Sar šaj te pomožina e manušendže dži pana nane kasno?

10. Sar o Jehova pomožini amen te sikava e manušen?

¹⁰ Prekali piklji organizacija, o Jehova dela amen sa so valjani te šaj te sikava e manušen o čačipe. Na primer, svako kurko prekalo amaro sastanko ko radno dive amen sikljovaja sar te čera odova. Odova sastanko pomožini amen te džana sar te vačera e manušencar prvo puti ja ked posetinaja ljen paljem. Isto adžahar, sikljovaja hem sar te vodina e biblijake kursija. E Jehovasi organizacija čerdža te ovel amen glavna publikacije  e službače. On pomožinena amen te...

• počmina o razgovor e manušencar;

• vačera e manušencar ando šukar haberi ko zanimljivo način;

• pomožina e manušendže te mangen te sikljon pobuter andi Biblija;

• sikava ljen o čačipe ko biblijake kursija hem

• sikava e zainteresovano manušen sar te džan ko amaro veb-sajt ja te vičina ljen te aven ko amare sastankija.

Džandžola pe, nane dovoljno samo te ovel amen akala publikacije, nego valjani hem te koristina ljen. * Na primer, šaj hine tut but šukar razgovor jekhe manušeja. Ama, ako ačhavdžan ljese jekh traktati ja jekh časopis o manuš šaj te čitini lje dži na aveja paljem koro ljeste. Amen isi amen odgovornost svako masek te propovedina kobor god šaj.

11. Sose tane čerde o Onlajn e biblijake lekcije?

¹¹ Pana jekh način sar o Jehova pomožini e manušen te sikljon o čačipe tano prekalo Onlajn e biblijake lekcije ko amaro sajt jw.org. Sose tane čerde akala lekcije? Svako masek, but manuša ko celo sveto rodena e biblijake lekcije ko internet. O lekcije kola arakhena pe ko amaro sajt šaj te pomožinen odolje manušendže te počminen te sikljon o čačipe ando e Devljeso Lafi. Šaj disave manuša koljencar vačereja nane sigurna da li te prihvatinen e biblijako kurs. Tegani, šaj te mothove ljendže akava deo ko amaro veb-sajt ja te bičhalje ljendže o link kova ljegari dži akala lekcije. Ako šaj mothov ljendže o lekcije ki čhib koja haljona. *

12. So šaj te sikljol pe ando amare Onlajn e biblijake lekcije?

¹² Amare Onlajn e biblijake lekcije vačerena ando akala teme: „I Biblija hem olako Autor“, „Glavna e biblijake ličnostija“, hem „O haberi andi Biblija dela amen nada“. Uzo odola teme, šaj te sikljon hem:

• Sar šaj i Biblija te pomožini amen?

• Koj tano o Jehova, o Isus hem o anđelija?

• Sose o Devel čerdža e manušen?

• Sose avdije isi patnja hem o lošnipe?

Isto adžahar, odola lekcije vačerena hem sar o Jehova ka...

• cidel i patnja hem o meribe;

• irini e muljen ko dživdipe hem

• cidel sa o manušikane vladavine, a ka čerel jedino e Devljeso Kraljevstvo te ačhol.

13. Da li tane o Onlajn e biblijake lekcije zamena aso e biblijako kurs? Objasnin.

¹³ O Onlajn e biblijake lekcije nane zamena aso e biblijako kurs. O Isus amendže mothovdža bari čast ked dindža amen o zadatko te čera e učenikonen. Dži o zainteresovano manuš proučini odola lekcije, on ka pomožinen ljese te mangel odova so sikljola hem oljesi želja te džanel pobuter ka ovel pobari. Palo odova, šaj ka prihvatini e biblijako kurs. Ko krajo andi svako lekcija, o manuš tano podstaknimo te pherel o formulari koljeja rodela neko te avel hem te proučini i Biblija oljeja. Prekalo amaro veb-sajt, svako dive ando celo sveto resena prekalo 230 zahtevija aso e biblijako kurs. Najšukar način  o manuša te sikljon tano ked nekasa proučinena.

14. Premalo Matej 28:19, 20, ko so valjani te da sa amendar hem sose?

¹⁴ Čitinen Matej 28:19, 20. Dži vodinaja e biblijake kursija, valjani te da sa amendar te čera učenikonen hem te sikava ljen te ičeren pe ko sa so o Isus zapovedindža amendže. Valjani te pomožina e manušendže te haljon kobor tano važno te odlučinen te služinen e Jehovase hem te podržinen oljeso Kraljevstvo. Odova značini so amen valjani te podstaknina e manušen te primeninen odova so sikljona, te den po dživdipe e Jehovase hem te krstinen pe. Samo adžahar ka preživinen e Jehovaso dive (1. Petr. 3:21).

15. Aso so nane amen vreme hem sose?

¹⁵ Sar so phendžam angljeder, na ačhilo pana but vreme angljeder te avel o krajo. Odoljese, nane amen vreme te proučina i Biblija e manušencar kola na menjinena pe te šaj te oven e Devljese sluge (1. Kor. 9:26). Amari buti tani but hitno hem važno! Pana isi manuša kola valjani te šunen o šukar haberi angljeder te ovel kasno.

16. Premalo Otkrivenje 18:2, 4, 5, 8, so sare amen valjani te čera? (Dikh i fusnota.)

¹⁶ Čitinen Otkrivenje 18:2, 4, 5, 8. Akala stihija mothovena pana diso so o Jehova očekujini kotar peklje sluge. Sa o prava hrišćanja valjani te oven sigurna so nisar nane povezime e hovavne religijaja. Angljeder so jekh manuš počmindža te proučini i Biblija, šaj hine deo andi hovavni religija. Šaj dželo ko oljenge religiozna službe ja učestvujindža ko oljenge aktivnostija. Disave podupirindže i hovavni religija adžahar so dindže materijalna prilogija. Odoljese, angljeder so jekh manuš kova proučini i Biblija ovela nekršteno objavitelj, ov valjani te ovel sigurno so više nane deo andi hovavni religija. O student valjani te pisini jekh ljil ki crkva ja ki organizacija ki koja hine hem te phenel so ov više na mangela te ovel oljengo član. *

17. Savi buti jekh hrišćanin na ka prihvatini hem sose?

¹⁷ O prava hrišćanja valjani te oven sigurna so i buti koja čerena nane nisar povezimi e hovavne religijaja (2. Kor. 6:14-17). Na primer, amen na ka prihvatina  te čera buti ki crkva. Ama, jekh hrišćanin kova čerela buti negde averthe, na ka prihvatini te čerel disavi bari buti ko objekat kova pripadini e hovavne religijače. Ako jekh hrišćanin isi lje piklji firma, ov sigurno na ka prihvatini te čerel ugovor e crkvaja ja disave religiozna organizacijaja. Sose isi amen asavko stav? Odoljese so na mangaja te podupirina o hovavne sikljoviba niti oljenge lošna delija kola tane melalje ko e Devljese jačha (Is. 52:11). *

18. Sar jekh phral ičerdža pe ko e biblijake načelija?

¹⁸ Angljeder nekobor berš, jekhe starešinese hine ponudimo te čerel sar stolar ki jekh crkva ki diz kuri ov živindža. O menadžer džandža so o phral phendža so niked na ka prihvatini te čerel buti ki crkva. Ama, oljese hitno valjandža neko te čerel odija buti. Amaro phral ičerdža pe ko e biblijake načelija hem na prihvatindža odija buti. Aver kurko ko novine ikljilji i slika ando jekh aver stolar sar čhivela o krst ki crkva. Ked ov na bi ičeri pe ko e biblijake načelija, tegani oljesi slika bi ikljola ko novine. Razmislin sar bi sa odova utičini ko oljeso šukar nav maškaro amare phralja. Šaj samo te zamislina sar bi ovela e Jehovase.

19-20. (a) So sikljiljam dži akana? (b) So pana valjani te sikljova?

¹⁹ Premalo proročanstvo andi Biblija, pana hari o vladarija ko sveto ka objavinen „mir hem sigurnost“. Odoljese so o Jehova sikavi amen, amen džanaja so o vladarija na ka ostvarinen mir ko sveto. So valjani te čera angljeder so ka ovel i objava hem o iznenenadno uništenje? O Jehova očekujini te da sa amendar te propovedina hem te čera učenikonen. Isto adžahar, nisar na valjani te ova povezime e hovavne religijaja. Odova značini hem so na valjani te ova članija ando Baro Vavilon niti te prihvatina te čera buti koja tani povezimi e hovavne religijaja.

²⁰ Pana disave događaja valjani te oven ko krajo ando „poslednja dive“. O Jehova očekujini amen te čera pana disave buča. Kola tane odola buča hem sar šaj te pripremina amen aso sa so ka ovel ki budućnost? Odova ka dikha ko aver članko.