1. So značini te ovel tut dar kotar o Devel hem sose okola so mangena e Jehova valjani te ovel len akija dar?

O HRIŠĆANIJA mangena e Devle, ama isto adžahar, on hem darana olestar. Disavendže odova šaj te ovel diso čudno. Ama, akava na odnosini pe ki dar andi koja tresineja. Amen ka vačera andi jekh posebno vrsta kotar i dar. O manuša kola isi len akija vrsta kotar i dar premalo Devel, isi len strahopoštovanje premalo oleste hem iskreno poštujinena le. On na mangena te čeren diso sova ka razočarinen pe nebesko Dade, sose na mangena te ugrozinen po amalipe oleja (Ps. 111:10; Posl. 8:13).

2. Premalo e Davidese lafija kola tane pisime ko Psalam 86:11, ando kola buča ka vačera ko akava članko?

² Čitin Psalam 86:11. Dži razmislineja kotar akala lafija, šaj jasno te dikhe so o kralj David džandža kobor tano važno te ovel tut i dar kotar o Devel. Akana ka dikha sar šaj te primenina odova so o David phendža ki pi molitva. Najangleder, ka dikha ando kola razlogija valjani te ovel amen strahopoštovanje premalo e Devleso anav. Palo odova, ka dikha sar šaj amare dživdipaja te mothova so isi amen strahopoštovanje premalo e Devleso anav.

3. Kova iskustvo pomožindža e Mojsijese hem ponodri te ovel le strahopoštovanje premalo e Devleso anav?

³ Zamislin sar osetindža pe o Mojsije ked hine ki pukotina andi jekh stena hem ked ki vizija dikhlja sar o Jehova nakhela ki pi slava. Ko Insight on the Scriptures, pisini: „Akava  iskustvo, kova retko kova manuš angleder o Isus hine le, čače čhivela tut te ovel tut strahopoštovanje.“ O Mojsije šundža o lafija kola verovatno vačerdža jekh anđeo: „Jehova, Jehova, o Devel soj tano milosrdno hem samilosno, strpljivo, pherdo verno mangipaja hem čačipaja, kova mothovi o verno mangipe e hiljadendže, oprostini o prestupija, i krivica hem o grehija“ (Izl. 33:17-23; 34:5-7). Ked god o Mojsije koristindža e Jehovaso anav, ov verovatno setindža pe ko akava događaj. Odolese, nane čudno so o Mojsije kasnije upozorindža e Devlese narodo, o Izrael, te daran kotar odova slavno anav kova čhivela len te ovel len strahopoštovanje (Pon. zak. 28:58).

4. So šaj te podstaknini amen te ovel amen pana pobaro strahopoštovanje premalo Jehova?

⁴ Ked razmislinaja ando e Devleso anav, valjani hem te razmislina koj tano odova ko akhari odova anav. Amen valjani te razmislina kotar olese osobine sar soj tane moć, mudrost, pravda hem mangipe. Ked razmislinaja kotar odola hem avera olese osobine, odova ka podstaknini amen te ovel amen pana pobaro strahopoštovanje premalo leste (Ps. 77:11-15).

5-6. (a) So značini e Devleso anav? (b) Premalo Izlazak 3:13, 14 hem Isaija 64:8, so čerela o Jehova te bi ispunini pi namera?

⁵ So značini e Devleso anav? But izučavaocija slažinena pe so o anav Jehova verovatno značini „Ov čerela te ovel.“ Odova podsetini amen so ništa našti te sprečini e Jehova te ispunini pi namera hem so ov šaj te čerel sa o buča te oven. Sar odova?

⁶ O Jehova čerela sa o buča te oven, adžahar so ov ovela so god valjani te šaj te ispunini pi namera. (Čitin Izlazak 3:13, 14.) Ko amare publikacije but putija hijam podstaknime te razmislina ando akava deo kotar e Jehovasi ličnost. Isto adžahar, o Jehova osposobini pe nesavršena slugen te čeren sa so valjani te šaj te služinen lese hem te šaj te ispuninen olesi namera. (Čitin Isaija 64:8.) Ko akala načinija, o Jehova pobrinini pe te  ovel čerdi olesi volja. Ništa našti te sprečini le te ispunini pi namera (Is. 46:10, 11).

7. Sar šaj pana pobuter te cenina amare nebesko Dade?

⁷ Amen šaj pana pobuter te cenina amare nebesko Dade ako hor razmislinaja odolestar so čerdža hem aso so osposobindža amen. Na primer, ked razmislinaja kotar sa o buča kola stvorindža, amaro strahopoštovanje premalo Jehova barjola (Ps. 8:3, 4). Ked hor razmislinaja odolestar sar o Jehova osposobindža amen te šaj te čera odova so ov mangela, amaro poštovanje premalo leste ovela pana pobaro. E Devleso anav, Jehova, podstaknini amen te ovel amen strahopoštovanje premalo leste. Oleso anav predstavini sa soj tano amaro Dad, sa so ov čerdža hem sa so ka čerel (Ps. 89:7, 8).

8. Premalo Ponovljeni zakoni 32:2, 3, so o Jehova mangela olese sluge te čeren olese anaveja?

⁸ Angleder o Izraelcija te khuven ki Obećimi phuv, o Jehova phendža e Mojsijese te zapisini o lafija kotar jekh džili (Pon. zak. 31:19). Palo odova, o Mojsije sikavdža e manušen akija džili. (Čitin Ponovljeni zakoni 32:2, 3.) Ako hor razmislinaja ando dujto hem trito stiho, jasno tano so o Jehova na mangela oleso anav te ovel garavdo, niti o manuša te mislinen so oleso anav tano odobor sveto so na valjani te izgovorinen le. Ov mangela sare te džanen oleso anav. E manušendže hine bari čast te šunen e Mojsije dži sikavdža len ando Jehova hem ando oleso veličanstveno anav. Sar so o boršim pomožini e biljkendže te barjon, adžahar hem odova sostar o Mojsije sikavdža len zorjačerdža olengi vera hem ohrabrindža len. Sar šaj amen te ova sigurna so o način ko kova sikavaja e manušen upro lende utičini ko asavko način?

9. Sar šaj te pomožina te posvetini pe e Jehovaso anav?

⁹ Ked hijam ki služba, kotar i Biblija šaj te mothova e manušendže e Devleso lično anav, Jehova. Šaj te da olendže amare publikacije, te mothova lendže but šuže hem poučna kratka filmija ja diso kotar amaro sajt sovaja slavinaja e Jehovaso anav. Ki buti, ki škola ja dži putujinaja, šaj ka ovel amen prilike te vačera kotar amaro Devel hem odolestar savo tano ov. Tegani, šaj te vačera olencar kotar odova savi namera o Devel isi le amencar hem e phuvjaja. Ked ka šunen pobuter odolestar, šaj prvo puti ka haljon kobor o Jehova mangela amen. Ked averendže vačeraja o čačipe kotar amaro brižno Dad, amen učestvujinaja ko odova te posvetini pe e Jehovaso anav. Amen pomožinaja e manušendže te haljon so avera sikavdže len but hovajba olestar. Odova so amen sikavaja e manušen kotar i Biblija šaj but te ohrabrini len (Is. 65:13, 14).

10. Ked nekasa proučinaja i Biblija, sose na valjani te sikava le samo ando e Devlese zakonija?

¹⁰ Ked nekasa proučinaja i Biblija, amen mangaja te pomožina lese te sikljol kova tano e Devleso anav hem te koristini le. Uzo odova, amen mangaja te pomožina lese te upoznajini e Jehova. Da li ka uspina ko odova ako samo sikavaja le ando olese zakonija, uputstvija ja pravilija? Jekh šukar student šaj te sikljol ando e Devlese zakonija hem čak šaj te cenini len. Ama, da li odova značini so ka šunel e Jehova sebepi so mangela le? Setin tut, so i Eva džandža e Devleso zakon, ama ni oj, a ni o Adam na manglje Okole kova dindža odova zakon (Post. 3:1-6). Odolese, na valjani te sikava e manušen samo kotar e Devlese zakonija.

11. Sar šaj te pomožina amare studentendže na samo te mangen e Devlese zakonija, već hem Okole kova dela len?

¹¹ E Jehovase zakonija uvek tane amare šukaripase (Ps. 119:97, 111, 112). Ama, amare  studentija šaj na ka mislinen adžahar ako na haljona so o Jehova dindža odola zakonija sebepi so mangela amen. Odolese, šukar tano te puča len: „So mislineja, sose o Devel rodela ando pe sluge te čeren diso ja sose na mangela diso te čeren? So akava vačeri tuče olestar, savo tano ov sar Osoba?“ Ako pomožinaja amare studentendže te razmislinen kotar o Jehova hem te razvijinen o mangipe premalo oleso veličanstveno anav, verovatno ka resa dži olengo vilo. Tegani, amare studentija na ka mangen samo o zakonija, već hem Okole kova dela len (Ps. 119:68). Odova ka pomožini lendže te ovel len pozorali vera hem te istrajinen ko razna pharipa kola ka ovel len (1. Kor. 3:12-15).

12. Sar e Davideso vilo jekhvar hine podelimo hem so ulo sebepi odova?

¹² O lafija kola o kralj David pisindža ko Psalam 86:11, „de man vilo kova nane podelimo“, tane isto adžahar but važna. Kotar poklo iskustvo, o David sikljilo kobor tano lokho te dozvolina te ovel amen podelimo vilo. Jekhvar, dži hine ko krovo, ov dikhlja sar avere manušesi romni nandžola. So mislineja, ko odova trenutko, da li e Davideso vilo hine podelimo ja na? Ov but šukar džandža e Jehovaso zakon, kova phenela: „Ma mang te pašutnese romnja“ (Izl. 20:17). Ama, o David ipak nastavindža te dikhel la. Oleso vilo hine podelimo. Ki jekh strana manglja te ovel odole romnjaja, e Vitsavejaja, a ki aver strana manglja te čerel odova soj tano ugodno e Jehovase. Iako o David beršencar manglja hem poštujindža e Jehova, ki akija situacija ov manglja te zadovoljini pi sebično želja. Ko krajo, o David čerdža disave lošna buča. Odoleja so čerdža, but ladžačerdža e Jehovaso anav. Isto adžahar, sebepi oleso, o manuša hem olesi porodica doživindže but pharipa iako na hine kriva nisose (2. Sam. 11:1-5, 14-17; 12:7-12).

13. Sar džanaja so o David palem hine le vilo kova nane podelimo?

¹³ O Jehova disciplinujindža e Davide hem ov palem hine le šukar odnos e Jehovaja (2. Sam. 12:13; Ps. 51:2-4, 17). O David niked na bisterdža kobor hine lese pharo hem kobor dukhavdža le ked dozvolindža oleso vilo te ovel podelimo. Da li o Jehova pomožindža e Davidese te ovel le vilo kova nane podelimo? Ja, sose e Devleso Lafi vačeri so o David hine „celo vileja odano e Jehovase“ (1. Kralj. 11:4; 15:3).

14. So valjani te puča amen hem sose?

¹⁴ E Davideso primer tano amendže hem upozorenje hem ohrabrenje. Odova so o David  doživindža te perel hem te čerel ozbiljno greh tano upozorenje sarinendže kola avdije služinena e Devlese. Bizo obzir, da li skoro počmindžam te služina e Jehovase ja već beršencar služinaja olese, valjani te puča amen: „Da li borinava man te na ovel man podelimo vilo iako o Beng pokušini odova ko but načinija?

15. Sar šaj i dar kotar Devel te zaštitini amen ked ikljona amendže o neprikladna slike?

¹⁵ Na primer, sar reagujineja ked ki televizija ja ko internet ikljola disavi neprikladno slika koja šaj te čhivel tut te ovel tut neprikladna želje? Lokho tano te misline so odija slika ja film nane baš pornografija. Ama, da li odova šaj te ovel o način ko kova o Beng mangela te podelini to vilo? (2. Kor. 2:11). Odija slika šaj te ovel sar jekh metalno klin kova o manuš koristini te pharavi jekh trupco. Sar ov khuvela o klin, olesi oštro hem sani ivica khuvela ko trupco. Sar o klin khuvela sa pobuter hem pobuter, o trupco odvojini pe. So mislineja, da li o neprikladna slike kola dikhljan šaj te oven sar odija sani hem oštro ivica ando klin? Ako dikheja o buča kola šaj na izgledinena soj tane štetna, sigate šaj te grešine e Jehovase. Odolese, ma dozvolin ništa soj tano neprikladno te khuvel ko to vilo! De sa tutar te ovel tut vilo kova nane podelimo hem kova darala ando e Jehovaso anav.

16. So valjani te puča amen ked doživinaja disavo iskušenje?

¹⁶ Uzo odova so koristini o neprikladna slike, o Beng koristini hem avera buča te iskušini amen. Sar tegani reagujinaja? Lokho tano te mislina so odola buča nane lošna. Na primer, šaj te mislina: „Akava nane odobor ozbiljno odolese so na ka ovav isključimo ako ka čerav akava.“ Asavko razmišljanje tano but pogrešno. Pošukar tano te puča amen: „Da li o Satana koristini akava iskušenje te podelini mo vilo? Ako akana popustinava,  da li ka ladžačerav e Jehovaso anav? Da li odova so ka čerav ka pašačeri man e Devlese ja ka cidel man olestar?“ Hor razmislin ando akala pučiba. Molin tut te ovel tut mudrost te šaj te odgovorine iskreno hem te na hovave kokri tut (Jak. 1:5). Odova šaj te zaštitini tut. Isto adžahar, odova ka pomožini tuče te cide tut kotar o iskušenje, sar so o Isus čerdža ked phendža: „Naš, Satana!“ (Mat. 4:10).

17. Sose nane šukar amaro vilo te ovel podelimo? Vačer jekh primer.

¹⁷ Nane šukar ako amaro vilo tano podelimo. Zamislin so o članija ando jekh fudbalsko tim na slažinena pe šukar. Disave mangena te proslavinen pe, disave na mangena te čhelen premalo pravilija, a disave na poštujinena e trenere. Jekh asavko tim verovatno na ka pobedini. Ki aver strana, o tim kova isi le isto cilj, verovatno ka pobedini. Amaro vilo šaj te ovel sar o tim kova pobedini samo ako amare mislija, želje hem osećanja tane usmerime ko odova te služina e Jehovase. Ma te bistre, so o Beng mangela toklo vilo te ovel podelimo. Ov mangela ano tute uvek te ovel borba maškaro odova so o Jehova mangela hem maškaro te sebična želje. Ki aver strana, tuče valjani vilo kova nane podelimo te šaj te služine e Jehovase (Mat. 22:36-38). Odolese, niked ma dozvolin e Bengese te čerel to vilo te ovel podelimo!

18. Premalo Mihej 4:5, so hijan odlučno te čere?

¹⁸ Molin tut e Jehovase sar o David: „De man vilo kova nane podelimo, te šaj te darav ando to anav.“ Čer sa so šaj te šaj te živine premali akija molitva. Svako dive, te odluke, bilo on te oven tikne ja bare, nek mothoven so isi tut strahopoštovanje premalo e Jehovaso sveto anav. Ked ka čere adžahar, sar jekh ando e Jehovase svedokija, tu ka ane slava e Devlese anavese (Posl. 27:11). Hem sare amen, ka phena isto so phendža o prorok Mihej: „Amen ka služina e Jehovase, amare Devlese, ki celo večnost“ (Mih. 4:5).