KI BIBLIJA čitinaja ando manuša kola hine ljen „osećanja“ sar amare (Jak. 5:17, fusn.). Na primer, amen šaj te haljova e Pavlese lafija kola tane ko Rimljanima 7:21-24: „Ked mangava te čerav o šukaripe, koro mande tano o lošnipe [...] Jadno manuš me hijum!“ Akala lafija čače šaj te utešinen amen ked borinaja amen amare manencar.

Ama, o Pavle mothovdža hem avera osećanja. Ko Galatima 2:20, ov mothovdža soj tano uverimo so o Isus „manglja [olje] hem dindža po dživdipe [oljese]“. Da li hem tu adžahar osetineja tut? Na baš uvek.

Ako pana osetinaja amen so ništa na vredinaja sebepi odova so angljeder čerdžam, šaj tano pharo te verujina so o Jehova mangela amen hem so oprostini amendže. Isto adžahar, šaj te ovel pana popharo te dikha ki Isusesi žrtva sar poklon kova tano dindo amendže. Da li o Isus čače mangela adžahar te dikha ki otkupno žrtva? Ako mangela, tegani so šaj te pomožini amen adžahar te razmislina? Te dikha akala duj pučiba.

O Isus čače mangela te dikha ki oljesi žrtva sar poklon kova dindža lično amendže. Sar šaj te ova sigurna ko odova? Zamislin o događaj kova pisini ko Luka 23:39-43. Uzalo Isus ko stubo visindža o manuš, kova priznajindža so čerdža diso lošno. Odova so čerdža sigurno hine diso ozbiljno, sose asavki okrutno kazna hine samo okoljendže kola čerdže baro lošnipe. Adžahar sikirimo hem ko bare dukha, molindža e Isuse: „Setin tut koro mande ked ka ave ko toklo kraljevstvo.“

So čerdža o Isus? Zamislin savi bari dukh o Isus isi lje dži irini po šero premalo odova manuš te šaj te dikhel lje. Iako sa dukhandilo lje ov asandoj utešini akalje manuše hem obećini ljese: „Čače, phenava tuče avdije, tu ka ove mancar ko raj.“ O Isus šaj hine samo te setinčeri odolje manuše so o manušikano Čhavo „alo te služini hem te del po dživdipe sar otkupnina bute dženendže“ (Mat. 20:28). Ama, o Isus vačeri oljeja direktno hem phenela ljese so baš ov ka ovel lje korist andi oljesi žrtva. Dži vačeri oljeja sar pe amaljeja, ov phenela ljese so ka ovel lje mogućnost te živini ko raj ki phuv.

O Isus manglja akava manuš te prihvatini i otkupno žrtva sar jekh poklon kova tano lično oljese. Ako o Isus adžahar dikhlja ko odova lošno manuš kova na hine lje prilika te služini e Devljese, sar tegani dikhela ko okola so krstindže pe hem služinena e Devljese? So šaj te pomožini amen čače te verujina so o Isus mulo amendže lično, iako šaj angljeder čerdžam disavo greh?

Odoljese so o Isus dindža e Pavlese zadatko te propovedini, ov šaj hine te haljol so o Isus mulo oljese. So značini odova? Ov objasnindža: „Zahvalno hijum e Hristese, e Isusese, amare Gospodese, kova dindža man snaga, odoljese so dikhlja  man so hijum verno hem dindža man i sveto služba, iako angljeder but lošno vačerdžum protiv o Devel, progonindžum oljese narodo hem hijum lje but ponosno“ (1. Tim. 1:12-14). O zadatko kova hine dindo e Pavlese uverindža lje so o Isus mothovdža ljese milosrđe, mangipe hem poverenje. Isto adžahar, o Isus hem amendže dindža zadatak te vačera o šukar haberi (Mat. 28:19, 20). Šaj li i služba te pomožini amen te haljova so o Isus mulo amendže?

O Albert hine 34 berš isključimo hem akana sigate irindža pe e Jehovase. Ov phenela: „Na bisterdžum mo greh. Ama, ked hijum ki služba, sar o apostol Pavle hem me osetinava so o Isus lično maje dindža o zadatak. Odova zorjačeri man hem pomožini man pozitivno te razmislinav mandar, ando mo dživdipe hem odoljestar so ka avel“ (Ps. 51:3).

O Alan, angljeder te pendžari o čačipe, čerdža bare lošnipa hem hine but nasilno. Ov phenela: „Pana razmislinava kotar dukh so čerdžum e manušendže. Sebepi odova, disavo puti hijum depresivno. Ama, zahvalno hijum e Jehovase so mukhlja jekhe grešnikose, sar so hijum me, te vačeri o šukar haberi averendže. Ked dikhava sar o manuša reagujinena ko šukar haberi, odova setinčeri man kozom o Jehova tano šukar hem brižno. Čače osetinava so o Jehova koristini man te pomožinav averendže kola čerdže odova so me čerdžum.“

I služba dela amen snaga te čera o šukar buča hem pozitivno te mislina. Uverini amen ko e Isuseso milosrđe, mangipe hem ko odova so isi lje poverenje koro amende.

Sa dži trajini e Bengeso sveto, amaro vilo šaj pana te osudini amen sebepi o greške kola čerdžam angljeder. So ka pomožini amen te borina amen ked adžahar osetinaja amen?

„Sviđini pe maje o stih kova phenela so o Devel tano ’pobaro ando amaro vilo‘“, phenela i Džin. Ola i krivica halja odoljese so ko ternipe averčhane ponašindža pe čhere pe roditeljencar hem ki dvorana, ama averčhane ked na hine odothe (1. Jov. 3:19, 20). Šaj hem amen te utešini ked džanaja so o Jehova hem o Isus pošukar amendar haljona kozom hijam nesavršena. Ma te bistra so on baro mangipe mothovdže so dindže i otkupno žrtva, na e savršeno manušendže, nego okoljendže soj tane grešna hem kajinena pe (1. Tim. 1:15).

Amen uverinaja amen so i otkupno žrtva tani dindi amendže ked ki molitva hor razmislinaja sar o Isus ponašindža pe premalo nesavršena manuša hem ked daja sa amendar te čera o zadatko kova dindža amen. Adžahar hem amen sar o Pavle šaj te phena so: O Isus „manglja man hem dindža po dživdipe maje“ (Gal. 2:20).